MARKUS 5

1Hi wɛɛ hi tuur a mɛmbal kasiŋ zaabɔ a Gerezanɛ hɛbt du ge. 2Anyɔ Yeesu gi silk a lɛmb du, wɛɛ ɓɔrbɔ doo za yɔ gin loorɛha̧a̧l muul ɗu tuuz a loorlɛlɛ zaa dagtin hi giya. 3Za̧a̧n bɔ gɔ gi waak a loorlɛlɛ. Doo za ɗɛ̄ɛ̄ an gi wa̧a̧ge gi wɔg hi ba̧a̧ntus hɛw gɛ. 4Gɔ hi wɔb dɔɔɔ wɔ hi gbɔɔsi, naanɔ wɔ hi ba̧a̧ntusɛ, wɛɛ kaatir ba̧a̧ntus wɔ. Za̧a̧n za tɛŋkya taa an gi daarig be.

5Faa, yɛms bed hi lurk bed gi lɛɛlik a loor lɛlɛ, a ga̧a̧t ha, gi ya̧a̧ɓoolik be, wɛɛ gi muulɔ ɓuukig hi bet be. 6Yɔ gbɛn Yeesu lakyɔ̧ɔ̧rɛ, nɔɔz zaa zagl gi muutdu. 7Ɓooya̧a̧ ha̧a̧ltɔnɔ raage:

a dɔgl be gidu hi mɔɔ ya, Yeesu Bɛt Yɔ Gi Gbɔɔl Gi Daarlɛl waaɔ? Be zɔ̧mɔ hi ya̧a̧ hɛmnt a Bɛt nuŋg du an bɔmɔ ha̧a̧nib ya̧a̧rɛ.

8Yɔ Yeesu raa nɛ:

a loorɛha̧a̧lɛ tuum za̧a̧n yɛrɛ gi muuldu ro!

Za̧a̧n bɔ gi dɔg anbɔ. 9Yeesu wɛɛ ɛr za̧a̧n bɔ:

a nuŋg mɔ a ri?

Za̧a̧n bɔ goo raa ge:

a nuŋg be a Saalɛ, anyɔ wi gi kittɔnɔ.

10Za̧a̧n bɔ zɔ̧ Yeesu hi tɛŋko, an bɔgi yaa loorɛ-ha̧a̧l wɔ a hɛbt za dɔɔmi. 11A lɛlɔdi hab kittɔnɔ hi tɔk hɛt a ga̧a̧t dɔŋya̧di. 12Wɛɛ loorɛha̧a̧l wɔ hi zɔ̧ge:

a yaawi a hab wɛrɛ hi, an wi da wi gul hi muul du.

13Yɔ Yeesu ta̧a̧ a rekinɛ, hi tuu za̧a̧n bɔ muulɛ, hi rek hi gul a hab wɔ hi muul du. Hab wɔ sɛw hi sɛ̧ɛ̧b hin duk eerɛ, hi bindɔ hi nɔɔ hi tii a kasiŋ disɛ, hi re hi gi̧i̧l a mɛmbal du, hi wɔrɔ.

14Hab nɛɛrɛwaat wɔ hi nɔɔ hi ren ramsɔ, hi fɔk a waal gbɔɔl du hi a raat dɛɛt wɔ du. Dood hi zaa hi sɔ̧ɔ̧ hinyɔ tuurɔ. 15Yɔ hi tuur a Yeesu dɔŋdi hi gbɛn za̧a̧n bɔ gin nɛ loorɛ ha̧a̧l wɔ muul du yɔ raa nɛ a nuŋg be a Saalɛ, gi ɗɔɔtugo. Heg gbandilɔ hamad, mɔkilɔ gi rɔbtɔnɔ. Yɔ hi gbɛn anbɔ hoob ha̧a̧hiha̧.

16Wɔ hi gbɛn hinyɔ tuur anbɔ sɛw hi fɔks wɔrɔ hinyɔ tuur a loorɛha̧a̧lya bɔ gi muulɛ, hi hinyɔ tuur a hab wɔ hi muulɛ. 17Yɔ anbɔ hi wɛɛ hi zɔ̧ Yeesu an gi ɗuk gi ɔɔ hɛbtya̧ bɔ.

18Yɔ Yeesu gi kark lɛmb du, za̧a̧n bɔ gin nɛ loorɛha̧a̧l wɔ muul du zɔ̧ge an gi kɔm elo. 19Yeesu tā̧ā̧ gɛ. Wɛɛ raage:

a wɛɛm mɔ lɛlɛ, a dood mɔ hi; mɔ fɔksihi hinyɔ Waar woosum sɛw hi kpoosɔ gaattɔnɔ.

20Za̧a̧n bɔ rek yɛɛl hinyɔ Yeesu woosig nɛ fɔkig a lɛlyɔ gɔ hi el a Waal Gbɔlɛ Koobl ge. Hi sɛw kɔmsihi gɛrsɛ.

21Yɔ Yeesu wɛɛ gi siz lɛmb du a mɛmbal kasiŋ zaabɔ fu̧u̧nɛ ge, saal za nɔ gbɔɔl hi zaa hi mɔks gi dɔŋdi. Gii be gi erk a mɛm ya̧di. 22Yɔ mɔksillukya gbɔlɛ wɔ zaaya̧ gbun bɔ nuŋgɔ a Yayirus tuur gi gbɛn Yeesu , zagl gi dɔŋdi. 23Zɔ̧ge hi ya̧a̧ hɛmnti, raa

a waa be siŋg gum ha̧a̧ltɔnɔ sɛ̧ɛ̧b tɔdigyɔ. Zaam mɔ gbaasig naan muulɛ an gums bɔ gi gogsige gi za̧a̧!

24Yeesu retin hi giya. Saalzanɔ gbɔɔl fɔge hi gig ɓɔ̧ɔ̧k tees du be. 25Nis za lis gig fɔk wɛl koobl daa eerɛ. 26Ha̧a̧ nɛ ya̧a̧r gbɔɔltɔnɔ a gɛr kitɛ naan du, waks tusɔ kpɔkkrɔ; gumsɔ bɔ da̧a̧ gɛ be, wɛɛ gi yɛ̧sugo yɛ̧sugo. 27Hɔnɛyɔ kɛm hi book Yeesu nuŋgɔ, zaa a saal bɔ gedu, zaa gi kuudu ɓi̧i̧ gbandilɔ. 28Da raa nɛ be

a à be ki̧i̧ gbandilɔ bɔ gii mɔɔti, yɔ be za̧a̧za̧.

29Yɔ ɓi̧i̧ Yeesu gbannɔ bɔ anbɔ, lisɔ bɔ da̧a̧ ɓɔrbɔ, kɛm hinza a gi muul du an kosgumnɔ bɔ da̧a̧da̧. 30Ɓɔrbɔ Yeesu mɛɛmɛ a tɛŋk za tuu be muul du. Zɛ̧mr a saal tees bɔ gedu, warɔ:

a bɔ ki̧i̧ gbandil be nɔ?

31Walɛsɛrɛ ɔ̧ɔ̧ wɔ hi raage:

a mɔ gbɛn saal gi mɔ ɓɔ̧ɔ̧k be, mɔ wɛɛ mɔ wark bɔ ma a bɔ ki̧i̧ be?

32Hɔnɛ Yeesu zɛ̧btir lɛl hi lɔl gi dɔŋdi an gi gbɛn za̧a̧nyɔ gɔ hinɔ. 33Yɔ nis bɔ mɛɛ hinyɔ tursige, bee hoobo, zaa zagl Yeesu dɔŋg di raasig hin sɛw hi rɔbo. 34Yeesu raage:

a waa be siŋgo, ɗɔbsig mɔ za̧a̧sumza̧a̧sɔ. Rekum bɛttɔnɔ, bɔ gums mɔ bɔ gi wɛɛsum zaa.

35Yɔ Yeesu gi dɔk anbɔ tɛ̧, ramsyaadɛ hi fu̧u̧z a Yayirus raa du hi zaa hi raa Yayirus:

a waa mɔ bɔ wɔɔrɔ. Mɔ mɔɔsig Hingokya bɔ nɔ?

36Yeesu kɛ̄msihi dɔglya̧ bɔ hi book gɛ. Wɛɛ raa Yayirus:

a bɔ hoob gi ha̧a̧mɔ, ɗɔbsum kpɔd.

37Gāā doo za gbɔnɔ an gi fɔg ma gɛ, gɛ Piyɛr , hi Yakuba, hi yɛ̧ɛ̧tɔ Yohana. 38Yɔ hi tuur a Yayirus raa du, a lɛlyɔ gbɛn saal ɗɔbtɛ ge, hi gɔk namsɛ; dood hi kaako, hi sɛɛbik be. 39Yeesu gul raa bɔ gedu, warihi

a nɛ gɔk namsɔ nɔ be? Nɛ kaak nɔ? Waa bɔ wɔ̄r gɛ, gi yokyo.

40Dood hi kpɛ̧ɛ̧lig-kpɛ̧ɛ̧lɔ. Yeesu tuusihi lak di sɛw. Loo waa wɔrk bɔ baatɔ hi nɔɔtɔ, hi wɔ hi gitin elo, hi gul a lɛlyɔ waa bɔ gi gedu. 41Rek wa̧a̧ waa bɔ naan muulɛ raage:

a ꞋꞋTalita kumꞋꞋ,

hinɔ raakɔ:

a wawayɔ, be raamɔ, ɗukum ha!

42Ɓɔrbɔ wawa bɔ ɗuk yɛɛl ɛmbikyɔ. Wawa bɔ gin wɛl kooblɛ daa eerɛ. Yɔ dood hi gbɛn hin bɔ lab kɔmsihi gɛrs yɛ̧ltɔnɔ. 43Yeesu wɛɛ ɓaasihi an bɔhi raas za̧a̧n za hinɔ. Kuudu wɛɛ raahi ɓɛ:

a gaan wawa bɔ lees gi le.

Currently Selected:

MARKUS 5: NTD

Highlight

Copy