LUKA 9
9
LUKA 9
1Yɔ Yeesu mɔks walɛsɛrɛ ɔ̧ɔ̧ koobl daa eer wɔ, gaahi tɛŋko hi ɗɛɛn a loorɛha̧a̧l wɔ gaŋsya̧ sɛw hi zulha, hi wɛɛ hi za̧a̧sil gumtil wɔ be. 2Wɛɛ yaahi an hi dɔg Bɛt wáátɔ dɔglɛ, dood wɔ hi gin gumsɛ hi za̧a̧sihi be. 3Raahi:
a anyɔ nɛ rek rɔbsi, bɔnɛ loo hinza an sɔɔlɛ, saa, koko, tusɛ; bɔnɛ heg gbandil eerɛ. 4Gɔ nɛ gul a raa zaa du, kɔn duge, gi tuur an nɛ ɗund nɛ rekɔ. 5Gid dood hi inin dak hi waal du, tuun nɛ ɔɔ waal bɔ nɛ pub luus wɔ nɛ dɔɔ kuuha an gi wɛɛsihi hinmɛɛnikya.
6Walɛsɛrɛ wɔ hi rek gɔ raato hi raato hi dɔk Dɔgl Rɔb bɔ, hi za̧a̧silgo dood lɛl sɛw.
7-8Anyɔ waar gbɔɔl bɔ Hirudus lag hinyɔ gi daak sɛwi, dood zaadɛ hi raako a Yohana gii rɛmlɔ, zaadɛ be a Eliya Bɛtya̧a̧kɛŋkya bɔ gii wɛɛ gi midza, wɛɛ zaadɛ be a Bɛtya̧a̧-kɛŋkya wɔ zaaya̧ gbuni rɛmlɔ, yɔ anbɔ hinɔ yɔɔgyɔ. 9Wɛɛ raa:
a à Yohana giya, be wa̧a̧ge be dɛ̧ɛ̧r zulɔ be! Nɛ bɔ za̧a̧nɔ ɔnɛ be kɛm hi gig hin raanik anbɔ?
Wɛɛ ɓɛɛge an gi gbɛn za̧a̧nɔ.
10Walɛsɛrɛ wɔ hi wɛɛzɔ hi fɔks Yeesu hinyɔ hi woo. Yeesu loohi mukya̧ rek hi hii a waal za gbɔɔl du nuŋgɔ a Baytizaada. 11Yɔ dood saal hi mɛɛ a Yeesu gi rek hɔ, hi fɔge, gii be dagihi dɔgsihi Bɛt wáátɔ dɔglɛ. Wɛɛ za̧a̧s dood wɔ ha̧a̧hi za̧a̧k hɛw. 12Yɔ ɔ̧t gi leko, walɛsɛrɛ koobl daa eer wɔ hi sɔɔ hi raage:
a anyɔ wɛ gi a hɛtdɔŋ du hɛdi, yaam dood saal wɛrɛ hi rek a raat dɛɛt wɔ du hi raat wɔ hi sɛ̧ɛ̧b a hɛt duge an hi rek hi yo hi dag leesɛ.
13Yeesu raahi:
a nɛɛ hi zul nɛ gaanɛhi hinyɔ gɔ hi le.
Walɛsɛrɛ ɔ̧ɔ̧ wɔ hi goo:
a gɛ wi gin kok kiml nɔɔnɛ hi dut eerɛ, gi an wi re wi zebz lees za an wi gaa dood wɛrɛ sɛw ya?
14Walɛ wɔ sɛw kitigya̧ rek an duk nɔɔnɛ. Yeesu raahi:
a raan dood saal wɔ hi ɗɔɔt mɔksil lɛl gbunu gbunu dood du dumbili nɔɔnɛ nɔɔnɛ.
15Wɔrɔ hi gɔ anbɔ, hi raa dood saal wɔ hi ɗɔɔt sɛw. 16Yeesu loo kok kiml nɔɔn wɔ hi dut eerɛ wɔ, pɛɛ lɔlɔ wɛɛha baan Bɛto. Ɓɛɛl kok wɔ gaa walɛsɛrɛ ɔ̧ɔ̧ wɔ hi gɛ̧ɛ̧s dood saal wɔ. 17Dood sɛw hi le kok bɔ hi hi̧i̧. Hi wɛɛ hi mɔgl kok ɓɛɛkil wɔ hi zɛ̧ɛ̧rɔ hi̧i̧s dɛl koobl daa eerɛ.
18Ɔ̧tza yɔ Yeesu gi zɔ̧k Bɛt a lɛl-aakil du, ɛr walɛsɛrɛ ɔ̧ɔ̧ wɔ hi gi el an yɛrɛ lɛ:
a dood hi raak a be gi bɔ?
19Hi ta̧a̧:
a dood hi raak a mɔ gi Yohana Bɛtmɛm Hotingoya bɔ giya; zaadɛ be a mɔɔ gi Eliya;
zaadɛ hi raak ɓɛ: a mɔɔ gi Bɛtya̧a̧kɛŋkya wɔ amntɔnɔ zaaɔ yɔ rɛmlzɔ.
20Wɛɛ warihi:
a yɛrɛ nɛya, nɛ raak a bee gi bɔ?
Piyɛr ta̧a̧:
a mɔɔ gi Masihu yɔ fu̧u̧z a Bɛt ge.
21Yeesu wɛɛ raahi ma gɔ hi naati:
a bɔhi dɔks doo za hinɔ.
22Yeesu wɛɛ dɔg ɓɛ:
a gi an Za̧a̧n Waa bɔ gi yɔ̧ ya̧a̧r ha̧a̧ltɔnɔ. Yahuduya ɗɛntɛ wɔ hi Bɛtmaakwookya gbɔlɛ wɔ hi Bɛtmaakdɔkya wɔ hi bisige, hi gbɔŋge; gi rɛmlɔ gi ɗuk a ɔ̧t taasimɛ.
23Kuudu Yeesu wɛɛ raa dood sɛw:
a za̧a̧ni ha̧a̧g zaak a be kuudu, gi ɔs zulɔ hinmɔkigi, gi pɛɛ dɔ̧ɔ̧rɔ ɔ̧t nuŋg sɛw gi fɔbzibe. 24Ya̧a̧nɛ, za̧a̧ni ha̧a̧g an gi za̧a̧s kolɔ, gi waksige; wɛɛ za̧a̧ni waks kolɔ be dɔŋg be, gi za̧a̧sige. 25À doo za dag waal sɛw ɔnɛ, gi waks kolɔ, zaabe gi waks zulɔ, gi dak nɔ du nɔ?
26Ya̧a̧nɛ, za̧a̧ni seem ha̧a̧g beya hi dɔgl be, Za̧a̧n Waa bɔ gɔ gi zaa a gi gbɔlums ɗu, hi Baatɔ gbɔlums du, hi Bɛt walɛsɛrɛ gaatɛ wɔ hi gbɔlums du, seem gi ha̧a̧g za̧a̧nɔ be. 27Be gisin raak rɔbo: dood zaadɛ wɔ hi erk hɛdi hi gbɛn Bɛt wáátɔ kete, ɓɔr hi ɔɔ wɔrko.
28Yɔ Yeesu dɔg hin wɔrɔ anbɔ ɔ̧t gi tal di gɛ̧ɛ̧sɛ, loo Piyɛr , Yohana hi Yakuba hi dɔɔ a ga̧a̧t ha an hi zɔ̧ Bɛto. 29Yɔ Yeesu gi Bɛt zɔ̧ko muutɔ gbar zɛmrɔ, wɛɛ gbandilɔ buu anbɔ fɛr.
30Ɓɔrbɔ Bɛtya̧a̧kɛŋkya wɔrkɛ amntɛ eerɛ hi zaa hi booya̧a̧ hi Yeesu : gɛ Muusa hi Eliya. 31Hi midz a bɛtha gbɔlums du, hi boo waalɔ ɔɔk dɔgl yɔ gɔ gi woo woosɔ a Urusalima. 32Piyɛr hi naaza zaadɛ wɔ yoom gihi daaruko. Yɔ hi za̧a̧lɔlɛ hi gbɛn Yeesu gbɔlumsɔ hi dood eerɛ wɔ hi gi hi Yeesu. 33Yɔ dood wɔrɔ hi hɛɛtingo hi Yeesu , Piyɛr raa Yeesu :
a Hingokya , anyɔ wɛ gi hɛdi, bɛɛrɔ. Wi ɗuks duul gbanyaadɛ taarɛ: gbunu mɔɔnɛ, gbunu Muusa ɔnɛ, wɛɛ zaa gbunu Eliya ɔnɛ.
Wɛɛ Piyɛr mɛ̄ɛ̄ hinyɔ gi raak gɛ be. 34Yɔ gi dɔk anbɔ, kuus za zaa yaatihi. Yɔ kuus bɔ yaatihi anbɔ, walɛsɛrɛ wɔ hoob ha̧a̧hiha̧, 35wɛɛ ya̧a̧booyz a kuus bɔ gedu:
a yɛrɛ gi waa be yɔ be herig giya, kɛmsinɛge!
36Yɔ ya̧a̧ bɔ booy anbɔ gi da̧a̧, hi gbɛ̄n doo za ma gɛ, gɛ Yeesu gi gbunu. Yɔ anbɔ walɛsɛrɛ ɔ̧ɔ̧ wɔ hi kɔm be, a ɔ̧t wɔrɔ gedu hi fɔ̄ks doo za hinza gɛ.
37Yoosugɔ, yɔ Yeesu hi walɛsɛrɛ ɔ̧ɔ̧ wɔ hi siz a ga̧a̧t bɔ hage, dood saalzanɔ gbɔɔl hi zaa hi dagtin hi giya. 38Wal za kaa a saal bɔ gedu:
a Hingokya! Be zɔ̧mɔ, seem lɔl a waa be wal muulɛ, gii gi waa be gbunsimi. 39Loorɛha̧a̧l za wa̧a̧ge gɔ gig kalsugo, gig beesugo hi tɛŋko, gisig set itil tuusig ya̧a̧ du, gig kosgumn gaak ha̧a̧ltɔnɔ, wɛɛ gɔ sam ɔɔg gɛ be. 40Be zɔ̧b walɛsɛrɛ mɔ wɔ an hi tuus loorɛha̧a̧l bɔ, wɛɛ hi ɗɛɛ gɛ.
41Yeesu goo:
a nɛɛ dood wɔ nɛ ta̧a̧ ɗɔbsig gɛ, dood ha̧a̧l wɛ, be ɗɔɔt hi nɛɛ be mɔmsin gi tuur bili? Kamzum waa mɔ wal bɔ hɛdi.
42Yɔ loorɛha̧a̧lya bɔ gi sɔɔzugo, loorɛ bɔ mat walà bɔ hɛbt di beesig hi tɛŋko. Hɔnɛyɔ Yeesu ya̧a̧l loorɛha̧a̧l bɔ, tuu, wɛɛ za̧a̧s walà bɔ, gaag baatɔ naan du. 43Bɛt gbɔlumsɔ kɔms dood sɛw gɛrs gbɔɔltɔnɔ. An hinyɔ Yeesu woo sɛw gi kɔms dood sɛw gɛrsɛ hi book dɔglɔ te, Yeesu raa walɛsɛrɛ ɔ̧ɔ̧ wɔ:
44a nɛnɛ lagin hin yɛrɛ bɛttɔnɔ: hi gaa Za̧a̧n Waa bɔ a dood naan du ma.
45Hɔnɛ walɛsɛrɛ wɔ hi kɛ̄m dɔgl bɔrɔ hinɔ gɛ. Dɔgl bɔ kɔmsihi dɔgl yaatigyɔ an bɔhi kɛm hinɔ; anyɔ gɔ hi ɛrig dɔglɔ be, hoobha̧a̧hiha̧.
46Hɔnɛyɔ anbɔ walɛsɛrɛ wɔ hi yɛɛl watingo hi teesdu an hi mɛɛ za̧a̧nyɔ gi gbɔɔl gi daarlɛlɛ a hi tees du. 47Yɔ Yeesu mɛɛ mɔkil bɔrɔ hi kpoos du, loo waa za gbaag gi dɔŋg di, 48wɛɛ raahi:
a za̧a̧nyɔ dag ya̧a̧mwaa yɛrɛ a be nuŋg du, dag bee hi zul be; wɛɛ za̧a̧nyɔ dag bee hi zul be, dag Za̧a̧nyɔ yaazib giya. Ya̧a̧nɛ, za̧a̧nyɔ gi wans a nɛ teesdu gi daarlɛl sɛwi, za̧a̧nɔ gii gi gbɔɔlɛ.
49Yohana raa:
a Hingokya , wi gbɛn za̧a̧n za gi ninik loorɛ hi nuŋg mɔ, anyɔ taa doo wɛnɛ gɛ be, wi a̧a̧nig-a̧a̧nɔ.
50Hɔnɛ Yeesu ta̧a̧ge:
a bɔnɛ a̧a̧nige, doo gi ha̧a̧g gabs hi nɛɛ gɛ, gi doo nɛɛnɛ.
51Ɔ̧tyɔ Bɛt gɔ gi loo Yeesu gi dɔɔnig bɛtha sɛ̧ɛ̧bɔ, ha̧a̧g a gi kpoos du an gi rek a Urusalima. 52Yaa tɔmsɔya wɔ hi dorɔ hi rek a Samariya raat za du an hi gɛmtsig kusillɛlɔ. 53Anyɔ ginɛ rek a Urusalima, dood wɔ hɔ ha̧a̧hi an hi dagig gɛ. 54Yɔ walɛsɛrɛ ɔ̧ɔ̧ wɔ Yakuba hi Yohana hi gbɛn anbɔ hi warɔ:
a Waar i, ha̧a̧mɔ an wi raa laa gi fu̧u̧z a bɛtha gi dɔ̧ɔ̧hi ya?
55Yeesu lag anbɔ zɛmr hiige raahi:
a nɛ mɛ̄ɛ̄ mɔkilyɔ gi nɛ kpoos du gɛ. 56Yɛrɛ Za̧a̧n Waa bɔ zāā an gi waks dood kol gɛ, zaa an gi za̧a̧sihiza̧a̧sɔ.
Hi dɔŋg gɔ a raat za dɔɔm du. 57Yɔ hi gi rek a gbɔnɔ du, doo za raa Yeesu :
a Waar i, bé fɔmɔ a lɛlyɔ gɔ mɔ rek ge sɛw.
58Gii googe:
a bɛrtɔkgɛ hi gin luko, nɔɔs wɔ bɛtha hi gin zɛko. Yɛrɛ Za̧a̧n Waa bɔ taan lɛlyɔ gɔ gi gbaa zulɔ du gi holɔ.
59Wɛɛ raa doo za:
a fɔbzibe.
Za̧a̧n bɔ wɛɛ ta̧a̧:
a Waar i, gaabe gbɔnɔ an be re be i̧i̧z baa be wɔrkɔ kete.
60Hɔnɛ Yeesu wɛɛ raage:
a ɔɔm wɔrkɛ wɔ hi i̧i̧ wɔrkɛya̧. Wɛɛ mɔya rekum mɔ dɔg Bɛt wáátɔ dɔglɛ.
61Doo za dɔɔm wɛɛ raage:
a Waar i, bé fɔmɔ. Yɛrɛ gaabe gbɔnɔ an be rek be warz dood wɔ hi gi be raa du.
62Yeesu wɛɛ raage
a za̧a̧nyɔ gbaa naan a naafur ha gi wɛɛ gi see lɔl kuudu, gāā a Bɛt wáát du gɛ.
Currently Selected:
LUKA 9: NTD
Highlight
Share
Copy
Want to have your highlights saved across all your devices? Sign up or sign in
Doyayo New Testament © Bible Society of Cameroon, 1991.
