MARKUS 4
4
MARKUS 4
1Yeesu wɛɛ yɛɛl hingok ɓɛ a mɛmbal ya̧. Yɔ dood saal wɔ hí mɔks a gi dɔŋdi, gii kar a lɛmb du a mɛm ha ɗɔɔtɔ. Wɛɛ saal wɔ hi gi hɛbtdi a mɛmya̧. 2Yeesu gogsihi hin kittɔnɔ hi ya̧a̧daaniki. Raasihi a hingokɔ bɔ duge:
3a kɛnɛ! Bakbalkya za tuu an gi dɔ̧ɔ̧ dɔ̧ɔ̧to. 4Hɔnɛyɔ gi dɔ̧ɔ̧k dɔ̧ɔ̧t bɔ, dɔ̧ɔ̧t wɔ zaadɛya̧ hi mɛɛl a gbɔnɔya̧, nɔɔs hi zaa hi sɛ̧ɛ̧. 5Dɔ̧ɔ̧t zaadɛ hi mɛɛl a betwaat lɛl du, a lɛlyɔ hɛbt tɔɔ ge gɛ; anyɔ hɛbt ɗɔ̄b lɛlɔ ge gɛ dɔ̧ɔ̧t wɔ hi pir nɔɔktɔnɔ. 6Yɔ ɔ̧t haa, dɔ̧ɔ̧t wɔ hi pirɔ hí yāā yɛ̧ɛ̧s gɛ hi dɔ̧ɔ̧, hi wɛɛ hi kootɔ.
7Dɔ̧ɔ̧t zaadɛ hi mɛɛl a tɛ̧ɛ̧ kobsyaadɛ tees du. Tɛ̧ɛ̧ kobsya wɔ hi hɔɔ hi gbaa dɔ̧ɔ̧t wɔ hi pirɔ. Hinɔ gii dɔ̧ɔ̧t wɔ hi pirɔ hí hum gɛ. 8Hɔnɛ dɔ̧ɔ̧t zaadɛ wɔ hi mɛɛl a hɛbt rɔb lɛl du be, hi pirɔ hi hɔɔ hi hibɔ. Zaadɛ hi tuus gaat dumbili taarɛ, zaadɛ gaat dumbili nɔɔngbunu, wɛɛ zaadɛ wɔ be gaat yɔ̧ɔ̧lɔ nɔɔnɛ.
9Yeesu wɛɛ raa:
a za̧a̧ni gin tɔn an gi kɛmɔ, gi kɛmɔ!
10Yɔ Yeesu hɛml hi saal bɔ, dood wɔ hi er nɛ el hi walɛsɛrɛ ɔ̧ɔ̧ wɔ koobl daa eerɛ, hi zɔ̧ge an gi wad ya̧a̧daanik wɔ hinya̧. 11Yeesu goohi:
a Bɛt zuns nɛɛ hinyɔ gi gi wáát du doosɛ, yɛrɛ dood zaadɛ hi kɛŋk hin wɛrɛ sɛw dɔglya̧ an ya̧a̧daanikyɔ, ya̧a̧nɛ. 12An dood wɔ hi gbor lɔlseeki, wɛɛ hí gbɛ̄n hinɔ gɛ, hi gbor tɔnlaki, wɛɛ hí kɛ̄m gɛ; an bɔ̄ dood wɔrɔ hi zɛmr kpoosya̧ a Bɛt ge, gi bitsihi hinha̧a̧lya̧.
13Yeesu wɛɛ raahi:
a nɛ́ kɛ̄m ya̧a̧daanik yɛrɛ hinɔ gɛ ya? Nɛ yɛrɛ nɛ́ kɛm ya̧a̧daanik wɔ sɛw hinɔ ri? 14Bakbalkya gi an za̧a̧nyɔ gi raak Bɛt dɔglɔ. 15Dood zaadɛ hi riitin an gbɔnɔya̧yɔ. À lɛlyɔ Bɛt dɔglɔ tuur ge: yɔ hi bɛɛ Bɛt dɔglɔ lako, Saydanu zaa wɔɔ dɔgl lukt bɔ hi kpoos du.
16Gbunɔ, zaadɛ hi dag dɔ̧ɔ̧t a hɛbt betya ha. Hi kɛm Bɛt dɔglɔ hi ta̧a̧ nɔɔktɔnɔ hi hato. 17Hɔnɛ hí ɔ̄ɔ̄ an dɔglɔ gi yaa yɛ̧ɛ̧sɔ hi kpoos du gɛ. Hi wa̧a̧ dɔglɔ hi kpoos du am kaasi. Ya̧a̧rhant gɔ bɛɛ tuuruko, zaa be zɛksil a Bɛt dɔglɔ dɔŋgo, ɓɔrbɔ hi maatɔ.
18Dood zaadɛ be, hi dag dɔ̧ɔ̧t a tɛ̧ɛ̧ kobsya teesdu, hi kɛm Bɛt dɔglɔ; 19waal mɔkilɔ wɔ, hi rɔɔs ɗɔkum maatilya, hi ɗɔkum zaadɛ gaŋsɛ gaŋsɛ hi gul hi yɛ̧g dɔgl bɔ hi kpoos du, dɔgl bɔ wōō hinza ma hi kpoos du gɛ. 20Dood zaadɛ hi dag hin dɔ̧ɔ̧t bɔ a hɛbt rɔb lɛl du; doodya̧ hii kɛm Bɛt dɔgl bɔ dɔ̧ɔ̧tɔ hi dag hi kpoos du, hi tuus gaato; zaa tuus gaat dumbili taarɛ, zaadɛ hi tuus gaat dumbili nɔɔn-gbunu, zaadɛ be hi tuus gaat yɔ̧ɔ̧lɔ nɔɔnɛ.
21Yeesu raa:
a doo za gɔ kamz pitila kpook kubt a dɔn du ya? Zaa lab gɛ yaat a leeso wɛɛdis ya? Nɛ wii ma a lɛlyɔ gɔ hi wiik pitila ge mi? 22Nɛ hinza yaatilya taa an hi ɔɔg midigɔ; wɛɛ hinza luurya taa an hi ɔɔg mɛksigɔ a dood lɔlgbar sɛw du. 23Za̧a̧ni gin tɔn an gi kɛmɔ, gi kɛmɔ.
24Yeesu raahi ɓɛ:
a oon hinyɔ nɛ kɛŋkyɔ bɛttɔnɔ. Bɛt gi goonsin hin hi kɔlwaa yɔ nɛ gis dood zaadɛ hin goonik be; hí wɛɛ hí gaan zaa ha. 25Gɔ gi anbɔ za̧a̧nyɔ gin hinza, gi dag zaa ha. Wɛɛ za̧a̧nyɔ taan gɛ be, hi ha̧s fɛŋwaa bɔ da gin nɛ hɛw.
26Yeesu raa ɓɛ:
a hinyɔ riitin hi Bɛt wáátɔ gɛrɛ: doo za dɔ̧ɔ̧ dɔ̧ɔ̧t a gi bak du. 27Gi gi yokyo, gi gi lɔlɛ, yɛms du hi lurk du, dɔ̧ɔ̧t bɔ gi pirko gi hɔɔko, mɛ̄ɛ̄ an ri gɛ. 28Hɛbt bɔ hi zulɔ pis dɔ̧ɔ̧t wɔ. Yɛɛlɔ, dɔ̧ɔ̧t bɔ tɛŋtigɔ pirɔ, wɛɛ hɔɔ hibɔ kɛ̧ɛ̧ lɔlɛ, 29gaatɔ wɔ gɔ hi bɛɛ raŋko, wal bɔ baar woosɔ hi rɔŋsɔ anyɔ ɓɛsɔ rii.
30Yeesu raa ɓɛ:
a wɛ gogsin nɔ hinɔ gi riitin hi Bɛt wáátɔ nɔ? Wɛ gogsin hi nɔ ya̧a̧daanikɔ nɔ? 31Bɛt waar umsɔ riitin an sitahi lɛŋksɛ: gɔ hi lugig a hɛbtdi, dɛɛb daar hin lɛŋks zaadɛ wɔ waal du sɛw. 32Hɔnɛ gɔ hi lugige, pirɔ, hɔɔ, tɔɔ daar tɛ̧ɛ̧ wɛl gbunya zaadɛ wɔ sɛw. Yaa yā̧a̧n gbɔlɛ an nɔɔs hi nɛbt zɛk a zeksɔ gedu.
33Yeesu gaa hingokɔ wɔ sɛw hi ya̧a̧daanik kittɔnɔ anbɔ labɔ; gog an wɔ hi gisig lako, hi ɗɛɛ kɛŋko. 34Gɔ́ bōōsihi hinza gi ɔsihi ya̧a̧daanik dɔk du gɛ. Hɔnɛ yɔ gɔ gi nɛ hi walɛsɛrɛ ɔ̧ɔ̧ wɔ hi ɔ̧ɔ̧kya̧, gisihi wadig hin sɛw.
35A lɛɛsig du yɔ ɔ̧t legɔ, a ɔ̧t gbuna bɔ duge, Yeesu raa walɛsɛrɛ ɔ̧ɔ̧:
a wɛ tal a mɛmbal kasiŋ zaa bɔ ge.
36Yɔ hi ɔɔ saal bɔ, walɛsɛrɛ ɔ̧ɔ̧ wɔ hi kam Yeesu a lɛmb du, a lɛmb bɔ da giz nɛ gedu. Lɛmb zaadɛ hi sɛ̧ɛ̧b nɛ hi gi di be.
37Wɛɛ zɛk za ha̧a̧l yɛɛl fɛk hi tɛŋko; yɔ mɛmɗukil wɔ hi ga̧a̧y a lɛmb du gi daarlɛlɛ, lɛmb bɔ yɛɛl hi̧i̧sigyɔ. 38Yeesu gi yok nɛ a lɛmb kuudu, gbaa zulɔ a kal ha. Walɛsɛrɛ ɔ̧ɔ̧ wɔ hi kpooge, hi raage:
a Hingokya! Wɛ wɔrɔ! Hin yɛrɛ lɛ rɛ gɔsum hinza gɛ ya?
39Yeesu rɛmɔ, ya̧a̧l zɛk bɔ, wɛɛ raa mɛmbal bɔ:
a sēemɔ! Kɔm sob, bɔmɔ namɔ!
Zɛk bɔ kɔmɔ, lɛl ɗagl gɔ. 40Wɛɛ raa walɛsɛrɛ wɔ:
a hoob gin ha̧a̧k nɔ? Nɛ taan ɗɔbsil ket ya?
41Hɔnɛyɔ hoob ha̧a̧hi yɛ̧ltɔnɔ be hi wɛɛ hi watin hi tees du:
a bɔ za̧a̧n yɛrɛ ɔ̧nɛ, zɛk hɛw hi mɛm hi lagsig tɔn yɔ?
Currently Selected:
MARKUS 4: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
