LUKA 8

1Kuudu, ɔ̧tyɔ tal kaasi, Yeesu rek a waal gbɔlɛ hi waal gbɔlɛ, raato hi raato an gi dɔg Bɛt wáátɔ Dɔgl Rɔbo. Walɛsɛrɛ ɔ̧ɔ̧ wɔ koobl daa eerɛ hi gi hi giya. 2Nɛɛd zaadɛ wɔ za̧a̧sihi nɛ hi loorɛ gumsɛ hi gums zaadɛ sɔmsɔm hi gi hi gii hɛw. Nɛɛdya̧ gɛrɛ: Mariyama yɔ gɔ hi elig a Magdalayayɔ, yɔ Yeesu tuus loorɛ nɔɔn-er a gi muul du, 3hi Waar bɔ Hirudus walsɛrɔ bɔ nuŋgɔ a Hudza nistɔ Yowanɛ, hi Suzaan, hi nɛɛd zaadɛ kit wɔ hi gisig ɗaak hi rɔɔsya̧.

4Dood kittɔnɔ hi fu̧u̧z a waal gbɔlɛ du sɔmsɔm hi zaa hi mɔks a Yeesu ge. Yeesu dɔgsihi ya̧a̧daanik an yɛrɛ lɛ:

5a doo za bakbalkya tuu an gi re gi dɔ̧ɔ̧ dɔ̧ɔ̧tɔ a gi bak du. Yɔ gi dɔ̧ɔ̧ko, dɔ̧ɔ̧t zaadɛ hi kpɔm a gbɔnɔ ya̧. Dood hi ɗa̧a̧k dɔɔ du be, nɔɔs hi zaa hi sɛ̧ɛ̧ zaadɛ be. 6Dɔ̧ɔ̧t wɔ zaadɛya̧ hi kpɔm a betwaat lɛlɛ, yɔ hi pirɔ hi wɛɛ hi koot nɔɔktɔnɔ anyɔ lɛlɔ gɔ hi̧i̧b gɛ. 7Dɔ̧ɔ̧t wɔ zaadɛya̧ hi pir a tɛ̧ɛ̧ kobsyaadɛ teesdu, kobs wɔ hi tɔɔtin hi hiya, hi yɛ̧gihi. 8Dɔ̧ɔ̧t wɔ zaadɛya̧ hi kpɔm a hɛbt rɔb lɛlɛ, hi pirɔ, hi hɔɔ, hi kɛ̧ɛ̧lɔl yɔ̧ɔ̧lɔ nɔɔnɛ nɔɔnɛ.

Yɔ Yeesu da̧a̧s dɔglɔ bɔ bookɔ anbɔ, wɛɛ dɔg hi kɔlk hɔɔti:

a za̧a̧nyɔ gin tɔn an gi kɛmɔ, gi kɛmɔ.

9Yɔ anbɔ, walɛsɛrɛ ɔ̧ɔ̧ wɔ hi warige:

a ya̧a̧daanik bɔrɔ tuus hinɔ a nɔ?

10Yeesu raahi:

a nɛya, nɛ dag gbɔnɔ an nɛ mɛɛ hinyɔ yaat nɛ a Bɛt wáát du. Yɛrɛ dood zaadɛ be, gi an be bonsihi ya̧a̧daanikyɔ, an hi seeko, wɛɛ hi gbɛn gɛ, an hi lako, wɛɛ hi kɛm gɛ.

11Hinyɔ ya̧a̧daanik yɛrɛ gi wadig gɛrɛ: a dɔ̧ɔ̧t bɔ hinɔ gi Bɛt dɔglɛ. 12Dood zaadɛ hi riitin an gbɔnɔya̧yɔ: gɔ hi kɛm Bɛt dɔglɔ, loorɛha̧a̧l zaa wɔɔ dɔgl bɔ hi kpoos du an bɔ hi ɗɔbsɔ hi za̧a̧. 13Dood zaadɛ hi riitin an betwaat lɛlɛ: doodya̧ hii gɔ kɛm Bɛt dɔglɛ hi ta̧a̧ hi hato; wɛɛ hi ɔ̄ɔ̄ dɔgl bɔ an gi yaa yɛ̧ɛ̧sɔ hi kpoos du gɛ, hi ɗɔbs am kaasi, hinza gɔ bɛɛhi maatugo hi ɔɔ dɔgl bɔ ɔɔ.

14Dɔ̧ɔ̧t wɔ hi kpɔm a kobs teesdu be, doodya̧ hii gɔ kɛm Bɛt dɔglɛ hi wa̧a̧ gbɔnɔ hi rekɔ, wɛɛ waalmɔkili, rɔɔsɛ hi waabil hɛmnt yɔ waal du yɛ̧g dɔgl bɔ hi kpoos du, dɔgl bɔ humlɔ wɛɛ hin tɔsi ma. 15Dɔ̧ɔ̧t wɔ hi kpɔm a hɛbt rɔb lɛl du, doodya̧ hii gɔ kɛm Bɛt dɔglɛ hi wa̧a̧ hi kpoos du gaati hi bis gɛ. Yɔ hi waa hinmɔŋk hi kpoos rɔbo, dɔgl bɔ gaa humlɔ gɔ hi kpoos du be.

16Doo za gɔ kpoo laa a pitila du gi mibt a dak du gɛ, zaabe gɔ mibt a leeso buudu gɛ. Gɔ wii a wiisɔ bɔ gedu an wɔ gɔ hi guzig a luk bɔ geɗu hi gbɛn lɛlgaalɛ. 17Hinza yaatilya taa an hi ɔɔg midigɔ. Wɛɛ hinza gɛdya taa an hi ɔɔg mɛksigɔ hi midigɔ a ɔ̧t du. 18Ya̧a̧nɛ, oon hinyɔ nɛ kɛŋk yɔ bɛttɔnɔ. Yɛrɛ za̧a̧nyɔ gin hinza, hi gaage zaa ha. Za̧a̧nyɔ taan hinza gɛ be, hi ha̧s hinyɔ mɔk nɛ a be gin hɛw.

19Yɔ Yeesu gi a lɛl za du, nɔɔtɔ hi yɛ̧ɛ̧dɛ ɔ̧ɔ̧ hi zaa hi zɛŋge, wɛɛ hi dāg gbɔnɔ an hi tuur ge gɛ, dood saal hi kiitɔ. 20Hi raasige:

a nàà mɔ hi yɛ̧ɛ̧dɛ mɔ hi erk lakdi, ha̧a̧hi an hi gbɛnumɔ.

21Hɔnɛ Yeesu wɛɛ ta̧a̧hi:

a nàà be hi yɛ̧ɛ̧dɛ be gɛ dood wɔ hi gi kɛŋk Bɛt dɔglɔ hi wɛɛ hi gi wooko.

22Ɔ̧tza ma Yeesu kar a lɛmb du hi walɛsɛrɛ ɔ̧ɔ̧ wɔ, wɛɛ raahi:

a yɛnwɛ tal a mɛmbal kasiŋ zaabɔ ge.

Hi rekɔ. 23Yɔ hi rek a lɛmb du, Yeesu yoyo. Zɛk za ha̧a̧l tɛŋkya yɛɛl fɛk a mɛm bɔ hage, mɛm gi ga̧a̧yyik a lɛmb du, lɛmb bɔ gi hi̧i̧sugo, sɛ̧ɛ̧b an gi gubrihi a mɛm bɔ gedu hi wɔrɔ. 24Hi sɔɔ hi rɛmsige hi raage:

a Hingokya! Hingokya! Wɛ wɔrɔ!

Yɔ Yeesu rɛmɔ, ya̧a̧l zɛk ha̧a̧l bɔ hi mɛmɗukil wɔ hi erɔ, lɛl kɔm gɔ seseg. 25Wɛɛ raahi:

a ɗɔbsig nɛ gi ay?

Yɔ hoobha̧a̧ wɔrɔ gi wɛɛ gi kɔmsihi gɛrsɛ hi ɛtinu:

a bɔ za̧a̧n yɛrɛ gɔ gi raa zɛko hi mɛmɛ hi kɛmsig tɔn wɛ yɔ?

26Yɔ anbɔ Yeesu hi walɛsɛrɛ ɔ̧ɔ̧ wɔ hi tuur ma a mɛmbal kasiŋ zaabɔ ge, hi sil gɔ a Gerezanɛ hɛbt du. Galile hɛbt gi nɛ a mɛmbal kasiŋ zaabɔ hi ɔɔg nɛ hi kar lɛmb duge.

27Yɔ Yeesu sil a lɛmb du, wal za yɔ gi a waal gbɔɔl bɔ gedu gin loorɛha̧a̧l kittɔnɔ a gi muul du, zaa ge. Wɛlɔ kittɔnɔ gi waak ɔ̧lɛ, wɛɛ taa waak a luk du, gi waak a loorlɛlɛ. 28Yɔ gbɛn Yeesu , zaa zagl gi dɔŋdi ɓooya̧a̧ ha̧a̧ltɔnɔ dɔg hi tɛŋko:

a dɔgl be nɔ du hi mɔɔya, Yeesu , Bɛt Yɔ Gi Gbɔɔl Gi Daarlɛl waa? Be zɔ̧mɔ, bɔmɔ ha̧a̧nib ya̧a̧rɛ!

29Yɔ Yeesu raa nɛ loorɛha̧a̧l bɔ a gi tuu a wal bɔ gi muul du giigi dɔg anbɔ. Yɛɛl amntɔnɔ, loorɛha̧a̧l bɔ gi waak nɛ wal bɔ wa̧a̧ki. Dood gɔ hi waag hi wɔk dɔɔɔ wɔ hi naanɔ wɔ hi ba̧a̧n tusɛ, hi tus gbɔɔsi, hi gig gbaako. Wɛɛ gɔ anbɔ kaatir gbɔɔs wɔrɔ sɛw. Wɛɛ loorɛha̧a̧l bɔ kaŋge a hɛtdɔŋ du. 30Yeesu warige:

a nuŋg mɔ a nɔ?

Gii ta̧a̧

a nuŋg be a saalɛ.

Anyɔ loorɛha̧a̧l kittɔnɔ hi gul nɛ a gi muul du. 31Hi wɛɛ hi zɔ̧b Yeesu hi ya̧a̧hɛmnti:

a bɔgi yaahi a zɛŋk dubt du.

32Hɔnɛyɔ hab kittɔnɔ hi gi nɛ ga̧a̧t ha hi tɔk hɛto, loorɛha̧a̧l wɔ hi zɔ̧b Yeesu

a gi yaahi a hab wɔ hi muul du.

Yeesu gaahi gbɔnɔ.

33Loorɛha̧a̧l wɔ hi bɛɛ tuuk a wal bɔ gi muul du hi tal hi rek a hab wɔ hi muul du. Wɛɛ hab wɔ hi bindɔ hi nɔɔ hi tii a kasiŋ disɛ hi dikto hi rek hi gi̧i̧l a mɛmbal du hi wɔrɔ. 34Yɔ hab nɛɛrɛwaat wɔ hi gbɛn anbɔ, hi nɔɔ hi rek a waal gbɔlɛ du hi raat dɛɛt wɔ du hi raam ramsɔ. 35Yɔ dood hi lag anbɔ hi rek hi see hinyɔ tuurɔ, hi tuur a Yeesu ge, hi zɛm wal bɔ loorɛha̧a̧l tuu gi muul du ɗɔɔt a Yeesu dɔŋdi, heg gbandilɔ hamad gi hi mɔkilɔ rɔbtɔnɔ. Yɔ anbɔ hoobha̧a̧-hiha̧.

36Dood wɔ hi gbɛn hinyɔ talɔ, hi fɔks wɔrɔ loorɛya bɔ za̧a̧tigɔ dɔglɔ. 37Yɔ anbɔ, dood wɔ hi waak a Gerezanɛ hɛbt yɔ sɛ̧ɛ̧b di gedu sɛw hoobha̧a̧hi ha̧a̧ltɔnɔ hi zɔ̧b Yeesu an gi tuu gi ɔɔ hɛbtya̧ bɔ. Yeesu wɛɛ kar lɛmb du wɛɛ wɛɛ a lɛl bɔ da giz nɛ ge. 38Wal bɔ loorɛha̧a̧l tuu gi muulɛ zɔ̧ Yeesu an gi kɔm hi giya. Hɔnɛ Yeesu wɛɛ yaage raage:

39a wɛɛmɔ a mɔ lɛlɛ mɔ da mɔ fɔk hinyɔ Bɛt woosum sɛw.

Wal bɔ rekɔ fɔkil hinyɔ Yeesu gɔsig nɛ dɔglɔ sɛw a waal gbɔɔl bɔ gedu sɛw.

40Hɔnɛyɔ Yeesu wɛɛzɔ, dood saal hi dagige; hi sɛw hi gig nɛ ook be. 41Yɔ anbɔ, wal za giro nuŋgɔ a Yayirus, gi mɔksillukya gbɔɔlɛ. Zaa zagl a Yeesu dɔŋdi, zɔ̧ge an gi re gi gul a gi raa du,

42anyɔ gin waaɔsiŋ yɔ gi waaɔ gbunsimi, gin wɛlɔ koobl daa eerɛ gi sɛ̧ɛ̧bik wɔrkyɔ. Yɔ Yeesu gi reko, dood saal wɔ hi gig ɓɔ̧ɔ̧ko.

43Nis za giro, lis gig fɔk wɛl koobl daa eerɛ, waks rɔɔsɔ sɛw a gɛr du, gɛr za ɗɛɛg za̧a̧sig gɛ be. 44Nis bɔ sɔɔ a Yeesu kuudu ɓi̧i̧ gbandilɔ tɔl bɔ wɛɛdisɛ, ɓɔrbɔ lisɔ bɔ da̧a̧sig gɔ. 45Yeesu yɔ mɛksɔ, warɔ:

a bɔ ɓi̧i̧be?

Anyɔ dood sɛw hi faako, Piyɛr raa:

a Hingokya , dood saal hi gɔ̧ɔ̧ dɔŋg mɔ hi gi mɔ ɓɔ̧ɔ̧k be, mɔ wɛɛ mɔ wark bɔ a bɔ ɓi̧i̧ be nɔ?

46Hɔnɛ Yeesu ta̧a̧ raa:

a za̧a̧nza ɓı̧̀ı̧̀be, ya̧a̧nɛ bé mɛɛ a tɛŋk za tuu be muul du.

47Yɔ nis bɔ gbɛn an hi midigmidɔ, zaa zagl a Yeesu dɔɔ dɔŋdi gi beek hoobo; wɛɛ fɔk hinyɔ ki̧i̧ Yeesu dɔŋgɔ ge a dood lɔlgbar sɛw, wɛɛ dɔg za̧a̧tigɔ dɔgl ɓɔrbɔ sɛw. 48Yeesu raage:

a waa be siŋgo, ɗɔbsig mɔ za̧a̧sumza̧a̧sɔ, rekum rɔbtɔnɔ.

49Anyɔ Yeesu gi ya̧a̧book te, doo za fu̧u̧z a mɔksilluk gbɔɔlya bɔ gi lɛlɛ, zaa dɔksig wɔrk ramsɛ:

a waa mɔ siŋg bɔ wɔɔrɔ, bɔmɔ mɔɔs Hingokya bɔ.

50Hɔnɛyɔ Yeesu bɛɛ hin bɔrɔ lak anbɔ, raa Yayirus:

a bɔ hoob gi ha̧a̧mɔ, ɗɔbsum kpɔd, waa mɔ bɔ gi za̧a̧.

51Yɔ Yeesu tuur a raa bɔ gedu, ta̧a̧ an doo za gi gul hi gii gɛ, gɛ Piyɛr , Yohana, Yakuba hi waa bɔ baatɔ hi nɔɔtɔ hii gul kpɔd. 52Dood sɛw hi kaako, hi hekugo, a wɔrk bɔ gi muulɛ. Yeesu raahi:

a bɔnɛ kaa, waa bɔ wɔr gɛ gi yokyo.

53Yɔ dood hi lag anbɔ hi kpɛ̧ɛ̧lig-kpɛ̧ɛ̧lɔ, hi seege a yooyɔ, hi mɛɛ be a waa bɔ wɔɔrɔ. 54Hɔnɛ Yeesu sɔɔ waa bɔ gi dɔŋdi wa̧a̧g naan muulɛ, dɔg hi ya̧a̧ɓooti:

a waa, ɗukum ha!

55Waa bɔ kolɔ wɛɛzɔ, wɛɛ ɗund ɓɔrbɔ ɗɔɔtɔ. Yeesu wɛɛ raa:

a gaanɛg lees gi le ma.

56Wawa bɔ baatɔ hi nɔɔtɔ kɔmsihi gɛrsɛ, Yeesu wɛɛ raahi:

a bɔnɛ fɔks doo za hinyɔ tuurɔ.

Currently Selected:

LUKA 8: NTD

Highlight

Copy