MARKUS 13

1Anyɔ Yeesu gi tuuzig nɛ a Bɛtluk bɔ gedu, walsɛrɔ za gbun raage:

a Hingokya , sɔ̧ɔ̧mɔ, bet wɔ bɛrki! Luk gbɔlɛ wɔ tɔɔkɔ!

2Yeesu ta̧a̧ge:

a mɔ gbɛn luk gbɔlɛ wɔ tɔɔkɔ gɛrɛ, bet gbunu taa kɔŋk goksili, sɛw gí yaar hɛbtdi.

3Yeesu ɗɔɔt a Kɔ̧ɔ̧b Ga̧a̧t ha a Bɛtluk bɔ doosɔ ge. Yɔ Piyɛr hi Yakuba hi Yohana hi Andrɛ hi gi ɔ̧ɔ̧kya̧ hi Yeesu , 4hi ɛrige:

a raasiwi hin wɔrɔ ɔ̧tɔ gɔ hi tuur du, hi hinmɛksin-goya yɔ gɔ gi dɔgsuw ɔ̧tyɔ hin wɔrɔ sɛw gɔ hi sɛ̧ɛ̧b du.

5Yeesu yɛlsihi raaki:

a ɓāan bɛttɔnɔ an bɔ dood hi maatinɛ. 6Dood kittɔnɔ hí zaa a be nuŋg du hi raa a hii giya! Hí wɛɛ hí maat dood kittɔnɔ. 7Gɔ nɛ kɛm a nɔk giro, hí wɛɛ hí book nɔk zaadɛ ramsɛ, bɔ hoob gi ha̧a̧nɛ; yɔ anbɔ gi an hinɔ gi tuurɔ, wɛɛ hinɔ taa waal da̧a̧k kete. 8Waal gi ɗuk gabs a waal za zulha, waar gi ɗuk gabs a waar za zulha, hɛbtnamlik gí gi a lɛl zaadɛ sɔmsɔm. Tɔs gí giro. Hin wɔrɔ sɛw gí gi an waamɔɔk kosgumn yɛɛlikyɔ.

9Yɛrɛ nɛya ɓaasin muul nɛ. Gɔ gi anbɔ dood zaadɛ hi ka̧nɛ a dɔglyɛ̧ɛ̧k luk du, hi ɓaan a mɔksilluk wɔ duge. Hi ka̧nɛ a dood nabl wɔ hi muutdu, hi waar ɛ gbɔlɛ wɔ hi muutdu a be dɔŋgo an nɛ dɔg hinyɔ tursin hi rɔbo a hi muutdu. 10Gi an Dɔgl Rɔb bɔ gi dɔgiy a waal du doosi ɓɔr waal gi ɔɔ da̧a̧ko.

11Gɔ hi wa̧a̧n an hi ka̧nɛ a dɔglyɛ̧ɛ̧k luk du, bɔ kol gi tuunɛ a hinyɔ gɔ nɛ dɔg geha doosi. À lɛlɔdi dɔgin hinyɔ gɔ gí zaasin kpoos ha giya. Gɔ gi anbɔ nɛɛ taa hinɔ dɔk hi zul nɛ, Bɛt Mɔkilɔ gii gi dɔko. 12Dood zaadɛ hı́ gaa yɛ̧ɛ̧dɛya̧ zaŋ an hi gbɔ̧hi, zaadɛ be hi gaa hindaya̧ zaŋ an hí gbɔ̧hi. 13Dood sɛw lɔlya̧ gí bɛtin hi nɛɛ gɛ a be dɔŋgo. Yɛrɛ za̧a̧nyɔ gɔ gi mɔm ya̧a̧rhant a be dɔŋg gi tuur a waal da̧a̧ki gi za̧a̧.

14Nɛ́ gbɛn hinyɔ gɔ hi el a hinha̧a̧l lɛlha̧tirgoya gí ɗɔɔt a lɛlyɔ taa nɛ an gí ɗɔɔt ge gɛ (za̧a̧nyɔ gi zaŋgig hin yɛrɛ gi kɛm bɛttɔnɔ! ) wɔ gɔ hi gi a Yahuduya hɛbt du, nɔ̀ɔ̀hi hí dɔɔ ga̧a̧ti. 15Za̧a̧nyɔ gɔ gi gi a luk zulha, bɔgi siz a luk du an gi loo wɔdɔ gi renɔ. 16Wɛɛ za̧a̧nyɔ gɔ gi gi a bako, bɔgi wɛɛz gi lɛlɛ an gi loo gbandilɔ.

17Ya̧a̧rhant gi giro a nɛɛd budaa wɔ hi zulha, hi waatnɔɔdɛ wɔ hi gaak waat wa̧a̧l a ɔ̧tɔ ge. 18Zɔ̧n Bɛto an bɔ̄ hin wɔrɔ lab hi tuur a zɛrk du. 19Ya̧a̧nɛ a ɔ̧tɔ ge ya̧a̧rhantɔ gí tɔɔ gí daar ya̧a̧rhant zaadɛ wɔ wɛ mɛɛhi nɛ sɛw yɔ waal yɛɛlɔ, yɔ Bɛt kim hin sɛw gí tuur a ɔ̧ti gi zulɛ. Wɛɛ ya̧a̧rhant za yɔ riitin an bɔrɔ taa nɛ midig zaŋ.

20An Waar Bɛt lɔ̄bs nɛ ɔ̧t wɔrɔ gɛ, doo za ɗɛ̄ɛ̄ an gi za̧a̧ gɛ. Yɛrɛ Bɛt lɔbs ɔ̧t a doodɔ wɔ sɛ̧ɛ̧hi zulɛ. 21Za̧a̧n za gi raan a sɔ̧ɔ̧n Masihu bɔ gi hɛdi! Zaabe: a nɔ da gi bɔ! Bɔnɛ ɗɔbs hinɔ. 22Masihu ya̧a̧gɔ̧ɔ̧nya wɔ hi Bɛtya̧a̧kɛŋkya ya̧a̧gɔ̧ɔ̧nya wɔ hi midɔ hi zu̧u̧n hinmɛksingoya hi gɛrs an hi maatin dood wɔ Bɛt sɛ̧ɛ̧hi hɛw, gid hi ɗɛɛ hinɔ wooko. 23Nɛya, ɓaanɛ, be raasin hin sɛw door ma.

24Yɛrɛ a ɔ̧tɔ ge ɔ̧t ya̧a̧rhantya bɔ gɔ gi talɔ, ɔ̧t gi nimɔ, sɛɛ taa buul gaako, 25sɛwaat hí mɛlz a bɛtha, wɛɛ tɛŋk wɔ hi gi bɛtha hí bee. 26Gɔ ma hi gbɛn Za̧a̧n Waa bɔ zaak gɔ a kuus ha hi tɛŋk gbɔɔltɔnɔ hi gbɔlumsɛ. 27Gí yaa Bɛtwalɛ-sɛrɛ wɔ a ɔ̧tkazigi, a ɔ̧tleki, hi a ɔ̧tkazig naanrɔbo hi ɔ̧tkazig naanyɛ̧li, hí mɔks wɔ Bɛt sɛ̧ɛ̧hi ma gi da gi bààr a hɛbtlɛl yɔ yɛɛl ge, gi tuur a lɛlyɔ door ge.

28Kɛn hinyɔ ya̧a̧daanik bɔ gi book a yɔmntnɔ muulɛ: a gɔ nɛ́ gbɛn tɛ̧ɛ̧ya̧a̧n yɛ̧s wɔ hi bɛɛ kpas yɛ̧s baako, nɛ mɛɛ a zɛrk bɔ sɛ̧ɛ̧bɔ. 29Gbunɔ, nɛ́ gɔ nɛ́ gbɛn hin wɔrɔ hi tuuruko, mɛɛn a zaakɔ sɛ̧ɛ̧bɔ an hinɔ gi tuurɔ. 30Be raasin hi rɔbo: hin wɛrɛ sɛw hi tuur kete, ɓɔr dood wɔ hi gi ɔ̧ti gi zulɛ hi ɔɔ wɔrko. 31Bɛtha hi hɛbtdi hi talɔ, yɛrɛ dɔgl be taa talko.

32Yɛrɛ doo za mɛ̄ɛ̄ ɔ̧t yɔ̧ɔ̧sum bɔ zaakɔ gɛ; Bɛt walɛsɛrɛ wɔ bɛtha hɛw hí mɛ̄ɛ̄ gɛ. Baa Bɛt gi gbun mɛɛ ɔ̧tyɔ waal gɔ gi da̧a̧ du ɔnɛ. 33Ɓaanɛ, oonɛ; anyɔ nɛ́ mɛ̄ɛ̄ ɔ̧tɔ zaakɔ gɛ. 34Yɔ anbɔ, gí gi ma an doo za gi rɔbs reko gi gi ɔɔk raatɔ hi hin sɛw a woosyaadɛ ɔ̧ɔ̧ naan du. Gaa woosya wɔ bɔbe hi woosɔ, bɔbe hi woosɔ an gi woo; wɛɛ gaa lɛl-ookya bɔ woosɔ an gi oo lɛl be.

35Yɔ anbɔ, kɔmbin nɛ oo anyɔ nɛ́ mɛ̄ɛ̄ ɔ̧tyɔ za̧a̧n raatya bɔ gɔ gi zaa du gɛ. Kɛnsa gi zaa a lɛɛsig du, kɛnsa yɛms tees du, kɛnsa bi̧i̧l teeyɔ, kɛnsa bi̧i̧l du. 36Gi zaa ɓɔrbɔ be, an bɔgi zɛ̧n yoom du. 37Hinyɔ be gisin dɔkyɔ be dɔksig dood sɛw, oonɛ!

Currently Selected:

MARKUS 13: NTD

Highlight

Copy