MARKUSI 12
12
Ghɔm tə́ tútə̀ pɑ tsʉ' mthə nə nu' mlù' pɑ zhwə́ pɔ̀
(Mt 21.33-46; Lk 20.9-19)
1E lə to' nə lɑ ghɔm tə́ tútə̀ gɔmnwə bi pú gɑ: Mu' mo lə tsə̌ mthə nə nú' mlù' pé e, ŋkwɑ ŋkhɛpé nə dzám, biŋ nthə́ŋ tsʉ' nə nú' mlù' pé bɔ bə́m; biŋ ŋkwɑ tsʉ' nə cwə nə́ bɑ dé pé; e lə yo' gùŋ é awɛ bi pɑ tsʉ' mthə́ nə nú' mlù' cwəlɔ, gɔ̌.
2Cwə lə kǔ' e tə́m ta' gɛ fà' bi pɑ tsʉ' mthə́ nə nú' lù' gɑ e ghɔ ŋkwi yə ywə yə a nthəm pé a. 3Pɔ bɔ lə́ ghəm é shwɔ é, jə́ŋ é tɑ́ hɑ sɔmywə bi e. 4E lə́ kwi' nthəm mu' gɛ fà' bi pú; wap cwɔ yə bɔ mo nə́ thə́ é, biŋ jəmtə é. 5E piŋ nthəm mu' gɛ fà'; wap zhwə yə bɔ; e piŋ nthəm shɑ́: Wap cwɔ shɑ, biŋ jwətə́ shɑ. 6A lə cʉ' da' mú e yə e lə ŋkhuŋ é té' a. E nə təm e bi pú bɑ gɔm gɑ: Wap gɔ ghə mku' mu a. 7Da' gɑ pɑ tsʉ' pě mthə́ nə nú' mlù' bɔ ghɔm cəcɑ̌ pu gɑ: E bɑ́ dzʉdyə̌! Pɑ̀ zhwe é, mcʉ̌' cʉ' mɔk pɑ̀. 8Wap lə ghəm e, jwə́ é, dɑ pfə́ e nə nthəm pé mǎ'. 9Gɛ pě bɔ gɔ ghə gɑ́ kɑ̀? E gɔ sɔ́' sɔ', ghə̌ pu zhwə pɑ tsʉ' pě mthə nə nú' mlù' bɔ, e piŋ hɑ pé bɔ bi shɑ pɔ̀. 10Po ka ké tsʉ' ŋwa'nyə̀ yə a gɔm gɑ:
Gwɔ' yə pɑ pə́m pa' lə wa' á,
ya nə lě ji gwɔ' phə pa'.
11A bɑ́ fa' Cyəpɔ:
Msya nwə nə mnyə́ mɔk pɑ̀!
12Wap lə pɑ̌ shəŋ nə ghəm é, da' gɑ́ bɑwə́ bwɔk pɔmnəŋ. A lə bɑ wap cəŋtə ju' gɑ nwə yə e lə ghɔm a, e lə gɔm nə pú. Wap lə tak Yeso cwəlɔ, gɔ̌.
Nə ma' shwɔp bi Kasa
(Mt 22.15-22; Lk 20.20-26)
13Wap lə təm shɑ pɑ Farisai pu a shɑ pɔ Herode bi Yeso po'o gɑ wap cyə́ m nə ghɔm tsyə́ gəm é. 14Wap lə sɔ' gɔm bi e gɑ: Ta, pyə̌ zhyə́ gɑ o bɑ nyənyɔ, la' o piŋ bɑ biŋ gɑ sɔmmo hya o: O tə́ bwɔk mnyə sɔmmo pɑ̀, bɑ da'tə məjyə̀ Si dəŋdəŋ. A bɑ pu piŋ nə ma' shwɔp bi Kasa kɑ gɛ̌? Pyə̌ gɔ ma' kɑ pyə tə́ gɔ ma' a? 15Da' gɑ Yeso zhyə́ gɑ́ wap bɑ pɔ jʉm pʉə gɔm bi pu gɑ: Nwə kɑ po ləŋtə a? Po hɑ ta' bɛ ŋkhap bəm tə́ jɔ. 16Wap lə hɑ ta' bɛ ŋkhap bi Yeso. E ghɔm bi pu gɑ: Thə́ mo ba ywə yə pu bvə nə a bɑ yə wɑ? Wap pa' bi é gɑ: Yə Kasa. 17Yeso ghɔm bi pu gɑ: Po pa' ywə yə a yə Kasa a bi Kasa, ba' yə Si bi Si. Nwə lə piŋ shyə́ wap té' nə Yeso.
Nə yám nə vʉ̌
(Mt 22.23-33; Lk 20.27-40)
18Pɑ Sadukai lə sɔ' bəŋ Yeso. Wap pyə wap gɔm gɑ nə yám nə vʉ̌ tə bɑwə a pɑ́ həŋtə é gɑ: 19Ta, Mosɛ bɑ é lě bvə bi pyə gɑ: Mbɛ ghə fɑ e yə mbɛ, e nə pfʉ nthak mjwǐ tə́ tak mú, e sɔk npfɔk e po'o gɑ e ghə gwya mo bi fɑ e bɔ̌. 20Shɑ mfɑ lə pɑ̌ sɔmbʉə. Dəŋdzə̀ lɔmdyə́, npfʉ́ tə tak gwya mo. 21Batə yɑpʉə sɔk mjwǐ bɔ, npfʉ́ tə tak gwya mo. Ba batə yɑtá, 22ba guŋ yap sɔmbʉə awɛ, wap lə tak gwya mo. Guŋ yap awɛ lə pfʉ̌, ba mjwǐ ti npfʉ yə́ jʉ̌m pú. 23A gɔ sɔ' pɑ cwə nə yám nə vʉ̌, wap yám nə vʉ̌, mjwǐ bɔ pɑ́ yə wɑ̌ nə pú, pa' wap lě nəŋ dɔm é awɛ a?
24Yeso ghɔm bi pu gɑ: A tə́ shyə m pa' a tə bɑ pǒ zhyə́ ywə yə pu lə və a, ba tʉɔ si a, tə po pɑwə hɔjyə pa' lə? 25Nə pa' cwə yə pu jam nə vʉ̌ a, pu lə ghə mjwǐ kɑ dhə́ lə. Pu bɑ m pa' pɑ aŋgəle kɛbəŋ a. 26Sɔ' m nə nə́ yam nə vʉ̌, bɑ po la m ŋkhe nthʉm ŋwa'nyə Mosɛ, nə ywə yə pu lə və nə nwə cu' mghé mɔk tə́ ŋkhə, pa' Si lə ghɔm bi e gɑ: Gɑ̌ bɑ Si Abraham, Si Isak ba Si Yakop a? 27E tə bɑ Si mpfə́ pɔ pɑ̀; é bɑ Si pɔmtʉɔ. Pǒ bɑ pǒ cəŋtə hɔ məjyə.
Dzə̀ mcò'
(Mt 22.34-40; Lk 10.25-28)
28Mu' jyə́ mco' lə sɔ' bəŋ Yeso. A lə bɑ ě yu' pa' Yeso pu a pɑ Sadukai nthɛshwə̀, e pa' bi pu pɑpuŋ a. E lə həŋtə Yeso gɑ: Də̀ŋdzə̀ mco' nə gùŋ mco' awɛ bɑ ma? 29Yeso pa' gɑ: Dzə̀ mco' bɑ gɑ: Yu' m Israɛl Cyəpɔ Si yɔk pɑ̀ bɑ da' Cyəpɔ. 30O gɔ pɑ kuŋ Cyəpɔ Si o nə guŋ tʉm tsʉ̌ awɛ, nə guŋ lam tsʉ̌ awɛ, nə guŋ kwɛnyə o awɛ ba nə guŋ gʉ' o awɛ. 31Batə məbʉ̌ə́ bɑ gɑ: O gɔ pɑ́ kuŋ mo yə e bəŋ o a pa' thə nɑ o a. Sɔm mco' ka cyə́ mɔ mco' məbʉə́.
32Jyə́ mco' ghɔm bi e gɑ: Ǎ pùŋ m Ta, o ghɔm nyənyɔ. E bɑ́ da' yʉ́ dǒ é, sɔm lə kwi' bɑwə́, 33nə kùŋ e nə guŋ tʉ̌m mo awɛ, nə guŋ zhyə̌nwə mo awɛ, nə guŋ gʉ' mo awɛ, biŋ ŋkhuŋ mo yə e bəŋ mo a pa' thə nɑ́ mo a pɑ́ bɑ ǎ cyə guŋ tsə tsyə pu ntho bi Si a ba tsə pwɔ' awɛ. 34Yeso lə yɔ̌ gɑ e lɑ fʉ́ nə ba', gɔm bi e gɑ: O tə̌ gʉə sʉəsʉə nə Nəfo Si pɑ́. A piŋ bɑ po'o sɔmmo lə kwi' həŋtə́ e sɔmywə.
Mesia pu David
(Mt 22.41-46; Lk 20.41-44)
35Yeso lə lɑ̌ ghɔm, bɑ ji'tə pɔmnəŋ ywə Dyə Si bɑ gɔm gɑ: Pɑ zhyə́ mco' gɔm gɑ Kristo bɑ mú David m gɑ́ kɑ̀? 36Zhwenyə Dɔlɔ̌ lə ghə David zhyə biŋ gɔm gɑ:
Cyəpɔ ghɔm bi Cyəpɔ a gɑ:
Cwə́ nə ghəŋ tʉɔ a
tə́ a nyəŋ mghɛ bò pǔ
to mkwə o.
37Kwa' David ŋkhe e gɑ Cyəpɔ e; tə́ é biŋ bɑ mu e m gɑ kɑ? Vəŋ dú pɔ lə bɑwə ŋwɛnyə nə yu' e.
Yeso fyɛ' pɑ zhyə́ mco'
(Mt 23.1-36; Lk 20.45-47)
38Yeso lə bɑ ji'tə pɔ ywə bɑ gɔm gɑ: Po pɔm pɑ zhyə́ mco' pyə wap ŋkwa msʉə́ dzə́ nə giŋ, bɑ shə́ŋ gɑ pú ca'tə wap dəm sim, 39bɑ ŋkho sinagogə shwə nə dəŋdzə mkwɔ', biŋ bɑ tsʉ' la'nwə shwə pɑ́ nə dəŋdzə tsʉ' a. 40Wap pyə wap mitə tsə mpfɔk, biŋ bɑ gə msʉəsʉə mcwyɛ'nyə nə fʉtə wap a. Pu gɔ sɔ' nyəŋ shɛ yə ǎ cyə a thə́ pú.
Ywə hɑhɑ̌ npfɔk bəŋ mjwǐ
(Lk 21.1-4)
41Yeso lə cwə̌ bəŋ kak yə pú nyəŋ ywə nə fa' Dyə Si nə a, bɑwə jɔ pa' pɔmnəŋ wə nyəŋ ŋkhap nthʉm o a. Pɔ jizhǐ tə jɔm lə sɔ̌' bɑ́ nyəŋ ywə nthʉm o tə a yɔm. 42Mu' npfɔk bəŋ mjwǐ lə sɔ' nyəŋ po mpfʉ́ tsə bɛ pʉ̌ə, kwa' jʉ̀m ŋkhap. 43Yeso lə kě pɑkhʉ̌ pyə́ gɔm bi pu gɑ: Kwa' nyənyɔ gɑ̌ siŋ wɔ gɑ́ npfɔk bəŋ mjwǐ yə̌ŋ nyəŋ shyə guŋ pɔ pyə wap bɑwə nyəŋ ywə nthʉm kak a. 44Nə pa' gùŋ yap awɛ nə nyəŋ nthé pɑ nə dziak tsə tsap, tə́ sɔ' m nə é bɑ ě nə nyəŋ yə́ nthe m nə ghəghʉɔ e, nyəŋ guŋ yə́ ywə yə a bɑ bi a, guŋ ywə yə a kɑ́ bɑ ě ghə nə́ nə bvɔk a.
Currently Selected:
MARKUSI 12: NTGomala
Highlight
Share
Copy
Want to have your highlights saved across all your devices? Sign up or sign in
Nouveau Testament Ghomala © Bible Society of Cameroon, 2002.
