Mak, echî 12

Egan ane mba á kóe ebhin á yîm

(Mat 21.33-46; Luk 20.9-18)

1Jisos a tûp mân egan se, “Nne yót a fôn ebhin-í-nkap ejê. A gbê ebhám a fáre ńjə́ne, a gbê etə́m nji á kí kumí á bhabha nkap eye ka ebhin, a tʉ́ri eji aməm eyámám. Kən a kô ane a kâk se á yimá ebhin njí á kará yê eye nkiri. A bhâ mághe a jak ejen.#Asa 5.1-2.

2“Nji ebhú nkap é síi, mfone ebhin nnyó a yíghi ḿgbán owe yót a tûm se a ji mbâ ane mba á yíma ebhin ejê a jí ko eye nkiri ebhin. 3Kən ane mbá, á kpó yen ḿgbán nnyó, á fî yê á tə̂m, á bhîm a chə́bhe njəm abhô-ábhô. 4Mfone ebhin nnyó a kpô túm ḿgbán nnyo tat. Kən ane mbá á tə̂m mân nnyó é chíŋi obhô, á kâk yê bifú ka echî, á káre yê ekpatə́m ísonê, á bhîm yê. 5Mfone ebhin nnyó a kpô yighí nnyo tat a tûm. Ane mbá mân á yúi nnyó mfá oyúí. Mfone ebhin a yighá ágbán a túmá, kən ane mbá á yua etʉ̂ oyúí, á təmá mba tat otəm.

6“Nne nnyó a bhâ yíghi mân mmon okot owe a tûm. Íkíkéré ifê a ri se tîk ane mbá á jíghi mmon owe. 7Kən á kpó to á yén mmon nnyó, á sə́re atem sê, ‘Ńgyê ndígha-ekʉ̂. Bhák é yúí yê, iyîm í ńsé í kə́t ibhə́ré.’ 8Á bhâ fî mmon nnyó á yúi, á kə̂n ékpoê ejê á bhûm ka etə́m.”

9Jisos a bhə̂p mân se, “Ó kere ên sê mfone ebhin nnyó kə́n a yîm jen na ane mbá? To a kí yui ábho a tábhe ebhin ejê a káre ane etat?

10“Ó ka yúk ên tîk egan nji á túbhi ka nwet Obhasi sê,

‘Isôk mfi agbeghá-ojû á bhúmi sê í ká nop njû egbeém,

ḿfə́ne nâ í bhâ chə́bhe mfoné-mfoné isôk mfi í fíi njû.

11Ńtâ Obhasi nâ a yimî áno se é jóe ka ekpak njí.

A ri okpógha-biji nchot.’ ”#Nkôn 118.22-23.

12Nji atúi-ofâm ane Jus á yúghi egan njí, á mə́ŋe sê Jisos a túbhi áno a kpê na ábho. Á dâŋ sê á fî yê, kən á kí fup ekam ane nji é rî áfo, á mághe á kʉra.

Ebhə̂p nji ntí-echî ekarám

(Mat 22.15-22; Luk 20.19-26)

13Á bhâ yíghi mân etʉ̂ ane echəme Farasi na etʉ̂ mba á tóbha Erot, á tûm sê á jí wáp Jisos ka akát. 14Nji ane mbá á bháe mbâ Jisos, á bhə̂p yê sê, “Ńsé, é məŋe sê we áfúbhí ó bhó chot, ó bhó kep nne ka ochî. Ńgyímí nne ó bhó koŋ. Ó səra ane ka etʉri ejûm nji Obhasi a wóme nne a yîm. Kən sə́ré êt kpá, nâ-ngá é rî nono sê é káre ntí-echî mbâ Ntûfâm i Rom, kən é ká nop!” 15É káre kən e kâ káre!

Kən Jisos a yên oka nchot ábho a táme ábho ka ebhə̂p se, “Ó gaá ên kpá énê? Kô ên ntí bhák ên, mme ń yén.”

16Á bhak yê na ntí a kô, a kêp. A bhə̂p mân ábho se, “Efóŋé énê na mbiŋ énê nâ a ri áno ka ntí mmí?”

Á táme sê, “Ntûfâm i Rom.”

17A sə́re mân ábho se, “Karê ên mbâ Ntûfâm i Rom iyîm í Ntûfâm i Rom, o káre ên mbâ Obhasi iyîm Obhasi.”

É jóe ane mbá a ri ejûm okpógha-biji kpe-eji ka ekpak nji Jisos a kóe a táme ebhə̂p njí.

Ebhə̂p nji sê nne á kpo a chə́bhe njəm ka ekpin

(Mat 22.23-33; Luk 20.27-40)

18Ka ofú ábhi bhə́t, etʉ̂ ane echəme Sadusi, á bhak á bhá bhə́p Jisos ebhə̂p. Ane mbá nâ á ká kam sê nne á kpo, tîk a nyə́me ka ekʉ̂.#Etûm 23.8. 19Á bhə̂p yê sê, “Ńsé, Mosis nâ a séŋe ebhín a káre êt se, ‘Ebhú nne á ko nkáé kən a kpô, kpe mmon á ka maghé, deê mmon-i-nnyen i ndûm a kó nne-nkáé ányo a jí abhon ka mbiŋ i mmon-i-nnyen.’#Otira 25.5. 20Kən ofú bhə́t abhon-í-nnyen á rî mfá anígisá. Nnyo nne-nkúí a kô nkáé a núŋi a kpô, kpe mmon á ka maghé. 21Enyeré a bhâ kô nkáé nnyó yót. Yê fə́ne a kpô, mmon á ka maghé. Osúí ásá a kpô fə́ne, mmon á ka maghé. 22Chénchén abhon-í-nnyen mbá anígisá á kô nne-nkáé nnyó, á kpô kpe nnyo a maghé mmon cháŋ. Nne-nkáé nnyó fə́ne a jéghe okpó. 23Ka ofú mbi ane chénchén á kí nyəmé ka ekʉ̂, nne-nkáé nnyó a kí joé nnyo énê, ka ábho anígisá á kô yê ebhú á rî mbít.”

24Jisos a táme ábho se, “Íkíkéré ifə́né cháŋ ka mbá. Nan? Nne owəné kpe yót nnyo a məŋê achot mma á séŋe ka nwet Obhasi cháŋ. Ó ka məŋé ên fə́ne ikom mfi Obhasi a fonê. 25Echî aŋ? Ebhú ane á nyəmé ka ekʉ̂, á kí joé noŋ baénjel ka ósô, nchot ebháé á ro kpó chot. 26Sê nne á kpo a nyəmé ka ekʉ̂, ó ka nok obhiŋ ên tîk ejûm nji Mosis a séŋe a kpê na erəmta-ngûn nji é rûk ka ájé? Á séŋe sê Obhasi a sə́re yê se, ‘Mme a ri Obhasi Abraham na Obhasi Isak na Obhasi Jakop.’#Ane 3.6. 27Nâ é tóŋe sê Obhasi á ka joé Obhasi ekʉ̂, kən a ri Obhasi ekpin. Íkíkéré ifə́né í tan mbá nnyen etánám.”

Bhaghé ebhín Obhasi nâ é fáŋe é chíŋi atem?

(Mat 22.34-40; Luk 10.25-28)

28Ntóŋa-ebhín yót a ri áfo nnyo a yúghi noŋ ane á chóra na Jisos. A yên se a táme ane echəme Sadusi mbá nono, a bhâ bhə̂p yê se, “Bhaghé ebhín Obhasi nâ é fáŋe é chíŋi atem?”#Luk 10.25-28.

29Jisos a táme nne-ndûm nnyó se, “Ḿfa nâ ebhín Obhasi nji é fáŋe é chîŋ ochíŋ. Á séŋe sê, ‘Ane Isrel, yûk ên! Ńtâ Obhasi, yê nnyo a fonê êt chénchén, a ri yót.#Otira 6.4-5. 30Deê nne a kot Ńtâ Obhasi owe na ḿbə́ŋé eye chénchén na ńtʉgântʉ eye chénchén na íkíkéré ifê chénchén na ikom ifê chénchén.’ 31Osúí íbháe é rî sê, ‘Deê ó kôt ntem-nne ka ekpak nji o korê biji ibhâ.’ Bibhín mbí íbháe nâ í fáŋe í chîŋ ochíŋ, mbi tat kpó cháŋ.”#Mbín 19.18.

32Ntóŋa-ebhín nnyó a sə́re mân Jisos se, “Nchot eya a gyébhe kpe-eji. É rî ka etʉri sê Ńtâ Obhasi a ri yót, nnyo tat kpó cháŋ təm yê átíŋ.#Otira 4.35. 33Nne a ri a kot Obhasi na ḿbə́ŋé eye fép na íkíkéré ifê fép na ikom ifê fép, a ri a kot ntem-nne noŋ a korê biji ibhê. Nji nne a kí ki bibhín mbí íbháe, é faŋ é chiŋ onyam eyúúm na ekəp ekarám.”#Ose 6.6.

34Nji Jisos a yéne se ntóŋa-ebhín nnyó a mə́ŋe okéré nono, a sə́re yê se, “É kət wâ kpít ó yen otúi Obhasi.”

Ta ka ebhú áji, nne á ka kpó gaé a bhə́p Jisos ebhə̂p.

Krayis, nne nnyo a bháe oyim ngun á sém, nâ mmon énê?

(Mat 22.41-46; Luk 20.41-44)

35Nji Jisos a kí kpi ane achot ka ókʉ́rí achot Obhasi, a bhə̂p ebhə̂p se, “Jen é yími kən atóŋá-ebhín á kí səre sê Krayis, nne nnyo Obhasi a túmi se a bhá yim ngun á sém, a ri eyábhé-mmon í Debhit? 36Ka ikom mfi Ntʉgantʉ Obhasi, Debhit a chôt ka nnyo imê se,

‘Ńtâ Obhasi a sə́re ntûfâm omé se,

“Kumî ə̂m mfá mkpe obhô-orûm

ta n yîm ane-ebhan abhâ á jóe ka óséré obhâ.” ’#Nkôn 110.1.

37Debhit yê ḿfoné a kí bhiŋ Krayis se, ‘Ntûfâm.’ Krayis a kí kpo yim nan a jóe mmon i Debhit?”

Jisos se atóbhá abhê á kó ebhú na atóŋá-ebhín

(Mat 23.1-36; Luk 20.45-47)

Ekam ane é chəme, é yugha okpígha-ejûm mbi Jisos na ogyebhá-ḿbə́ŋé. 38Kən a kí kpi se, “Kô ên ebhú na atóŋá-ebhín abhə́né mba á kóra á kaghá awubha-wubha okʉ̂, á kóra sê ane á kubha ábho na ejík ka ndûm éré. 39Á korá ekumúm ka ngûm ekumi nnyi ejík ka erom na ka óchâm Obhasi. 40Á móa ane-akáé ekə́t amoe, kən ngun á yen sê á kí saé ábho. Á yim mân á gyê Obhasi egoróm ntə̂m cháŋ. Na ntʉ́ghi ekpin njí, Obhasi tîk a kpə́re ábho nnyen ekpərə́m.”

Ekəp í ḿbə́ŋé nne-nkáé ekə́t

(Luk 21.1-4)

41Jisos a kúmi a kpíri eji nji á kágha ntí ka nkop i ntí ka ókʉ́rí achot Obhasi, a kébhá noŋ ane á túbha ntí. Ane-ntí etî-etî á tûp ntí mmi ń tóŋe fə́ne sê ábho a ri ane-ntí. 42Kən nne-nkáé ekə́t yót na okpák obhê, a bhák á bhâ tûp áfu ábháe ka péne yə́t. 43Nji nne-nkáé nnyó a túbhi ntí mmí, Jisos a bhîŋ atóbhá abhê a chôt se, “Deê ń sə́ré ên bəre nne-nkáé ekə́t nnyó na okpák obhê, a tûp ntí ń ti ń chiŋi mmi ane chénchén á túbhi. 44Echî aŋ? Ntí mmi ane mba ngá á kághe ka nkop i ntí nnyi a ri mkpât ka mmi á fóne. Kən yê ka okpák obhê, a kâk chénchén ntí mmi a fonê ka ekpin ejê.”

Currently Selected:

Mak, echî 12: ETUNT

Highlight

Copy