LUKA 10

1Kuudu yɔ hin wɔrɔ hi talɔ, Waar Yeesu her dood dumbili nɔɔn-er zaadɛ yaahi eerɛ eerɛ hi dor a waal gbɔlɛ wɔ du sɛw hi lɛl zaadɛ wɔ gii gɔ gi rek nɛ ge sɛw, 2raahi:

a tot gi bak du gbɔɔltɔnɔ, ɓɛrkɔ rii be, wɛɛ woosya hi kit gɛ be. Yɛrɛ da nɛ zɔ̧b Totɓɛs Zulya bɔ, gi yaaz woosyaadɛ a totɓɛsɔ bɔ gedu. 3Rekinɛ, yɛrɛ be gin yaak an tamwaato a lergum tees du. 4Gɔ nɛ reko bɔnɛ loo tusɛ, zaabe lees duko, hi taalɛ; bɔnɛ boo doo gbɔnɔ di.

5Gɔ nɛ gulk a raa za du, raan kete: a an boolum gi gi a raa yɛrɛ geɗu. 6Wɛɛ doo za boolumya gi gi a raa bɔ gedu, boolum nɛ yɛgi ɗɔɔt gi zulha. Doo za boolumya gi taadu gɛ be, boolum nɛ gi wɛɛz a nɛɛge. 7Waan a raa gbun bɔ gedu nɛ gi hinleko, nɛ gi yɔ̧k hinyɔ gɔ hi gaanɛ. Ya̧a̧nɛ, woosya rii an gi dag dɔɔrɔɔsɔ dagɔ. Bɔnɛ tal raato hi raato.

8Gɔ nɛ gul a waal gbɔɔl za du, gid hi daginɛ, len lees yɔ gɔ hi gaanɛ. 9Za̧a̧sin gumtil wɔ gɔ nɛ zɛ̧hi a waal gbɔɔl bɔ gedu, wɛɛn nɛ raahi: a Bɛt wáátɔ sɛ̧ɛ̧b hi nɛya.

10Yɛrɛ a waal gbɔɔl za yɔ gɔ nɛ gul gedu a lɛlyɔ gɔ hi dagin gedu gɛ, tuun a gbɔnɔɔ wɔ gedu nɛ dɔgɔ: 11a wi pubik waal gbɔɔl nɛ bɔ luusɔ kɔm wi dɔɔkuu ha nɛ muulɛ. Yɛrɛ mɛɛn ma a Bɛt wáátɔ sɛ̧ɛ̧bɔ. 12Be raasinɛ: a dɔgl-gbaak ɔ̧ti, waal gbɔɔl yɛrɛ dɔglɔ gɔ hi gbaasige gi daar waal gbɔɔl bɔ Sodɔma ɔnɛ bɔ gɔ hi gbaasige.

13Koraziŋ, ya̧a̧rhant gisumɔ! Baytizaada, ya̧a̧rhant gisumɔ! Ya̧a̧nɛ à gɛrs gbɔlɛ wɔ hi wooy nɛko a nɛ teesdu da wooy nɛ a Tiriya hi Sidɔŋg, dood wɔ hi waak nɛ hɔ amntɔnɔ, yɔ hi rumsihi tám muulɛ, hi wɛɛ hi heksihi saa a muul nɔɔktɔnɔ an hi zuun a hi zɛmr kpoosya̧ zɛmrɔ.

14Ya̧a̧nɛ, dɔgl yɔ gɔ hi gbaas Tiriya hi Sidɔŋg taa ɗɔk an nɛnɛ bɔ. 15Yɛrɛ mɔya, Kapɛrnayum, mɔ mɔkig a Bɛt dɔɔsumdɔɔs a bɛtha ya ri? Hí tidzumɔ an mɔ zaa̍ mɔ gul a wɔrkɛ ɗɔɔtillɛlɛ.

16Yeesu wɛɛ raahi:

a za̧a̧nyɔ gisin dɔgl nɛ kɛŋko, gis bee kɛŋko. Wɛɛ za̧a̧nyɔ bisinɛ, bis beya. Za̧a̧nyɔ bis bee be, bis Za̧a̧nyɔ yaazib giya.

17Tɔmsya wɔ dumbili nɔɔn-er hi wɛɛza hi hato hi raa Yeesu :

a Waar i, loorɛha̧a̧l wɔ hɛw hi gisiw tɔn lako hi nuŋg mɔ.

18Yeesu raahi:

a be gbɛn Saydanu gi mɛɛzig bɛtha an bɛlya̧bsɛ. 19Yɛrɛ be gaanɛ ɗɛɛti an nɛ ɗa̧a̧ beksɛ hi keli, hi lɔlhɛ̧ɛ̧nikya bɔ tɛŋkɔ yɔ gin sɛw, wɛɛ hinza taan nɔk gaak nɛ zaŋ. 20Yɔ anbɔ, bɔnɛ dag hat a hinyɔ loorɛ wɔ hi laksin tɔn hage. Yɛrɛ dagin hato anyɔ nuŋg nɛ bi̧i̧y a bɛtha.

21A ɔ̧t gbun bɔ gedu, Bɛt Mɔkil hatɔ segl Yeesu raa:

a Baa, mɔɔ gi bɛtha hi hɛbtdi Waar ya̧, be baanumɔ anyɔ mɔ mits waatyɛ̧s wɔ hinyɔ mɔ da mɔ yaats dood hinmɛɛkya wɔ hi dood kɛ̧ɛ̧tɛ wɔ gɔ hi kɛm hinɛ. Hɔɔ! Baa, be baanumɔ a hinyɔ ha̧a̧mɔ geha anbɔ.

22Baa be gii gaazib hin sɛw, wɛɛ doo za mɛɛ waawal bɔ za̧a̧nɔ gɛ, gɛ baatɔ mɛɛg kpɔd. Wɛɛ doo za mɛɛ Baa bɔ za̧a̧nɔ gɛ, gɛ waawal bɔ mɛɛg kpɔd hi dood wɔ Waawal bɔ ha̧a̧ge an gi zunsihi za̧a̧nɔ hi mɛɛge.

23Wɛɛ yɔ wɛɛ gi zɛmr a walɛsɛrɛ ɔ̧ɔ̧ wɔ hii, raahi ɔ̧ɔ̧kya̧:

a hat gi a za̧a̧nyɔ gbɛn hinyɔ nɛ gbɛnik ge. 24Ya̧a̧nɛ be gisin raako: a Bɛtya̧a̧kɛŋkya wɔ kittɔnɔ hi waar ɛ gbɔlɛ wɔ ha̧a̧hi an hi gbɛn hinyɔ nɛ gbɛnko, wɛɛ hi gbɛn gɛ, an hi kɛm hinyɔ nɛ kɛŋko, wɛɛ hi kɛŋ gɛ.

25Bɛtmaakdɔkya za ɗund ɛr Yeesu hin an gi maatinge; ɛrige:

a Hingokya , bé woo nɔ an be dag za̧a̧tig faa nɔ?

26Yeesu wɛɛ warige:

a hi bi̧i̧ a nɔ a Bɛtmaakdɔgl du nɔ? Gɔ mɔ zaŋgig nɔ gedu?

27Wal bɔ ta̧a̧:

a hi bi̧i̧ a gi ha̧a̧mɔ Waar mɔ Bɛto hi kpoos mɔ sɛw, hi kol mɔ sɛw, hi tɛŋk mɔ sɛw, hi mɔkil mɔ sɛw, hi a namɔza ge an zul mɔ.

28Yeesu raage:

a mɔ ta̧a̧ bɛɛrɔ woom anbɔ mɔ́ za̧a̧.

29Hɔnɛ Bɛtmaakdɔkya bɔ ha̧a̧g an gi wɛɛn zulɔ hinrɔbwookya a Bɛt muutdu, ɛr Yeesu :

a bɔ gi nabeza ma nɔ?

30Yeesu ta̧a̧ raa:

a wal za fu̧u̧z a Urusalima gi tiik a Zeeriko, mat a luurɛ ha̧a̧l tees du. Luurɛ ha̧a̧l wɔ hi holk gbandilɔ wɔ, hi lɛbtige, hi ɔɔg gbɛŋgi hi rekɔ. 31Hɔnɛ Bɛtmaakwookya za gi tiizig a gbɔnɔ gbun bɔ gedu, bɛɛ wal bɔ kus hɛbtdi gbɛnko, daa bɛrko rekɔ. 32Gbunɔ, doo za Lewiya tuur a lɛl bɔ ge, bɛɛ wal bɔ gbɛnik ɓɛ, daa bɛrko rekɔ.

33Hɔnɛ doo za Samariyaya gi rɔbsɔ reko, yɔ tuur hɔdi gi gbɛn wal bɔ hɛbtdi mɛɛsig ya̧a̧rɛ. 34Sɔɔ gi dɔŋdi loo bumhob gabsi doktin nɔkɔ wɔ, gbaasig kurum gedu, wɔbtil hi gbandili, wɛɛ pɛɛ gbaag a pɛɛzimɔ bɔ gi yɛl ha kaŋge a rɔbɛ luk du, ooge.

35Yoosugɔ, loo tus gaat eerɛ gaa rɔbɛ luk-ookya bɔ raage: a oosibe gumtil yɛrɛ. Loom tus yɛrɛ mɔ zemnsinge hinyɔ gi sɛw. Tus benɛ bɔ gi rii gɛ mɔnɛ yɔ gɔ mɔ goo ha, gɔ be wɛɛz mɔ raasib be wɛnsumɔ.

36Yeesu ɛrige:

a dood taarɛ wɛrɛ teesya̧ bɔ gedu, mɔ mɔk nɔni wɛɛs za̧a̧n bɔ luurɛha̧a̧l hi lɛbtig naaza nɔ?

37Bɛtmaakdɔkya bɔ ta̧a̧:

a gɛ za̧a̧n yɔ mɛɛsig ya̧a̧rɛ.

Wɛɛ Yeesu raage:

a hɔɔ, mɔya rekum mɔ woo anbɔ be.

38Anyɔ Yeesu gi rek gbɔnɔ du hi walɛsɛrɛ ɔ̧ɔ̧, zɛm raa za gul gedu, wɛɛ nis za nuŋgɔ a Marta dagig a gi raa du. 39Gin yɛ̧ɛ̧tɔ za nuŋgɔ a Mariyama, ɗɔɔt a Waar Yeesu dɔŋdi gisig dɔglɔ kɛŋko. 40Marta be, gi zɛksig zulɔ hi woos gbɔɔltɔnɔ, wɛɛ zaa raa:

a Waar i, dɔgl mɔ taa du anyɔ yɛ̧ɛ̧be ɔsib woos be wook be gbun ya? Raamɔge gi zaa gi ɗaasib ma mi!

41Waar Yeesu raage:

a Marta! Marta! Mɔ gi zɛksig zul mɔ hi mɔkil kittɔnɔ. 42Yɛrɛ hinyɔ ha̧a̧mɔ hi rɔbo, gi hin gbunu. Mariyama her ɔnɛ rɔb bɔ herɔ; hinɔ be hi taa zaa looko.

Currently Selected:

LUKA 10: NTD

Highlight

Copy