MARKUS 14
14
MARKUS 14
1Zɛ̧ɛ̧r nɛ yɛms eerɛ an Paska naabo hi kok yɔ gɔ taan hɛ̧ɛ̧t gɛ dood gɔ hi lek gi tuurɔ. Bɛtmaakwookya gbɔlɛ wɔ hi Bɛtmaakdɔkya wɔ hi ɓɛɛk gbɔnɔ an hi wa̧a̧ Yeesu a luurlɛlɛ hi gbɔŋge. 2Hi wɛɛ hi raa be:
a taa an wɛ wa̧a̧g a naab-ɔ̧ti an bɔ dood hi gbaatin hi wɛya.
3Yeesu giz a Betani a Simɔŋ ɗobtilya bɔ gi lɛl du; yɔ gi lekhinɛ, nis za gul hi kurum ki̧i̧lhɛmntya tik hi̧i̧sili. Tik bɔ hi wɔmn bet rɔb yɔ gɔ hi el a albaatreyɔ. Kurum bɔ be hi gɔn tɛ̧ɛ̧yɛ̧ɛ̧s mɛko, nuŋggɔ a naaryɔ. Tusɔ gɔ sa̧a̧sa̧. Nis bɔ ɓɛd tik bɔ ya̧a̧-gbarɔ gubs Yeesu kurum bɔ a zulha. 4Dood zaadɛ wɔ hi ginɛ di yɔ kpoosya̧ nɔɔhi, hi watin hi tees du:
a hi ha̧tir kurum hɛmnt yɛrɛ a nɔ dɔŋgo? 5Yɔ hi zebrig nɛ tusɔ gaat yɔ daar tɛmɛrɛ taar hɛw an hi gaa ya̧a̧rya wɔ.
Hi niis nis bɔ ha̧a̧ltɔnɔ. 6Yeesu wɛɛ raa:
a ɔɔnɛge, nɛ gig mɔɔsig nɔ? Woowoos rɔb a be gbaŋgi. 7Nɛ gin ya̧a̧rya wɔ nɛ teesdu ɔ̧t nuŋgo, nɛ ɗɛɛ an nɛ woosihi hinrɔb a ɔ̧tyɔ ha̧a̧n gedu sɛw. Yɛrɛ beya, be taa waak hi nɛɛ faa. 8Nis bɔ woo hinyɔ ɗɛɛ giya. Gub kurum ki̧i̧lhɛmntya yɛrɛ a be muul gaati an gi gɛms loorɛ. 9Be raasin rɔbo: lɛlyɔ gɔ hi dɔg Dɔgl Rɔb bɔ du sɛw, a waal du sɛw, hí fɔ̀k hinyɔ nis yɛrɛ woo an hi mɛksinge.
10Walɛsɛrɛ wɔ koobl daa eer zaaya̧ gbun bɔ nuŋgɔ a Yahuda Iskaryudi, rek raas Bɛtmaakwookya gbɔlɛ wɔ a ha̧a̧g an gi gaahi Yeesu naan du. 11Yɔ hi lag anbɔ hi dag hato, hi wɛɛ hi raage a hí gaag tusɛ. Wɛɛ Yahuda yɛɛl gbɔnɔ ɓɛɛki an gi gaahi Yeesu naan du.
12Yɔ naab-ɔ̧t doos bɔ kokɔ taan hɛ̧ɛ̧t gɛ rii a ɔ̧tyɔ hi gbɛɛtirgo tamwaat gedu an hi len Paska naabo, Yeesu walɛsɛrɛ ɔ̧ɔ̧ wɔ hi ɛrige:
a ha̧a̧mɔ an wi rek wi gɔsum Paska lees ay nɔ?
13Yɔ anbɔ Yeesu her walɛsɛrɛ eerɛ a zaadɛ teesdu yaahi, raahi:
a rekin a waal gbɔɔl du nɛ dagtin hi wal za gi pɛɛk mɛmruuk zulha; nɛ́ fɔge. 14A lɛlyɔ gɔ gi gul gedu, nɛ raa za̧a̧n raatya bɔ: a Hingokya bɔ gii raa: a luk buu benɛ yɔ gɔ be le Paska naab lees du hi walɛsɛrɛ be wɔ gi ay nɔ? 15Gi wɛɛ gi zunsin luk buu gbɔɔl bɔ wɛɛha, a lɛlyɔ hi gɛms bɛttɔnɔ hi wɔd gedu. Nɛ gɛmtsɛ lɛlɔ ge.
16Walɛsɛrɛ wɔ hi rek hi tuur a waal gbɔɔl bɔ gedu, hi zɛm hin sɛw anyɔ raasihi. Hi gɛms Paska naab lees bɔ gɔ.
17Yɔ ɔ̧t gi leko, Yeesu tuur gɔ hi walɛsɛrɛ ɔ̧ɔ̧ wɔ koobl daa eerɛ. 18Yɔ hi ɗɔɔt hi lekhinɛ, Yeesu raa:
a be raasin rɔbo: zaa nɛ gbun yɔ gi lekhin hi beya, gi rɛ̧ɛ̧be.
19Walɛsɛrɛ wɔ hi kɛm anbɔ kpoosya̧ wiilɔ, hi yɛɛlig hin-ɛrk hi gbunu gbunu:
a nɛ bee ma gɛ mi?
20Yeesu goohi:
a zaa gbuni a nɛ tees du. Yɔ nɛ gi nɛ koobl daa eer yɔ, za̧a̧n yɔ gi yaak naan kokdak du lɛlgbun hi bee giya. 21Za̧a̧n Waa bɔ gi reek ma anyɔ Bɛt ɗɛɛrwolɔ raa dɔgl be; yɛrɛ ya̧a̧rhant gi gis za̧a̧n yɔ gɔ gi rɛ̧ɛ̧ Za̧a̧n Waa bɔ. An za̧a̧nɔ mɔɔy nɛ gɛ, yɔ bɛsig gi ɗaarɔ.
22Yɔ Yeesu gi lekhin hi walɛsɛrɛ ɔ̧ɔ̧ wɔ loo koko, baan Bɛto, ɓɛɛlɔ, gaahi, raa:
a loonɛ, yɛrɛ gi muul beenɛ.
23Wɛɛ loo dakwaa bɔ bumhob gi du, yɔ baan Bɛto, gaahi, hi wɛɛ hi yɔ̧ lɛlgbun sɛw. 24Raahi:
a yɛrɛ gi ga̧a̧m beenɛ, ga̧a̧m yɔ gi zuunik Bɛt ya̧a̧wɔkɔ hi doodɛ; gi gub a dood kit dɔŋgo. 25Be raasin rɔbo: be taa bumhob za yɔ̧k zaŋ, gi tuur a ɔ̧tyɔ gɔ be yɔ̧k zaa sekt a Bɛt wáát duge.
26Hi wɛɛ hi ɛɛhin an hi baan Bɛto; kuudu hi wɛɛ hi re gɔ a Kɔ̧ɔ̧b Ga̧a̧t ha. 27Yeesu raa walɛsɛrɛ ɔ̧ɔ̧ wɔ:
a nɛ sɛw, nɛ́ simdɔɔ. Ya̧a̧ gii hi bi̧i̧ a Bɛt ɗɛɛrwol du: a bé gbɔm nɛɛra bɔ, tam wɔ hi hɛksɔ. 28Yɛrɛ gɔ bé rɛml wɔrk du, bé dosin a Galile.
29Piyɛr raage:
a gid zaadɛ sɛw hi ɔɔmɔ, benɛ be taam ɔɔko.
30Yeesu wɛɛ raage:
a be raasum hi rɔbo: nɛɛko a yɛms yɛrɛ gedu, an kɔɔ gi kek dɔɔ eerɛ, mɔɔ mɔ faab ma dɔɔ taarɛ.
31Piyɛr wɛɛ dɔg hi ya̧a̧ɓooti:
a gid hinɔ gi nɛ an be wɔr hi mɔɔ si̧, be taam faako.
Hi sɛw hi raa ya̧a̧ gbun bɔ giya.
32Hi rek a lɛl za bɔ nuŋgɔ a Gɛsɛmanɛ ge. Yeesu raa walɛsɛrɛ ɔ̧ɔ̧ wɔ a ɗɔɔtin hɛdi, be da be zɔ̧bz Bɛto. 33Wɛɛ kam Piyɛr hi Yakuba hi Yohana; gii be kolɔ yɛɛlig tuukyɔ, wɛɛ hoob ha̧a̧sig ha̧a̧ltɔnɔ. 34Wɛɛ raahi:
a kpoos be gisib wɔtigi hurko. Kɔmbin hɛdi, za̧a̧n lɔlɛ.
35Wɛɛ rek hɛml kaasi, gbuut a hɛbtdi zɔ̧ Bɛto, an ya̧a̧rhant bɔ ɔ̧tɔ gi tasige, hinɔ gi giro. 36Raa:
a Aba, hinɔ raakɔ: a Baaba, mɔ ɗɛɛ an mɔ woo hin sɛw; hɛmlinmɔ dakwaa ya̧a̧rhantya yɛrɛ be dɔŋdi. Hinza gɛ, taa anyɔ ha̧a̧be, woom anyɔ ha̧a̧mɔ.
37Wɛɛ wɛɛz zɛ̧hi yoom du.
War Piyɛr a Simɔŋ, mɔ yokyo ya? Mɔ́ ɗɛ̄ɛ̄ an mɔ za̧a̧lɔl kaaka gɛ ya? 38Kɔmbin lɔlɛ, nɛ wɛɛ nɛ zɔ̧b Bɛt an bɔnɛ mat a maatil du. Doo bɔ mɔkilɔ ha̧a̧g wook rɔbtɔnɔ, wɛɛ muulɔ hɔnighɔnɔ.
39Wɛɛ hɛml ɓɛ, zɔ̧b Bɛt hi dɔgl gbun bɔ. 40Wɛɛ wɛɛza ɓɛ, zɛ̧hi yoom du, yoom bɔ ɗɔhiɗɔbɔ ya̧a̧nɛ. Hí wɛɛ hí mɛ̄ɛ̄ hinyɔ gɔ hí raasig gɛ be. 41Yɔ Yeesu wɛɛz dɔɔ taasumɛ, warihi:
a yɔ nɛ gbork yok rɛ, nɛ holikhol ma ya? Rii! lɛlɔ tuurɔ. Yɛrɛ Za̧a̧n Waa bɔ gi gaay ma a hinha̧a̧lya wɔ hi naan du. 42Ɗukinɛ wɛ rekɔ; za̧a̧n yɔ rɛ̧ɛ̧sib ya̧a̧ sɛ̧ɛ̧b gi gɛdi.
43Ɓɔrbɔ, yɔ Yeesu gi bookya̧a̧ tɛ̧, walɛsɛrɛ wɔ koobl daa eer zaaya̧ gbun bɔ nuŋgɔ a Yahuda zaa. Bɛtmaakwookya gbɔlɛ wɔ hi Bɛtmaakdɔkya wɔ, hi Yahuduya ɗɛntɛ wɔ hii yaaz dood saal hi zaa hi Yahuda. Hi zaan daŋbɛsim wɔ hi sɔɔlɛ an hi wa̧a̧ Yeesu. 44Za̧a̧n rɛ̧ɛ̧kya bɔ goks nɛ dood saal wɔ hinyɔ gɔ gí rek gí gɔ anyɔ lɛ:
a za̧a̧nyɔ gɔ bé zɔm wɛktɔ, gi za̧a̧nyɔ ha̧a̧n wa̧a̧k giya. Wa̧a̧nɛge, nɛ kaŋg rɔbtɔnɔ.
45Yɔ Yahuda bɛɛ tuuruko, sɔɔ Yeesu dɔŋdi elige:
a Hingokya ,
wɛɛ zɔm wɛktɔ. 46Dood hi yaa naan hi wa̧a̧g gɔ. 47Zaaya̧ gbun bɔ gi lɛlɔdi hɔ̧b daŋbɛsim gbob Bɛt-maakwookya gbɔɔl mɔɔt bɔ gbaarɔ tɔnɔ dɛ̧ɛ̧rɔ. 48Yeesu raahi:
a nɛ zāan daŋbɛsim hi sɔɔl an nɛ wa̧a̧b an luur ha̧a̧l wɔd wɔɔlikya ya? 49Ɔ̧t nuŋg sɛw be gi hi nɛya, be gi hingok a Bɛtluk du, wɛɛ nɛ́ wā̧ā̧be gɛ. Yɛrɛ gi an hinyɔ Bɛt ɗɛɛrwol raa gí tuurɔ.
50Yɔ anbɔ, walɛsɛrɛ wɔ sɛw hi ɔɔg hi nɔɔnɔ. 51Wal za sɛr fɔge, tab gbandil buu ɗɔbti muul kpɔd. Hi goog wa̧a̧ko, 52wir hòbrsihi gbandil buu bɔ naan du dur, nɔɔ rek ɔ̧lɛ.
53Hi kam Yeesu a Bɛtmaakwookya gbɔɔl mɔɔt bɔ ge, a lɛlyɔ Bɛtmaakwookya gbɔlɛ zaadɛ wɔ sɛw hi mɔks ge hi Yahuduya ɗɛntɛ wɔ hi Bɛtmaakdɔkya wɔ ge.
54Piyɛr fɔbz Yeesu da hɛmltɔnɔ, zaa tuur a Bɛtmaakwookya gbɔɔl mɔɔt bɔ gi luk ya̧di. Ɗɔɔt hɔdi hi lɛl-ookya wɔ, gi laa tɛɛko. 55Bɛtmaakwookya gbɔlɛ wɔ hi dɔgl-yɛ̧ɛ̧kya wɔ sɛw hi ɓɛɛk dood segyaadɛ an hi wa̧a̧n Yeesu dɔgl hi gbɔŋge, wɛɛ hí zōl gɛ. 56Dood kittɔnɔ hi gisig ya̧a̧gɔ̧ɔ̧ko; wɛɛ ya̧a̧ya̧ wɔy gbun gɛ be. 57Dood zaadɛ hi ɗuk hi gisig ya̧a̧gɔ̧ɔ̧k be:
58a be kɛŋg gi raako. a bé ɛ̧br Bɛtluk yɛrɛ yɔ dood hi wɔmn naanɛ, wɛɛ ɔ̧t taarɛ, be wɛɛ be wɔm zaa yɔ dood hí wɔ̄m gɛ.
59Wɛɛ a dɔglya̧ bɔ hi dɔktig gedu hɛw, ya̧a̧ya̧ ɔks gbun gɛ be. 60Bɛtmaakwookya gbɔɔl mɔɔt bɔ ɗuk er hi teesdu, ɛr Yeesu :
a mɔ taa hinza gook ya? Dood wɛrɛ hi dɔk nɔ mɔ zulha nɔ?
61Yɔ anbɔ Yeesu gōō hinza gɛ, kɔms sɔsɔg. Bɔrɔ wɛɛ ɛrig ɓɛ:
a mɔɔ gi Masihu bɔ Bɛt bɔ Za̧a̧nɔ wɛ gig baanik waaɔ ya?
62Yeesu goo:
a bee giya! Nɛ́ gbɛn Za̧a̧n Waa bɔ gi ɗɔɔt a Bɛt Tɛŋkya naan rɔbo, gɔ gi sizig bɛtha a kuus ha hɛw nɛ́ gbɛnige.
63Yɔ anbɔ Bɛtmaakwookya gbɔɔl mɔɔt bɔ taar gbannɔ gɔ tees du kpa̧s, wɛɛ raa:
a yɛrɛ wɛ gin nɔ dɔglɔ ɓɛ! 64Nɛ kɛm ha̧a̧l yɔ boo a Bɛt zulha be! Nɛ mɔk nɔ?
Dood sɛw hi yɛ̧ɛ̧ge hi raa:
a rii an hi gbɔŋg-gbɔmɔ.
65Dood zaadɛ hi teesdu hi yɛlsig set tusilgo, hi yaat muutɔ hi zɔ̧̀ɔ̧̀ge, hi wɛɛ hi raage:
a taamɔ, bɔ gɔsum hin bɔrɔ nɔ?
Lɛl-ookya wɔ hi loog hi dɛŋge.
66Yɔ Piyɛr gi lakdi a luk dɔŋg disɛ, Bɛtmaakwookya gbɔɔl mɔɔt bɔ nɛɛdɔ woosya wɔ zaaya̧ gbun tuurɔ; 67yɔ gbɛn Piyɛr gi laa tɛɛko, sɔ̧ɔ̧ge raa:
a mɔɔ hɛw, mɔ da mɔ gi nɛ hi Yeesu Nazarɛdya bɔ elo!
68Hɔnɛ Piyɛr yɔ kɛm anbɔ wɛɛ faa raa:
a bé mɛ̄ɛ̄ gɛ, bé kɛ̄m hinyɔ ha̧a̧m dɔk gɛ!
Kuudu wɛɛ tuu an gi rek a pɔnt du a gbɔnɔya̧. Kɔba kekɔ.
69Yɔ nis woosya bɔ wɛɛ gi gbɛnige, yɛls wɔrɔ hi gi di dɔk ɓɛ:
a wal yɛrɛ gi zaaya̧ gbunyɔ!
70Piyɛr wɛɛ faa ɓɛ. Kuudu kaasi, dood zaadɛ wɔ hi gi di hi raa ɓɛ:
a rɔbo, mɔ gi zaaya̧ gbunyɔ; mɔɔ hɛw mɔ gi Galileyayɔ!
71Hɔnɛ wɛɛ yɛɛl boot dɔk gɔ gi zulha hi hin dɛŋgliki:
a bé mɛ̄ɛ̄ wal yɔ nɛ dɔglɔ book gɛ!
72Ɓɔrbɔ kɔba kek gbaŋ eesimɛ. Yɔ Piyɛr mɛks hinyɔ Yeesu da dɔgsig nɛ be:
a kɔba gi kek dɔɔ eerɛ, mɔɔ mɔ faab gi dor dɔɔ taarɛ,
kaa ha̧a̧ltɔnɔ.
Currently Selected:
MARKUS 14: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
