MARKUSI 13

Yeso siŋ gɑ́ pu gɔ sɔ' sa'tə Dyə Si

(Mt 24.1-2; Lk 21.5-6)

1Cwə yə Yeso lə pɑ̌ nthəm Dyə Si a, mu' mukhʉ́ é ghɔm bi e gɑ: Ta yɔ də́ŋ mwɔ', yɔ dəŋ pa' pu ŋkwɑ́ ywə. 2Yeso ghɔm bi e gɑ: Ǒ yɔ tsə́ gwyəgwyə tsɑ́ tsyə pu ŋkwɑ́ a! Sɔm gwɔ' tə gɔ sɔ' cwə dəm sɔm pɑ̀. Pu gɔ sɔ' sa'tə guŋ e awɛ.

3Yeso pu a Pɛtrɔ, ba Yakop, ba Yohane pu Andreya lə cwə dəm kuŋ mthə Olivə, dzə̌ Dyə Si, tsʉ' tsiŋ wap həŋtə e gɑ: 4Siŋ wɔk cwə yə nwə bǎ gɔ sɔ' sɔ' a, ba mtiŋ myə a gɔ sɔ' la'tə gɑ tsə bǎ gɔ mi a.

Cwə nə to' gǒ'

5Yeso to' nə ghɔm bi pu gɑ: Po pɔmtə gɑ sɔmmo kɑ́ ghə po hɔ́jyə̀, 6bo'gwyə pɔ gɔ sɔ' lɑ tso tsɑ̌ sɔ', pɑ ghɔm gɑ: A bɑ a, ghə̌ pɔ jɔmyɔ̌m hɔ́jyə̀. 7Po gɔ sɔ' yu' shù, pu pìŋ bɑ gɔmnwə nə shù. Po kɑ pwɔk. A puŋ gɑ tsə bɔ təm awɛ, da' gɑ a lə wuŋ bɑ nə mìŋ. 8Nə pa' mu' guŋ gɔ sɔ' pɑ lo' yə mu' guŋ. Mu' Nəfo pɑ do' tsyə mu' nəfo. Cǎ' pɑ shʉ'nyə́ nə mtsʉ' jɔmyɔ̌m. Kəya' pɑ jɛ́; a gɔ sɔ' pɑ pɑ́ nə to' go' nə dzə́. 9Po pɔmtə́. Pu gɔ sɔ' pɑ hɑ wɔ nə mdyə́ fyɛ' pu a msinagogə, pu pɑ shwɔ wɔ, bɑ fyɛ' wɔ dzə̌ mgɔpna' pu a mfomfo po'o nə thə́ a. A pɑ mtiŋ nə ŋkwithɛ bi pu. 10Nə pa' a bɑwə shəŋ gɑ pu ləŋdzə siŋ Cùŋ pɑpuŋ bi gùŋ mgùŋ awɛ. 11Pu sɔ' bɑ dɑ́ wɔ nə gɔ m nə hɑ po'o, ka lam tsɔ wuŋ sɔ́ nə ywə yə pǒ gɔ kó ghɔm a; nə pa' ywə yə pu gɔ sɔ' hɑ bi po cwə o bɔ a, po ghɔm ya bɔ; nə pa' tə wɔ nə gɔ sɔ' ghɔm pɑ́, Zhwenyə Dɔlɔ̌ nə gɔ sɔ' ghɔm nə yɔ tsʉ'. 12Fɑ́ gɔ sɔ' hɑ fɑ́ nə vʉ̌. Ǎ ta hɑ mú nə vʉ̌; pǒ gɔ sɔ' fɛjʉ́m pɑ tsə́ wap ghə pu zhwə wap. 13Guŋ pɔ awɛ gɔ sɔ' pɔ wɔ nə tso tsɑ̌. Tə́ mo yə ě tɔm tə nə miŋ a gɔ sɔ' vɔk.

Mɑ́ ghəghʉɔ

(Mt 24.15-28; Lk 21.20-24)

14Po sɔ' jɔ́ Bɔkbɔ́k zhwìŋ nə tsʉ' yə e ka tə́ bɑ gɔ pɑ́ nə a pɑ: mo yə ě wə ŋkhe a cəŋtə ju' a: a sɔ' tə bɑ po'o, pɔ pyə wap Yudea a khʉ̌ gɔ dəm mkúŋ; 15mo yə ě gɔ sɔ' pɑ m̀ zhəŋ dyə thə́ a kɑ fi'si, e kɑ nə̌ŋ ŋkho dyə é nə pe ywə. 16Mo yə ě gɔ sɔ' pɑ m pé a kɑ pɑnyə jʉ̀m nə lɑ dzə e. 17Ghəghʉɔ pɑjwǐ tsʉ̌m pu a mmʉə po nə tyɛ'dzʉ́ bɔ! 18Po cwyɛ'nyə Si gɑ a kɑ sɔ' bɑ ŋkhàp ŋʉm. 19Nə pa' mtyɛdzʉ́ bɔ gɔ sɔ' pɑ mtyɛ' ghəghʉɔ yə a la m bɑ tə fɑ pa' Si lə la' nyaptə dzʉ a tə ŋkhəm tyɛ' ɔ, a lə nəŋ bɑ gɔ la'tə piŋ pɑwə pɑ́. 20A ka pɑ́ gɑ́ Cyəpɔ ghə gɑ tyɛ'dzʉ bɔ sɔ' shwanyə cwanyə a, bɑ sɔmmo tə gɔ sɔ' vɔk pɑ́. Da' gɑ a cyə m nə pɔ̀ pyə e lə cwɔ' wap a e ghə gɑ mtyɛ'dzʉ́ bɔ sɔ' shwanyə. 21A pɑ́ po'o, bi a pɑ mo ghɔm bi po gɑ Kristo m tsɔ'ɔ, kɑ m gɑ é m tsi' é lə ka po piŋ. 22Pɑ mkristo nə fʉtə pu a pɑ mghɔm ghɔm Si nə fʉtə gɔ sɔ' təm jyəjyə̀, pɑ ghə mtíŋ pu a nthinthi msya, nə ghə pɔ jɔmyɔ̌m hɔjyə, ba shɑ pɔ pyə pu lě shi wap a. 23Tə́ sɔ' m nə po, po pɔmtə́ nə pa' gɑ̌ siŋ wɔ gùŋ ywə awɛ.

Pa' Mú mo gɔ sɔ' a

(Mt 24.29-31; Lk 21.25-28)

24A gɔ sɔ' pɑ nə mtyɛ'dzʉ bɔ, tə bɑ ghəghʉɔ yə̌ŋ cyə, a nam sonyə́, mɑŋwə́ pi, 25msɛ́ to' nə pɑ fɑ kɛbəŋ bvʉtə́ si, mtʉ̀ɔ kɛbəŋ cʉ'nyə́. 26A pɑ́ po'o pú yɔ Mú mo e sɔ' nthʉ́m mlwa, nthʉ́m guŋ mtʉ̀ɔ awɛ pu ghu'tə.

27A pɑ po'o, é tə́m pɑ aŋgəle wap ghɔ nə guŋ dzʉ mghəŋ pfʉ̀ə awɛ nə dhə́ sicǎ' ba m nə dhə kɛbə̀ŋ, shu'tə pɔ pyə́ pyə e lě shi wap a.

Ywə yə thə nthɔm thə da'tə a

(Mt 24.32-35; Lk 21.29-33)

28Po yu' fó' yə̌ŋ yə gɑ̌ dɑ nə́ thə nthɔm thə́ a. Bú myə́ shwə tə ntwɔp, tə mhwə pɑ nthəm nə́, po zhyə gɑ́ cwə dzʉ́ pɑpúŋ wə sɔ̌'. 29A dəŋdəŋ po'o tə ba wɔ la'tə jɔ mnwə bɔ sɔ̌', po zhyə gɑ Mú mo ghɔptə́, gɑ ě jyədyə̌ po. 30Kwa' nyənyɔ gɑ̌ siŋ wɔ gɑ pɔ nə yəŋ wɔ̌dzʉ́ tə gɔ cyə tə gúŋ mnwə bɔ awɛ sɔ' pɑ́. 31Kɛbəŋ pu cǎ' gɔ sɔ' mi, tə mghɔm mə tə́ gɔ sɔ' mi pɑ́. 32Da' gɑ́ sɔ' m nə tyɛ'dzʉ́ bɔ, kɑ cwə dzʉ̌ bɔ̌ lə, sɔmmo ka zhyə, ba pɑ aŋgəle kɛbəŋ, ba Mú, tə ně da' Tá.

Po ti tə tǐ

33Po pɔmtə́, po ti tə tǐ nə pa' po ka zhyə cwə yə́ a gɔ sɔ' pɑ yá a. 34A shwə pa' mu' mo yə e gɔ m tə́m a: E nə ghɔ nthak la' tsyə, hɑ fa' bi mghɛ fa' pyə, biŋ jap byap jyədyə̌ gɑ e pɑ byap tə tǐ. 35Po ti tə tǐ nə pa' po ka zhyə cwə yə gɛ lǎ' gɔ sɔ' a: Kɑ bwadzʉ̌, kɑ tə́ŋ mtsʉ̌', kɑ cwə yə ko' nthuŋ, kɑ fɔkdzʉ̌ lə. 36Po pɔmtə gɑ e kɑ vo'nyə wɔ vo'nyə, nə sɔ' po pɑwə dí. 37Ywə yə gɑ̌ gɔm bi po a, gɑ gɔm bi gùŋ pɔ̀ awɛ: Po ti tə ti.

Currently Selected:

MARKUSI 13: NTGomala

Highlight

Copy