MATIO 17

Yeso sɑnyə

(Mk 9.2-13; Lk 9.28-36)

1A lə nə cyə́ tyɛ' nthɔk Yeso lɑ Pɛtrɔ, ba Yakop pu Yohane fɑ é pu a pú təm gɔ dəm sʉəsʉə kuŋ dǒ pú. 2Yeso sɑnyə dzə̌ pú: Sə́ é ləŋnyə pa' sə́ nam a, dzə tsyə fɔk pa' ŋkha' a. 3Wap piŋ jɔ Mosɛ pu Elia ŋwak pu a Yeso pɑwə shɔm nwə̀. 4Pɛtrɔ wuŋ ŋkho nə́ gɔm bi Yeso gɑ: Cyəpɔ, a puŋ gɑ́ pɑ pɑ́ pɑ́ tsɔ'ɔ; o kuŋ bɑ́ gɑ́ gɔ zhɔk mpfɑ̀ tsɔ'ɔ mɑ ntha. Mu' pɑ́ yǔ, mu' pɑ́ yə Mosɛ, mu' pɑ yə Elia. 5Cwə yə e lə pɑ́ gɔm po'o a, guŋ nə yɔ mlwa dəŋnyələŋnyə pfɔptə wap. E yu' gi mo nthʉm mlwa ghɔm gɑ: Mo yəŋ bɑ Mu a yə gɑ̌ ŋkhuŋ e pɑpuŋ a, mo yə e buŋ a nə cwɔ' e. Po yu'nyə e. 6Pɑkhʉ̌ Yeso lə nə yu' po', bwɔk té', bvʉtə si pfɔppfɔp. 7Yeso sɔ' bəŋ pú, sho' pu nə pú gɔm gɑ: Po lusi! Ka po pwɔk! 8Wap lə pʉ' mnyə map, biŋ jɔ pɑ́ da' Yeso dó é. 9Pa' wap lə pɑ́ dzəŋ fɑ kuŋgó nə pɑnyə a, Yeso co' bi pú gɑ: Po pɔm nə siŋ sɔmmo nwə nə ywə yə a shyə po yɔ a, tə́ ŋkhəm cwə yə́ Mu mo yam nə vʉ̌ a.

10Pɑkhʉ̌ Yeso lə piŋ həŋtə́ e gɑ: Nwə kɑ́ pɑ zhyə́ mcò' pɑ́ gɔm gɑ́ Elia gɔ sɔ' ləŋdzə sɔ̌'? 11E pa' bi pu gɑ: A nyənyɔ gɑ Elia gɔ sɔ' sɔ' piŋ nyap guŋ mnwə awɛ. 12Da' gɑ́ gɑ siŋ wɔ gɑ́, Elia le da' sɔ̌', wap lɑ nthə nə piŋ e, gə nə e pa' wap zhyə a. Ba Mu mo yə gɔ yɔgo' bi pú 13pɑkhʉ̌ pyə yu' gɑ e lə́ gɔm Yohane nu'pɔ shyə́.

Yeso yɛ̀ mu' mú zhwenyə cwəpuŋ pɑ nə é

(Mk 9.14-29; Lk 9.37-43)

14Wap pu a pú lə ghɔ tə́ ŋkhəm bəŋ pɔmnəŋ, mu' mbɛ sɔ' ŋkham kwi'tə dzə e gɔm gɑ́. 15Cyəpɔ, cɔmmtso mu a, e bvʉ, biŋ bɑwə́ jɔgo' té' o; e bɑ̀ mu'cwə bvʉ mɔk, bɑ mu'cwə bvʉ̀ shyə. 16Gɑ cəŋtə dɑ e gɔ bi pɑkhʉ̌ pǔ, da' gɑ́ la' wap ku' nə yɛ̀ é 17Yeso lɑ ghɔm gɔm gɑ: Wɔ pɑ tə́ zhyə nə́ piŋ, mghɛ mhɔ, gɑ̌ gɔ pɑ́ bəŋ po tə kəm sǒ? Gɑ gɔ ŋkhyəp tʉ́m nə po tə kəm sǒ? Po lɑ e sɔ̌' tsɔ'ɔ bəŋ m̀. 18Yeso lə cɔk zhwenyə cwəpuŋ, e təm nə mu, mu bɔ wuŋ jɛ́ pɑ́ cwə o bɔ. 19A lə pɑ́ po'o pɑkhʉ̌ pyə sɔ' bəŋ é gɔm bi é gɑ: Nwə kɑ́ bɑ pyə ka kú' nə zhəŋ e? 20Yeso pa' bi pu gɑ: Bɑ piŋnthʉm yɔ kɔk. Nə pa' gɑ̌ siŋ wɔ kwa' nyənyɔ gɑ́ tyɛ'dzʉ yə po ghə piŋnthʉm dəŋ msɔm jap a, bɑ po gɔ ghɔm bi kuŋ go yəŋ gɑ: Lu tsɔ'ɔ gɔ tsi' i, a ghɔ̌. A sɔmywə lə piŋ shyə́ wɔ. 21A piŋ bɑ po'o nə zhəŋ yəŋ nthi zhwenyə cwəpuŋ pɑ pɑ̌ m nə́ nə cwyɛ'nyə Si pu nə cwə tɑ́ tsʉ̌ ywə́

Yeso kwi' gɔm nwə vʉ é pu nə yam nə vʉ̌

(Mk 9.30-32; Lk 9.43-45)

22Cwə yə́ wap lə cu'tə Galilea, Yeso ghɔm bi pú gɑ: Pú gɔ hɑ Mù mo nə bǔ pɔmnəŋ; 23wap zhwə e, a piŋ nə pɑ́ batə tyɛ'dzʉ yɑtá e yàm nə vʉ̌. Wap lə yú' po'o, nwə pɔk wap té' o.

Yeso pu Pɛtrɔ ma' shwɔp

24Cwə yə́ wap lə́ kəm Kapɛrnaum a, pɑ kwishwɔp Dyə Si ghɔ bəŋ Pɛtrɔ gɔm bi é gɑ: Tà yɔ tə́ ma' shwɔp a? 25Pɛtrɔ ghɔm gɑ: bɑkɔ. Pɛtrɔ lə́ pɑnyə dyə cwəlɔ, Yeso ləŋdzə gɔm bi é gɑ̌ O yɔ yǔ gɑ́ kɑ̀? Mfo mfo dəmcǎ' ŋkwi shwɔp bi pɑ wɑ? Bi pɔ pap kɑ m bi mcyə́nyə̀? 26Pa' Pɛtrɔ lə̀ pa' gɑ́ bi mcyə́nyə̀ a, Yeso lə ghɔm bi é gɑ́: Nə kəlɑ́ pǒ tə́ bɑ mtho' pɑ́. 27Da' gɑ́ nə cyətə fa'tə pɔ bǎ, ghɔ shyə lɑpʉə, má' bà', gəm dəŋdzə̀ bápgù yə́ e gɔ cɔk a, biŋ ŋa' shwə̀ é: O gɔ yɔ́ bʉm nthʉm o. Lɑ nə́ gɔ hɑ bi pu nə́ yɑ̀ shwɔp ba yù.

Currently Selected:

MATIO 17: NTGomala

Highlight

Copy