Luka 21

Cipo ca Mukamufwu

(Matayo 12:41-44)

1Inzho Jeso wakabona bantu bahubi balabika mali mucizobwelo. 2Ulimwi wakabona mukamufwu umwi wakaakuli mupushi cini cini, wabika tuli tobile twamukuba. 3Ngoonaawo wakaamba ati, “Ndamushimwina cini cini ati wezu mukamufwu mupushi wapa kubaala baba boonse babika. 4Nkaambo bamwi babika tushoonto bulyo kuhwa ku shintu shinji shinji nshibahubile. Pele walo wezu mukamufwu mupushi wapa mali oonse ngaakukwete, ngaakushoma mu bumi bwakwe.”

Shitondezho Shaciindi ca Mamanino

(Matayo 24:1-2; Maako 13:1-2)

5Bamwi bantu bakaakwaamba makani aŋanda ya Leza, mbuyakaakuzacilwe u mabwe mabotu meebeshi, u shipo shibotu shizoosha shakaakupewa kwa Leza. Jeso wakaamba ati, 6Cilakashika ciindi nikukaabula ibwe niliba lyomwi lizhilicilwe ebwe nina litakaaolomonwa, kuli sheshi shoonse nshimubwene.

Inkondo Umazwanga

7Inzho bakamubuzha Jeso ati, “Mwiiyi, no ndililiye nishikaacitika? Ulimwi ncinzhi cikaaba citondezho ca ciindi nishikaacitika sheshi shoonse?”

8Jeso wakabaambila ati, “Amucenjele mutacengwa, kaambo balakeza bantu banji banji mwizhina lyangu baamba ati, ‘Ndime wezo.’ Ulimwi ati, ‘Ciindi cashika.’ Mutakabacilila. 9Inzho mulakateelela inkondo umazwanga anshi yoonse, mutakatiyi. Sheshi shintu shilyeelele kwaamba shikataangune kucitika, pele tashaamba ati mamanino ashika pe pe.”

10Jeso wakaamba ati, “Cishi cilakalwa u cishi nina, bwami bulakalwa u bwami nina. 11Kulakaba kuzungaana kwanshi mu masena andeene andeene, ulimwi kulakaba inzala u malwazhi inshi yoonse, kulakaba shintu shizoosha ushitondezho shikando shitizha kuhwa mwizeulu. 12Pele kashitana kucitika shoonse sheshi, mulakaangwa u kupenzhewa, mulakatolwa kuya kubetekwa mu shikombelo shaba Juda, u kumubika muntolongo, mulakatolwa kubami ukubeendelezhi ukaambo kangu. 13Inzho ceci cilakaba nciciindi cenu cakushimwina bantu Makani Mabotu. 14#Lk 12:11, 12Mutakapengi mu mizeezo kwaamba ati no tulalikwabilila buti? 15Nkaambo ndakamupa mazwi u busongo kwaamba kutakabi naaba womwi wabashinkondonokwenu ukaamukazha ncimukakaamba. 16Mulakaabwa ubazhali benu, u banyokwenu, ubanyokokwenu boonse, u balongweenu, ulimwi bamwi benu balakayayiwa. 17Bantu boonse balakamusula ukaambo kangu. 18Pele nikuba bobo kwiina nikaba kasusu komwi kati kakazhimine kuhwa kumitwi yenu. 19Amukwatishe muzume, kaambo bobo mbumukonzha kulihuna.”

Kuzonaunwa kwa Munzhi wa Jelusalemu

(Matayo 24:15-21; Maako 13:14-19)

20Pele mwakabona ati munzhi wa Jelusalemu wazhingulukwa u bashikalumamba, inzho amuzhibe ati uli afwaafwi kuzonaunwa. 21Ubobo, babo bali mucishi ca Judiya balyeelele kulukancila mu mapili, abo bali mu Jelusalemu balyeelele kumuhwa, bali mu myuunda batakabweela mu Jelusalemu. 22#Hos 9:7Nkaambo aza alakaba “Mazuba a cisubulo,” Kwaamba cilembelwe mu maŋwalu cizuzucizhiwe. 23Mulakapenga umwe nubakaintu bamishi ubanonsha ku mazuba azo! Kulakaba mapenzhi atanabwenwe anshi yezhi. Leza ulakabapa cibebyo bantu. 24Bamwi balakayayiwa u maceba bamwi balakatolwa buzhice ku bantu bakunze, Jelusalemu ulakalyataukwa kushicila ciindi cabo bakunze cikazuzucizhiwe.

Shitondezho Shakwiza kwa Mwanaa Muntu

25 # Aiz 13:10; Eze 32:7; Jow 2:31; Cizu 6:12, 13 Kulakaba shitondezho kwizuba, kumwezhi ukuntongwezhi. Ano anshi kulakaba kutiya ukulibilika cini cini mumashi oonse. Kulakaba kuhuluma ukutooma kwa nyenje u mankutisha. 26Bantu balakawizuka ku bukandu nibalindila kubona ceco cizanda kushika anshi yeno yoonse. Insana sha kwizeulu shilakazungaana. 27#Dan 7:13; Cizu 1:7Inzho balakoombona Mwanaa Muntu uleza mu makumbi insana u bulemu. 28Sheshi shintu mwakashibona shakanka kucitika, mukalanje mwizeulu, nkukuti kufwutuka kwenu kwaba afwaafwi.

Ciiyo ce Samu lya Bukuzu

(Matayo 24:32-35; Maako 13:28-31)

29Ngoonaawo Jeso wakabaambila cikozhano ceci ati, “Amutelaike bukuzu u masamu amwi oonse. 30Mwabona ati matuhu akanka kusonsa mulazhiba kwaamba ati mainza ali afwaafwi. 31Mbubona bobo mwakabona kwaamba shintu sheshi shacitika, amuzhibe ati Bwami bwa Leza buli afwaafwi.

32“Cini cini ndamushimwina ati, shintu sheshi shoonse shilakacitika izhalane leli kalitana kumana kufwa. 33Izeulu iinshi shilakamana, pele mazwi angu taakamana.”

Jeso Wakaamba Mulinde

34“Amukale mulilibambile, myonzo yenu itaakutuntaanina bulyo kulya u kunwa, u shintu shoonse shaano anshi, kaambo buzuba bobu bukalakamuyana tamulibambile. 35Kwiza kwa buzuba bobu kulakaba ukoya kooze kateye, kalakafwisuka ukukwasha bantu boonse ano anshi. 36Amukale mulilibambile u kukomba ciindi coonse kwaamba mukayane insana shakumwiisha mu shintu shoonse sheshi shikaacitika, ukuzhima ku bushu bwa Mwanaa Muntu.”

37 # Lk 19:47 Inzho ku mazuba azo Jeso kayiisha muŋanda ya Leza, pele mangolezha kaya ukoona ku Lupili lwa Oliva. 38Inzho bantu boonse kabafwuma kuŋanda ya Leza kuya kumuteelela.

Currently Selected:

Luka 21: ILL

Highlight

Copy