MATIO 18

Mo gwyə nthʉm Nəfo

(Mk 9.33-37; Lk 9.46-48)

1A lə́ pɑ́ cwə o bɔ, pɑkhʉ̌ pyə́ sɔ' bəŋ é həŋtə e gɑ: wɑ̌ bɑ mo gwyə nthʉm Nəfo kɛbə̀ŋ? 2Yeso lə ké muywə mú, jap e cəcɑ́ pú 3biŋ gɔm gɑ: Gɑ̌ siŋ wɔ kwa' nyənyɔ gɑ́ po pɑ́ tə́ kwyəpnyə biŋ shʉ' pa' pǒmkəcɔk po a, bɑ gɛ̌, po tə́ gɔ sɔ' kó nə́ Nəfo kɛ́bə̀ŋ pɑ. 4Mo yə e gɔ sɔ' zhi mo ŋkho' pa' mú yəŋ gɑ a, bɑ̀ mo gwyə nthʉm Nəfo kɛbəŋ. 5Mo yə e lɑ muywə mú pa' yəŋ gɑ nə tso tsɑ̌ a, bɑ e dɑ pa' pɑ́ kwa' myə̀.

6Da' gɑ́ mo yə́ e fa'tə bǎ tá' mo nə pǒmkəcɔk po pɔ gɑ pyə wap biŋ a, bɑ dzə̀ bi mo bɔ gɑ pu cə̀ŋ mɑ gwɔ' nthuŋ e ma' e nthʉ́m tsʉ̀m shyə́ lɑpʉə. 7Ghəghʉɔ bi dzʉ̌ yə a fa'tə pɔmnəŋ po'o a, əŋ, a buŋ gɑ fa'tə pɑ wə́, da' gɑ́ ghəghʉɔ bɑ bi mo yə fa'tə shyə m nə́ e a. 8A pɑ gɑ pú u kə́ kwə ó lə́ gɔ fa'tə o, o ya' gwa' tə́ gʉə sʉəsʉə; nə pa' dzə gɑ o ko nə́ vɔk m kam kwə kə́ m kam pu lə́, shyə́ pa' bi a pɑ́ pu ma' o nthʉm mɔk mamà pu a bú mǔ məbʉə kə́ pu a mkwə mǔ məbʉə lə́. 9Biŋ bɑ́ bi a bɛtsə o pɑ̀ gɔ fa'tə o nə vʉ nə mhɔ, o té e gwa' e tə́ gʉə sʉəsʉə; dzə gɑ o kó nə vɔk kəpitsə shyə pa' bi a pɑ́ pu ma' o nthʉ̀m mɔk mama pu a mnyə mǔ məbʉə a.

Mú jʉ̀jʉ̀ bipi

(Lk 15.3-7)

10Pó pɔm nə wak sɔm mú nə pǒmkəcɔk po pɔ̌ gɑ, nə pa' gɑ siŋ wɔ gɑ a bɑ́ kɛbəŋ m aŋgəle pap pɑ nthiŋnyə tə́ pwa dzə̌ Tá ǎ. 11Nə pa' Mu mò lə́ sɔ' nə vɔk ywə yə a lə́ pi a. 12Pǒ jɔ̌ yɔ́ gɑ́ kɑ̀? A po'o bi a pɑ mo ghə jʉ̀jʉ̀ tsyə́ ŋkhə́, mu' ta' piŋ nthəm nə pú bi, bɑ́ e tə́ gɔ tak pyə shwɔpvʉ̌' mgham vʉ̌' dəm kuŋ, ghɔ cəŋ yə é bi a pa a? 13Gɑ̌ siŋ wɔ kwa' nyənyɔ gɑ́ e cwə tə jɔ́ e bɑ e gɔ ŋwɛnyə nə e tə́ cyə nə pyə shwɔpvʉ̌' mgham vʉ̌'. 14A dəŋdəŋ po'o tə́ Tá yɔ kɛbəŋ shəŋ gɑ́ sɔmmo nə pǒ pɔ gɑ kɑ́ pi.

Nthɔknyə mfɑmfɑ

15A pɑ́ gɑ́ fɑ o hɔ́nwə̀, o ghɔ jɔ e, po e pɑ́ pɑ́ pɑ́pʉə, o cɔktə e. E yu' bɑ o tsʉ́ fɑ o. 16E pɑ́ tə yu' bù, o piŋ dɑ ta' mo kɑ pɔ pʉə lə́ po'o gɑ mghɔm pɔ pʉə kɑ pɔ tá lə nyap nwə bɔ.

17Bi a e kəŋnyə, nə yu' bi pu a, o siŋ cu'tə pɔ Kristo, bi a e piŋ ŋkhəŋnyə nə yu' bi cu'tə, o yɔ e cwəlɔ m pa' tə́ pɑ yə Yudea kə́ pa' ŋkwi shwɔp a lə. 18Nə pa' gɑ siŋ wɔ kwa' nyənyɔ gɑ́: Guŋ ywə awɛ yə pǒ kwɑ dəmcǎ' a pu gɔ sɔ' kwɑ kɛbəŋ, a guŋ ywə awɛ yə po ŋkhyɛ' dəmcǎ' a pu sɔ' kyɛ' kɛbəŋ.

19Gɑ piŋ siŋ wɔ kwa' nyənyɔ gɑ pɔ pɑpʉə cəcɑ́ po dəm cá' pɑ ŋkwishwə dó pɑ́ kə́lə́, bɑ Tá a yə e kɛbəŋ a gɔ hɑ́ bi pù. 20Nə pa' tsʉ' yə́ pɔ pʉə kɑ pɔ tá lə cu'tə́ nə́ nə́ tsǒ tsɑ á bɑ́ gɑ bɑ́ cəcɑ́ pú.

Nwə co'fo tə cɔmmtsò

21Pɛtrɔ lə fʉ'tə nɑ e gɔ bəŋ Yeso gɔm bi e gɑ: Cyəpɔ, cwə yə́ fɑ a hɔnwə bəm a, bɑ gɑ̌ gɔ nə cwyɛ' e mcʉm sʉ'ʉ? Mcʉm sɔmbʉə lə́? 22Yeso ghɔm bi e gɑ: Ŋ tə gɔ ghɔm bu gɑ́ tə́ ŋkhəm da' mcʉm sɔmbʉə pɑ́ o gɔ nə cwyɛ'e mcʉm mgham sɔmbʉə jyə sɔmbʉə.

23Nə pa' Nəfo kɛbəŋ shwə pa' nwə mu' fo yə e lə pɑ́ ŋkhʉə ju bi mco' pyə́ a. 24Pú lə́ to' dɑ mu' co' e sɔ' bɑ pu e ghə tsə talɑŋto sha' ghǎm. 25Pa' a lə́ bɑ e ka ghə́ ywə nə nthuŋ a, fo lə́ ghɔm gɑ́ pu fiŋ e, ba jwi e pu a po pyə́, ba guŋ tsə tsyə awɛ nə nthuŋ jú e. 26Gɛfa' bɔ lə̀ nǔŋ mkwə fo gɔm gɑ: Na' byap a, gɑ gɔ tuŋ. 27Mtso myə́ lə kú tap e, e lɑ jú e nə shwyɛ' e, nthak e nəŋ e ghɔ. 28Gɛfa' bɔ lə nə təm dzʉ́, pu mu' só e yu'tə, e pɑwə ŋkhʉə e tsə bɛ ŋkhə. E tɔm e nə nthuŋ e, nwɔ' nthuŋ e pɑ nə zhwə e, bɑ́ gɔm gɑ: Tuŋ ywə yə pǔ ya a. 29Só e lə́ núŋ mkwə e, biŋ shwyɛ'nyə e gɔm gɑ: Na' byap a gɑ̌ gɔ tuŋ. 30Da' gɑ́ e kə́ŋnyə̀, biŋ gə pú nyəŋ e cɛ́ tə nə byap gɑ́ e tuŋ jú e. 31Mso pyə́ lə nə yɔ ywə yə a shyə́ a, nwə pɔk wap té' o; wap ghɔ siŋ tà yap nwə yə a nthəm a. 32Tá yap lə ké gɛfa' e bɔ gɔm bi e gɑ: Gɛfa' cwəpùŋ, o lə́ cwyɛ'nyə a, ŋ də jú o nə shwyɛ' o awɛ. 33O la tə bɑ́ pɑ́ o cɔmmtso sò o pa' ŋ də cɔ́mmtso mu a pɑ a? 34Tap e lə yɛluŋ nə e, hɑ e bi fəfə, tə nə byap gɑ́ e túŋ guŋ ywə awɛ yə pu lə bɑwə ŋkwi bi a. 35A dəŋdəŋ po' tə́ Tá a kɛbəŋ gɔ sɔ' ghə nə po, bi a pɑ́ gɑ́ bǎ ya mo lə nə po ka lɑ mhɔ fɑ e nə shwyɛ' e tə nthʉ́m tʉ́m e a.

Currently Selected:

MATIO 18: NTGomala

Highlight

Copy