MATIO 19

Mghɔm Yeso nə́ nə zhəŋ mjwǐ

(Mk 10.1-12)

1Cwə yə́ Yeso lə́ miŋ nə ghɔmmnwə a, dú Galilea gɔ Yudea nə yə mu' jʉɔ Yurdɛŋ 2pɔmnəŋ jɔmyɔ̌m lə́ bɑ jʉ̀m e, e piŋ bɑ́ jɛ́ wap tsʉ'ʉ. 3Pɑ Farisai ghɔ bəŋ e dəŋtə e gɔm gɑ: A bɑ pu piŋ gɑ bi a pɑ mbɛ zhəŋ jwi e bǎ nə kə́ a? 4Yeso pa' gɑ: Po ká ké gɑ nə́ nə́ to' Nyap dzʉ́ lə̀ ghə wap Mbɛ pu mjwǐ, 5biŋ gɔm gɑ: A shyə̀ m po'o mbɛ pɑ́ gɔ sɔ' təm nə tap e ba nə map e, piŋ kwɑ́ m nə jwi e, wap pɑ́pʉə piŋ bɑ́ pɑ́ ta' bapnɑ́ yɑmu'. 6A bɑ́ po'o wap lə́ piŋ bɑ́ pɑpʉə pɑ, wap bɑ pɑ ta' bapnɑ yɑmu'. A po'o tə́ ywə yə Si tamtə a mo kɑ́ haptə. 7Pɑ Farisai piŋ gɔm bi Yeso gɑ: Nwə kɑ́ bɑ Mosɛ lě bvə gɑ pu pɑ́ hɑ ŋwa'nyə nə jəŋ mjwǐ cwə nə zhəŋ mjwǐ? 8Yeso ghɔm bi pu gɑ: A lə shyə m nə pa' a bɑ́ tʉm tsɔ sɔk gɑ́ kùŋ a, tə̀ Mosɛ piŋ gɑ po pɑ́ jəŋ pɑ jwǐ pɔ. Da' gɑ́ nə́ nə́ to' a lá tə́ bɑ̀ po'o pɑ. 9Gɑ ghɔm bi po gɑ: Mo zhəŋ jwi e tə a bɑ́ pɑ́ da' nə nwə nə ka thə a biŋ ŋkho mu' mjwǐ bɑ e ghə ghap.

10Pɑkhʉ pyə ghɔm bi e gɑ: A pɑ́ gɑ́ vɔk mbɛ bəŋ mjwǐ nthʉm lɔmdyə bɑ m pa' a, bɑ a ka kwitə nə lɔmdyə̌. 11E ghɔm bi pu gɑ: Guŋ pɔ awɛ tə́ ju' ghɔm tsɔ pɑ̀ tə né da' pɔ pyə a hɑ gɑ́ wap yù' a.

12Nə pa' shɑ́ msʉ̌ pɔ si bɑ mmʉ́ə pap nə́ dzə wap. Shɑ̀ mkwì piŋ bɑ yap bɑ pɔmnəŋ nə dɑ wap gə mkwi; shɑ́ piŋ bɑ́ bɑ pɑ́ wap nə dɑ nɑ tsap gə mkwi dù nə́ Nəfo kɛbəŋ. Jú'yǔ' yú'.

Yeso nyəŋ byanyə nə pǒmkəcɔk pó

(Mk 10.13-16; Lk 18.15-17)

13A lə́ pɑ́ po'o pɔmnəŋ lɑ pǒmkəcɔk pó nə sɔ' bi Yeso gɑ́ e nyəŋ byanyə nə pú, biŋ shwyɛ'nyə Si. Pɑkhʉ̌ Yeso pɑ jəŋ wap. 14Yeso ghɔm gɑ: Po tak pomkəcɔk pó pɑ́ nəŋ, ka po kɔ gɑ́ wap kɑ sɔ' bəm, nə pa' Nəfo kɛbəŋ bɑ bi pɔ pyə wap pɑ́ pa' wap a. 15Yeso lə yap bǔ nə pú cwəlɔ dú tsʉ'u gɔ̌.

Mú səm gɛ ywə́

(Mk 10.17-31; Lk 18.18-30)

16A lə pǐŋ bɑ, mu' mbɛ sɔ' bəŋ Yeso gɔm bi e gɑ: Ta, gɑ̌ gɔ ghə gɑ́ kɑ pɑpuŋ tə́ ghə vɔk mama? 17Yeso ghɔm bi e gɑ: Nwəkɑ́ o həŋtə a nwə̀ nə̀ ywə pɑpuŋ? Da' ta' mo nə́ bɑ́ mo pɑpuŋ. O pɑ́ shəŋ nə pɑ́ nthʉm vɔk, o pɑ ŋkhyəp mco' 18E həŋtə́ Yeso gɑ: Má mco'? Yeso pa' gɑ: Kɑ zhwə mò. Kɑ ghə́ ghàp. Kɑ zhʉ̀. Kɑ kwinthɛ cwanwə̀. 19Ghə mku' tɔ̌ pu mɔ̌. Nə́ nɑ miŋ. O kúŋ mo yə e bəŋ o a pa' o ŋkhuŋ thə́ nɑ o a. 20Mú səm bɔ ghɔm bi e gɑ: Gɑ́ zhyə̀ guŋ e bǎ awɛ. A wə biŋ jak a kɑ? 21Yeso ghɔm bi e gɑ: O pɑ́ shəŋ nə pɑ́ dɔlɔ̌ o ghɔ fiŋ guŋ tsə́ tsyə o ghə awɛ, hɑ bi mpə̌ŋ, tə sɔ' gə fʉ́' thə kɛbəŋ. Biŋ sɔ' jap jʉ̌m m̀. 22Mu səm bɔ lə yu' ghɔm tsɔ, sə é fi' e ghɔ, nə pa' a lə́ bɑ e ghə tsə tɑ́' a.

23Yeso piŋ gɔm bi pɑkhʉ pyə gɑ: kwa' nyənyɔ gɑ siŋ wɔ gɑ̌ a gɔ sɔ' tʉɔ bi gɛ ywə́ nə ko nə Nəfo kɛbəŋ. 24Gɑ piŋ kwi' siŋ wɔ gɑ, a yɛ̀ bi kamelo nə cyə nə fǎ dàp syap shyə pa' bi a pɑ gɛ ywə ko nə̀ Nəfo Si a. 25Pɑkhʉ pyə́ lə nə yu' ghɔm tsɔ̌, a cyə wap, wap pɑ́ gɔm gɑ: Tə́ a po'o wɑ́ ghɔ sɔ' vɔk? 26Yeso lə le wap dəŋdəŋ gɔm gɑ: Ywə yə a shyə̀ pɔmnəŋ a tə́ shyə Si pɑ́.

27Pɛtrɔ lə́ lɑ ghɔm gɔm gɑ: Pyə le ŋthak guŋ tsə awɛ jap jʉm o. Tə́ a gɔ sɔ' pɑ́ nə́ pyə pɑ́ m gɑ́ kɑ? 28Yeso ghɔm bi e gɑ: Kwa'nyənyɔ gɑ ghɔm bi po gɑ: Cwə yə pu gɔ sɔ' ghə guŋ ywə awɛ msə a, cwə yə Mu mo gɔ sɔ' cwə́ dəm kwɔ' wu'tə̀ é a, wɔ pyə po lə yap jʉ̌m m̀ a, po cwə nə mkwɔ' shwɔppʉə mgham, bɑ́ sa' mtuŋ dyə Israɛl shwɔppʉə mgham. 29Biŋ bɑ bi a bǎ wɑlə́ pɑ́ bɑ e lé nthak la' tsyə, mfɑ pyə́ pyə pɑ bɛ ba pyə pɑ jwǐ, tap e, map e, pó pyə, kɑ be myə́ po' nə tso tsɑ̌ bɑ e gɔ sɔ' kwi tsə bɔ tə a yɔm piŋ kwi ba vɔk mama. 30Bo'gwyə pɑ dzə̀ gɔ sɔ' cʉ' pɑ jʉ̀m, a pɑ jʉ̀m cʉ' pɑ dzə̀.

Currently Selected:

MATIO 19: NTGomala

Highlight

Copy