Luka 4

Jarribeeki Yeesu

(Matta 4:1-11; Markus 1:12-13)

1Yeesu loroyi diga Urdun, o keewɗo Ruuhu Ceniiɗo e Ruuhu man yahri mo ladde. 2Iblisa jarribi mo ton nyalɗe cappanɗe nayi. O nyaamaay sam nyalɗe man e nde nyalɗe ɗe'e caali, o maati dolo. 3Iblisa wi'i mo: “To a Ɓiɗɗo Allah kam, umru hayre nde'e, nde laato nyaamdu.” 4Yeesu jaabi mo: “Deftere wi'i: Neɗɗo yeeɗirtaa nyaamdu tan#TT 8:3..”

5Iblisa yahri mo haa dow, nder ma'annde non o sappini mo laamuuji duniyaaru fuu, 6o wi'i mo: “Mi hokkete baawɗe e risku laamuuji ɗi'i fuu, ngam ɗum hokkaama yam, min boo mi hokkan ɗum mo ngiɗmi fuu. 7Ɗum fuu mi hokkete to a sujidani yam.” 8Yeesu jaabi mo: “Deftere wi'i: Sujidan Allah Jawmiraawo maaɗa tan, kaŋko feere maako a rewata#TT 6:13..”

9Fahin, Iblisa yahri mo haa Urusaliima, jo'ini mo dow yeereere haykaliiru, wi'i mo: “To a Ɓiɗɗo Allah kam, diw diga ɗo haa lesdi, 10ngam deftere wi'i: Allah umran malaa'ika'en muuɗum ngam aynugo ma#Jab 91:11.. 11Fahin boo: Ɓe taɓɓoto ma bee juuɗe maɓɓe, ngam taa kosŋgal ma fergo dow hayre#Jab 91:12..” 12Yeesu jaabi mo: “Deftere wi'i: Taa jarriba Allah Jawmiraawo maaɗa#TT 6:16..” 13Nde Iblisa timmini jarribaago Yeesu bee dabare mum fuu, o dilli, o acci mo, sey saa'i feere fahin.

Yeesu fuɗɗi kuugal muuɗum nder lesdi Galiili

(Matta 4:12-17; Markus 1:14-15)

14Yeesu lori haa lesdi Galiili, o kebbinaaɗo baawɗe Ruuhu Ceniiɗo. Habaru maako saŋkiti nder lesdi man fuu. 15O ekkitini yimɓe nder cuuɗi dewal Yahuudu'en, yimɓe fuu teddini mo.

Yimɓe Nasaratu cali Yeesu

(Matta 13:53-58; Markus 6:1-6)

16Yeesu yehi Nasaratu, wuro ngo o mawnino haa muuɗum. Nyannde siwtorde o nasti suudu dewal Yahuudu'en bana o woowi waɗugo. O ummi ngam o jaŋnga deftere, 17ɓe ndokki mo deftere annabi Esaaya taggaande, o taggiti nde, o tawi aayaaje binndaaɗe bana ni'i:

18“Ruuhu Jawmiraawo ɗon dow am,

o mooyti yam ngam haa mi waazina laafuɓe habaru seyo.

O neli yam haa mi wooynana haɓɓaaɓe ndimu muuɗum'en,

ngam wumtingo wumɓe,

ngam jooftuki torraaɓe,

19ngam yeeynugo hitaande baŋguki mo'ere Jawmiraawo#Esa 61:1-2..”

20Nden o taggi deftere go, o hokkiti nde balloowo nder suudu dewal Yahuudu'en, o jooɗi. Yimɓe wonɓe ton fuu tokki laarugo mo. 21Nden o fuɗɗi wolwango ɓe: “Aayaaje binndaaɗe ɗe'e, ɗe ngooŋɗi haa mooɗon wakkati on nani ɗe njaŋngaama jonta.” 22Ɓe fuu ɓe ngerdi haala maako, ɓe kayɗini ngam bolle belɗe gurtiiɗe diga hunnduko maako. Ɓe mbi'i: “Naa o ɓii Yusufu na?” 23Yeesu wi'i ɓe: “Fakat, on ngeccatam geccawol ngo'ol: Kurgoowo, hurgu hoore maaɗa! On mbi'atam boo: Min nani ko mbaɗɗa haa Kafarnahum fuu, waɗ ɗum nder wuro maaɗa boo!” 24Fahin o wi'i: “Gooŋga mbi'anmi on, walaa annabiijo koo gooto mo ɓe njaɓɓata nder wuro muuɗum#Yuh 4:44.. 25Mi ɗon wi'a on, fakat, rewɓe yurumɓe ɗuuɗɓe ɗonno nder Isra'iila zamanu annabi Eliya, saa'i iyeende toɓaayno baakin duuɓi tati e lebbi joweego, weelo saatuŋgo waɗi nder lesdi fuu#1 Laam 17:1.. 26Ammaa Allah nelaay Eliya haa jurumɗo koo gooto maɓɓe, sey haa mo wuro Sarepta, nder lesdi Sidon#1 Laam 17:8-16.. 27Kuturu'en ɗuuɗɓe ɗonno boo nder lesdi Isra'iila zamanu annabi Elisa. Ammaa koo gooto maɓɓe yamɗitaay, sey Na'aman mo lesdi Siriya tan#2 Laam 5:1-14..”

28Yimɓe wonɓe nder suudu dewal man fuu keewi tikkere, nde ɓe nani bolle ɗe'e. 29Ɓe ummi, ɓe ngerɓi mo haa yaasi wuro maɓɓe, ɓe njahri mo dow towndiire nde berniwol maɓɓe Nasaratu mahano dow maare, ngam ɓe cakkina mo haa les. 30Ammaa o wurti caka maɓɓe, o tokkitini laawol maako.

Goɗɗo mo ginnawol torri ɗum

(Markus 1:21-28)

31Yeesu yehi Kafarnahum, berniwol nder lesdi Galiili, o ekkitini yimɓe ton nyannde siwtorde. 32Ɓe kayɗini dow no o ekkitinirta, ngam o ɗon wolwa bee baawɗe#Mat 7:28-29.. 33Woodino goɗɗo feere nder suudu dewal man, o woodi ruuhuwol coɓŋgol, o fuɗɗi wookugo bee sawtu, o wi'i: 34“Hey, an Yeesu mo Nasaratu, ko ngiɗɗa bee amin? A wari ngam halkugo min na? Mi anndi ma: A Ceniiɗo, nelaaɗo Allah.” 35Yeesu ruggi ruuhuwol coɓŋgol go, wi'i: “Jeeɗa, wurta gorko oo.” Ngol do'i gorko go yeeso yimɓe fuu, nden ngol wurti, ngol acci mo, bilaa naawnere sam. 36Yimɓe fuu kayɗini, ɓe mbolwi hakkunde maɓɓe: “Haala irin kaye ka boo? O ɗon umra ruuhuuji coɓɗi bee baawɗe, ɗi ngurto goɗɗo!” 37Ɓe mbolwi haala Yeesu haa lesdi maajum fuu.

Yeesu yamɗitini nyawɓe ɗuuɗɓe

(Matta 8:14-17; Markus 1:29-34)

38Yeesu wurti suudu dewal Yahuudu'en, o yehi saare Simon. Esiraawo Simon debbo ɗon waali nyawu yontere naawnde, ɓe tori Yeesu o yamɗitina mo. 39O turi dow nyawɗo go, o telɓani yontere man, nde acci debbo go, nden o ummi law, o weerni ɓe.

40Haa mutki naaŋge, ɓen ɓe mari nyawɓe e torraaɓe nyawuji feere feereeji ngaddi ɓe haa Yeesu. O yowi juuɗe maako dow gooto gooto maɓɓe, o yamɗitini ɓe. 41Ginnaaji ngurti yimɓe ɗuuɗɓe, ɗi ɗon ngooka bana ni'i: “An woni Ɓiɗɗo Allah!”

Ammaa Yeesu ruggi ɗi bee caatal, o haɗi ɗi wolwugo boo, ngam kanji ɗi anndi kaŋko woni Almasiihu.

Yeesu waazi nder lesdi Yahudiya

(Markus 1:35-39)

42Nde weeti, o wurti o dilli haa nokkuure ferewnde. Yimɓe puɗɗi tefugo mo. Nde ɓe tawi mo, ɓe ngiɗi haɗugo mo dillugo ngam taa o acca ɓe. 43Ammaa Yeesu wi'i ɓe: “Haani mi waazina kubaruwol belŋgol ngol laamu Allah haa gure goɗɗe boo, ngam man Allah neli yam.” 44O dilli, o waazi nder cuuɗi dewal Yahuudu'en nder lesdi Yahudiya.

Currently Selected:

Luka 4: FBDC

Highlight

Copy