Luka 22
22
Makanze Akumuyaya Jeso
(Matayo 26:1-5; Maako 14:1-2; Johani 11:45-53)
1 #
Kul 12:1-27
Inzho ciindi cakaswena afwaafwi cakulya ipobwe lya cinkwa ciina bumena, litewa ati Ipobwe lya Kwiitilila. 2Bapaizhi bakando u balembi bakakapula inzhila yakumuyaya Jeso cakuseseka nkaambo kabatiya bantu ati balaleta lupyopyongano.
Judasi Wahumina Kumwaaba Jeso
(Matayo 26:14-16; Maako 14:10-11)
3Inzho Shaatani wakamunjila Judasi wakaakutewa ati Shikaliyoti, walo wakaakuli umwi wa babo bakakuli ikumi ubatwesha bobile. 4Ubobo Judasi wakaya kwaamba bakateelezhanye mbwaakaamwaaba Jeso ku bapaizhi bakando, ubalindizhi ba ŋanda ya Leza. 5Abo bakabotelwa, ukuteelezhanya kwaamba bamulipile mali. 6Judasi wakahumina u kukanka kukapula ciindi cibotu cakumwaaba Jeso ukwiina ubwene.
Jeso Walibambila Kulya Ipobwe lya Kwiitilila
(Matayo 26:17-25; Maako 14:12-21; Johani 13:21-30)
7Buzuba bwakashika bwakulya ipobwe lya cinkwa ciina bumena, lelyo twana twa mbelele twepobwe lya Kwiitilila nitwakaakuyayiwa. 8Ubobo Jeso wakabatuma ba Pita u Johani, ukubalailila ati, “Kamuya mukabambe mulalilo wesu we pobwe lya kwiitilila#22:8 Kwiitilila:tulyakwaamba pashika kwaamba tulye.”
9Bakamubuzha ati, “No nkukwi nkuuzanda ati tukalibambile nkuko?”
10Jeso wakabaingula ati, “Mwakenjila mu Jelusalemu, mulakaswaanganya mulombwana uzemwine intesho ya meenzhi. Amukamucilile mukanjile muŋanda mwaakeenjila, 11mwamana mukamwaambile ati, Mwiiyi waamba ati, ‘No njilikwi iŋanda momo munkaalila ipobwe lya kwiitilila u ba shiciiya bangu?’ 12Ulakamutondezha iŋanda inkando ya mwizeulu umuli shintu shizandika, mumomo mumukaabambila.”
13Inzho bakaya bakayana shintu shoonse nshibambe umbona mbwaakabaambila Jeso, ngoonaawo bakakanka kulibambila ipobwe lya kwiitilila.
Mulalilo wa Mwami
(Matayo 26:26-30; Maako 14:22-26; 1 Bakolinto 11:23-25)
14Ciindi nicakashika cakulya ipobwe lya Kwiitilila Jeso wakakala abusena bwakwe etebulu, antoomwi u batumwa bakwe bali ikumi ubatwesha bobile. 15Amane wakabaambila ati, “Ndaakuzandisha cini cini kulya amwe cakulya ceci ce pobwe lya Kwiitilila ncitana kunjila u mapenzhi. 16Ulimwi ndamwaambila ati camana ceci, nshikalyi linji Ipobwe ano anshi mpaka likazuzucizhiwe mu bwami bwa Leza.”
17Ngoonaawo Jeso wakabweza inkapu, wamulumba Leza amane wabaambila ati, “Amubweze yezhi inkapu mwaabane akati kenu. 18Nkaambo kuhwa ninzho nshikanwi linji mucelo uwamusaansa cita bwami bwa Leza bukashice.”
19Amane wakabweza cinkwa, wapa kulumba kwa Leza, wacikomauna amane waamba ati, “Wezu ngu mubili wangu ngumwapewa, kamucita bolya lyoonse kuzhibaluka ume.” 20#Jele 31:31-34Muciyanza ncicona ceci wakabapa inkapu nibakamana kulalila waamba ati, “Yezhi inkapu ncicihuminano cipiya ca bulowa bwangu, bwakatika ukaambo kenu.
21 #
Inte 41:9
“Pele amubone! Wezo shikungaba tuli aze etebulu leli ndilyona! 22Mwanaa Muntu ulakafwa umbona mbuli mbwaakacizanda Leza. Pele ulakapenga wezo ukaamwaaba!”
23Ubobo ba shiciiya bakakanka kubuzhanya mulwabo ati, nguni akati kesu ukonzha kucicita ceci?
Ba Shiciiya Mbubakazumanicizhanya Bukando
24 #
Mat 18:1; Mk 9:34; Lk 9:46 Inzho kwakaba kukazhanya akati ka ba shiciiya kaambo bakaakuzanda kuzhiba ati nguni mukando ubaala akati kabo. 25Ngoonaawo Jeso wakabaambila ati, “Bami ba bantu bakunze balalela bantu babo kakomokomo, abo baleli balazanda kulumbaizhiwa ukutewa ati ‘Mbeenzhiina u bantu.’ 26#Mat 23:11; Mk 9:35#Mat 20:25-27; Mk 10:42-44Pele taceelele kuba bobo kuli umwe pe, mukando akati kenu alizhole anshi kubaala bantu boonse, ulimwi abe mutwanga wenu. 27#Joh 13:12-15Nguuliye mukando, usengela, na ukala etebulu ukusengelelwa? Nguwezo uusengelelwa u kulya. Pele ume ndili ukoya mutwanga wenu usenjela.
28“Mwakala ame mu masukusho aangu oonse. 29Ubobo mbubona Taata mbwaakampa bwami, ame ndamupa insana shabulelo. 30#Mat 19:28Mulakalya u kunwa etebulu lyangu mu bwami bwangu, ulimwi mulakakala a shuuna sha bwami u kubeteka mishobo iili ikumi uyobile ya Izilaili.”
Jeso Waambila Pita ati Ulakantama
(Matayo 26:31-35; Maako 14:27-31; Johani 13:36-38)
31“Saimoni, Saimoni, Shaatani wahumizhiwa kwaamba amuululule, ukoya mulimi mbwaawululula bungu kuhwa ku maila. 32Pele ndakukombela kwaamba lushomo lwako lutamana. Wakasanduka mu monzo wako, ukabazumye zumye banyoko.”
33Pita wakaingula ati, “Mwami ndilibambile kuya aze kuntolongo, nikuba ku lufwu.”
34Jeso wakaingula ati, “Ndakwaambila Pita, mukombwe katana kulila shiindi shotatwe aza mashiku, ulaakuntamine kale shiindi shotatwe ati twinzhi.”
Cikwama, Inkomo, Iceba
35 #
Mat 10:9, 10; Mk 6:8, 9; Lk 9:3; 10:4 Jeso wakababuzha ba shiciiya ati, “Indakamutuma mwakaakwiina cikwama, iinkomo iindyasho saa mulikwete ncimwakabula?”
Bakaingula ati, “Kwiina niciba comwi ncitwakabula.”
36Jeso wakaamba ati, “Pele inzho ndamwaambila ati, wezo ukwete cikwama naa inkomo ebweze etolelezhe, u wezo wiina iceba auzhe cisani cakwe kwaamba aule iceba. 37#Aiz 53:12Nkaambo ndamwaambila ati, Malembe alaamba ati, ‘Wakabalilwa antoomwi u bashishibi.’ Azo alyeelele kwaamba ngazuzucizhe. Nkaambo coonse cakalembwa ukaambo kangu cilazuzucizhiwa.”
38Ba shiciiya bakamwita ati, “Inta Mwami ngaaza maceba obile tulikwete!”
Jeso wakaingula ati, “Imbubo kwazulila.”
Jeso Wakomba ku Lupili lwa Masamu a Oliva
(Matayo 26:36-46; Maako 14:32-42)
39Jeso wakamuhwa mu munzhi waya ku lupili lwa masamu a Oliva umbona mbwaakaakucita lyoonse, wakaya antoomwi u ba shiciiya bakwe. 40Naakashika kubusena bobo, wakabaambila ati, “Amukombe kwaamba atamuzundi masukusho.”
41Amane wakabashiya weenda bukulo bufwaafwi aashika ibwe walifwusa, wakotama wakomba, 42waamba ati, “Taata, naa cilakonzheka ikushe inkapu yezhi yamapenzhi. Pele nikuba bobo kutabi kuzanda kwangu, akube kuzanda kwako.” 43#22:43 Amwi maŋwalu a kale kale ayina kapango ka 43 u 44Awo ngoona anjelo wakeza kwakwe kuhwa kwizeulu kwiza kumuzumya zumya. 44Inzho kaambo kepenzhi lyakaakumukwete ku monzo, wakakomba cini cini, wakanka kuhwa ibe lyakasweka ukoya malondo abulowa.
45Naakazhimuka awo ngaakaakukombela wakaya ku bashiciiya bakwe, wakayana baloona, myonzo yabo keekatele kaambo bakashimpilwa. 46Wakababuzha ati, “No kaamboonzhi muloona? Amubuke mukombe kwaamba mutanjili mu masunko.”
Kukwatwa kwa Jeso
(Matayo 26:47-56; Maako 14:43-50; Johani 18:3-11)
47Inzho Jeso naakaakucikanana, inkamu yakashika uliisolwezhe Judasi, wakaakuli umwi wa babo bali ikumi ubatwesha bobile. Judasi wakaswena afwaafwi kwa Jeso, wamushonta. 48Jeso wakamwaambila ati, “Judasi, saa wamwaaba Mwanaa Muntu kwiita mukumushonta?”
49Inzho ba shiciiya nibakacibona cakaakuzanda kucitika bakamubuzha Jeso ati, “Sa Mwami ulazanda kwaamba tulwe u maceba?” 50Ubobo umwi wabo wakakukosola kutwi kwa cilyo kwa musebezhi wa mupaizhi mukando.
51Jeso wakaamba ati, “Mbubo amucileke ceci!” Amane wakakubweza koko kutwi kwa muntu wezo wamuponya.
52Ngoona Jeso wakabaambila bapaizhi bakando, ubakando babalindizhi ba ŋanda ya Leza ubakando ba cishi babo bakeza kwiza kumukwata ati, “Nkamboonzhi mweza kunkwata u maceba iinkoli ukoya ndimutewu? 53#Lk 19:47; 21:37Ndakaakuli amwe muŋanda ya Leza mazuba oonse, pele mwiina nimwakasola kunkwata. Pele iinzho nciindi cenu cashika cakuti alele mwami wa mu mushinze.”
Pita Wamutama Jeso
(Matayo 26:57-58, 69-75; Maako 14:53-54, 66-72; Johani 18:12-18, 25-27)
54Bakamukwata Jeso bamutola kuŋanda ya mupaizhi mukando, aze Pita wakaakuya bucilila alaale. 55Kakukuncilwe mulilo akati kalubanza, ubobo Pita wakakala kuzota u babo mbaakayana awo. 56Umwi wabashimbi basebezhi naakamubona Pita ulazota mulilo wakamulangisha u kwaamba ati, “Wezu muntu aze kabali u Jeso!” 57Pele Pita wakatama waamba ati, “Uwe mukaintu! Ume wezu muntu nshimwizhi pe!”
58Cibe ciindi, umwi mulombwana naakamubona Pita wakaamba ati, “Uwe uli umwi wabo!”
Pita wakamwiingula ati, “Pe pe ume nshili wa babo pe!”
59Ulimwi nikwakaita iwoola lyomwi, umwi muntu wakaamba cakushinizha ati, “Kwiina umubuzho, wezu muntu kabali antoomwi u Jeso, kaambo ngwakucishi ca Galilaya.”
60Pele ulimwi Pita wakaamba ati, “Uwe ume azo makani nguuamba nsheezhi pe!”
Naakaakucaamba bobo Pita mukombwe wakalila. 61Ngoonaawo Mwami Jeso wakacinduluka wamucebuka Pita ukumulangisha. Inzho Pita wakaazhibaluka mazwi ngaakaamba Mwami aakuti, ubwasunu mukombwe katana kulila ulaakuntamine shiindi shotatwe. 62Pita wakahwa ansengwe walila cabulowe.
Jeso Bamuseka Ukumuuma
63Inzho bantu bakaakumulindila Jeso bakamuseka ukumuuma. 64Bakamuhumba kumenso, bamuuma ukumubuzha ati, “Shinshima! Nguni wakuuma?” 65Ulimwi bakaamba shintu shinji shinji shakumutukana ukumusampula.
Jeso Waletwa ku Babeteshi
(Matayo 26:59-66; Maako 14:55-64; Johani 18:19-24)
66Nilyakapasula izuba, Bakando baba Juda u bapaizhi bakando u balembi bakakala antoomwi, bamane bakamuleta Jeso nkubabele. 67Bakamubuzha ati, “Twaambile, saa uwe ndiwe Munanike waka Leza?”
Walo wakaamba ati, “Niinkamwaambila tamuhumina. 68Ulimwi ndamubuzha mubuzho tamunyinguli. 69Pele kuhwa bwasunu, ume ndi Mwanaa Muntu ndakakala kucilyo kwa Leza shinsana shoonse.”
70Inzho bantu boonse bakaamba ati, “Nkukuti uli Mwanakwe Leza?” Walo wakaingula ati, “mwaamba ati ndime.” 71Balo bakaamba ati, “Mbaanzhi bakamboni banji mbutucizanda! Uswe tubeni twaliteelelela nshaamba ku mulomo wakwe mwini.”
Currently Selected:
Luka 22: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.
