MARKUS 3
3
MARKUS 3
1Yɔ Yeesu wɛɛ gi gul a mɔksilluk du, wal za gi du gin naanɔ wɔlɛ. 2Dood wɔ hi sɔ̧ɔ̧k Yeesu sɔsɔg a kinsa gi za̧a̧s wal naan wɔlya bɔ a holum-ɔ̧t be, an hi ɗɛɛg dɔgl gɛ̧ɛ̧nuko. 3Yeesu raa wal naan wɔlya bɔ:
a ɗukum ha a dood lɔlgbar sɛw.
4Kuudu ɛr dood wɔ hi gi sɔ̧ɔ̧ko:
a maak wɛ dɔg a ri? An hí gɔ hin rɔb a holum-ɔ̧t ya? Zaa hí gɔ hinha̧a̧l ya ri? Gi an hí za̧a̧s doo za̧a̧s ya? Zaa gi an hí gbɔŋ-gbɔm ya?
Hɔnɛ dood wɔ hi wɛɛ hi kɔm hititi, hí gōō hinza gɛ. 5Hin nɔɔs Yeesu yɛ̧ltɔnɔ a kpoosya̧ ɓaatil bɔ gi dɔŋgo. Wɛɛ sɔ̧ɔ̧hi sɛw hi nɔɔtig lɔlɛ. Wɛɛ raa wal bɔ gɔ:
a yu̧u̧sum naan mɔ.
Naanwɔlya bɔ yu̧u̧s naanɔ, naanɔ bɔ wɛɛ bɛrɔ. 6Farisaya wɔ hi gbɛn hin bɔ tal anbɔ nɔɔhi hi tuu a mɔksilluk bɔ gedu, ɓɔrbɔ hi eltin hi da hi mɔksa hi waar bɔ Hirudus doodɔ an hi wɔb kɔlk hi gbɔm Yeesu.
7Yeesu ɔɔ lɛl bɔ rek hi walɛsɛrɛ ɔ̧ɔ̧ a Galile mɛmbal ya̧. Saal gbɔɔl fɔge. Doodya̧ hi fu̧u̧z a Galile hi a Yahuduya, 8a Urusalima, a Udumɛ hɛbt du, a Urdum kasiŋ zaa bɔ ge, hi hɛbt za yɔ sɛ̧ɛ̧b a Tiir dɔŋdi hi Sidɔŋg ge. Saal gbɔɔl bɔ gi zaak Yeesu ge anyɔ hi lag hinyɔ gi wook sɛw.
9Yɔ anbɔ Yeesu raa walɛsɛrɛ ɔ̧ɔ̧ wɔ an hi tɛbsig lɛmb wansɛ gi ɗɔɔt gedu, an bɔ saal wɔ hi ɓɔ̧ɔ̧g hɛbtdi. 10Anyɔ gi za̧a̧sig dood kittɔnɔ, wɔ gums gi hi tɔk sɛw hi zaak ge hi beet an hi ki̧i̧ge. 11Loorɛha̧a̧l wɔ gɔ hi bɛɛg gbɛnko, hi gbuut gi muutdu, hi ɓoo kaalɛ:
a mɔɔ gi Bɛt waaɔ!
12Hɔnɛ Yeesu wɛɛ ɓaasihi a bɔ hi raa a bee gi Za̧a̧nɔ.
13Yɔ Yeesu kar a ga̧a̧t ha elz dood wɔ ha̧a̧ge, hi zaa a ge. 14Her dood kooblɛ daa eer gaati wɛɛnihi tɔmsyaadɛ an hi waatin elo, gí yaahi hí dɔg Bɛt dɔglɔ, 15hí wɛɛ hí dag tɛŋk an hí nin loorɛha̧a̧l wɔ.
16Dood koobl daa eerɛ wɔ herihi nuŋgya̧ gɛrɛ: Simɔŋ yɔ Yeesu dɔ̧ɔ̧sig nuŋgɔ zaa a Piyɛr , 17Zebede waatɔ walɛ wɔ Yakuba hi yɛ̧ɛ̧tɔ Yohana, dood wɔ Yeesu dɔ̧́ɔ̧́sihi nuŋgya̧ a Bowanɛr, hinɔ raakɔ a bɛlya̧a̧sɛɛk-waatwalɛyɔ. 18Andrɛ, Filib, Bartelemi, Mata, Tumas, Alfe waa wal Yakuba, Taadeyus, Simɔŋ Hɛbtwaa Gabs bɔ 19hi Yahuda Iskaryudi za̧a̧nyɔ rɛ̧ɛ̧ Yeesu.
20Yeesu wɛɛ wɛɛ a raa du. Yɔ dood saal wɔ hi wɛɛ hi mɔks a ge gi daarlɛlɛ, dāg gbɔnɔ an gi lehin hi walɛsɛrɛ ɔ̧ɔ̧ hɛw gɛ. 21Yɔ Yeesu nɛsɛ ɔ̧ɔ̧ wɔ hi lag anbɔ hi zaa an hí loog hi tɛŋko. Yɔ anbɔ, dood wɔ hi raak be:
a taan kol ha.
22Yɔ Bɛtmaakdɔkya wɔ hi tiiz a Urusalima hi raa:
a Yeesu gin loorɛha̧a̧l waar Belzebili a gi muul du.
Gii gaag tɛŋk an gi ninin loorɛha̧a̧l wɔrɔ.
23Yɔ anbɔ Yeesu wɛɛ elihi, dɔgsihi dɔgl hi ya̧a̧daaniki:
a Saydanu ɗɛɛ an gi nin zulɔ ri nɔ? 24À waar ums za gɛ̧ɛ̧ zulɔ, waar umsɔ ɗɛ̄ɛ̄ an gi er gɛ. 25À nɛsums za gɛ̧ɛ̧yyɔ, nɛsums bɔ ɗɛ̄ɛ̄ an gi er gɛ. 26À Saydanu ha̧tir zulɔ, gɛ̧ɛ̧ zul ɔ̧ɔ̧nɛ; waar umsɔ bɔ ɗɛ̄ɛ̄ an gi er gɛ, tɛŋkɔ yɔ da̧a̧da̧.
27Doo za ɗɛ̄ɛ̄ an gi gul a za̧a̧nza tɛŋkya raa du an gi wɔɔl wɔdɔ gɛ, gid wɔ̄b za̧a̧n tɛŋkya bɔ kɛn gɛ. À wɔge, ɗɛɛ an gi loo wɔdɔ sɛw a gi raa du. 28Be raasin rɔbo: dood hi ɗɛɛ an hi dag hinha̧a̧lya̧ bisigi hi ya̧a̧ya̧ ha̧a̧l yɔ gɔ hi boo a Bɛt zulha sɛw. 29Yɛrɛ za̧a̧nyɔ boo ya̧a̧ha̧a̧l a Bɛt Mɔkilɔ zulha, Bɛt taasig nɛ hinha̧a̧lɔ zaa bisig zaŋ; yɔ anbɔ, woo hinha̧a̧l yɔ gɔ gi waa faa giya.
30Yeesu dɔgsihi hin bɔrɔ anbɔ yɔ hi raa:
a gin loorɛha̧a̧l gi muul du giya.
31Yeesu nɔɔtɔ hi Yeesu yɛ̧ɛ̧dɛ ɔ̧ɔ̧ hiya hi zaa hi er a lak di, hi yaas Yeesu ya̧a̧ hi elzige. 32Saal wɔ hi ɗɔɔt gi dɔŋdi hi raage: a ɗɛntyɔ, kɛmɔ:
nàà mɔ hi yɛ̧ɛ̧dɛ mɔ hi gi mɔ ɛrk lakɗi.
33Yeesu goohi:
a bɔ gi nàà be hi yɛ̧ɛ̧dɛ be nɔ?
34Kuudu wɛɛ sɔ̧ɔ̧ dood wɔ hi ɗɔɔt elo, raa:
a nàà be hi yɛ̧ɛ̧dɛ be hi gi gɛrɛ. 35Za̧a̧nyɔ woo hinyɔ Bɛt ha̧a̧ge, gi yɛ̧ɛ̧ be, siŋg be hi nàà be.
Currently Selected:
MARKUS 3: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
