MATIO 15

Mfə̀ŋnyə nə mà gùŋ

(Mk 7.1-13)

1A lə́ pɑ̌ po'o pɑ Farisai pu a pɑ zhyə mco' pyə wap lə́ bɑ́ Yerusalɛm a sɔ' bəŋ Yeso gɔm bi e gɑ: 2Nwə́ kɑ́ pɑkhʉ̌ pǔ pɑ́ bɔptə́ mà gùŋ? Nə pa' wap tə sɔk bú map cwə nə́ tsʉ̀ ywə pɑ́. 3Yeso pa' bi pu gɑ: Kwa' wɔ, nwə kɑ́ po pɑ́ bɔptə mcò' Si shyə m nə́ mà gùŋ yɔ? 4Nə pa' a bɑ Si lə́ ghɔ̌m gɑ: ghə mku' tɔ̌ pu mɔ̌, ba m gɑ: Mo yə ě nyəŋ do thə́ tap é kə́ map e a lə, bɑ pu gɔ nyəŋ shɛ́ vʉ thə é. 5Da' gɑ́ po gɔm gɑ́: Mo yə e ghɔm bi tap e kɑ bi map e gɑ̀ ywə kwitə̀ yə ŋ khɑ́ bɑ́ gɔ hɑ bu a zhi tsə́ pwɔ' dɔlɔ̌ a, 6bɑ mo bɔ tə́ gɔ piŋ ghə mku' tap e pɑ́. A bɑ po'o bɑ po lɑ mà gùŋ yɔ, bvɑnyə́ mco' Si. 7Pɑ tsɛbǔ! Esaya lə la' shəŋtə́ gɔm ghɔm Si nə po pa' e lə gɔm gɑ:

8Pɔ pɔ̌ gɑ gə mku' mə̌ pɑ shyə shwə̀.

Da' gɑ tʉm tsáp pɑ́ tə gʉə sʉəsʉə nə m̀

9wap shu'tə se á pɑ pɔpɔ,

nə pa' ywə yə wap ji'tə a

bɑ pɑ́ mco' monəŋ.

Ywə yə a bviŋ mo a.

Ywə mviŋ pú ywə dɔlɔ̌

(Mk 7.14-23)

10Yeso lə́ piŋ ŋkhe pɔmnəŋ gɔm bi pú gɑ: Po yu', tə jú'! 11Tə ywə yə a ŋkho shwə mo a nə bviŋ é pɑ́; ywə yə a nthəm shwə mo a nə bviŋ é. 12A lə pɑ́ po'o pɑkhʉ pyə fʉ'tə nɑ́ hɑ bəŋ é gɔm bi e gɑ: Tə́ o zhyə́ gɑ́ pɑ Farisai nə yu' ghɔm bǎ a fa'tə wáp lə? 13E pa' bi pú gɑ: Gwya ywə yə Tǎ thə́ kɛbəŋ ka tsə̀ a, pu gɔ cwɔ́' 14Po tak wap nə́ŋ: A bɑ̀ mfʉ̀, wap pɑwə shya mfʉ̀; bi a fʉ̀ nəŋ bɑ shya fʉ bɑ wap gɔ pəmtə vʉ́ tɔ́m pɑpʉə. 15Pɛtrɔ lɑ ghɔm gɔm bi e gɑ: Tútə tsɔ ghɔm tə́ tútə bi pyə. 16Yeso ghɔm gɑ: Ba wɔ yɔ jɑ́ pɑ́ mfʉmnyə pɔ a? 17Po ka zhyə́ gɑ́ ywə yə a ŋkho shwə́ mo a, shyə́ vam e, gɔ pu wa' ghʉm a? 18Tə́ ywə yə a nthəm shwə mo a fɑ m nthʉm tʉm e, biŋ bɑ ywə yə a bviŋ mo a. 19Nə pa' mkwɛnyə cwəpuŋ, nə zhwə mo, nə ghə ghap, cǔŋ, cwanwə̀, mcap, bɑ́ tsə tsyə̀ a nthəm nthʉm tʉm mo a. 20A bɑ ywə yə a bviŋ mo a; da' gɑ́ nə tsʉ̀ ywə́ tə sɔk bú tə́ bviŋ mo a.

Piŋnthʉm m jwǐ Kana

(Mk 7.24-30)

21Yeso lə́ lǔ tsʉ'u bɔ gɔ m nə ghəŋ Tiro pu Sidon. 22A lə́ pɑ́ po'o mu' mjwǐ yə́ Kana fɑ́ nə yə bɔ ghə̌ŋ bɑ shwé gɑ: Cɔmmtso mə̌ m Cyəpɔ mú David! Zhwenyə cwəpùŋ wə mɛnyə mu a tə́ a pɑ́ pɑ̀ vʉ̌. 23Da' gɑ́ Yeso lə pa' sɔm nwə bi e. Pɑkhʉ̌ pyə fʉ'tə nɑ hɑ bəŋ e gɔm bi e gɑ: Zhəŋ é nə pa' e wə dɑ gì e nə baknyə wɔk pɑ̀. 24Yeso pa' gɑ: Pú lə́ nthəm a pɑ́ bi mjʉ̀jʉ̀ pyə wap lə la' bi nə tuŋdyə Israɛl a.

25Da' gɑ́ mjwǐ bɔ sɔ' ŋkham mkwi'tə myə́ dzə e gɔm bi e gɑ: Cyəpɔ, kwitə a!

26Yeso ghɔm gɑ: A ka puŋ nə pé ywətsʉ po mkəcɔk po hɑ bi pǒ bvʉ́.

27Mjwǐ bɔ pa' bi Yeso gɑ: A nyənyɔ m Cyəpɔ! Da' gɑ́ pǒ bvʉ́ npfɑ msəsia ywə yə a bvʉsi nə tɑpe mta pap a.

28A pɑ́ po'o, Yeso pa' bi e gɑ: Mamjwǐ, piŋnthʉm o zhi! Nwə o pəmtə́!

Go é lə́ wuŋ jɛ pɑ́ cwəocwə̀ó.

Yeso yɛ mghɛ gho kə́ŋ mʉ'nyə́

29Yeso lə́ lǔ tsʉ'u bɔ, gɔ kəŋ shyə́ lɑpʉə Galilea. Ŋkwɔ' dəm kúŋ gǒ, shwəsi. 30Pɔmnəŋ pɑ́ sɔ' bi é kwa' du é pú a mŋkho'tə, mfʉ̀, mkhʉ̌m, mtə́ghɔm, ba shɑ mthi tə́ jɔm, è pɑ́ jɛ wap. 31Nwə pɑ́ sya pɔmnəŋ nə́ yɔ pa' mtə́ghɔm ghɔm, mkhʉ̌m zhi pɔ mtʉɔ, mko'tə ghiŋ dəŋdəŋ mfʉ yɔ tsʉ'; wap pɑ́ gu'tə Si Israɛl.

Yeso ŋkhim pɔ sha' pfʉə̀

(Mk 8.1-10)

32Yeso lə́ ke pɑkhʉ̌ pyə gɔm bi pu gɑ: Mtsò vəŋ pɔ pɔ̌ gɑ wə ŋkhú a, nə pa' a cwəlɔ̀ tyɛ'dzʉ tá pa' wap pɑ́ bəŋ m̀ a; bɑ wap ka nəŋ gə ywətsʉ, bi a pɑ́ dɑ nəŋ jəŋ wap, bwɔk gɑ wap kɑ kǒ məjyə bvʉ́. 33Pɑkhʉ pyə ghɔm bi é gɑ: Msɛ̌ gɔ fɑ́ hɑ́ dəŋ ywə́ bi pyə́ ghakgo tsɔ'ɔ tə́ pyə nə ŋkhim dəŋ vəŋ pɔ pɔ̌? 34Yeso ghɔm bi pu gɑ: Pǒ wim msɛ́ mta' sʉ'ʉ? Wap ghɔm bi e gɑ: mta' sɔmbʉə, gə po mduŋ bapgu ŋkho'ŋkho' 35Yeso ghɔm bi pɔmnəŋ gɑ́ wap cwətəsi, 36ŋkwi msɛ́ mtá sɔmbʉə ba bapgu, biŋ shwyɛ'nyə Si, bo'tə́ hɑ bi pɑkhʉ̌ pyə́, pɑkhʉ pyə́ hɑ bi pɔmnəŋ. 37Guŋ pɔ awɛ pfɑ tə́ jwyə́; pu piŋ daktə́ bvʉ' mbó' myə́, a ló nə msap sɔmbʉə. 38Pɔ pyə wap lə́ tsʉ̌ ywə a, lə bɑ́ pɑ́bɛ́ pɔ sha'pfʉə, tə́ sɛ pɑjwǐ ba pǒ mkəcɔk po. 39Yeso lə́ la'nyə pɔmnəŋ cwəlɔ, ŋkho nthʉm kənu' dɑ m nthʉm guŋ Magadan.

Currently Selected:

MATIO 15: NTGomala

Highlight

Copy