MATIO 16

Mtiŋ cwə̀ dzʉ̌

(Mk 8.11-13; Lk 12.54-56)

1Pɑ Farisai pu a pɑ Sadukai lə sɔ' bəŋ Yeso, dəŋtə e gɔm bi e gɑ é la'tə wap mtiŋ myə a fɑ m kɛbəŋ a. 2E pa' bi pu gɑ: A bɑ bwadzʉ̌ po ghɔm gɑ: Dzʉ̌ gɔ puŋ nə pa' po yɔ dzʉ̌ pɑwə bɛ pa' mɔk a, 3a piŋ bɑ fɔkdzʉ̌ pɔ ghɔm gɑ dzʉ́ gɔ pɔk tyɛ' ɔ nə pa' kɛbəŋ wə bɛ sónyə̀ sǒnyə́ a. A bɑ po zhyə nə yu' mtiŋ kɛbəŋ, da' gɑ bɑ po ka ku' nə zhyə mtiŋ cwədzʉ̌. 4Pɔ nə wɔdzʉ́ cwəpùŋ, pɑ ghə ghap həŋtə mtiŋ. Sɔ' m nə mtiŋ, pu tə́ gɔ piŋ la'tə wap sɔm mtiŋ a tə́ né da' mtiŋ Yona pɑ̀. E lə̀ ghɔm po'o nthak wáp tsʉ'u gɔ̌.

Kwɔ' msɛ̌ pɑ Farisai pu a pɑ Sadukai

(Mk 8.14-21)

5Pɑkhʉ̌ Yeso lə́ nə́ sa' ghɔ nə yə mu' jʉɔ, dʉɔnyə nə lɑ̀ msɛ. 6Yeso ghɔm bi pu gɑ: Po pɔm! Po pɔm ywə pɑ Farisai pu a pɑ Sadukai. 7E lə ghɔm po'o pɑkhʉ̌ pyə pɑwə sɛ gɑ́: A dù pa' pɑ ka lɑ msɛ́ a. 8Da' gɑ̀ Yeso zhyə, gɔm bi pu gɑ: Wɔ mghɛ piŋnthʉm ŋkho', nwə kɑ po sɛ gɑ pa' po ka lɑ msɛ a? 9Po jɑ tə́ yu' a? Po ka kamtə́ nwə msɛ mta' tɔ nə pɔ sha'tɔ biŋ gə dəŋ msap myə́ po lə lak bo' myə́ nə́ a? 10Kɑ msɛ mta' sɔmbʉə nə pɔ sha' pfʉə ba dəŋ mkhəkhʉə bo' myə́ a? 11Nwə kɑ́ po lə yu' gɑ ŋ kha tə́ gɔmnwə m nə sɛ́ pɑ́ nə cwə yə ŋ khɑ gɔm bi po gɑ́ po pɔm kwɔ'msɛ̌ pɑ Farisai pu a pɑ Sadukai!

12A lə pɑ́ po'o wap yu' gɑ e katə̀ gɔm m gɑ́ wap pɔm ŋkwɔ'msɛ pɑ́; gɑ e gɔm gɑ wap pɔm ywə yə pɑ Farisai pu a pɑ Sadukai ji'tə pɔmnəŋ a.

Pɛtrɔ zhyə gɑ́ Yeso Mú Si

(Mk 8.27-30; Lk 9.18-21)

13Yeso lə́ ŋwak nthʉm guŋ Kaesarea Filipo, həŋtə pɑkhʉ pyə gɑ: Pɔmnəŋ gɔm gɑ Mú mo bɑ wɑ? 14Wap ghɔm bi é gɑ: Shɑ́ pɔ gɔm gɑ́ o bɑ́ Yohane nu' pɔ shyə̀; pyə shɑ̀ ghɔm gɑ́ o bɑ́ Elia; shɑ̀ ghɔm gɑ́ o bɑ́ Yeremia kɑ mu' gɔm ghɔm Si lɑ́. 15Yeso piŋ gɔm bi pu gɑ: Kwa' wɔ, pǒ gɔm gɑ́ gɑ̌ bɑ́ wɑ? 16Simon Pɛtrɔ lɑ́ ghɔm gɔm gɑ: O bɑ́ Kristo Mú Si nthʉɔtʉɔ. 17Yeso piŋ dɑ́ ghɔm gɔm bi e gɑ: Simon mu Yona o bɑ́ bùŋtsě, nə pa' tə́ bapnɑ kɑ́ mcyə lə́ nə gə o zhyə po'o pɑ̀, Tá a yə e kɛbəŋ a nə́ gə́. 18Biŋ sɔ' m nə m̀, gɑ ghɔm gɑ o bɑ́ Pɛtrɔ yəŋ la'tə gɑ́ ghǔ gwɔ', biŋ gɔ́ sɔ' kwɑ cu'tə a dəm ghǔ gwɔ' bɔ, mtʉ̀ɔ vʉ lə nəŋ gɔ sɔ' ghə sɔm gʉ' nə̀. 19Gɑ̌ gɔ sɔ' hɑ ki Nəfo kɛbəŋ bu; guŋ ywə awɛ yə ǒ kwɑ́ dəmcǎ' a, pú gɔ sɔ' kwɑ́ kɛbəŋ, a guŋ ywə awɛ yə ǒ kyɛ' dəmcǎ' a, pu sɔ' ŋkhyɛ' kɛbəŋ. 20A lə pɑ̌ po'o Yeso ghɔm bi pɑkhʉ̌ pyə gɑ wap pɔm nə siŋ sɔmmo gɑ e bɑ́ Kristo.

Yeso siŋ pɑkhʉ pyə gɑ́ e gɔ yɔgo' piŋ yam nə vʉ̌

(Mk 8.31—9.1; Lk 9.22-27)

21Tɑ́ fɑ cwə o bɔ Yeso Kristo to' nə siŋ pɑkhʉ pyə gɑ e lə́ gɔ ghɔ Yerusalɛm, yɔgó' té' o bi mghətso, bɑ m bi mkamsi gwyəgwyə pu a pɑ zhyə́ mco', wap ghə pu zhwə e, tə́ e piŋ jam nə vʉ̌ nə batə tyɛ'dzʉ́ yɑtá. 22Pɛtrɔ fəŋ e nə gɔ jʉ̀m, shɔk e gɔm bi e gɑ: Si pfɔptə o m Cyəpɔ! Gɛ̌, bi a lə pɑ́ nə o pa' a. 23Da' gɑ́ Yeso fɛ́ nɑ e gɔm bi Pɛtrɔ gɑ: Lu jʉ̌m m̀ m Sata! O wə bɑ bəŋ m̀ bɑ pɑ ywə fa'tə, nə pa' mkwɛnyə mǔ tə́ wə bɑ́ myə́ Si pɑ́, a pɑ́ myə́ pɔmnəŋ.

Nthi nə nə jap jʉm Yeso

24Yeso lə piŋ gɔm bi pɑkhʉ̌ pyə̀ gɑ: Mo pɑ́ gɔ yap jʉ̌m m̀, e kəŋnyə thə́ nɑ e, biŋ ŋkwa yə bɛnyəpɛnyə, nə jap jʉ̀m m̀. 25Nə pa' mo pɑ́ shəŋ nə vɔk vɔ́k e bɑ e gɔ pi vɔk e bɔ; da' gɑ́ mo yə e pi vɔk é nə m̀ a gɔ sɔ' ghə vɔk. 26A po' bi a pɑ a piŋ ŋkwitə mo nə kʉ̌ gɑ guŋ dzʉ awɛ pɑ bi e, tə́ bɑ ě lɑ vɔk e nə jo? Kɑ bi a pɑ́ mo hɑ kɑ a pɑ́ dəŋ vɔk é? 27Nə pa' Mú mo gɔ sɔ' sɔ' pu a pɑ aŋgəle pyə nthʉm ghu'tə Si a, hɑ bǎ myə́ mcwɔ'fa' wɑlə́ pa' e nə giŋ yə a. 28Kwa' nyənyɔ gɑ̌ siŋ wɔ gɑ, cəcɑ́ pɔ pyə wap tsɔ' a, shɑ pɔ tə́ gɔ sɔ' pfʉ tə yɔ̌ pa' Mu mo sɔ' pa' fo a pɑ́.

Currently Selected:

MATIO 16: NTGomala

Highlight

Copy