Mak, echî 13

Tîk á bhíbhi ekpatə́m énoê ókʉ́rí achot Obhasi

(Mat 24.1-2; Luk 21.5-6)

1Nji Jisos a kí maghé ókʉ́rí achot Obhasi, ntóbhá owe yót a sə́re yê se, “Ńsé, á gbe ókʉ́rí mbí oo! Atáé mma á kóe á gbê á nop á chiŋi obhô.”

2Jisos se, “Ó yen ekpatə́m ókʉ́rí mbí a? Kpe ntáé yə́t á bhó kət mfá ngyím. Á kí gyʉi fép á tûp ka nsi.”

Biriŋ mbi í kí toŋe sê ngun a kə́ bha oman

(Mat 24.3-14; Luk 21.7-19)

3Nji Jisos a kun ka Egui Orif na ane abhê, ókʉ́rí achot Obhasi ó rî njəm i mbá, Pita na Jems na Jon na Andru á bhə̂p yê njəm-ńjə̂m sê, 4“Sə́re êt, achot mmá á kí fap bhaghé ebhú? Bhaghé biriŋ nâ e kí yen kən é mə́ŋe sê ebhú é si.”

5A sə́re ábho se, “Kô ên ebhú kpe nne a kâ ríri ên. 6Ka nan? Ane etî-etî tîk á bhak ka mbiŋ amé á səra sê, ‘Mme a ri nne ányo.’ Tîk á ríri ane etî-etî. 7Deê efup é kâ yîm ên ebhú ó yuk ên agûn enok noŋ á kí gbo, o yûk ên esə́re enok nji é kə́ bha mbá-ochî. Iyîm ábhi í fóne ka efábhám, kən áji é ká fap sê nâ ntə̂m a sî. 8Tîk nték a yə̂m enok na atem, atúi á nôk na atem atúi. Ngun tîk a kə̂t a nyiŋá onyiŋí ka ngûm ka ngûm. Ekpatə́m í njaé tîk a bhák ka ngun. Kən iyîm mbi chénchén í rî noŋ eróghá-ndə́p ojî mbi ó kí nok nne-nkáé.

9“Kən ên áfoné, kó ebhú. Tîk á kô ên á kâk ka esup, á tə̂m ên ka óchâm Obhasi. Ka obhô obhámé, tîk o gyími ên ka ochî atúi-ofâm na ane mba á fíi ikom eték, o káre ên otîp ogyebhá-ḿbə́ŋé Obhasi.#Mat 10.17-20; Luk 12.11-12. 10Kən kpe bhaghé ejûm nji é kí fap, deê ó mə́ŋe ên sê otîp ogyebhá-ḿbə́ŋé ó rî ó sí nték i ngun chénchén kən kpe ngun a man. 11Ebhú-ebhú á fi ên á jak ka esup, deê o kâ káre ên biji oseŋe ka ejûm nji o kí chot ên ka ebhú áji. Ebhú é si, chot ên nji-nji é fábhe ên ka nnyo. A ri Obhasi Ebhare Ntʉgantʉ nâ á kpok áno ochot, ên asík.

12“Mmon-i-nnyen tîk a ríghi se á yúí ntem-mmon-i-nnyen. Ásé á kí yim ekpak njí jə́t na abhon ábho. Abhon á kí gyimi ngyím enok na ásé na anyen ábho sê á yúí ábho oyúí. 13Ane chénchén tîk á bhân ên ka obhô obhámé. Kən kpe énê nnyo á kəp ḿbə́ŋé ta ntə̂m a sî, tîk a sêm.”#Mat 10.22.

Ekpatə́m oseŋe mbi Jerusarem

(Mat 24.15-28; Luk 21.20-24)

14Jisos a kpô chot se, “Tîk o yên ên Ekpatə́m í Nchot i Mbí a bhâ gyími ka eji á ka fon ka egyímím. Deê mbiŋá-bhíŋá a məŋé echî nchot. Ka ebhú áji, deê ane mba á rî ka ebhat í Judiya, á bé á jî ebhat agúí.#Dan 9.27; 11.31; 12.11. 15Nne nnyo a kun ka ósô njû, deê a kâ bhíbhi ebhú a bhət a bhá ka njû, a bhá kən kpe ejûm ejê jə́t. 16Nne nnyo a ri ka ebhin, a kâ yúi biji a chəbhé njəm nnyi njû a bhá bhup ḿfô eye.#Luk 17.31. 17Tîk é bhîp mân é chîŋ na ane-akáé oya, na mba á yábha abhon. 18Gorê ên Obhasi sê achot mmá á kâ fâp ka ebhú enae. 19Echî aŋ? Achot mma tîk á fâp á kí bhip á chíŋ. Á ká nok oyén ta mbôp Obhasi a yimî ngun ta é si égyé. Á bhó fap fə́ne ntə̂m ébháe.#Dan 12.1; Etûm 7.14. 20Kən Ńtâ Obhasi tîk a yîm mfín a kpə̂k. Áno asík, kə́n kpe nne yót nnyo a kí sem cháŋ, kən Obhasi tîk a yîm mfín a kpək ka obhô ane abhê mba a sáŋe.

21“Ebhú nne á səre ên se, ‘Ńgyê Krayis, nne nnyo Obhasi a túmi se a bhá yim ngun á sém. Ée, yên yê ńgô.’ Ka kâm ên nchot eye. 22Echî aŋ? Tîk ane áfúbhí á bhak mba á kí səre sê ábho a ri nne nnyo Obhasi a túmi se a bhá yim ngun á sém. Tîk mba tat á bhak mba á kí səre sê ábho a ri akará-otîp Obhasi. Ntʉ́ghi ane mbá tîk á tóŋe biriŋ, á yîm ntûm okpógha-biji sê á nôk á ríri ane mba Obhasi a sáŋe, kən chichi. 23Fiî ên biji, ka ń səre ên achot fép kən ebhú é bhá sí.”

Ebhú Mmon-i-ntem-nne a kə́ bha

(Mat 24.29-31; Luk 21.25-28)

24Jisos a kpô chot se, “Ebhú oseŋe mbí ó man, ejírim tîk é gbô ka njúí, nnyam-ósô a rô yá.#Asa 13.10; Ese 32.7; Jow 2.10,31; 3.15; Ndem 6.12. 25Tîk ńdʉnândʉ ósô ń dôt ka ngûm nnyi ń dî ḿ gbô. Nkom fə́ne chénchén mmi ń dî ka ósô ń yóŋe bibhə̂k ábho.#Asa 34.4; Jow 2.10; Etûm 6.13.

26“Ka ebhú áji, tîk ane á yên Mmon-i-ntem-nne a bhərá a bhák ka átʉ́k í ngurobhú, na ekpatə́m ikom na ejík.#Dan 7.13; Ndem 1.7. 27Ebhú á bha, tîk a tûm baénjel se á gyʉ́t ósô, á bhə̂t óséré, á jî obhô-okáé, á jî obhô-orûm. Á jî kpát ta á sî ntə̂m i ngun, á chîŋ á sî ntə̂m i ngurobhú, á chə́me ane abhê mba yê a sáŋe, ka eji jə́t.”

Deê é kpí aron ka étí-nkap

(Mat 24.32-35; Luk 21.29-33)

28Jisos se, “Deê étí fîk é kpí ên aron. Ó yen ên arâp amê á wûk ájé, mma fê á róghe edʉʉ́m, məŋê ên sê enae é kpiri. 29Ka ekpak njí eróŋ, ó yen ên iyîm mbí í kí fap, riŋî ên sê ebhú é kpiri Mmon-i-ntem-nne a bhâ ta a sî njû. 30Deê ń sə́ré ên bəre kən ane mba á rî nná ka ekpin mfá-mfá á kpó, iyîm mbí fép í fap. 31Ósô na nsi tîk í chîŋ, kən ejámé nji ń chot ka nnyo, é bhó chiŋ bhúghí-bhúghí.”

Kpe nne á ka riŋí ofú na mfoné-mfoné ebhú nchane

(Mat 24.36-44)

32Jisos se, “Kpe nne yót á ka riŋí ofú na mfoné-mfoné ebhú nji iyîm mbí chénchén í kí fap. Kpe baénjel á ká riŋí. Kpe Mmon Obhasi á ka riŋí. Obhasi Ńsé átíŋ nâ a riŋî.#Mat 24.36. 33Kô ên ebhú, gyímí ên ibhábhé, ka ebhú nchane ó ka riŋí ên. 34É rî ekan-ékân na nne nnyo a kí ji ejen. A mághe njû eye mbâ ágbán abhê, kpe nnyón ḿgbán, a fôn obhê obhô-etûm. Nne nnyó a sə́re mbábhá nnyo-mbá se a gyímí ibhábhé.#Luk 12.36-38. 35Nâ gyími ên mân ka ibhábhé, ka ó ka məŋé ên ebhú nji ńsé njû a kí chəbhé njəm. Kən a kə́ bha na egu aŋ, kən na étíŋanti atʉ́ aŋ, kən na ábhə́m aŋ, kən ta ofú ó wʉ́ŋi aŋ, nne nnyo a məŋê cháŋ. 36Ájoé a bhâ gbantə́m, é ká nop a kpúghí ên ka eyô. 37Ka ekpak nji ń səra ên áno, nâ ekpak fə́ne nji n kí səre ane fép ka ngun bəre á gyímí ibhábhé.”

Currently Selected:

Mak, echî 13: ETUNT

Highlight

Copy