Máàrk 6
6
Nùb Nàsàréèt mvúú ə́ə̀mnɨ Yésù
(Góòmɓwê Mt 13.53-58; Lk 4.16-30)
1Ə́rè ɓèé, Yésù ɨ́ gɨ̀cù no kwé, ɗà nɨ̀fuùb noò ɨ́ tùgè ŋgə́. 2Ye Sàbáà, ŋgə́ ɨ́ ə́ŋnè dúú mɨ̀yú̧ú̧ no nɨ̀vɨ́tɨ̀b tɔ̀ɔ̀nànɨ àm Mèèín. Nùb ví̧i̧ yi go óknɨ nɨ́m ŋgə́ yi taré ɨ́ gbɨ̀ɨ̀ŋɓà cei. Ŋgáb ɨ́ fɔ̂ ɨnè: «Nɨ́ɨ́b lè lâs gonaye ŋgə́ ŋga? Kɨ̀cáàb ŋgə́ du ɓe kí ɨnè rè, gonace nɨ́ ŋgə́ ŋga? Ɓe nɨ́ɨ́b sɨ̀sɨ̀rí ŋgə́ du ndɨ̀ŋɓànɨ rè? 3Ə́r ŋgéé yi nɨ́ óòŋtèé dúhɨ́bí sé à? Ŋgə́ nɨ mwin Màríyàà sé à? Ŋgə́ nɨ tə́kɨ̀r Jâk, Jòsê, Jûdə̀ ɓe Sìmôŋ sé à? Mȩȩ́gwi̧nɨ́b ŋgéé á hà nɨ́mè tə̧ə̧́ ye?» Kí á yi ndɨŋ ŋgáb dù bɨ́ ŋgə́ ə́ə̀mwá ru. 4Á Yésù tana ŋgáb: «Yá kùb pə́təəŋkɨ́ tɨ́kìn Mèèín á nɨ ŋgə́ nɨ̀mɨrí kwé, gbàŋ ŋgéé no, ɓe ŋgə́ nɨ̀mɨ́rí yó.» 5Ɓè kɨ́ ŋgə́ ya nɨ́ ɓe nyòm ŋgə́ ndɨŋ nɨ́m sɨ̀sɨ̀rí mwi̧cáŋ ti ɗàwá. Ŋgə́ ya wáaŋɗóhií nɨ̀yáb cutɨ́b kù ɓe hèìwû ŋgáb ŋgáár ŋgwéné. 6Ŋgə́ ɨ́ sɨ̀rɨ̀ɓà cei hȩ ŋgáb ya du bɨ́ ɓe ə́ə́m ɗàwá kɨ́.
Yésù tómndéé nɨ̀fuùb no cóóŋ ɨ́ bɨrɨ́b lè jɨ̀r ə́ré
(Góòmɓwê Mt 10.5-15; Lk 9.1-6)
Kí á ŋgə́ ya gɨ̀ndóŋ kwɨ́ì génèné no, tɔ̀ɔ̀sénɨ àm Mèèín. 7Yésù ɨ́ ɓéwò nùb cóóŋ ɨ́ bɨrɨ́b lè, ɗà ŋgə́ ɨ́ tôm ŋgáb, bɨrɨ́b bɨrɨ́b. Ŋgə́ ɨ́ nà ŋgáb nyòm ŋgáb ŋgɨ́íkɨ́ nyéhɨ̀b ɓáŋhɨ́b lâs. 8Ŋgə́ ɨ́ tànà ŋgáb ɨnè: «Nyí nɨ́m kù ŋgáré ágèwá, dùgɨ̀ cɔŋ, dùgɨ̀ ndú̧u̧, dùgɨ̀ mòné, jɔ̀sé túb. 9Tə́b nyínè gureè dùɗóò sɨ́rɨ́páì, nyí cè nɨ́ júk gè.»
10Ŋgə́ ɨ́ tànàkwà ŋgáb ɨnè: «Ɓwâ nyí ɓa féínnɨ yɨ́ kù, ɗà kùb ɨ́ gàmndê nyí dúú kù no, dùná yó ku há̧á̧ hȩ nyí ɓa gɨ̀ndóŋnɨ tíí. 11Óo kwɨ́í kù no, kùb ɨ́ njɔ̧̂ nyí yá gúnnè, kùb ɨ́ nyàhȩ̀ óknɨ nɨ́m nyí taré, gɨ̀ná tíí, lámkɨ́sòná mvútúúb nyínè gureè#6.11 Lámkɨ́sòó mvútúúb gureè du túúm ɨnayâna mɨ kwá tɨ̀ mɨ cùwòcɨ̀r ɓetí mɨ yúutɨ́ mɨ́ ɓíì moò, nɨ́me wu nɨ ɓe àm kù ɗàcɨ̀wá yáá na á. kwɨ́í kɨ́ no, mɨ̀námé ə́r ŋgábè á kí.» 12Ŋgáb ɨ́ gì ɓéèsénɨ àm ɓàndèé sumí. 13Ŋgáb ɨ́ yà jùkɨ́nɨ nɨ̀wàtɨ̀b ví̧i̧ nɨ̀vɨ́tɨ̀bì sóò, ŋgáb a sagenace nɨ̀yáàb ví̧i̧ kúrúm; nùb kɨ́ a wáaŋce.
Cwá Jâŋ nò kɔhɨ kùb kɔ ə́mní ya kúré
(Góòmɓwê Mt 14.1-12; Lk 9.7-9)
14Mvókín kɨ́ no ɓwê Hèrôdə̀ nò yi du mvèìn jírií ɨ́ ô kùb nyìnnɨ àm mgbíí Yésùù. Nùb kù ɨ́ yà tànɨ: «Jâŋ nò kɔhɨ kùb kɔ ə́mní ɨ́ səəmcuhó̧ mvókín nɨ̀kwíbí ru, àm kɨ́ á ŋgə́ du ndɨ̀ŋtèènɨ nɨ́ɨ́b sɨ̀sɨ̀rí ru.» 15Nùb kù ɨ́ tà: «Nɨ Èlî á.» Nùb kù ɨ́ tàcè: «Nɨ tɨ́kìn Mèèín fɨ́te tɨ́kìn Mèèín bɨ ya tíí á.» 16Ɓwâ Hèrôdə̀ yi ók u̧nèé, ŋgə́ ɨ́ tà: «Nò kɨ́ nɨ Jâŋ mɨ tɨ ta kùb téínkɨ́ ŋgwé hwè á. Ŋgə́ ɨ́ səəmcu nɨ́ ru!»
17Kí du Hèrôdə̀ ya taá kùb bɨ̀ Jâŋ, kùb kwéí ŋgə́, kùb a kɨ́klê ŋgə́ nìrì. Ŋgə́ ya nɨ́ nɨ́m kɨ́ sam ndɨ̀ŋwá, yɨɨ́m ɓe àm Hèròdìyâdə̀ gwi Fɨ́lɨ́ɨ̀b á. Hèrôdə̀ ya gahó̧kíí nɨ́ Fɨ́lɨ́ɨ̀b gwi ŋgáré, dugɨ hȩ ya du mwin yàá noò. 18Hȩ Jâŋ ya tanakom ŋgə́ ɨnè: «Ɓíì á kààŋnɨ ɓùcùkîí gwi mwin yàá woò» rèé, á ŋgə́ ya ta kùb ndɨ̀ŋ Jâŋ u̧ ru. 19Hèròdìyâdə̀ ɨ́ ɓə̀ndɨ̀ɓà nɨ́ Jâŋ cei ɓe àm kɨ́, ŋgə́ ɨ́ yà mánɨ ní kwíhɨ̀ ŋgə́, ɨ́dù ŋgə́ yaá lùnɨ Hèrôdə̀. 20Hèrôdə̀ yaácè nɨ́ jə̀ŋnɨ Jâŋ ɓetí ŋgə́ yi ɗəəŋtɨ́ Jâŋ nɨ nò ɗɨ́ɗɨ̧́, nò sarîn á. Ŋgə́ yaá ŋgə́ gə́tɨ̀nɨ. Ɓwâ ŋgə́ yi du óknɨ nyindí Jáàŋ ɓɔ̧ne, yaá hȩ ŋgə́ ndɨ̀ŋ ɨna kè rɨ u̧. U̧ kɨ́ ŋgə́ á cè ɗúhá nɨ óknɨ nyindí nó ɓɔ̧ne cei. 21Kí á Hèròdìyâdə̀ yi kwa ɗúúm ŋgə́ ndɨŋ nɨ́m ŋgə́ yi ɗúré, ye Hèrôdə̀ yi ndɨŋ jùrúb vùùŋcùnɨ ye fɨnni noò. Hèrôdə̀ ɨ́ ɓê mbahɨb noò, gàánɨ̀b suu ɓe nùb jííb Gàlìléè, ŋgáb gò tàŋnɨ ɓe ní yáá. 22Mwin Hèròdìyâdə̀ ɨ́ lə́sò, ɗà ŋgə́ ɨ́ núɓà wòr; wàì kɨ́ ɨ́ nyàŋndê Hèrôdə̀ ɓe nùb ŋgə́ tɨ ɓéré íhín. Kí á Hèrôdə̀ yi ta ɓe mɨkóóme rè: «Ɓwei mɨ nɨ́m lâs wu ɗúré, mɨ ɓa wu nànɨ á.» 23Ŋgə́ ɨ́ gùnà mɨkóóme rè ɓɔ̧, ŋgə́ ɨ́ sàb ɨnè: «Wu ɓwèìgɨ̀ mɨ ní, mɨ ɓa wu nànɨ á, dùgɨ̀ gbɨ́ktèìn ɗɔ̀ɔ́b mɨ du kɨ́ɨ́niì.» 24Kí á mɨkóóme kɨ́ yi fó̧, ŋgə́ ɨ́ fɔ̂ yà nóò ɨnè: «Mɨ ɓwèì ŋgə́ ní?» Yà nóò ɨ́ tà: «Ɓwei ŋgə́ ŋgwé Jâŋ nò kɔhɨ kùb kɔ ə́mní.» 25Kí á mɨkóóme rè lugaincukɔ́ɔ Hèrôdə̀, ŋgə́ ɨ́ tànà ŋgə́: «Mɨ ɗúú wu nà mɨ ŋgwé Jâŋ nò kɔhɨ kùb kɔ ə́mní, pásɨ́njà kù no ɗàrò!» 26Hèrôdə̀ ɨ́ ókɓà nɨ́ yəré sumí cei. Ɨ́dù hȩ ŋgə́ yi gunaŋgáhe mɨkóóme rè ɓɔ̧ mɨ̀kùnɨ́nné, ŋgə́ yi nɨ́ sàmàìn mvúna ŋgéé ɗàà. 27Ɓè mu̧u̧ ŋgə́ ɨ́ tôm sójà noò gɨ̀ téínwònɨ ŋgwé Jáàŋ. Kí á sójà kɨ́ yi gi dúú nìrì, ŋgə́ ɨ́ téínwò ŋgwé Jáàŋ. 28Ŋgə́ ɨ́ gèwò ŋgwé kɨ́ pásɨ́njà̧à̧, ŋgə́ ɨ́ nà mɨkóóme rè. Mɨkóóme ɨ́ gènà yà nóò. 29Ɓwâ nɨ̀fuùb Jáàŋ yi ók àm kíì, ŋgáb ɨ́ gì hànnɨ kúndu nóò vɨ́rɨ̀nɨ.
Yésù líhií nɨ̀ŋgwáàb tɔ́sìn ŋgiì
(Góòmɓwê Mt 14.13-21; Lk 9.10-17; Jŋ 6.1-14)
30Hȩ nùb tómé ya ɓáacuwo Yésùù ɓusɨnné, ŋgáb ɨ́ átɨ̀nà ŋgə́ nɨ́ɨ́b ŋgáb ya ndɨŋndé ɓe kɨ́b ŋgáb ya tɔɔré lâs. 31Nùb ya du féínkwànɨ ŋgábè ɓe nùb ya du ŋgáb éímbɨ́niì yaá ví̧i̧ cei, mvókín ŋgáb taŋ cɔɔ̀ŋ ya nɨ́ ɗàɓàwá. Àm kɨ́ á Yésù ya tana nɨ̀fuùb noò ɨnè: «Gonáam, nɨ́m gɨ̀ná gə́nȩ̀ȩ́ yá nɨ̀vɨ́tɨ̀b du ɗàwáá nyí a ùwèhè ŋgób» lu. 32Á ŋgáb ya lə́ kwáìn ŋgáb kɨ̀ ŋgáb, gìnɨ gə́nȩ̀ȩ́ yá nɨ̀vɨ́tɨ̀b ya du ɗàwáá. 33Ɨ́dù nɨ̀vɨ́tɨ̀b ví̧i̧ ɨ́ pə́ɗə̀ə̀ŋsò ŋgáb. Ɗà nɨ̀vɨ́tɨ̀b ɨ́ ndììtèèhô̧ kwɨ́ì lâs no, lùféínyàyènɨ yá Yésù ɓe nɨ̀fuùb noò yi du gìniì.
34Ɓwâ Yésù ya fó̧ kwánnè, ŋgə́ ɨ́ pê mɨ̀kwìn kàm nɨ̀vɨ́tɨ̀bì. Mwàm ɨ́ bì ŋgə́ ɓe ɨ́r ŋgábè ɓetí ŋgáb yaá hȩ jírɨ́b du ɓe nò gə́tɨ ŋgábè ɗàwáá. Kí á ŋgə́ yaré ŋgáb tɔ̀ɔ̀nɨ nɨ́ɨ́b ví̧i̧. 35Hȩ mvii yi gɨcɨ nɨ́ ceí, á nɨ̀fuùb Yésùù ŋgɨɨso gín nóò, ŋgáb ɨ́ tànà ŋgə́: «Mvii gɨcií nɨ́, nɨ́m á cè nɨ́ hò̧ tɨfuru̧ú̧. 36Mbɨ́k wu nùb lè gɨ̀cù bɨ kwɨ́íbìn, kɨ́ kù mwaibin yɨ́ ŋgáb gwɨi nɨ́m ŋgáb taŋndé.» 37Yésù ɨ́ tàcùnà ŋgáb: «Nyí nɨ̀miib, nanáam ŋgáb nɨ́m cɔɔ̀ŋ!» Ɨ́dù ŋgáb ɨ́ fɔ́cù ŋgə́ ɨnè: «Wu ɗúú nɨ́m gɨ̀ gùnnɨ bɨ̀rê kɨ́ sure mònéè#6.37 Ɓwâ ya kɨ́, sure mònéè mwi̧ á ɗóhîn ɓe mwèìn kùb gom nò ə́ré mvii mwi̧í̧. təmərì bɨrɨ́bí nɨ́m a nà ŋgáb tàŋtɨ à?» 38Kí á Yésù fɔ́ ŋgáb: «Nyí á ɓe bɨ̀rê meeb? Gɨnáam pénɨ.» Ɓwâ ŋgáb góomnyaaŋworé, ŋgáb ɨ́ tà: «Nɨ́m á ɓe kí ŋgiì ɓe həré bɨrɨ́b.» 39Yésù ɨ́ tànàgì nɨ̀fuùb noò ŋgáb ndɨŋ nɨ̀vɨ́tɨ̀b dùtèèré ɓwìín, mɨ̀kù̧ú̧ mɨ̀kù̧ú̧ yáá. 40Ŋgáb ɨ́ dùtèèrê ɓwìín mɨ̀kù̧ú̧ mɨ̀kù̧ú̧, kɨ́b kù təmərì, kɨ́b kù cè vii bɨrɨ́b ɨ́ cóóŋ. 41Kí á Yésù ágɨ bɨ̀rê ŋgiì ɓe həré bɨrɨ́b lè. Ŋgə́ ɨ́ ŋgèèwî íí còóm, ŋgə́ ɨ́ sáktè Mèín. Ŋgə́ ɨ́ kùùmè bɨ̀rê ɗà ŋgə́ ɨ́ nà nɨ̀fuùb noò ŋgáb gɔ̀knà nɨ̀vɨ́tɨ̀b. Ŋgə́ ɨ́ gɔ̀knàɓwê nùb lâs həré bɨrɨ́b lè. 42Nùb lâs ɨ́ tàŋ, ŋgáb ɨ́ fùb. 43Nɨ̀fuùb Yésùù ɨ́ ɓáàcù kumsiì bɨ̀rê ɓe kɨ́b həréé yi meré há̧á̧ lɨ̀ŋtɨ̧̀ cóóŋ ɨ́ bɨrɨ́b. 44Nùb yi taŋ bɨ̀rê kíì yaá nɨ̀ŋgwáàb tɔ́sìn ŋgiì.
Yésù á gìnɨ gùr mvúmí ya
(Góòmɓwê Mt 14.22-33; Jŋ 6.15-21)
45Cùr kɨ́ no ɓè mu̧u̧, Yésù ɨ́ kpɔ́hè nɨ̀fuùb noò ŋgáb lə́ kwáìn pèyànɨ cəə́r, péín kwɨ́í jíri Bètsáyídà duré, ɓwâ ní nɨ̀mɨr ní duye ndɨ̀ŋnɨ nɨ̀vɨ́tɨ̀b gɨ̀cùtɨ rè. 46Ɓwâ ŋgə́ ɓe nùb kɨ́ yi gɔɔré, á ŋgə́ gi ɓeè, Mèín yóŋnɨ. 47Ɓwâ lɨ́tɔ̧ ya kerɨré, kór yaácɨ̀ nɨ ɓáá tə̧ə̧́, Yésù á cè nɨ́ ɗàá ŋgə́ mwi̧. 48Ŋgə́ ɨ́ pê nɨ̀fuùb noò á cɨ̀ bɨ kwànnɨ kór ɓe jábɨ́r cei, ɓetí kəŋmbə́r yaá ŋgáb no cùrónɨ. Péín yesə̀rìì, ŋgə́ ɨ́ yà gìnɨ mvúmí ya còóm gàìnsònɨ ŋgáb. Ŋgə́ ɨ́ ɗû nɨ́ ŋgáb ya ndóŋnɨ. 49Ɓwâ ŋgáb yi pə́so ŋgə́ gònɨ mvúmí yaà, ŋgáb ɨ́ lə́mnè bɨ́ nɨ nyéhè ɓáŋhîn kù á, ŋgáb ɨ́ yà kɨ́ɨ̀ŋnɨ. 50Ɓetí ŋgáb lâs yi péé ŋgə́, vùù ɨ́ bɨ̀ɓà nɨ́ ŋgáb cei, ɨ́dù Yésù ɨ́ wèìwònà ŋgáb ɓɔ̧, ŋgə́ ɨ́ tà ɨnè: «Nyí nɨ vùù ô, mɨ á, taamnáam njɔ̧̀!» 51Ŋgə́ ɨ́ lə́sò ŋgáb kwànɨ kwáìn ku, kəŋmbə́r ɨ́ ə́ŋhȩ̀. Nɨ̀fuùb noò ɨ́ gbɨ̀ɨ̀ŋɓà cei, 52ɓetí ŋgáb yi bɨ́ ókwa njàb nɨ́m sɨ̀sɨ̀rí Yésù yi ndɨŋ ɓe bɨ̀rê kɨ́, sum ŋgábè yaá nɨ mgbemîn.
Yésù á wáàŋnɨ nɨ̀yáàb ɗɔ̀ɔ́b Jènèsàréèt no
(Góòmɓwê Mt 14.34-36)
53Pècáŋhȩ̀ȩ́ ɓárí, ŋgáb ɨ́ sûŋ kór gín mvúmí, ɗɔ̀ɔ́b Jènèsàréèt no. 54Fó̧wòó ŋgábè kwánnè, nɨ̀vɨ́tɨ̀b ɨ́ ɗə̀ə̀ŋcù Yésù. 55Ŋgáb ɨ́ gɨ̀tèècù ɓe lùú ŋgɨ̀ŋgɨ́ŋ ɗɔ̀ɔ́b kíì no bɨ̂ŋ, hà̧à̧tèèwònɨ nɨ̀yáàb kò yə́bì ŋgábè ya, gèwònànɨ Yésù yɨ́ lâs ŋgáb yi ók ŋgə́ duré. 56Yɨ́ Yésù yi du gìniì lâs, ŋgáb yaá ŋgə́ gèwònànɨ nɨ̀yáàb. Dùgɨ̀ kwɨ́í jírií, dùgɨ̀ kwɨ́ì mɨ̀tâín ɓe mwaibin lâs, nɨ̀vɨ́tɨ̀b yaá gònɨ ɓe nɨ̀yáàb. Ŋgáb a gò ŋgáb kɨ́ɨ́nɨ laŋtɨ̧ɨ̧́, ŋgáb a yôŋ Yésù mbɨ́k vúm dì̧hóɗóò tó júú nóò. Nùb ya di̧nɨ tó júú ŋgéé kíì lâs ya wáaŋtɨ́.
Currently Selected:
Máàrk 6: NTV
Highlight
Share
Copy
Want to have your highlights saved across all your devices? Sign up or sign in
© 2007 Alliance Biblique du Cameroun, B.P. 1133, Cameroon
