1 Jawˇmawˇ li‸ 8
8
Ka ti‸ shaˉ caˆ ta kʼoˍ bon yehˬ lo yuˬ laˬ ve
1Oˇ ve hkʼaw‸ nawˉ, jawˇmawˇ Sawˉla‸monˍ lehˬ Ziˉonˍ teh‸ kʼoˆ ve Daˍviˆ ve venˇ hkʼaw teh taˍ ve Gʼuiˬsha ve ka ti‸ shaˉ caˆ ta kʼoˍ hta‸ bon yehˬ lo yuˬ laˬ tuˬ, Iˉsaˍreˍlaˆ chaw awˬ hoˉ awˬ naˬ hkʼa peu-eˬ ve hta‸ Yeˍruˆsaˍlehnˍ venˇ lo kuˬ yuˬ ve yoˬ. 2Hkʼe te leh, yawˇ hui hkʼa peu-eˬ Eˍtaˍnenˍ#8:2 Chi ve lehˬ Awˆtoˇbaˬ ha pa htaˇ yoˬ. ha pa hkʼaw te ve Aˉ po kʼo pawehˇ te ve awˬ yanˇ gaˬ htaˇ, oˇ kaˬ lo hpawnˬ gaˬ la ve yoˬ. 3Awˬ hoˉ awˬ naˬ oˇ ve teˇ hpaˍ gaˬ la peuˬ htaˇ, paw hkuˇ teˇ hpaˍ ka ti‸ shaˉ caˆ ta kʼoˍ hta‸ taˆ leh bon yehˬ lo kʼai ve yoˬ. 4Leˍviˆ chaw leh paw hkuˇ teˇ hpaˍ lehˬ, Gʼuiˬsha ve aˉ po kʼo bon yehˬ hta‸ htawˇ hpaˆ baˬ leh bon yehˬ lo yuˬ kʼai ve yoˬ. 5Jawˇmawˇ Sawˉla‸monˍ leh Iˉsaˍreˍlaˆ chaw teˇ hpaˍ lehˬ, ka ti‸ shaˉ caˆ ta kʼoˍ gʼuˇ suhˍ lo, gʼaw maˇ peuˬ htaˇ hkʼa gaˬ maˇ jaˇ ve yawˬ leh nuˇ teˇ hpaˍ tuˉ tanˇ piˇ ve yoˬ. 6Oˇ hkʼe te peuˬ hkʼaw‸ nawˉ, paw hkuˇ teˇ hpaˍ lehˬ ka ti‸ shaˉ caˆ ta kʼoˍ hta‸ da‸ kehˬ jaˇ ve bawehˇ hkʼaw yuˬ kʼai leh, Hkeˍruˆbenˍ teˇ hpaˍ awˬ hawˉ lo teh taˍ ve yoˬ. 7Hkeˍruˆbenˍ teˇ hpaˍ ve toˍ la‸ kʼuˉ lehˬ, ta kʼoˍ leh ta kʼoˍ oˇ ve hta‸ keu taˆ chehˇ ve suhˆ taˬ hkʼoˆ lo beh taˍ ve yoˬ. 8Da‸ kehˬ jaˇ ve bawehˇ gʼuˇ suhˍ lo huˉ chehˇ ve chaw lehˬ, suhˆ taˬ oˇ ve teˇ hpaˍ ve awˬ hkʼoˇ meuˇ teˇ tawn hta‸ mawˬ hpeh‸ ve yoˬ. (Ya‸ nyi hkʼa gaˬ, suhˆ taˍ oˇ ve teˇ hpaˍ oˇ kaˬ lo cawˬ taˍ sheˍ ve yoˬ) 9Ka ti‸ shaˉ caˆ ta kʼoˍ oˇ ve awˬ hkʼaw lo, Moˉseˍ Siˉnaˆ hkʼaw hkʼoˆ lo yuˬ veu laˇ ve haˉ pui baˉ nyiˇ maˬ keu taˍ ve yoˬ. Chi ve lehˬ, Iˉsaˍreˍla chaw hui Eˇjiˇ tu‸ mvuhˇmiˬ hkʼaw tawˆ la chehˇ htaˇ, Gʼuiˬsha yawˇ hui hta‸ te piˇ taˍ ve ka ti‸ shaˉ caˆ hpeh‸ ve yoˬ.
10Paw hkuˇ teˇ hpaˍ bon yehˬ hkʼaw tawˆ-e chehˇ ve teˇ yanˇ, bon yehˬ hkʼaw lo mvuhˇ hkʼawˇ biˇ sheˬ ve yoˬ. 11Hkʼe te leh, yawˇ hui bon yehˬ hkʼaw lo kʼaw‸ lo‸-e maˇ hpeh‸ ve yoˬ. 12Oˇ htaˇ, Sawˉla‸monˍ bon lawˬ leh kʼoˆ ve,
Gʼuiˬsha-oˬ, nawˬ lehˬ mvuhˇ nyi hta‸ mvuhˇ naw ma hkʼoˆ lo teh taˍ ve yoˬ.
Ya‸ hkʼaˇ, nawˬ lehˬ moˬ leh naˆ ho‸ ve hkʼaw lo chehˇ tuˬ leuˆ yuˬ taˍ peuˬ.
13Chi beu‸ ngaˬ lehˬ nawˬ co co taiˍ taiˍ chehˇ tuˬ ve
awˬ me‸ awˬ hponˇ cawˬ ve bon yehˬ teˇ maˬ te taˍ peuˬ, teh‸ kʼoˆ ve yoˬ.
Sawˉla‸monˍ chaw moˍ lonˉ hta‸ tawˇ yaw piˇ ve
14Chaw yaˇ teˇ hpaˍ oˇ kaˬ lo huˉ chehˇ ve teˇ yanˇ, jawˇmawˇ Sawˉla‸monˍ yawˇ hui hpawˇ lo hpfuhˆ leh, yawˇ hui hta‸ bon na‸ piˇ ve yoˬ. 15Peuˬ hkʼaw‸ nawˉ yawˇ kʼoˆ ve, Iˉsaˍreˍlaˆ ve Gʼuiˬsha hta‸ chiˇ mvuh-o. Yawˇ lehˬ, ngaˬ pa Daˍviˆ hta‸ chi hkʼe kʼoˆ piˇ taˍ ve yoˬ. 16Ngaˬ ve chaw teˇ hpaˍ hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ ve teˇ nyi hta‸ te leh ya‸ nyi hkʼa gaˬ, Iˉsaˍreˍlaˆ mvuhˇmiˬ hkʼaw cawˬ ve venˇ hkʼaˬ ve teˇ venˇ awˬ hkʼaw lo maˇ kʼoˆ, ngaˬ hta‸ oˉ kʼoˍ pui kuiˬ bon yehˬ teˇ pawˆ ka‸ maˇ te tcuh sheˍ. Ya‸ hkʼaˇ, ngaˬ ve chaw teˇ hpaˍ hta‸ uˉ peunˍ tuˬ, ngaˬ nawˬ hta‸ leuˆ yuˬ taˍ ve yoˬ, teh‸ ngaˬ pa hta‸ kʼoˆ piˇ taˍ ve yoˬ.
17Ngaˬ pa lehˬ, Gʼuiˬsha hta‸ oˉ kʼoˍ pui kuiˬ bon yehˬ teˇ maˬ te tuˬ dawˇ nyi jaw ve yoˬ. 18Ya‸ hkʼaˇ, Gʼuiˬsha yawˇ hta‸ chi hkʼe kʼoˆ piˇ ve yoˬ. Nawˬ chi hkʼe te gaˇ ve nyi ma cawˬ ve lehˬ da‸ jaˇ ve yoˬ. 19Ya‸ hkʼaˇ, nawˬ maˇ gʼa te. Ngaˬ ve bon yehˬ hta‸ gʼa te tuˬ ve teˇ gʼaˇ lehˬ, nawˬ ve yaˇ paˍ yoˬ, teh‸ yawˇ hta‸ kʼoˆ piˇ ve yoˬ.
20Gʼuiˬsha lehˬ, yawˇ kʼoˆ taˍ ve hkʼe hpeh‸ la piˇ lawˬ ve yoˬ. Ngaˬ lehˬ ngaˬ pa awˬ tan jawˇmawˇ kʼaw‸ te leh, Gʼuiˬsha hta‸ oˉ kʼoˍ pui kuiˬ bon yehˬ teˇ maˬ hta‸ te taˍ peuˬ. 21Ngaˬ hui ve awˬ puˍ awˬ pi hui hta‸ Eˇjiˇtu‸ mvuhˇmiˬ hkʼaw shiˍ tawˆ la piˇ chehˇ htaˇ, yawˇ yawˇ hui hta‸ te piˇ taˍ ve ka ti‸ shaˉ caˆ, haˉ pui baˉ nyiˇ maˬ keu taˍ ve ta kʼoˍ teh taˍ kuiˬ bawehˇ teˇ maˬ hta‸ htawˇ ngaˬ te taˍ peuˬ, teh‸ yawˇ hui hta‸ kʼoˆ piˇ ve yoˬ.
Sawˉla‸monˍ bon lawˬ ve
22Oˇ ve hkʼaw‸ nawˉ, Sawˉla‸monˍ lehˬ tuˉ tanˇ kuiˬ gʼuˇ suhˍ lo huˉ taˍ leh, la‸ sheh nyiˇ paˉ chiˇ peuˬ hkʼaw‸ nawˉ bon chi hkʼe lawˬ ve yoˬ. 23Iˉsaˍreˍlaˆ ve Gʼuiˬsha-oˬ, mvuhˇ naw ma hkʼoˆ leh miˬguiˬ hkʼoˆ lo nawˬ hkʼe ve Gʼuiˬsha teˇ gʼaˇ ka‸ maˇ cawˬ. Nawˬ ve tawˇ hta‸ hkʼa deh‸ na yuˬ chehˇ ve chaw teˇ hpaˍ hta‸ nawˬ ve ha‸ pehnˇ ve awˬ ceuˬ hpeu‸ maˍ piˇ leh, nawˬ yawˇ hui hta‸ te piˇ taˍ ve ka ti‸ hta‸ hkʼaˬ htaˆ ka‸ dawˇ nawˇ chehˇ ve yoˬ. 24Ngaˬ pa Daˍviˆ hta‸ nawˬ te piˇ taˍ ve ka ti‸ hta‸ hkʼaˬ htaˆ ka‸ dawˇ nawˇ chehˇ leh, ya‸ nyi nawˬ ve tawˇ oˇ ve hkʼa peu-eˬ biˇ la peuˬ. 25Iˉsaˍreˍlaˆ ve Gʼuiˬsha-oˬ, ngaˬ pa Daˍviˆ hkʼa shuˍ nawˬ ve tawˇ hta‸ na yuˬ puiˉ ve yawˇ ve awˬ ceuˬ awˬ hkʼaˇ teˇ gʼaˇ peuˬ teˇ gʼaˇ hta‸ jawˇmawˇ te tcuh tuˬ, nawˬ kʼoˆ taˍ peuˬ ve tawˇ hta‸ a ciˉ dawˇ nawˇ taˍ laˇ tuˬ, chi beu‸ ngaˬ nawˬ hta‸ lawˬ hkawˉ ve yoˬ. 26Iˉsaˍreˍlaˆ ve Gʼuiˬsha-oˬ, nawˬ ve awˬ ceˬ ngaˬ pa Daˍviˆ hta‸ te piˇ taˍ ve ka ti‸ oˇ ve teˇ hpaˍ hta‸ a ciˉ biˇ la piˇ-oˆ.
27Ya‸ hkʼaˇ, Gʼuiˬsha-oˬ, nawˬ awˬ tehˬ awˬ na miˬguiˬ hkʼoˆ chehˇ hpeh‸ ve laˇ. Mvuhˇ naw ma chi taw taw uiˍ jaˇ kʼehˬ jaˇ ve ka‸, nawˬ chehˇ maˇ law‸ sheˍ ve yoˬ. Hkʼaˬ hkʼe te leh, ngaˬ te taˍ ve bon yehˬ chi ve hkʼaw nawˬ chehˇ gʼa tuˬ ve le. 28Ngaˬ ve Gʼuiˬsha-oˬ, ngaˬ lehˬ nawˬ ve awˬ ceˬ paˍ hpeh‸ ve yoˬ. Ya‸ nyi ngaˬ ve bon lawˬ hkawˇ hta‸ na yuˬ leh, ngaˬ lawˬ ve hkʼe a ciˉ ga laˇ-oˆ. 29Nawˬ hta‸ oˉ kʼoˍ pui kuiˬ te taˍ ve bon yehˬ chi hta‸ teˇ nyi teˇ haˉ le a ciˉ nyi ha‸ shaˉ laˇ-oˆ. Bon yehˬ chi ve hpawˇ lo ngaˬ hpfuhˆ leh bon lawˬ ve teˇ yanˇ, ngaˬ ve bon lawˬ hkawˇ hta‸ a ciˉ na yuˬ laˇ-oˆ. 30Bon yehˬ chi ve hpawˇ lo hpfuhˆ leh bon lawˬ chehˇ ve nawˬ ve chaw teˇ hpaˍ ve bon lawˬ hkawˇ hta‸ htawˇ, a ciˉ na yuˬ piˇ-oˆ. Mvuhˇ naw ma hkʼoˆ lo cawˬ ve nawˬ ve yehˬ hkʼaw chehˇ taˍ leh, ngaˬhui ve bon lawˬ hkawˇ hta‸ na yuˬ leh, ngaˬ hui ve venˇbaˆ hta‸ a ciˉ hpehˇ laˇ-oˆ.
31Chaw teˇ gʼaˇ shu hta‸ te ya‸ ve pa taw, yawˇ hta‸ choˬ kaˬ nawˬ ve tuˉ tanˇ kuiˬ lo shiˍ laˬ leh, yawˇ te‸ chiˉ venˇbaˆ maˇ cawˬ teh‸ kʼoˆ ve teˇ yanˇ, 32Gʼuiˬsha-oˬ, nawˬ ve awˬ ceˬ teˇ hpaˍ hta‸ suhˉ a ciˉ jehˬ laˇ-oˆ. Te ya‸ ve chaw teˇ gʼaˇ hta‸, keunˍ da‸ ve hkʼe ciˍ yanˍ piˇ leh, te‸ chiˉ venˇbaˆ maˇ cawˬ ve chaw teˇ gʼaˇ hta‸ ponˬ piˇ-oˆ.
33Nawˬ ve chaw teˇ hpaˍ nawˬ hta‸ te ya‸ ve pa taw, yawˇ hui canˇ paˍ teˇ hpaˍ ve la‸ sheh hkʼaw gʼa gaˬ peuˬ hkʼaw‸ nawˉ, venˇbaˆ dawˇ hpfuhˆ leh choˬ kaˬ nawˬ ve bon yehˬ lo laˬ ve teˇ yanˇ, 34yawˇ hui lawˬ hkawˉ ve awˬ hkawˇ hta‸ a ciˉ na yuˬ piˇ-oˆ. Yawˇ hui ve venˇbaˆ hta‸ hpehˇ piˇ leh, nawˬ yawˇ hui ve awˬ puˍ awˬ pi hui hta‸ piˇ taˍ ve mvuhˇmiˬ hkʼaw, yawˇ hui hta‸ kʼaw‸ shiˍ hkʼaw‸ veu laˇ piˇ-oˆ.
35Nawˬ ve chaw teˇ hpaˍ venˇbaˆ te ve pa taw, nawˬ yawˇ hui awˬ hkʼoˆ lo mvuhˇ yeˬ maˇ laˬ piˇ ve ka‸, yawˇ hui venˇbaˆ dawˇ hpfuhˆ ve hkʼaw bon yehˬ chi ve hpawˇ lo hpfuhˆ leh bon lawˬ ve kʼo, yawˇ hui lawˬ hkawˉ ve awˬ hkawˇ hta‸ a ciˉ na yuˬ piˇ-oˆ. 36Iˉsaˍreˍlaˆ chaw leh yawˇ hui ve jawˇmawˇ te ya‸ ve venˇbaˆ hta‸ a ciˉ hpehˇ piˇ-oˆ. Da‸ ve kanˉ hta‸ tiˉ te tuˬ, yawˇ hui hta‸ maˍ piˇ-oˆ. Oˇ hkʼe te peuˬ hkʼaw‸ nawˉ, nawˬ yawˇ hui hta‸ piˇ taˍ ve mvuhˇmiˬ chi awˬ hkʼoˆ lo mvuhˇ yeˬ kʼaw‸ laˬ piˇ-oˆ.
37Mvuhˇmiˬ hkʼaw meu‸ ve kaˆ ve, naˬ beuˬ gaˬ ve, mvuhˇ goˇ jaˇ leh caˬ luˬ ve, caˬ faˆ tawˆ ve, canˇ paˍ teˇ hpaˍ nawˬ ve chaw hta‸ ca bawˆ la ve, naˬ ve gawˬ ve awˬ ceuˬ chi teˇ hpaˍ hpeh‸ la ve teˇ yanˇ, yawˇ hui ve bon lawˬ hkawˇ hta‸ a ciˉ na yuˬ piˇ-oˆ. 38Nawˬ ve Iˉsaˍreˍlaˆ chaw teˇ gʼaˇ gʼaˇ dawˇ haˍ jaˇ ve pa taw, bon yehˬ chi hpawˇ lo hpfuhˆ leh nawˬ geh bon lawˬ ve teˇ yanˇ, yawˇ ve bon lawˬ hkawˇ hta‸ a ciˉ na yuˬ piˇ-oˆ. 39Yawˇ hui ve venˇbaˆ hta‸ hpehˇ piˇ leh, yawˇ hui hta‸ a ciˉ ga piˇ-oˆ. Chaw yaˇ ve dawˇ hkʼaˇ hta‸ shiˍ shehˍ hpaˇ nawˬ teˇ gʼaˇ tiˉ cawˬ ve yoˬ. 40Ngaˬ hui ve awˬ puˍ awˬ pi hui hta‸ nawˬ piˇ taˍ ve mvuhˇmiˬ chi ve hkʼaw yawˇ hui chehˇ taˍ ve teˇ co-e, yawˇ hui nawˬ ve tawˇ hta‸ na yuˬ puiˉ tuˬ, yawˇ hui hta‸ keunˍ da‸ ve hkʼe a ciˉ ga piˇ-oˆ.
41Vuiˇ jaˇ ve mvuhˇmiˬ hkʼaw chehˇ ve buiˇshaˆaˉnaˆ chaw teˇ gʼaˇ gʼaˇ, nawˬ te taˍ peuˬ ve uiˍ jaˇ ve kanˉ teˇ hpaˍ awˬ lawn gʼa kaˇ leh, 42nawˬ hta‸ oˉ kʼoˍ pui tuˬ bon yehˬ chi ve hkʼaw lo‸ la ve teˇ yanˇ, yawˇ ve bon lawˬ hkawˇ hta‸ a ciˉ na yuˬ piˇ-oˆ. 43Nawˬ ve Iˉsaˍreˍlaˆ chaw teˇ hpaˍ nawˬ hta‸ oˉ kʼoˍ pui chehˇ ve hkʼe, miˬguiˬ chaw yaˇ hkʼa peu-eˬ nawˬ hta‸ shiˍ leh nawˬ ve tawˇ hta‸ na yuˬ puiˉ tuˬ, yawˇ ve bon lawˬ hkawˇ hta‸ a ciˉ na yuˬ piˇ-oˆ. Oˇ hkʼe te ve kʼo, ngaˬ te taˍ ve bon yehˬ chi lehˬ, nawˬ hta‸ oˉ kʼoˍ pui kuiˬ hpeh‸ ve hta‸ yawˇ hui shiˍ la tuˬ yoˬ.
44Nawˬ ve chaw chi teˇ hpaˍ ma‸ gʼa ca bawˆ kʼai leh, yawˇ hui gaˬ ve chehˇ kuiˬ lo, ngaˬ te taˍ ve bon yehˬ chi ve hpawˇ lo hpfuhˆ leh nawˬ geh bon lawˬ ve kʼo, 45yawˇ hui ve bon lawˬ hkawˇ hta‸ a ciˉ na yuˬ piˇ leh, yawˇ hui hta‸ ma‸ bawˆ gʼaˇ tcuh piˇ-oˆ.
46Nawˬ ve chaw teˇ hpaˍ venˇbaˆ te ve pa taw, canˇ paˍ teˇ hpaˍ ca bawˆ la leh, vuiˇ jaˇ ve mvuhˇmiˬ lo shiˍ kʼai piˇ ve hta‸ gʼa hkanˍ ve htawˇ, yawˇ hui ve bon lawˬ hkawˇ hta‸ a ciˉ na yuˬ piˇ-oˆ. 47Gʼuiˬsha-oˬ, yawˇ hui oˇ kaˬ lo venˇbaˆ dawˇ hpfuhˆ leh nawˬ hta‸ lawˬ hkawˉ ve kʼo, yawˇ hui ve bon lawˬ hkawˇ hta‸ a ciˉ na yuˬ piˇ-oˆ. 48Oˇ kaˬ lo yawˇ hui venˇbaˆ dawˇ hpfuhˆ leh, ngaˬ hui ve awˬ puˍ awˬ pi hui hta‸ nawˬ piˇ taˍ ve mvuhˇmiˬ chi ve leh, ngaˬ nawˬ awˬ pon te taˍ ve bon yehˬ chi ve hpawˇ lo hpfuhˆ leh bon lawˬ ve kʼo, 49yawˇ hui hta‸ ha kʼaˉ piˇ leh, yawˇ hui ve bon lawˬ hkawˇ hta‸ a ciˉ na yuˬ piˇ-oˆ. 50Yawˇ hui nawˬ hta‸ te ya‸ ve venˇbaˆ hkʼa peu-eˬ ve hta‸ hpehˇ baˬ piˇ leh, canˇ paˍ teˇ hpaˍ yawˇ hui hta‸ ha kʼaˉ piˇ tuˬ a ciˉ te piˇ-oˆ. 51Awˬ lawn kʼo, yawˇ hui lehˬ nawˬ ve chaw hpeh‸ leh, aˬ miˍ buiˬ hpfuh hkʼe hpeh‸ ve Eˇjiˇtu‸ mvuhˇmiˬ hkʼaw lo nawˬ shiˍ tawˆ la piˇ taˍ ve chaw teˇ hpaˍ hpeh‸ ve yoˬ.
52Kanˇ paˆ uiˍ jaˇ ve Gʼuiˬsha-oˬ, nawˬ ve Iˉsaˍreˍlaˆ chaw teˇ hpaˍ leh yawˇ hui ve jawˇmawˇ hta‸ hkʼaˬ htaˆ ka‸ nyi ha‸ shaˉ piˇ leh, yawˇ hui nawˬ hta‸ lawˬ hkawˉ ve bon lawˬ hkawˇ teˇ hpaˍ hta‸ a ciˉ na yuˬ piˇ-oˆ. 53Ngaˬ hui ve awˬ puˍ awˬ pi hui hta‸ Eˇjiˇtu‸ mvuhˇmiˬ hkʼaw lo nawˬ shiˍ tawˆ la piˇ chehˇ htaˇ, Moˉseˍ hta‸ teˇ caˉ te leh nawˬ yawˇ hui hta‸ kʼoˆ piˇ taˍ peuˬ ve hkʼe, yawˇ hui lehˬ nawˬ leuˆ yuˬ taˍ ve chaw ceuˬ hpeh‸ ve yoˬ, teh‸ kʼoˆ leh Sawˉla‸monˍ bon lawˬ ve yoˬ.
Awˬ leh meuˇ ve bon lawˬ hkawˇ
54Sawˉla‸monˍ tuˉ tanˇ kuiˬ gʼuˇ suhˍ lo hkui tcuhˉ teh leh Gʼuiˬsha geh bon oˇ hkʼe lawˬ peuˬ hkʼaw‸ nawˉ, yawˇ tu la ve yoˬ. 55Oˇ kaˬ lo chehˇ taˍ ve chaw hkʼa peu-eˬ ve hta‸ yawˇ awˬ hkawˇ bvuhˬ chaweh chi hkʼe kʼoˆ piˇ ve yoˬ. 56Gʼuiˬsha lehˬ ka ti‸ te taˍ peuˬ ve hkʼe, yawˇ ve chaw teˇ hpaˍ hta‸ gawˬ lehˍ chehˇ tcuh taˍ ve pa taw, yawˇ hta‸ chiˇ mvuh-o. Gʼuiˬsha lehˬ, yawˇ ve awˬ ceˬ paˍ Moˉseˍ hta‸ te piˇ taˍ peuˬ ve ka ti‸ teˇ hpaˍ hta‸ hkʼaˬ htaˆ ka‸ dawˇ nawˇ chehˇ ve yoˬ. 57Gʼuiˬsha lehˬ, nawˬ hui ve awˬ puˍ awˬ pi hui geh chehˇ ve hkʼe, ngaˬ hui geh htawˇ chehˇ piˇ-oˆ. 58Ngaˬ hui ve awˬ puˍ awˬ pi hui hta‸ yawˇ piˇ taˍ ve awˬliˇtawˇhkawˇ teˇ hpaˍ hta‸ ngaˬ hui hkʼa deh‸ na yuˬ leh, yawˇ a loˍ cawˇ ve hkʼe ngaˬ hui a sha‸ te‸ chehˇ puiˉ tuˬ, yawˇ ngaˬ hui hta‸ na yuˬ puiˉ ve chaw hpeh‸ la tcuh piˇ-oˆ. 59Ngaˬ ve bon lawˬ hkawˇ chi teˇ hpaˍ hta‸ Gʼuiˬsha hkʼaˬ htaˆ ka‸ dawˇ nawˇ chehˇ piˇ-oˆ. Iˉsaˍreˍlaˆ chaw teˇ hpaˍ leh yawˇ hui ve jawˇmawˇ hta‸, Gʼuiˬsha hkʼaˬ htaˆ ka‸ ha kʼaˉ laˇ piˇ-oˆ. 60Miˬguiˬ chaw ceuˬ hkʼa peu-eˬ, yawˇ teˇ gʼaˇ ceh tiˉ Gʼuiˬsha hpeh‸ ve hta‸ shiˍ la piˇ-oˆ. 61Nawˬ hui hkʼa peu-eˬ htawˇ, ya‸ nyi nawˬ hui te chehˇ ve hkʼe, Gʼuiˬsha hta‸ hkʼaˬ htaˆ ka‸ ka ti‸ yeˬ leh yawˇ ve tawˇ hta‸ na yuˬ chehˇ ve chaw hpeh‸ piˇ-oˆ, teh‸ kʼoˆ ve yoˬ.
Bon yehˬ chiˇ a‸ ve
62Oˇ ve hkʼaw‸ nawˉ, jawˇmawˇ Sawˉla‸monˍ leh Iˉsaˍreˍlaˆ chaw hkʼa peu-eˬ Gʼuiˬsha hta‸ tuˉ tanˇ piˇ ve yoˬ. 63Yawˇ hui lehˬ, nuˇ 22,000 hkeh, yawˬ 120,000 hkeh tuˉ tanˇ piˇ ve yoˬ. Hkʼe te leh, yawˇ hui bon yehˬ oˇ ve Gʼuiˬsha hta‸ chiˇ a‸ piˇ ve yoˬ. 64Oˇ ve teˇ nyi tiˉ awˬ hkʼaw lo, jawˇmawˇ lehˬ tuˉ tanˇ kuiˬ gʼuˇ suhˍ lo cawˬ ve bawehˇ lonˉ hta‸ htawˇ da‸ kehˬ tuˬ te leh, oˇ kaˬ lo htawˇ Gʼuiˬsha hta‸ tuˉ tanˇ piˇ ve yoˬ. Awˬ lawn kʼo, tuˉ tanˇ tuˬ chi ma ma ve hta‸ kuiˇ yuˬ te taˍ ve tuˉ tanˇ kuiˬ hkʼoˆ lo ceh tiˉ tuˉ tanˇ maˇ daw ve pa taw yoˬ.
65Oˇ hkʼe te peuˬ hkʼaw‸ nawˉ, Sawˉla‸monˍ leh Iˉsaˍreˍlaˆ chaw teˇ hpaˍ bon yehˬ hkʼaw suhˍ nyi hkʼa gaˬ pawehˇ te ve yoˬ. Awˬ na hpawˇ Haˍmaˆ kʼaˍ le‸ leh, awˬ hawˉ hpawˇ Eˇjiˇtu‸ miˬ tcuhˉ lo chehˇ ve Iˉsaˍreˍlaˆ chaw teˇ hpaˍ htawˇ, pawehˇ te kuiˬ lo gaˬ la ve yoˬ. 66Hiˉ nyi teˇ nyi gaˬ htaˇ, Sawˉla‸monˍ lehˬ chaw oˇ ve teˇ hpaˍ hta‸ a shu yawˇ ve chehˇ kuiˬ lo kʼo‸-e tcuh ve yoˬ. Yawˇ hui hkʼa peu-eˬ yawˇ hta‸ chiˇ mvuh leh, Gʼuiˬsha Iˉsaˍreˍlaˆ chaw leh yawˇ ve awˬ ceˬ paˍ Daˍviˆ hta‸ na‸ piˇ taˍ ve awˬ bon teˇ hpaˍ hta‸ chiˇ mvuh leh ha lehˬ ha kʼa kʼo‸-e ve yoˬ.
Currently Selected:
1 Jawˇmawˇ li‸ 8: LHBE
Highlight
Share
Copy
Want to have your highlights saved across all your devices? Sign up or sign in
Lahu Bible Edited © Thailand Bible Society and Bible Society of Myanmar, 2010, 2020.
