MATIO 20

Cuŋ mghɛ fa' pɑ sɔ' mjʉ̀m

1Nəfo kɛbəŋ shwə pa' mu' mo gɛ lǎ' yə e lə́ təm mɑfɔkdzʉ̌ bɑ dɑ mghɛ fa' pé mthə mlu' e a. 2Pú a mghɛ fa' lə́ yap gɑ e gɔ hɑ bɛ ŋkhap bi pú nə tyɛ'dzʉ́ cwəlɔ̌, e cya wap pé mthə mlu' e. 3A lə piŋ nə cyə mnam tá e təm jɔ shɑ pɔ bɑ wap tiŋnyə tsʉ'u tɑ pɑwə gə ywə, 4e ghɔm bi pu gɑ: Ba wɔ yɔ ghɔ pe mthə mlu' m̀, gə hɑ ywə yə a ku'nyə a bi pò. 5Wap lə ghɔ̌. E lə piŋ nthəm nə batə́ mnam nthɔk, ba mnam vʉ̌', kwi' gə pɑ po'o. 6A lə pɑ nə gwɛ a jyə mnam shwamu' mgham e kwi' nthəm, biŋ jɔ́ shɑ pɔ̀ bɑ wap tiŋnyə tsʉ'u, gɔm bi pu gɑ: Nwə kɑ bɑ po ywɔk tsɔ'ɔ tə ghə sɔmywə? 7Wap pa' bi e gɑ, sɔmmo bɑ e ka lɑ wɔk fa'. E ghɔm bi pu gɑ: Ba wɔ yɔ ghɔ pé m̀. 8A lə kəm bwadzʉ̌, gɛ pě ghɔm bi ŋkho nthɛ é gɑ: Ké mghɛ fa', hɑ ŋkhap fa' bǎ ya mo lə bi é, ntho' nə pɔ pyə wap sɔ' jʉm a, miŋ nə pyə wap la' dəŋdzə sɔ' a. 9Pɔ pyə wap lə sɔ' nə batə mnam shwamu' mgham a, lə sɔ̌', bǎ ya mo lə nə́ pu kwi ta' bɛ ŋkhap. 10Pɔ pyə wap lə́ tsə́ pé a lə́ nə sɔ' bɑwə ŋkwɛ gɑ́ pu gɔ kwi' yáp dəŋ ŋkhap; da' gɑ bǎ ya mo lə́ nə pu lə kwi pɑ ta' bɛ ŋkhap. 11Wap lə́ nə kwǐ bɑ ŋkhuku nthuŋ pú nə gɛ la' a 12bɑ gɔm gɑ: Pɔ pyə wap sɔ' m jʉm a bɑ wap fa' da' nə ta' nam, o piŋ gə nə pu pɑ́ pá' wɔk pyə́ pyə ywɔk fa', mɑ nam tyə́ wɔk a. 13Da' gɑ gɛ la' a ghɔm bi mu' mo nə́ pu gɑ: So a, ŋ kha hɔ sɔmywə bu, pu ké tə́ ka'nyə nə bɛ ŋkhap a? 14Pé ywə yə a yu a gɔ. Gɑ̌ gɔ hɑ pɑ dəŋ yə gɑ hɑ bu a bi yə́ŋ mò. 15Pù ka piŋ gɑ́ gə nə ywə yə a yɑ̌ a pa' gɑ kuŋ a? Kɑ bɛtsə o bɔk pa' gɑ mo pɑpuŋ a? 16A po'o tə́ pɑ jʉ̀m gɔ sɔ' cʉ' pɑ dzə, a pɑ dzə piŋ shʉ' pɑ jʉ̀m.

Yeso siŋ batə mcʉm nthá gɑ é gɔ pfʉ piŋ yam

(Mk 10.32-34; Lk 18.31-34)

17Yeso lə́ nə́ pʉɔ ghɔ Yerusalɛm ŋkhe pɑkhʉ̌ pyə nə gɔ tsʉ' tsiŋ, biŋ giŋ mə́jyə̀ gɔm bi pú gɑ: 18Pó yɔ, pɑ si po' bʉɔ m Yerusalɛm, pu hɑ Mú mo bi mkamsi gwyəgwyə pu a pɑ zhyə́ mcò'; wap ya'shɛ e gɑ pu gɔ zhwə e, 19piŋ hɑ e bi pɑ tə pɑ pɑ Yudea gɑ́ wap yəmtə é, biŋ dɑ mshɔ̀m shwɔ́ é, ŋkham é thə́ bɛnyəpɛnyə; a piŋ bɑ nə batə́ tyɛ'dzʉ́ yɑtá e yam nə vʉ̌.

Pǒ Zebede

(Mk 10.35-45)

20A lə pɑ́ po'o, ma pǒ Zebede sɔ' bəŋ Yeso pu a pó pyə, ŋkham mkwi'tə myə́ dzə é nə lo mu' ywə bi e. 21Yeso həŋtə é gɑ: O shəŋ gɑ́ kɑ̀? E ghɔm bi e gɑ́, yap gɑ́ nthʉm Nəfo tsǔ po pɑ pɔ gɑ pɑpʉ́ə mu' cwə nə́ ghə̌ŋ pú u yə tʉɔ, yə mu' cwə nə ghə̌ŋ pú u yə kwyap. 22Yeso pa' gɑ: Po ka zhyə ywə yə pó wə dó a. Bi a pɑ́ po nwə́ nthú' yə gɑ gɔ nwə́ a? Wap ghɔm gɑ bi a pɑ́ pyə nwə́. 23E ghɔm bi pú gɑ: Po gɔ la' nwə nthu' a, da' gɑ́ sɔ' m nə nə́ cwə nə ghə́ŋ pu a yə tʉɔ ba yə kwyap, tə́ myə̀ nə hɑ bi mo pɑ̀: Pù gɔ la' hɑ bi pɔ pyə Tá a lə nyaptə bi pú a.

24Pyə pɔ gham lə nə yu' po'o jɛ́luŋ nə mfɑ̌ pɔ pɑ́pʉ́ə. 25Da' gɑ́ Yeso ké wap gɔm bi pu gɑ: Pó zhyə gɑ́ pɑ sa' mguŋ dɑ tʉɔ̀ yap nə nthɔm mguŋ, pɔ gwyəgwyə pɑ́ hya guŋ. 26A tə́ bɑ pɑ́ po'o cəcɑ̌ po pɑ́, mo pɑ́ gɔ pɑ mo gwyə cəcɑ̌ po e pɑ́ gɛfa' yɔ. 27Biŋ bɑ bi a mo pɑ shəŋ nə pɑ́ dzə̀ cəcɑ́ po e pɑ ŋkwɔ yɔ. 28A po'o tə́ Mu mo la tə́ sɔ' gɑ pu fa' bi e pɑ, e lə́ sɔ' m nə fa', piŋ hɑ vɔk é nə kwyəpnyə pɔ jɔmyɔ̌m.

Mfʉ̀ Yeriko pɑ́pʉ́ə

29Yeso lə́ nə́ təm Yeriko vəŋ pɔ yap jʉ̀m e. 30Shɑ́ mghɛ fʉ̀ pɑ́pʉ́ə pyə a lə́ bɑ wap cwə kəŋ məjyə̀ a lə́ nə yu' gɑ́ Yeso nə wə shyə̀, shwe gɑ: Cyəpɔ Mu David cɔmmtsò mɔk! 31Pɔmnəŋ lə́ pɑ shɑnyə wap gɑ wap lɛtə, wap piŋ shwe tɑ thə gɑ: Cyəpɔ Mu David cɔmmtso mɔk 32Yeso lə́ tiŋnyə̀, ŋkhe wap gɔm bi pu gɑ: Po shəŋ gɑ gə gɑ kɑ́ bi pǒ? 33Wap ghɔm bi e gɑ: Cyəpɔ, gɑ mnyə mɔk ghyɛ'. 34Mtso map lə kǔ Yeso, e co' pǔ nə mnyə map. Wap wuŋ jɔ tsʉ' biŋ jap jʉ̀m e.

Currently Selected:

MATIO 20: NTGomala

Highlight

Copy