MARKUS 15

1Bɛtmaakwookya gbɔlɛ hi mɔks bi̧i̧ltɔnɔ hi Yahu-duya ɗɛntɛ wɔ, hi Bɛtmaakdɔkya wɔ, hi dɔglyɛ̧ɛ̧kya wɔ sɛw hi wɔ̀ kɔlki. Hi wɔb Yeesu hi kaŋg hi gaag waar Pilatu naan du. 2Pilatu ɛrig hinɛ:

a mɔɔ gi Yahuduya wɔ waar ya̧ ya?

Yeesu gòòge:

a anyɔ mɔ raa.

3Bɛtmaakwookya gbɔlɛ wɔ hi gɛ̧ɛ̧nig hin kittɔnɔ. 4Yɔ anbɔ, Pilatu wɛɛ ɛrige:

a mɔ taa hinza gook ya? Mɔ kɛŋk hin gɛ̧ɛ̧nik mɔ zulha kittɔnɔ be!

5Yeesu wɛɛ gōō hinza ma zaŋ gɛ. Yɔ anbɔ hin wɛɛ wɛɛs Pilatu gɛrsɛ.

6Yɔ Paska naab gɔ gi nɛko, waar Pilatu gɔ bis luknɔya zaa gbun yɔ dood gɔ hi ɛr an hi bisige. 7Za̧a̧n za giro nuŋggɔ a Barabas gi luknɔ du hi dood zulɓaasigya zaadɛ wɔ hi gbɔm nɛ za̧a̧n za a gabs du be. 8Dood saal hi dɔɔ a Pilatu ge hi ɛrig hinyɔ rɔ̧ɔ̧s wook hi hiya. 9Pilatu goohi:

a ha̧a̧n an be bitsin Waar Yahuduya bɔ ya?

10Gii be mɛɛmɛ a Bɛtmaak-wookya gbɔlɛ wɔ hi gaabge naan du hi ka̧a̧syɔ. 11Wɛɛ, Bɛtmaakwookya gbɔlɛ wɔ hi sɔmb dood an hi ɛr Pilatu gi bitsihi Barabas a Yeesu kalɛ. 12Pilatu wɛɛ ɛr dood saal wɔ ɓɛ:

a ha̧a̧n an be gɔs nɔ za̧a̧n bɔ nɛ gig elik a Waar Yahuduya nɔ?

13Wɔrɔ hi ta̧a̧ge hi ya̧a̧ɓooki:

a doomɔg a dɔ̧ɔ̧r ha!

14Pilatu ɛrihi:

a woo nɔ hin ha̧a̧lɔ nɔ?

Hi wɛɛ hi ɓooya̧a̧ ha̧a̧ltɔnɔ ɓɛ:

a doomɔg a dɔ̧ɔ̧r ha!

15Yɔ Pilatu ha̧a̧g an gi gɔs saal wɔ kpoosya̧ gi harihi be tutsihi Barabas gɔ luknɔ du. Kuudu wɛɛ raa dooɗɔ hi lɛb Yeesu , wɛɛ gaahige hi kaŋg hi dooge. 16Laaya wɔ hi loo Yeesu hi kaŋg gɔ a dɔgl-gbaak luk du a Pilatu raa du. Hi mɔks laaya zaadɛ wɔ hi zɛ̧ɛ̧r nɛ sɛw. 17Hi heks Yeesu dimnaan hob muulɛ, hi haŋ kal kobsya hi heksig zulha an waar ums kalɛ. 18Kuudu hi yɛɛlig booki ma:

a be boomɔ, seko ya, Waar Yahuduya!

19Hi wɛɛ hi gig lɛk zulha hi bɔ̧ɔ̧kkoki, hi tulsig set muulɛ, hi wɛɛ hi zagl hi hu̧u̧r di bɛttɔnɔ a gi muutdu. 20Yɔ hi kpɛ̧ɛ̧l Yeesu gi da̧a̧, hi hod dimnaan hob bɔ hi wɛɛ hi hegsig gbannɔ wɔ. Kuudu hi tuunig lakdi hi rek hi doog dɔ̧ɔ̧r ha. 21Doo za Kirɛnɛya fu̧u̧z hɛt du nuŋgɔ a Simɔŋ, Iskan-darus hi Rufus baaya̧ giya gi daak ma dihɔ. Laaya wɔ hi gbɛnige hi wa̧a̧g hi fɛ̧ɛ̧g an gi pɛɛ Yeesu dɔ̧ɔ̧rɔ bɔ.

22Hi kam Yeesu a lɛlyɔ gɔ hi el a Golgota ge, raakɔ a zullɛŋk lɛlɛ. 23Ha̧a̧hi an hi yɔ̧n Yeesu bumhob za yɔ hi ɔksin tɛ̧ɛ̧ mɔt zobtil nuŋgɔ a ɗaasɛrɛyɔ. Gii be ta̧a̧ yɔ̧k gɛ. 24Kuudu hi wa̧a̧ hi doog gɔ a dɔ̧ɔ̧r ha, hi wɛɛ hi gɛ̧ɛ̧tin gbandilɔ wɔ; gbandilɔ wɔ hi len subud an hi sɔ̧ɔ̧ za̧a̧nyɔ gɔ gi le gi dagɔ.

25Yɔ hi doog a dɔ̧ɔ̧r ha, ɔ̧t bɔ gi kusaal ɓaati. 26Hi bi̧i̧ hinyɔ hi wa̧a̧g dɔŋgɔ ge dɔglɔ anyɔ lɛ: a WAAR YAHUDU-YAYƆ. 27Hi doo luurɛ ha̧a̧l eerɛ a dɔ̧ɔ̧r zaadɛ ha a gi dɔŋdi, gbunu a gi naan rɔbo, zaa gbunu a gi naanyɛ̧li. [ 28Hinyɔ Bɛt ɗɛɛrwol bɔ raa dɔglɔ wooyyɔ:

a hi ɓɛrig a dood ha̧a̧lɛ tees du. ]

29Dood wɔ hi daak hɔdi gɔ hi nams zulya̧ hi niige, hi raage:

a ɛ-u̧u̧! Mɔɔ Bɛtluk ɛ̧brikya bɔ, wɔŋkya bɔ ɔ̧t taarɛ, 30za̧a̧sum zul mɔ ma, sizum dɔ̧ɔ̧r bɔ hage!

31Bɛtmaakwookya gbɔlɛ wɔ, hi Bɛtmaakdɔkya wɔ hi kpɛ̧ɛ̧l a hi tees du, hi raa an ya̧a̧ gbun bɔ:

a za̧a̧s dood zaadɛ, yɛrɛ ɗɛ̄ɛ̄ an gi za̧a̧s zulɔ ma gɛ! 32An Masihu bɔ, Israhilaya waar bɔ gi siz ɓɔri ma a dɔ̧ɔ̧r bɔ hage. Wɛ́ gbɛn ma anbɔ wɛ ɗɔbs gɔ ɓɔrɔ.

Wɔ hi doohi a dɔ̧ɔ̧r za wɔ ha be hi gi Yeesu niik lab be.

33A lurk teesdu, lɛl wil a waal bɔ gedu sɛw, am tuur a naaba̧a̧n du. 34Yɔ ɔ̧t gi a naaba̧a̧n du, Yeesu ɓooya̧a̧ ha̧a̧ltɔnɔ raa:

a Eloyi, Eloyi, laama sabaktani?

Hinɔ raakɔ:

a Bɛt be, Bɛt be, mɔ ɔɔb nɔ?

35Dood zaadɛ wɔ hi ginɛ di hí kɛm anbɔ, hi raa:

a kɛn ma, gi elik Eliya ga!

36Zaaya̧ gbunu nɔɔ da looz bɔɔmɛ tɔ̧ɔ̧z mɛm haatil du zaa sa̧a̧ a bɔ̧ɔ̧kkok ha, gaag an gi yɔ̧. 37Hɔnɛ Yeesu wɛɛ ɓooya̧a̧ ha̧a̧ltɔnɔ, wɔr gɔ. 38Gbanɗil fɛɛt bɔ hi mal a Bɛtluk du taar teesdu der, yɛɛl taarik wɛɛha had wɛɛdisɛ. 39Laaya gbɔɔl Romaya bɔ gi nɛ erk a Yeesu muutdu, yɔ gbɛn Yeesu gi wɔr anbɔ, raa:

a hinɔ rɔbo, wal yɛrɛ gi Bɛt waayɔ!

40Nɛɛd zaadɛ hi giro, hi seezig lɔl hɛmltɔnɔ be. A hi tees du Mariyama yɔ fu̧u̧z a Magdala, hi Mariyama wala bɔ Yakuba nɔɔtɔ hi Yozɛs hi Salomɛ hi giro. 41Hii fɔbz nɛ Yeesu yɔ da gi nɛ a Galile, hii gaag nɛ leesɛ. Nɛɛd zaadɛ kit wɔ hi dɔɔtin nɛ hi Yeesu a Urusalima hi gi nɛ di hɛw.

42Yɔ ɔ̧t legɔ, yɔ gi nɛ a naabwɔd gɛbsig ɔ̧ti, raakɔ a yɔ Yahuduya wɔ holum-ɔ̧tya̧ gi sɛ̧ɛ̧biko, 43Yusufu a Arimate, doo ɗɛnt rɔb a dɔgl-gbɛɛrikyaadɛ tees du, zaa. Gii ginɛ ook Bɛt wáátɔ be. Ɓaas kpoosɔ rek a Waar Pilatu ge, ɛrig Yeesu muulɔ bɔ an gi re gi i̧i̧ loor du. 44Hɔnɛyɔ Pilatu lag a Yeesu wɔɔr be, hin wɛɛsig gɛrsɛ, elz laaya wɔ gbɔɔlya̧ bɔ, ɛrige:

a wɔr aam ya?

45Yɔ lag hinyɔ laaya gbɔɔl bɔ raasige, gaa Yusufu Yeesu muulɔ bɔ. 46Yusufu zebz gban buu rɔbo, re sis Yeesu wɔrkɔ bɔ a dɔ̧ɔ̧r bɔ hage, wɔbtig a gban buu bɔ gedu, kam da i̧i̧g a loor yɔ hi su̧u̧ a hɛɛl du gedu. Wɛɛ kibl bet gbɔɔl fɛɛti mibtin loor bɔ ya̧a̧gbarɔ. 47Mariyama a Magdala hi Mariyama Yozɛs nɔɔtɔ hi sɔ̧ɔ̧ lɛl yɔ hi i̧i̧k Yeesu wɔrkɔ bɔ.

Currently Selected:

MARKUS 15: NTD

Highlight

Copy