MARKUS 2

1Kuudu yɔ ɔ̧t an eerɛ zaa taarɛ hi talɔ, Yeesu wɛɛz a Kapɛrnayum. Dood hi lag a gi raa du. 2Dood kittɔnɔ hi zaa hi mɔks deder, tuur a lukgbarɔ, lɛl-aakil zɛ̧ɛ̧r gɛ. Yeesu gisihi dɔk Bɛt dɔglɔ.

3Dood zaadɛ hi zaa hi nasɔ hi kamz doo za zaŋgdi hi tɛŋzig tees du. 4Yɔ dood saal hi hi̧i̧s deder be, gbɔnɔ daas lɛl taa an hi sɛ̧bsig a Yeesu ge. Hi kar luk zulha, hi mibr lɛlyɔ riitin hi Yeesu der. Hi sis zaŋgd bɔ kus sil ha a tuutir lɛlyɔ hi gɔ gedu. 5Yɔ Yeesu gbɛn dood wɔ ɗɔbsigya̧, raa zaŋgd bɔ:

a waa be, be bitsum hinha̧a̧l mɔ wɔ bitsɔ.

6Bɛtmaakdɔkya zaadɛ hi ɗɔɔt nɛ di hi gi zulya̧ hinwark be:

7a wal yɛrɛ yɛɛl ri gi book ya̧a̧ha̧a̧l a Bɛt zulha nɔ! Bɔ ɗɛɛ an gi bis hinha̧a̧l nɔ? Bɛt gii ɗɛɛ gi gbun kpɔd!

8Ɓɔrbɔ yɔ Yeesu mɛɛ hinyɔ wɔrɔ hi mɔkig hi kpoos du be, warihi:

a nɔ nɛ gin mɔkil anbɔ nɔ? 9An be raa doo zaŋgd bɔ a ɗukumɔ mɔ́ loo sil mɔ, mɔ́ ɛmbɔ, hi záá raakɔ a be bitsum hinha̧a̧l mɔ bitsɔ, nɔni ɓaa gi daarlɛl nɔ? 10Yɛrɛ ha̧a̧be an nɛ mɛɛ a Za̧a̧n Waa bɔ gin tɛŋk a hɛbtdi an gi bits dood hinha̧a̧lɛ.

Raa doo zaŋgd bɔ:

11a be raamɔ, ɗukumɔ, loom sil mɔ, mɔ wɛɛ mɔ lɛlɛ!

12A ya̧a̧ gbun bɔ gedu wal bɔ ɗukɔ, loo silɔ tuu a dood lɔlgbar sɛw. Yɔ anbɔ, hi sɛw kɔmsihi gɛrsɛ. Hi wɛɛ hi baan Bɛt hi raa

a wí gbɛ̄ndir nɛ hinza riitin an yɛrɛ zaŋ gɛ!

13Yeesu wɛɛ tuu Kapɛrnayum rek a Galile mɛmbal ya̧. Yɔ dood saal wɔ sɛw hi zaa a ge, goksihi hinɛ.

14Yɔ gi daako, gbɛn Alfe waawal Lewi ɗɔɔt a toosluk du, raage:

a fɔbzibe!

Lewi ɗukɔ fɔge. 15Yɔ Yeesu re gi lekhin a Lewi raa du, tooszekya wɔ hi hinha̧a̧lwookya zaadɛ kittɔnɔ hi lekhin lɛlgbunu hi Yeesu , hi walɛsɛrɛ ɔ̧ɔ̧ wɔ, dood kittɔnɔ hi fɔg nɛ be. 16Yɔ Bɛtmaakdɔkya wɔ hi gi a Farisaya wɔ hi teesdu hí gbɛ̄n Yeesu gi lekhin hi tooszekya wɔ hi hinha̧a̧lwookya wɔ, hi war walɛsɛrɛ ɔ̧ɔ̧ wɔ:

a nɔ ɗɛnt nɛ gi lek hin hi tooszekya wɛrɛ hi hinha̧a̧lwookya wɛrɛ nɔ?

17Yɔ Yeesu kɛmɔ, wɛɛ raahi:

a dood wɔ muulya̧ gi rɔbtɔnɔ hā̧ā̧hi gɛr gɛ, ha̧a̧ gumtil wɔ hiya. Bé zāā an be el dood rɔbɛ gɛ, be zaa an be el hinha̧a̧lya wɔ hiya.

18Ɔ̧tza ma Yohana Bɛtmɛm Hotingoya walɛsɛrɛ ɔ̧ɔ̧ wɔ hi Farisaya wɔ hi lisig Bɛt leesɛ. Dood hi zaa hi war Yeesu :

a dood wɛrɛ hi hinlilko, nɔ fɔkya mɔ wɔ hí lı̄l ya̧nɛ gɛ nɔ?

19Yeesu wɛɛ goohi:

a za̧a̧n nislookya bɔ sa̧a̧mɔ wɔ hi ɗɛɛ hinlilk anyɔ nislookya bɔ gitin hi hii a lottins naab-ɔ̧t ya? Yɔ gitin hi hii be, hí ɗɛ̄ɛ̄ an hi lil gɛ. 20Yɛrɛ ɔ̧tyɔ Bɛt gɔ gi ha̧s nis lookya bɔ du gi tuurɔ, hi lil ɔ̧tɔ ge.

21Doo za gɔ sub gban taakil seg nuktig a gban haŋsil ha gɛ; à labɔ, gban seg bɔ yɔ kpaar gban haŋsil bɔ kpaar gbaŋ za, taakil lɛl bɔ yɔ fɛɛfɛ. 22Wɛɛ doo za gɔ kpēl bumhob mukt a tik wɔm du gɛ; à labɔ, bum bɔ nɔɔlɔ yɔ gbɔmr tik bɔ gbɔmrɔ. Bum bɔ hi tik bɔ yɔ hi ha̧tir lɛl gbunu. Yɛrɛ bɛr an hi kpel bum mukt a tik seg du.

23Ɔ̧tza a Yahuduyaadɛ holum-ɔ̧ti, Yeesu hi walɛsɛrɛ ɔ̧ɔ̧ hi talik a tot bak wɔ du. Yɔ hi gi reko, walɛsɛrɛ ɔ̧ɔ̧ wɔ hi yɛɛl tot wɔ halkigi. 24Farisaya wɔ hi war Yeesu gɔ:

a sɔ̧ɔ̧mɔ, nɔ walɛsɛrɛ mɔ wɔ hi wook hinyɔ Bɛt maakɔ gāā gbɔnɔ geha a holum-ɔ̧t gɛ nɔ?

25Yeesu warihi

a nɛ́ zaŋgir nɛ hinyɔ Dawda woo ɔ̧tza yɔ dag hinza gɛ, a̧a̧kil gi ha̧a̧g hi doodɔ gɛ ya? 26Dawda gul Bɛtluk du, le kok kiml wɔ hi gbaas Bɛto. Maak wɛ dɔg a Bɛtmaakwookya wɔ hii hi le kok kiml wɔrɔ kpɔd. Dawda be loo kok kiml wɔ gaa doodɔ be. Abiyata gii gi Bɛtmaak-wookya gbɔɔl mɔɔt bɔ a ɔ̧tɔ ge.

27Yeesu raahi ɓɛ:

a holum-ɔ̧t gɔys doodɛ; dood hí gɔys holum-ɔ̧t gɛ. 28Yɔ anbɔ, Za̧a̧n Waa bɔ gii gi holum-ɔ̧t waar i hɛw.

Currently Selected:

MARKUS 2: NTD

Highlight

Copy