Mga Talinhaga 10
10
An mga Talinhaga ni Solomon
1Uya an mga talinhaga ni Solomon:
An madonong na aki ikinakaogma nin saiyang ama. Alagad an lolong na aki sarong kamondoan nin saiyang ina.
2An kayamanan na nakua huli sa pandadaya dai minatao nin karahayan, alagad an pagigin onesto pwedeng magligtas kan saimong buhay.
3Dai pinapabayaan nin Kagurangnan na magutom an mga matanos, alagad an kamawotan kan mga tawong maraot dai niya itinutugot na mangyari.
4An pagigin hugakon iyo an madara saimo sa kadukhaan, alagad an pagigin mahigos iyo an mapayaman saimo.
5An tawong nagtitipon kun tig-init igwa nin marahay na kaisipan, alagad an pagkatorog sa panahon nin tig-anihan, sarong kasosopgan.
6An mga bendisyon maabot sa matanos, alagad an ngoso kan maraot nagtatago nin kadahasan.
7An matanos ginigiromdom bilang bendisyon, alagad an maraot malilingawan.
8An marahay na hatol inaako kan pusong madonong, alagad mapapahamak an lolong na matinaram.
9An naglalakaw sa katanosan naglalakaw na matiwasay, alagad madadakop an may bikong pamumuhay.
10Nakakaparibok an tawong nagtatago kan katotoohan, alagad an tawong hayag na minasagwe nagtatrabaho para sa katoninongan.
11An ngoso kan matanos burabod nin buhay, alagad an sa maraot na tawo nagtatago nin kadahasan.
12An pagkaongis danay na naghahanap nin iwal, alagad an pagkamoot iyo an nagtatahob kan gabos na kasalan.
13Sa mga ngabil kan may pakasabot manunumpongan an kadonongan, alagad pamakol an dapat sa likod kan tawong mayo nin toltol na kaisipan.
14An madonong nagsasaray nin kadonongan, alagad minaharani an kapahamakan kun minataram an lolong.
15An kayamanan iyo an nag-iingat sa mga mayaman; an kadukhaan iyo an minaraot sa dukha.
16Buhay an premyo sa paggibo nin marahay, alagad an kasalan namumunga nin orog pang kasalan.
17An naghihinanyog kun sinasaway mabubuhay, alagad an dai minaako kan saindang kasalan nasa pag-alaman.
18Putikon an tawong igwa nin natatagong kaanggotan; lolong an tawong nagbabalobagi.
19Kun mas dakul an tataramon, dakul man an kasalan; an igwa nin marahay na isip, bakong matinaram.
20An mga tataramon kan matanos nakakaarog sa purong plata: an kaisipan kan maraot mayo nin halaga.
21An mga tataramon kan matanos papakinabangan nin dakul na tawo, alagad pwedeng magadan an lolong huli kan saiyang kapatalan.
22An bendisyon nin Kagurangnan nakakapayaman, asin dai niya iyan dinadagdagan nin kamondoan.
23An paggibo nin maraot kaogmahan nin sarong lolong; alagad an marahay na gawe kaogmahan nin tawong may pakasabot.
24An natatakotan kan maraot na tawo mangyayari saiya, alagad an kamawotan kan matanos itatao saiya.
25Minaabot an bagyo asin ipinapalid an maraot, alagad an matanos danay na ligtas.
26Garo maalsom na suka saka asong nakakapaluha an sarong hugakon sa nagsusugo saiya.
27An pagkatakot sa Kagurangnan nagpapahalawig nin buhay, alagad halipot an mga taon kan maraot na tawo.
28An paglaom kan matanos minatapos sa kaogmahan, alagad an paglaom kan maraot minatapos sa kawaraan.
29Iniingatan nin Kagurangnan an mga matanos, alagad ginagadan niya an mga naggigibo nin karatan.
30Danay na magkakaigwa nin katiwasayan an matanos, alagad dai magdadanay sa daga an maraot.
31Kadonongan an minaluwas sa ngoso kan matanos, alagad an dila na nagtataram nin karatan puputolon.
32An matanos nagtataram kan mahuyong tataramon, alagad an maraot nagtataram kan mga bagay na nakakakulog.
Currently Selected:
Mga Talinhaga 10: MBBBIK92
Highlight
Share
Copy
Want to have your highlights saved across all your devices? Sign up or sign in
Marahay na Bareta Biblia © Philippine Bible Society, 1992.
