Luka 23
23
Jeso Wabetekwa kwa Pilato
(Matayo 27:1-2, 11-14; Maako 15:1-5; Johani 18:28-38)
1Boonse bantu banji banji bakazhimuka batola Jeso kwa Pilato. 2Bakakanka kumutamicizha twaambo twakuti, “Twakamuyana ulalengaulila bantu wabasowa, kabaambila ati tabeelele kutela ku muleli mukando Kaizala waku Loma. Ulimwi kaamba ati walo mwini lwakwe ngu mwami munanike.”
3Pilato wakamubuzha Jeso ati, “Sa ndiwe mwami waba Juda?”
Jeso wakaingula ati, “Waamba.”
4Ngoonaawo Pilato wakaambila bapaizhi bakando u bantu banji banji bakaakubungene ati, “Ndiina mulandu ngundamuyanina wezu muntu.”
5Pele balo bakatatanana cini cini ati, “Wezu muntu ulapilinganya bantu, mucishi coonse ca Judiya injiisho yakwe. Wakakancila ku cishi ca Galilaya, inzho nguwezu washika ukono.”
Jeso Watolwa kwa Helodi
6Pilato nakateelela bobo wakabuzha ati, “Sa wezu muntu ngwakucishi ca Galilaya?” 7Inzho naakazhiba ati Jeso kahwa kubusena bwa cishi bwakaakweendelezhiwa u Helodi, wakamutuma kwa Helodi kaambo kali mu Jelusalemu ku ciindi ceco. 8Helodi wakabotelwa cini cini naakabona Jeso, kaambo wiina naakaakumubwene kateelele bulyo impuwo, pele nikuba bobo ku ciindi cilamfwu kazandisha kubona Jeso mbwaacita maleele. 9Ubobo Helodi wakamubuzha Jeso mibuzho minjii minji, pele Jeso wiina nakaingula. 10Inzho bapaizhi bakando u balembi bakeza afwaafwi bakakanka kumutamicizha twaambo tuzumuzumu. 11Ngoonaawo Helodi u bashikalumamba bakamuseka Jeso ukumulimbusha. Bakamusamika cisani ucikobelo cilamfwu cibotu, bamane bakamubweezha kwa Pilato. 12Bobu mbubuzuba ba Pilato u Helodi nibakakanka kuteelezhanya, lyoonse kabatazandana.
Jeso Wakosolelwa Kufwa
(Matayo 27:15-26; Maako 15:6-15; Johani 18:39; 19:16)
13Pilato wakabunganya bapaizhi bakando, u beendelezhi ubashicishi boonse. 14Inzho wakabaambila ati, “Mwakandetela muntu wezu u kwaamba ati ulapilinganya bantu ukubalengaulila ulimwi wabasowa. Pele ume indamoombolozha ku bushu bwenu, ndiina kumuyanina mulandu nuuba womwi kutwaambo ntumwamutamicizha. 15U Helodi wiina kumuyanina mulandu ncamupilushizha kulyuuswe. Kwiina ncaakacita wezu muntu ceelele lufwu. 16Ubobo ndamuumya bulyo tulusu, ndamana mwaangulule.”
17Inzho kacili ciyanza ca Pilato kwaamba lyoonse cashika ciindi ce Pobwe lya Kwiitilila, kabakushizha mwaanje womwi.
18Inkamu yoonse ya bantu yakapozomoka ati, “Wezu naafwe! Utwaangulwile Balabasi!” 19Wezu Balabasi kali muntolongo kaambo kabupapyu umanyongwe akacitika mu munzhi, ulimwi u buyazhi.
20Inzho Pilato mbwakaakuzanda kwangulula Jeso, wakabalomba bantu ulimwi. 21Pele balo bakapozomoka ati, “Naakankaminwe aciciinkano! Naakankaminwe aciciinkano!”
22Pilato wakabaambila bantu lwatatu ati, “No mulanduunzhi ngwaacita? Kwiina mulandu ngundamuyanina uyelele lufwu. Ubobo ulakwipaulwa bulyo amana alekwe.”
23Pele bakapozomoka cini cini ati, “Naakankaminwe aciciinkano!” Inzho ku mamanino iyowe lyabo lyakazunda. 24Pilato wakahumina cibakakupumpa. 25Wakaangulula muntu ngubakaakuzanda, wezo wakabikwa muntolongo kabupapyu u buyazhi, wakabapa Jeso kwaamba bamucite mbubakaakuzanda.
Jeso Wakankaminwa Aciciinkano
(Matayo 27:32-44; Maako 15:21-32; Johani 19:17-27)
26Inzho bakamutola Jeso, pele nibakaakuya bweenda bakaswaanganya muntu wakaakuhwa kumatungu, izhina lyakwe kali Saimoni waku Kuleni, bakamukwata bamutwika ciciinkano kwaamba acizemune, Jeso kaya bweenda kumbele lyakwe.
27Kakuli bantu banji banji bakaakuya bucilila munshi. Akati kabo kakuli bakaintu bakaakuya bulila ukumukwiilila. 28Jeso wakabacebuka wabaambila ati, “Nubakaintu ba Jelusalemu! Mutandilila, amulilile nubeni u banenu. 29Nkaambo alakashika mazuba bantu nibakakaamba ati, ‘Balikwete coolwe bakaintu babo batakazhala ukunonsha! 30#Hos 10:8; Cizu 6:16Inzho ceco cilakaba nciciindi ncibakakaambila mapili ati, amutuwile! Umalundu ati, amutusesece!’ 31Nkaambo kuti shintu sheshi shacitika kwangu ndicisamu citece, no cilakaba buti kwenu nushisamu shizumu?”
32Inzho kakuli balombwana bamwi bobile bakaakuli bafwumpi, ubakatolwa kuyaiwa antoomwi u Jeso. 33Nibakashika abusena butewa ati, “Kaanza” bakamukankamina Jeso aciciinkano, antoomwi ubafwumpi babo bobile, umwi kucilyo umwi kucimonsho. 34#Inte 22:18Jeso wakaamba ati, “Taata balecelele kaambo tabacizhi ncibacita.”
Inzho bakaabana shakusama shakwe kwiita mukuuwala makakata. 35#Inte 22:7Bantu banji banji kabazhimine ansansa baleebela, ciindi beendelezhi nibakaakuseka ukumusaalizha Jeso ati, “Wakabafwutula bantu banji, aze naalifwutule mwini tubone, na ngumunanice ngwaakashomezha Leza.”
36 #
Inte 69:21
Abo bashikalumamba bakamusaalizha, bakeza kwakwe, bamutambika waini uulula, 37bamwaambila ati, “Waakuli mwami waba Juda, lifwutule.”
38Ulimwi ezeulu aciciinkano cakwe, kaalembelwe ati, “Nguwezu mwami waba Juda.”
39Inzho umwi mufwumpi wakaakukankamininwe aciciinkano wakamutuka Jeso ati, “Sa uwe tuli munanike wa Leza? Lifwutule aswe utufwutule!”
40Pele mufwumpinina wakamulemanina ati, “Sa uwe tumutiyi Leza? Toonse twapewa cibebyo cikozhene. 41Uswe twapewa ceelele milimo yesu mibiyabi, pele wezu wiina ncaakabisha.” 42Amane wakamwaambila Jeso ati, “Ukanzhibaluce Jeso wakezhiza mu Bwami bwako!” 43Aze Jeso wakamwaambila ati, “Cini cini ndakushimwina ati, ubwasunu tulaba aze mu paladaiso.”
Lufwu lwa Jeso
(Matayo 27:45-56; Maako 15:33-41)
44 #
Kul 26:31-33
Ciindi nicakashika afwaafwi akalendebwe, kwakashika mushinze anshi yoonse wakatola mawoola otatwe. 45Ngoonaawo cishitilizho ca muŋanda ya Leza cakaanduka akati. 46#Inte 31:5Inzho Jeso wakapozomoka iizwi ikando ati, “Taata! Moza wangu ndoobika mu matashi ako!” Amane kwaamba bobo wakafwa.
47Inzho shikalumamba naakabona cakacitika wakatembaula Leza waamba ati, “Cini cini wezu mulombwana kaluleme!”
48Inzho bantu babo bakeza kweebela ceco cakaakucitika, bakabweela kuminzhi yabo kabaya bulyuuma ashamba shabo cakweetezhewa. 49#Lk 8:2, 3Boonse babo bakaakumwizhi kabotu Jeso, kubicilizha u bakaintu bakaakumucilile kuhwa ku Galilaya, kabazhimine ansansa baleebela shakaakucitika.
Kuzhikwa kwa Jeso
(Matayo 27:57-61; Maako 15:42-47; Johani 19:38-42)
50Inzho kakuli mulombwana utewa ati Jozefu wakaakuhwa ku munzhi wa Alimatiya mucishi ca Judiya. Kali muntu mubotu ulemekwa, 51ulimwi wakakulanjila kushika kwa Bwami bwa Leza. Nikuba kuti kali uumwi wakabunga kabeendelezhi wiina naakahumizhanya abo mu mizeezo, umushintu nshibaakucita. 52Wakaya kwa Pilato wakumbila mutunta waka Jeso. 53Wakoowangula mubili aciciinkano woopopela mucisani cibotu, wootola waya kuuwoneka mu cuumbwe cakakololwa mwibwe, uciina nicakazhikwa muntu. 54Bobu kabuli buzuba bwakulibambila kaambo buzuba bwa Sabata kabuli afwaafwi kushika. 55Balya bakaintu ba Galilaya bakamushindikila Jeso, bakacilila Jozefu munuma kuya kubona mutunta wa Jeso nguwakazhikwa. 56#Kul 20:10; Ciz 5:14Inzho bakabweela ku munzhi kuya kubamba mafwuta aanunka kalonze akunanika mubili wa Jeso. Mu Sabata bakalyoocezha, kwiingaina u Mulawo.
Currently Selected:
Luka 23: ILL
Highlight
Share
Copy
Want to have your highlights saved across all your devices? Sign up or sign in
Ila New Testament © Bible Society of Zambia, 2015.
