Máàrk 7

Tɔ̀ɔ́ tákɨ̀rɨ́b yi tɔɔkɨ́soré

(Góòmɓwê Mt 15.1-9)

1 Fàrísààb ɓe nɨ̀gááŋ káàtàbì yi éíwoó Yèrúsàlèm, ŋgáb ɨ́ gò ɓáànɨ yá Yésùù. 2Ŋgáb ɨ́ pê nɨ̀fuùb Yésùù tàŋnɨ cɔŋ ɓe jɨ́nɨ̀m ŋgáré, ŋgáár nàtɨ̀wá; u̧ kɨ́ ɓíì ə́mní yi nɨ́ ɗúnɨ u̧ ɗàà. 3Jwîf bɨ lâs ɓà, dùgɨ̀ nùb du Fàrísààb, ŋgáb bɨ tàŋnɨ cɔŋ ɓè ŋgáb du ŋgáár mîn nàtɨ̀wáá ɗàà, hȩ ɗɨ́m tákɨ̀rɨ́b ya tɔɔkɨ́soré. 4Ɓwâ Jwîf bɨ cuwolɨ́ŋ mɨ̀tɨ̧̀ɨ̧́ rɨ, ŋgáb bɨ cɔŋ tàŋnɨ ɗàwá ɓè ŋgáb du mvúm kɔ̀kyèwáá. Ŋgáb á gwà gə́tɨ̀nɨ ɓe jɨ̧ cúk mɨ̀ɗɨ́mɗɨ̀m kàtɨ́b kù nɨ̀vɨ́tɨ̀b ya mare ɓe kíí hȩ ɓíì rɨ u̧ (sèkíì tóóbì, njííb ɓe súwábí).

5Kí á Fàrísààb ɓe nɨ̀gááŋ káàtàbì ya fɔ́ Yésù: «Àm níì á nɨ̀fuùb woò du bɨ́ jààŋkɨ́nɨ tɔ̀ɔ́ ya tákɨ̀rɨ́bí? Ŋgáb á bɨ tàŋnɨ cɔŋ u̧ ŋgáár nàtɨ̀yàyèwá.» 6Yésù ɨ́ pììnà ŋgáb ɨnè: «Nɨ́m Mèín ya nyin ɓe ɨ́r nyínè Èsáyà ya tɨin ndè á ɓà hàrák, mɨ̀yooɗíím ndè. Ɓetí ŋgə́ ya tɨintɨ́ ɨnè:

‹Gbàŋ kɨ́ dɨɨmɗóo nɨ mɨ nyindí ɓɔ̧ne ya á,

njɔ̧̀ ŋgábè á nɨ cóo ɓe mɨ.

7Ŋgáb ndáŋ bɨ́ mɨ ŋgə̀mnɨ sam á,

ɓetí nɨ́ɨ́b ŋgáb du tɔ̀ɔ̀nànɨ nɨ̀vɨ́tɨ̀bì

du nɨ ɓíhɨ̀b nùb ɗɔ̀bɨ́nné á.›

8Nyí á nɨ mbɨ́ksénɨ ɓíì Mèèín ɗàá, nyí a gə́tɨnyaaŋce ɗíím juu nɨ̀vɨ́tɨ̀bì.»

9Yésù ɨ́ tàgwà: «Nɨ́m nyí ɗəəŋɓa mɨ́nne á lèèkî ɓíì Mèèín àm nyí gə́te tɔ̀ɔ́ nyí nɨ̀mibi. 10Ɓetí Mòyîs yi taá ɨnè: ‹Jə̀ŋ tá woò ɓe yà wóò›, ŋgə́ ɨ́ tàgwà: ‹Nò andɨ tá noò, kɨ́ kù yà nóò, á ɗúnɨ kùb kwíìkɨ́ ŋgə́.› 11Ɨ́dù kɨ́ nyínè, nyí á tànɨ ɨnayâna nò kù ɨ́ tànà tá noò, kɨ́ kù yà nóò kè ɨnè: ‹kpɨ́kpɔ́ mɨ tɨ du wu kpɔ́kniì, mɨ mɨ wu kpɔ́kcɨ̀nɨ ɗàà, ɓetí du nɨ kòrbâŋ á› na, (Kí ta ‹nyər ók ɓe Dúú Mèèín› na á). 12Nyí a mbɨ́kmècè nò kɨ́ ndɨ̀ŋ u̧. 13Ɓe ndɨ̧̀ɨ̧́ u̧ kɨ́ á nyí du kwíìláàŋkɨ́nɨ Nyindí Mèèín ɓe tɔ̀ɔ́ nyí du nàtèènɨ mvókín nyínè noò ru. Nyí á ndɨ̀ŋɓwênɨ nɨ́ɨ́b kù ví̧i̧ fɨ́te kíí.»

Nɨ́ɨ́b du ndɨ̀ŋnɨ nɨ̀vɨ́tè sèì nò ɓáŋhɨ́nne

(Góòmɓwê Mt 15.10-20)

14Kí á Yésù ya ɓécuwo nùb ya du ɓe ŋgáb ɓèé lâs, ŋgə́ ɨ́ tànà ŋgáb: «Gə́əŋnáam tó, nyí lâs. Nyí a ô àm ndè. 15Nɨ́ɨ́b lâs du lénɨ nɨ̀vɨ́tèé ɓɔ̧ne nɨ ndɨ̀ŋnɨ ŋgə́ sèì nò ɓáŋhîn ɗàà, ɨ́dù nɨ́ɨ́b fó̧ ŋgéé ɓɔ̧ɔ̧ yàhô̧ sumíì ɨ́ fɨ́tɨ ŋgə́ ɓáàŋkɨ́nɨ ru. 16[Óknáɓam mîn ɓè nyí du ɓe tó ók àmnì!]»

17Ɓwâ Yésù yi éíkɨ́ mɨ̀kwìn kɨ́ no, ŋgə́ ɨ́ lê yóò, á nɨ̀fuùb noò yi fɔ́ ŋgə́ njàb gɨ̀gàìn kíì. 18Ŋgə́ ɨ́ tànà ŋgáb ɨnè: «Nyí nɨ ɓe kɨ̀cáàb ɗàɓwêwá ye? Nyí nɨ ɗə̀ə̀ŋwá ɨnayâna nɨ́m lə́ nɨ̀vɨ́tèé ɓɔ̧ɔ̧ lȩ́ne nɨ ndɨ̀ŋnɨ ŋgə́ sèì nò ɓáŋhîn ɗàwá à? 19Ɓetí nɨ́m kɨ́ nɨ lénɨ no sumí ɗàà, ŋgə́ lə́ nɨ́ tóbȩ́ȩ́ á, a tì fó̧ndóŋcè nɨ́?» (Nyindí kɨ́ no Yésù yi ɗú tànɨ kùb tàŋ nɨ́ɨ́b cɔɔ̀ŋ lâs na á.) 20Ŋgə́ ɨ́ tàgwà ɨnè: «Nɨ́m fó̧ nɨ̀vɨ́tèé ɓɔ̧ne ɨ́ du nɨ́ ŋgə́ ɓáàŋkɨ́nɨ ru. 21Ɓetí àm gwínhó̧ nɨ́ nɨ̀vɨ́tèé ɓɔ̧ɔ̧ á, no sumí á mɨ̀lə́m ndɨ̧̀ɨ̧́ nɨ́ɨ́b ɓáŋhɨ́b hȩ: ŋguùŋ du nànɨ sə̀réé, yúk, kwíhèé nɨ̀rì, 22mààŋ, sunɨ̀b, ɓíí, mbááŋ, ju jɨ́mnîn ɗàwáá, ɓi̧í̧, tàtùùb, wútè síhé ɓe ŋgwé ɓáŋhîn du bɨ́ fó̧nɨ ru. 23Vùùm nɨ́ɨ́b ɓáŋhɨ́b kɨ́ lâs gwínhó̧ nɨ̀vɨ́tèé ɓɔ̧ɔ̧ á, ŋgə́ a sèì nò ɓáŋhîn.»

Nɨ̀gwi yi du nɨ̀gúrí yi ə́əmtɨ́ Yésù

(Góòmɓwê Mt 15.21-28)

24Cùr kɨ́ no, Yésù ɨ́ éì ɓè, ŋgə́ ɨ́ gì ŋgɨ̀ŋgɨ́ŋ ɗɔ̀ɔ́b Tíìr no. Ŋgə́ ɨ́ lê dúú kù no. Ŋgə́ yi nɨ́ ɗúwa kùb ɗə̀ŋhɨ̀ ní á ɓè, ɨ́dù ŋgə́ yi nɨ́ nȩ̀ȩ́ dùwá ɓè nɨ̀vɨ́tɨ̀b ɗəŋhɨ ŋgə́ á ɓèé. 25Nɨ̀gwi kù nɨ̀wàtɨ̀b yi du jáàbnɨ muní, yi óó kùb nyìnnɨ àm Yésùù, ɓè mu̧u̧ ŋgə́ ɨ́ lùgàìnsò Yésù, ŋgə́ ɨ́ gùsê ŋgéé ɓusiín. 26Nɨ̀gwi kɨ́ yi nɨ́ nɨ̀gúr á, kùb ya fein ŋgə́ Fènìsî á, ɗɔ̀ɔ́b Sìríì no. Ŋgə́ ɨ́ yôŋ Yésù jùkɨ́ nɨ̀wàtɨ̀b muní sóò. 27Ɨ́dù Yésù ɨ́ tànà ŋgə́ ɨnè: «Mbɨ́kye mucutɨ́b fùbyèe mbáb. Nɨ nyɔ̧ɔ̧́ ɗàà kùb áá cɔŋ mucutɨ́bí lèènànɨ lɨ̀r.» 28Ŋgə́ ɨ́ tàcùnà Yésù ɨnè: «I̧i̧, Kéké, ɨ́dù dugií u̧, lɨ̀r á lénɨ tə́bə̀rè siín tàŋnɨ kumsiì cɔɔ̀ŋ mucutɨ́bí.» 29Kí á Yésù tana ŋgə́ ɨnè: «Ɓe ɨ́r nyindí wu nyin kíì, gɨm, nɨ̀wàtɨ̀b éíhó̧kíí mwin wóò só.» 30Ŋgə́ ɨ́ gɨ̀cùgì no yó, ŋgə́ ɨ́ kwà mwin nóò kòó gwîn, nɨ̀wàtɨ̀b tɨ éíhó̧kíí no só.

Yésù wáaŋtɨ́ nɨ̀ŋgwá njɨ̀mgbòŋtóo kù yi duɓwéhe mùkàà

31Yésù ya éíkɨ́tɨ́ ɗɔ̀ɔ́b Tíìr no, ŋgə́ ɨ́ ààŋndôŋ Sìdôŋ. Ŋgə́ ya gain ɓáí Gàlìlê á, ŋgə́ ɨ́ ndóŋɓà ɗɔ̀ɔ́b kùb ɓé «Kwɨ́ì cóóŋ» ndɨ no tə̧ə̧́. 32Kùb ɨ́ gèwònà ŋgə́ nɨ̀ŋgwá ya du njɨ̀mgbòŋtóo yi duɓwéhe mùkàà; ŋgáb ɨ́ yóŋɓà ŋgə́ ɨnayâna ŋgə́ hèìwú ŋgárɨ̀b ŋgéé nɨ̀ŋgwá kíì ŋgwéé. 33Kí á Yésù ya ɗamhó̧ ŋgə́ gə́nȩ̀ȩ́, cóo ti ɓe mɨ̀kwìn nɨ̀vɨ́tɨ̀bì. Ŋgə́ ɨ́ sèìtèèrê nɨ̀ŋgwá rè mbə́re tó̧ó̧, ŋgə́ ɨ́ túŋhô̧ cwàá, ŋgə́ ɨ́ sà yúum nɨ̀ŋgwá rèè ya. 34Kí á Yésù ya ŋgeewú ɓɨllin, ŋgə́ ɨ́ fì mèèìn, ŋgə́ ɨ́ tànà ŋgə́: «Èfátà!» (Kí ta: «kumnɨm!» na á.) 35Ɓè mu̧u̧, tóòb nɨ̀ŋgwá kíì ya kuumtɨ́; yúum ŋgéé ɨ́ wáŋhȩ̀, ɗà ŋgə́ ɨ́ yàrê wèìɓanɨ ɓɔ̧ mîn. 36Yésù ɨ́ tànà ŋgáb ɨnayâna nò kù àm kɨ́ tíí tàndóŋwa yáá. Ɨ́dù ɓwâ ŋgə́ ya duɓagɨ ŋgáb kààŋnɨ kɨ́ á ŋgáb ya duɓace ɓéènɨ cei nɨ́ɨ́b ŋgə́ ndɨŋndé. 37Ŋgáb ya gbɨɨŋɓatɨ́ ə́r ŋgéé cei, ŋgáb ɨ́ yà tànɨ ɨnè: «Nɨ́ɨ́b ŋgə́ du ndɨ̀ŋniì lâs á nyɔ̧ɔ̧́ cei, ŋgə́ á ndɨ̀ŋnɨ nùb yi du njɨ̀mgbòŋtóo ókcù tó̧ó̧, nùb ya du mùkàà wèìcù ɓɔ̧!»

Currently Selected:

Máàrk 7: NTV

Highlight

Copy