Luka 5

Yeesu ewni pukara'en aartuɓe

(Matta 4:18-22; Markus 1:16-20)

1Nyannde feere Yeesu ɗon dari dow fomoonde weendu Genesaret, yimɓe boo ɗon ɓiɗɗotira ngam nanugo wolde Allah. 2O yi'i koommbooje#5:2 Koommbooje malla laanaaje. ɗiɗi haa fomoonde, waawooɓe ngurti, ɗon lalla zubaaji muuɗum'en. 3Yeesu nasti nder gootal koommbooje man, ɗum koommbowal#5:3 Koommbowal malla laanawal. Simon. O tori mo o daayna ngal seɗɗa bee fomoonde. Yeesu jooɗi nder maagal, o fuɗɗi ekkitingo yimɓe#Mat 13:1-2; Mk 3:9-10; 4:1..

4Nde o timmini wolwugo, o wi'i Simon: “Yahru koommbowal haa ndiyam lugguɗam, nden an bee huuwdiɗɗiraaɓe maaɗa, cakkine zubaaji mooɗon, on ngaawo.” 5Simon jaabi mo: “Jaagorɗo, min torri jemmaare fuu min keɓaay koo ɗume, ammaa dow wolde maaɗa, mi sakkinan zubaaji#Yuh 21:3..”

6Ɓe cakkini zubaaji, ɓe naŋngi liɗɗi ɗuuɗɗi, haa zubaaji maɓɓe puɗɗi seekugo#Yuh 21:6.. 7Ɓe ewni hawtiɗiraaɓe maɓɓe woɗɓe nder koommbowal feere ngam ɓe ngara, ɓe mballa ɓe. Ɓe ngari, ɓe kebbini koommbooje ɗiɗi fuu bee liɗɗi, haa koommbooje maɓɓe puɗɗi moɗaago nder ndiyam. 8Nde Simon Piyer yi'i ɗum, o tuggi koppi yeeso Yeesu, o wi'i: “Taa ɓaditam, Jawmiraawo, ngam mi marɗo hakke!” 9Simon e yimɓe wonduɓe bee maako fuu kayɗini ngam ɗuuɗal liɗɗi ɗi ɓe ngaawi. 10Non boo Yaakuba e Yuhanna ɓiɓɓe Zebede, hawtiɗiraaɓe Simon kayɗini. Ammaa Yeesu wi'i Simon: “Taa hultor, yeeso ɗo, a laatoto gaawoowo yimɓe!” 11Ɓe njahri koommbooje maɓɓe haa fomoonde, ɓe acci kuuje fuu, ɓe tokki Yeesu.

Yeesu yamɗitini kuturuujo

(Matta 8:1-4; Markus 1:40-45)

12Nde Yeesu ɗon nder wuro feere, goɗɗo mo saɗawre fiilti ɓanndu mum wari. Nde o yi'i Yeesu, o sujidi, o tori mo, o wi'i: “Moodibbo, to a muuyi, a waawan yamɗitingo yam.” 13Yeesu forti juŋngo, meemi mo, wi'i: “Mi muuyi, a yamɗita.” Law saɗawre acci goɗɗo man. 14Yeesu umri mo: “Taa a yecca ɗum koo moy, ammaa yah, hollu hoore maaɗa haa limanjo, nden a lii'a dokkal bana Muusa umri, ngam haa ɓe tabitina a laɓɓinaama#FL 14:1-32..” 15Koo non fuu haala Yeesu ɓesdi saŋkitaago caka yimɓe yeeso yeeso. Mooɓe ɗuuɗɗe ngari haa maako ngam nanugo mo e ngam o yamɗitini ɓe diga nyawuji maɓɓe boo. 16Ammaa Yeesu woowi wurtaago, yaha nokkuure ferewnde ngam waɗugo do'a.

Yeesu yamɗitini goɗɗo waata-terɗeejo

(Matta 9:1-8; Markus 2:1-12)

17Nyannde feere Yeesu ɗonno ekkitina. Farisa'en e moodiɓɓe tawreeta ɗon njooɗi ton. Ɓe ngaroyi diga gure lesdi Galiili, lesdi Yahudiya e berniwol Urusaliima. Baawɗe Jawmiraawo ɗonno bee Yeesu ngam yamɗitingo nyawɓe. 18Yimɓe ngaddi goɗɗo waata-terɗeejo dow be'itte, ɓe ɗaɓɓi nastingo mo suudu e ɓe mballina mo yeeso Yeesu. 19Ammaa ɓe anndaa toy ɓe nastinirta mo, ngam yimɓe ɗuuɗi. Nden ɓe mba'i bee maako dow suudu, ɓe mbaɗi wurdere haa kippol maaru, ɓe njippini mo bee be'itte go caka mooɓre haa yeeso Yeesu. 20Nde Yeesu yi'i nuɗɗinki maɓɓe, o wi'i nyawɗo go: “Soobaajo am, hakkeeji maaɗa njaafaama!”

21Moodiɓɓe tawreeta e Farisa'en puɗɗi numugo: “Ɗum neɗɗo moye oo, bolwanɗo kalluka dow Allah? Moy waawata yaafaago hakkeeji sonaa Allah feere mum?” 22Yeesu anndi numooji maɓɓe, wi'i ɓe: “Koni maroton irin numooji ɗi'i nder mooɗon? 23Ko ɓuri hoyugo? Wi'go: Hakkeeji maaɗa njaafaama naa malla wi'go: Umma, yah? 24Ammaa ngam haa mi faamtina on Ɓii-neɗɗo woodi baawɗe nder duniyaaru yaafaago hakkeeji.” Nden o wi'i waata-terɗeejo go: “Mi ɗon wi'e: Umma, hoocu be'itte ma, hootu saare maaɗa!” 25Nyawɗo go ummi law yeeso yimɓe fuu, hoosi be'itte ɗe o waalino dow muuɗum'en, hooti saare muuɗum, o ɗon teddina Allah. 26Yimɓe kayɗini, ɓe teddini Allah, ɓe keewi kulol, ɓe mbi'i: “Hannde en ngi'i kuuje kayɗiniiɗe!”

Yeesu ewni Lewi

(Matta 9:9-13; Markus 2:13-17)

27Ɓaawo maajum Yeesu wurti, yi'i jomnoowo, innde maako Lewi, o ɗon jooɗi haa baariki maako. Yeesu wi'i mo: “Tokkam!” 28Lewi ummi, acci kuuje fuu, tokki mo.

29Nden Lewi waɗi nyaamduuji ɗuuɗɗi haa saare muuɗum ngam Yeesu. Jomnooɓe e woɗɓe feere ɗuuɗɓe nyaamdi bee maɓɓe. 30Ɗum fottanaay Farisa'en e moodiɓɓe tawreeta, ngam maajum ɓe ngurŋgurti, ɓe mbi'i pukara'en#5:30 Pukara'en malla ahiiɓe. Yeesu: “Ngam ɗume nyaamdoton bee jomnooɓe e hakke'en#Lk 15:1-2.?” 31Yeesu wi'i ɓe: “Yamɓe ngalaa haaje kurgoowo, sey nyawɓe. 32Mi waraay ewnaago adili'en, ammaa hakke'en, ngam ɓe tuuba.”

Ƴamol dow suumaago

(Matta 9:14-17; Markus 2:18-22)

33Farisa'en mbi'i Yeesu: “Pukara'en Yuhanna ɗon cuumo ndego, ɓe ɗon mbaɗa do'a, non boo pukara'en amin, ammaa ɓe maaɗa ɗon nyaama, ɗon njara.” 34Yeesu jaabi ɓe: “On ɗon tammo on mbaawan doolugo ewnaaɓe haa ɓaŋgal ɓe cuumo nde ɓaŋɗo ɗon wondi bee maɓɓe na? Naa non sam. 35Ammaa wakkati waran, ɓaŋɗo ittete caka maɓɓe, nden kadi nyalɗe man ɗen ɓe cuumoto.” 36Yeesu wolwani ɓe balndol ngo'ol: “Walaa mo seekata leppol haa limce kese ngam o mo'ina limce kiiɗɗe. To o waɗi non, o wonni limce kese e leppol man boo hawtataa bee kiiɗɗe. 37Walaa mo loowata inaboojam kesam nder kanyakanyaaji#5:37 Kanyakanyaawu ɗum booro laral ngam sigaago njaram. To laral man hiiɗi, ngal marataa semmbe. kiiɗɗi. To o waɗi non, inaboojam kesam seekan ɗi, ɗam rufan e kanyakanyaaji boo mbonnoto. 38Ammaa sey ɓe loowa inaboojam kesam nder kanyakanyaaji kesi. 39Walaa mo marata haaje inaboojam kesam to o aartiri kiiɗɗam, ngam maajum ɓe ɗon mbi'a: Inaboojam kiiɗɗam ɓuri wooɗugo.”

Currently Selected:

Luka 5: FBDC

Highlight

Copy