MARKUSI 11

Nə ko Yerusalɛm

(Mt 21.1-11; Lk 19.28-40; Yhn 12.12-19)

1Wap lə ghɔ tə́ bɑ ŋkhəm bə́ŋ Yerusalɛm, bəŋ Bɛtfage ba Betanya, nə ghə̌ŋ kúŋ mthə Olivə, Yeso tə́m pɔ pʉ́ə nə pɑkhʉ̌ pyə́, 2biŋ gɔm bi pu gɑ: Po ghɔ nə́ pfə́la' yə ǎ dzə̌ po a; po gɔ cwə tə ko wə́, yɔ mú jakasi bɑ pu cə̀ŋ é, bɑ sɔmmo ka wuŋ ŋkwɔ' nə é; a po kyɛ' é nə sɔ' 3bi a mo ghɔm bi po gɑ: Nwə ka po ghə pa' a? Po pa' bi e gɑ: Cyəpɔ wə hə́ŋtə́ yá, e wuŋ shya e tsɔ'ɔ.

4Wap lə ghɔ̌, jɔ mu jakasi ba pu cəŋ e dzʉ́ bə́ŋ mu' jyədyə̌ mə́jyə. Wap lə kyɛ' e. 5Shɑ pɔ nə́ pɔ pyə wap lə tsʉ'u a lə ghɔ̌m bi pú gɑ: Pǒ ŋkhyɛ' mu jakasi yɑ́ gɑ kɑ̀? 6Wap pa' pá' Yeso la' gɔm a, pu tak wap, wap ghə po'o. 7Wap lə lɑ̌ mu jakasi gɔ bi Yeso, jap mdzə map dəm é, Yeso cwə nə́. 8Bo'gwyə́ pɔ lə sǐŋ mdzə map məjyə, ba shɑ pɔ piŋ bɑ́ bo' mcɛ́ tsə pé sɛ məjyə. 9Pɔ pyə wap lə bɑ dzə é a, ba pyə wap lə bɑ jʉ̀m é a ghiŋ bɑ nthógə̀ŋ gɑ:

Hozana! Byanyə́

bi mo yə e sɔ' nə tsǒ Cyəpɔ a!

10Byanyə pɑ nə́ yə nə sa'dzʉ̌

yə a wə sɔ' a, yə nə sa'dzʉ̌ David tá yɔk pɑ̀!

Hozana tə́ thə́ kɛbə̀ŋ.

11E lə kǒ Yerusalɛm, ŋkho Dyə Si, jɔ guŋ mtsʉ' awɛ giŋnyə e; pa' a lə bɑ́ bwadzʉ̌ a, e tə́m, pu a pɔ shwɔppʉə mghǎm ghɔ Betanya.

Thə́ tə yǎm mthɔm

(Mt 21.18-19)

12Dzʉ̌ lə lɔ̌, wap pɑ́ nthəm Betanya jikù'u yɛ́ Yeso 13e lə yɔ mu' ta' thə́ nthɔmthə́ gʉə sʉəsʉə, mhwə́ pɑ́ nə́ tə jɔ́m, e ghɔ bəŋ o nə yɔ bi a ywə nə a. E lə ghɔ tə ŋkhəm bəŋ o, jɔ pɑ́ da' mhwə nə́, nə pa' a la tə́ bɑ cwə nthɔ̌m mthə́ pɑ́. 14Yeso ghɔm gɔm bi e gɑ: Sɔmmo kɑ́ la'tə́ pfɑ́ mnthɔm mǔ! Pɑkhʉ̌ pyə lə bɑwə jú'.

Nə zhə̀ŋ pɑ tɛmtɔ Dyə Si

(Mt 21.12-17; Lk 19.45-48; Yhn 2.13-22)

15Wap lə ŋwak Yerusalɛm, Yeso ko Dyə Si, ntho' nə zhəŋ pɔ pyə wap lə bɑwə fiŋ bìŋ jo potsə́ Dyə Si a; ŋkwɔk mtɑpe pɑ kwyəpnyə bʉm pu a mkwɔ' pɑ tɛ msəŋgɔpfò. 16La' e piŋ gɑ sɔmmo kwa sɔmywə nə shyə́ Dyə Si. 17E lə zhi'tə wap bɑ gɔm gɑ: A tə́ bɑ pu və̀ gɑ: Pu gɔ sɔ' pɑ ke Dyə a gɑ dyə mcwyɛ'nyə bi gùŋ mgùŋ awɛ a? Tə́ a bɑ́ yə̌ŋ bɑ po nə gə túŋ msamshwə̀. 18Mkamsi gwyə́gwyə́ pu a pɑ zhyə́ mco' lə yǔ', bɑwə shəŋ pa' wap gɔ ghə tə zhwə e a. Nə pa' wap lə bɑwə bwɔk e, nə kɑlɑ́ ywə yə e lə bɑwə ji'tə a lə bɑwə ŋkhonyə vəŋ pɔ. 19A lə pɑ̌ bwadzʉ̌, Yeso pu a pɑkhʉ̌ pyə təm tisuŋ.

Thə nthɔmmthə yə́m, piŋnthʉm pu a mcwyɛ'nyə

(Mt 21.20-22)

20Wap lə nə́ cyə̀ fɔkdzʉ̌, jɔ thə́ nthɔmmthə bɑ ǎ yəm tə́ ŋkhəm nə gɛ tsyə́. 21Pɛtrɔ kamtə gɔm bi Yeso gɑ: Rabi, yɔ thə́ nthɔmmthə́ yə o kɑ nyəŋ dò nə a yəŋ bɑ ǎ yə́m awɛ. 22Yeso pa' bi pu gɑ: Po ghə piŋnthʉm nə Si. 23Kwa' nyənyɔ gɑ̌ siŋ wɔ gɑ mo ghɔm bi kuŋgǒ yə̀ŋ gɑ gɑ́: Lu tsa' a gɔ ŋkho shyə lɑpʉə, biŋ bɑ tə zhʉ'nyə nthʉm tʉ́m é, da' gɑ biŋ gɑ́ ywə yə e gɔm a a gɔ pɑ po'o, bɑ ywə bɔ gɔ pəmtə. 24A po'o tə gɑ̌ siŋ wɔ gɑ: Guŋ ywə awɛ yə pǒ lo nə mcwyɛ'nyə̀ a, po piŋ gɑ po e da' ŋkwi ywə bɔ, a Si hɑ ywə bɔ bi po. 25Bi a po nəŋ biŋ nthiŋnyə thə́ bɑ shwyɛ'nyə Si a pɑ gɑ po a mo ghə nwə̀, po nə shwyɛ' é, po'o gɑ tá yɔ yə ě kɛbə̀ŋ a lɑ mɔ mhɔ nə shwyɛ' wɔ. 26Nə pa' po pɑ tə́ lɑ mhɔ pyə shɑ́ pɔ shwyɛ' wap bɑ Ta yɔ yə́ ě kɛbəŋ a tə́ gɔ lɑ mɔ mhɔ cwyɛ' wɔ pɑ́.

Tʉɔ Yeso

(Mt 21.23-27; Lk 20.1-8)

27Wap lə pɑ̌nyə Yerusalɛm, Yeso pɑ Dyə Si bɑwə giŋtə́, mkamsi gwyəgwyə, ba pɑ zhyə́ mco' pu a mghətso lə sɔ' bəŋ e. 28Həŋtə é gɑ: O dɑ ya tʉɔ gə ywə bǎ? Kɑ wɑ̌ hɑ tʉɔ bu tə́ o nə gə? 29Yeso ghɔm bi pu gɑ: Gɑ̌ gɔ həŋtə́ wɔ ta' nwə̀. Po la ba' bəm bɑ gɑ gɔ siŋ wɔ tʉɔ yə gɑ̌ nə gə nwə bɔ a. 30Kwǐshyə́ Yohane lə fɑ m kɛbəŋ kɑ m bi pɔmnəŋ? Po pa' bəm. 31Wap lə sɛ̌ cəcɑ̌ pu gɑ: Pɑ̀ ghɔm gɑ́ kɛbə̀ŋ bɑ e gɔ ghɔm bi pɑ̀ gɑ́ tə nwə kɑ́ bɑ po lě tə́ piŋ e? 32Pɑ gɔ nəŋ ghɔm gɑ́ bi pɔmnəŋ a? Nə pa' wap lə bɑwə bwɔk vəŋ pɔ pyə wap lə bɑ si a, nə pa' guŋ yap awɛ lə́ bɑwə sɛ gɑ́ Yohane lə bɑ́ kwa' gɔm ghɔm Si. 33A lə pɑ̌ po'o wap pa' bi Yeso gɑ: Pyə ka zhyə́. Yeso piŋ gɔm bi pú gɑ: Ba myə̀ yɑ̌ pɑ́ ŋ dɑ́ siŋ wɔ tʉ̀ɔ yə gɑ̌ nə gə mnwə bɔ a.

Currently Selected:

MARKUSI 11: NTGomala

Highlight

Copy