ZYAŊ 8

Giɓ anɛ à kìghà fìsɔ̀mɔ̀g

1Fɔɔnnɛ Yeesus à kɛ̀ngà ɓi dòn ì ɓɛ̀òlìvyee. 2Wɔ̀lɛ yɛ̀ɛ duri i tangà, à sugtìghà ɓi naà-Bɛ̀ll, ɓum ɓɛ̀cèm ɓɛ yu nyi a nyòò. Fɔɔnnɛ à kɔ̀rìghà ɓi zi à tumɛ̀n ɓɔ rìrèsàg.

3Nni Ɓɛ̀rèsàg-ɓìdɔ̀gsɛna rì Ɓɛ̀fàrìzyɛŋ ɓɛ yughày nyi rì giɓ anɛ ɓɛ siìdìghà di a kìki fisɔ̀mɔ̀g, 4ɓɛ kɔɔ̀sì nyi ɓi nyìinyìm à ɓum, ɓɛ kpaa Yeesus lɛ: Ǹɗèsàg, ɓaa sììdii giɓ anɛ di a kìki fisɔ̀mɔ̀g. 5Moyis à siitàkà ɓìsi ɓi ɓìdɔ̀gsɛna lɛ tì ghɛ̀ɛ̀sɛɛ kì welì mɛ̀kuu mɛ ɓɛ̀yiɓ mɛ fɛlɛ, di tì rogii mɔ gɔ̀g, nni wɔ̀ɔ̀ kpaa la? 6Ɓɛ kpaaghà fɔlɔɔ lɛ, ɓɛ ranɗàmgà Yeesus di ɓɛɛ ɓa rì bee inɛ lɛ ɓɛɛ sɔmɛn nyi. Wɔ̀lɛ Yeesus à tuŋìghà à tumɛ̀n rìkàn ɓi zi ri manàcàg. 7Yɛ̀ɛ ɓɛ kɛnkɛ̀ngà asu rì mɛ̀tɔɔ̀ghtɔɔgh, nni Yeesus à pɛ̀sìghà ǹto, à kpaa ɓɔ lɛ: Kìbog ki ɓi mìni ki ki ka kighà ɓi kiɓe, kɛɛ log nyi kì roŋì gɔ̀g. 8Fɔɔnnɛ à sugtìghà kìtuŋii, à tumɛ̀n tì rìkànkàn ɓi zi. 9Yɛ̀ɛ ɓum ɓɛ wokà fɔlɔɔ, ɓɛ tum rìghaghààgh lɛ bog bòg bog à tumɛ̀n ɓi ɓɛ̀roɓɛ ɓɛsɛ̀ɛ̀mɛn, à kpaŋ ɓi ɓɛ siitòn. Nni Yeesus à cɛɛnɛ̀ngà foo ɓɛɛ̀ giɓ anɛ à ɓaghà ànɛn ɓi nyìinyìm. 10Yeesus à pɛ̀sìtì min nto, à tɔg nyi lɛ: Giɓ anɛ, ɓumɓɛ ɓaa yùu wɔ̀ kìsɔmɛɛ ɓɛ ti fe? Ŋwaà faa ɓi wɔ zɔɔ? 11Giɓ a ɓàg lɛ: Mum à faa ɓi mɛ zɔɔ Kan. Fɔɔnnɛ Yeesus à kpaaghà min nyi lɛ: Nsoò mɛ̀ girig ǹfaa ɓi wɔ zɔɔ; kɛ̀na, kìɓan kifog kɔ̀ɔ kìti kiɓe yaà.]

Yeesus àrì kìtɛɛtɛn ki ɓi ziinɛ

12Yeesus à tòòghrɛ̀ngà tì rì ɓɔ à kpaa lɛ: Mɛ̀ ǹɗì kìtɛɛtɛn ki ɓi ziinɛ; ŋwaànɛ à nɔ̀ɔ̀tii mɛ̀, àa kɛ̀ɛ̀ghi ɓi ɓi birìm, à rì lɔŋ ɓiì ɓaà rì kìtɛɛtɛn ki cɛɓ.

13Ɓɛ̀fàrìzyɛŋ ɓɛ kpaaghà nyi lɛ: Wɛ̀ɛmiɗ yɛɛ̀ rèresi kiɓan kɔɔ, fɔɔnnɛ com ki u kpaakpaa ki yin saaɗ. 14Yeesus à ɓàg ɓɔ lɛ: Ki soo rì lɛ mɛ̀ yɛɛ̀ rèresi kiɓan kɛm̀ mɛ̀ɛmiɗ, com ki nkpaakpàà ki ri saaɗ, lɛ mɛ̀ ǹ-yii fe nnɛ nkɛ̀nkɛ̀n, kìɓan kifog, mìnii yii ɓi jàŋ inɛ m̀ɓaghày, nsoò jàŋ inɛ nkɛ̀nkɛ̀n. 15Mìnii ti ɓì fiɓɓàg ɓìɓan ri ɗyomzɛ̀n ɗi ɓi mɛ̀mùù, ɓi ɓɛg wɛ̀m, mɛ̀ ǹ-yɔ̀mi ɓi mum. 16Nsoò màa ki yɔ̀mi, rìren ɗyɛ̀m ɗi kiɓan ɗi ri lɛ saaɗ ɓisuulɛ ǹ-yin cɛ̀ncɛm, tì rì ɓɛɛ̀ Tààta ànɛ à romgày mɛ̀. 17Ki ri kìkànɛn ɓi ɓìdɔ̀gsɛna ɓin lɛ: Rìtɛɛ̀zì ɗi kiɓan ɗi ɓum ɓɛɓɛɛ̀ ɗi ri saaɗ. 18Mɛ̀ɛ nɗèresi saaɗ ànɛ ɓi kìɓan kɛm̀ mɛ̀ɛmiɗ, fɔɔnnɛ Tààta ànɛ à romgày mɛ̀ a rèresi kiɓan kɛm̀. 19Nni ɓɛ kpaaghà nyi lɛ Soŋi à rì fe? Yeesus à ɓàg ɓɔ lɛ: Ɓì yii ɓi mɛ, ɓyɛ̀ ɓi ki yi Seŋi wɛ̀m, i ɓyàa yii mɛ̀, di ɓì rì lɛ ɓì yi girig Seŋi wɛ̀m.

20Yeesus à kpaaghà ɓìɓan ɓiǹ yɛ̀ɛ à rèrèsàkà ɓum ɓi naà-Bɛ̀ll, ɓi jàŋ inɛ ɓɛ ǹnyamgì ìkum; mum kɛ̀ɛ ki ɓan nyi, lɛ cààmɛ̀n kii ki ɓaghà di ki ka kpaŋ ɓi.

21Yeesus à kpaatìghà ɓɔ lɛ: Mɛ̀ɛ nkɛ̀nkɛ̀n, ɓì rì mɛ̀ ɓiì kaà, ɓì ki wu ɓi kìɓe kin ɓiɗùm. Ɓì yin lɛ ɓì kpaŋ jàŋ inɛ ǹkɛ̀ɛ. 22Fɔɔnnɛ Ɓɛ̀yudɛ̀n ɓɛ kpaaghà lɛ: Àrì ɓiì wolɛɛ nyimiɗ giǹ, yɛ̀ɛ a kpaaghi lɛ: Ɓì yin lɛ ɓì kpaŋ jàŋ inɛ ǹkɛ̀ɛ? 23Nni Yeesus à kalìghà ɓɔ lɛ: Mìnii pɛsɛɛ wɔɔ fɛ ɓi ziinɛ, mɛ̀ m̀pɛ̀sɛɛ yì aɗyòò; mìnii ri ɓumɓɛ ɓi ziinɛ, mɛ̀ ǹ-yin ŋwaànɛ ɓi ziinɛ. 24Fɔlɔɔ nnɛ màa kpaa mìni lɛ, ɓì ɓiì wiì ɓi ɓìɓe ɓin ɓiɗùm; lɛ i ɓì gherɛɛ ɓi lɛ Mɛ̀ nɗì... , di ɓì wii ɓi ɓìɓe ɓin ɓiɗùm. 25Nni ɓɛ tɔkà nyi lɛ: Ù rì ghɛn? Yeesus à ɓàg ɓɔ lɛ: Mɛ̀ ǹɗì roànɛ ǹkpaaghà mìni lɛ ǹɗì a rìtumɛ̀n. 26Ǹtèghɛɛ ɓìɓan ɓi kpaakpaayɛn, rì ɓi yɔ̀mɛn ɓi kìɓan kin, kìɓan kifog roànɛ à romgày mɛ̀, a kpaakpaa saaɗ, fɔɔnnɛ nkpaakpaa ziinɛ ɓìɓan ɓi ǹwokà rì nyi. 27Ɓɛ wokà ɓi lɛ kìɓan ki Seŋi kɛɛ̀ki à kpaakpààghà ɓɔ. 28Nni Yeesus à kpaaghà min ɓɔ lɛ: Yɛ̀ɛ ɓì ri pɛ̀si Man à mum aɗyoo, lɛ teŋtèŋ̀ŋ̀, fɔɔnnɛ ɓì ri yi min lɛ Mɛ̀ yɛɛ ri, rì tì lɛ mɛ̀ ǹ-yin ɓiì kìkii kiɓan kidɛŋ rì nto wɛ̀m, kìɓan kifog, mɛ̀ɛ nkpaakpaa ɓiɓan ɓi Seŋi wɛ̀m à rèsàkà mɛ̀. 29Roànɛ à romgày mɛ̀ à rì nɗaŋ ri mɛ̀, à càɗkà ɓi mɛ cɛ̀ncɛm ɓisuulɛ, ǹti ǹkìlàg ɓìɓan ɓi ɓyɛɛ̀ kɔ̀ngi nyi ɓyààmɛ̀n ɓìcèm.

30Yɛ̀ɛ à kpaakpààghà ɓìɓan ɓiǹ, ɓum lɛɛ̀gwey ɓɛ gherɛ̀ngà nyi.

31Nni Yeesus à kpaaghà Ɓɛ̀yudɛ̀n ɓɛ ɓɛ gherɛ̀ngà nyi lɛ: I ɓì nɔ̀ɔ̀tii ɓìɓan ɓyɛm̀ kɛ̀ ɓi pas, ɓì rì ɓiì ɓaà ɓɛ̀kɔɔ̀kɔɔ̀ ɓɛ ɓɛyilàg ɓɛm. 32Ɓì rì ɓiì yiì saaɗ, saaɗ ànɛ̀n à ghaasì mìni ɓɛ̀kan. 33Nni ɓɛ tɔkà nyi lɛ: Tì rì boo ì mum yì Abiraham, tì ka ɓaghà ɓi ɓɛkpàn ɓɛ mum. Nni lannɛ ù kpaa lɛ ɓì rì ɓiì ɓaà ɓɛ̀kan? 34Yeesus à ɓàg ɓɔ lɛ: Mɛ̀ ǹkpaa mìni kɔɔ̀kɔɔ̀ à rìkpaa lɛ, mum ǹcèm ànɛ a kìki kiɓe, à rì ǹkpàn a kìɓe. 35Ǹkpàn a maà ɓa ɓi lɔŋ ŋwaànɛ ɓi naa ì ɓum ɓyààmɛ̀n ɓìcèm, kìɓan kifog man ànɛ ɓi naa ì ɓum ìnɛ̀n, nnyɛɛ ri ŋwaànɛ ɓi naa ìnɛ̀n ɓyààmɛ̀n ɓìcèm. 36Fɔɔnnɛ i Man yɛɛ ghaasii mìni ɓɛ̀kan, ɓì ɓa ɓɛ̀kɔɔ̀kɔɔ̀ ɓɛ ɓɛ̀kan. 37Ǹ-yii lɛ, ɓì rì boo ì mum yì Abiraham, kìɓan kifog, ɓi kaakaa lɛ ɓi wey mɛ̀ lɛ, ɓìɓan ɓyɛm̀ ɓi ghɛɛ ɓi ikɔ̀ɔ̀ ɓi mɛ̀rem min. 38Mɛ̀ɛ ǹkpaakpaa ɓiɓan ɓi ǹghɛngà yɛ̀ɛ Seŋi wɛ̀m; mìniì yɛɛ̀ kìki lɔŋ ɓiɓan ɓi seŋi wìn à kpaaghà mìni. 39Nni ɓɛ ɓakà nyi lɛ: Abiraham yɛɛ ri seŋi wìs. Yeesus à kpaa ɓɔ lɛ: I ki ri saaɗ lɛ ɓì rì ɓɔn ɓɛ Abiraham, kìina min ɓiɓan ɓi nyii kighà. 40Wɔ̀lɛ ɓi cààmɛ̀n ki, ɓi kaakaa lɛ ɓi wey mɛ̀. M̀òànɛ ǹkpaaghà mìni ɓìɓan ɓi ǹwokày rì Bɛ̀ll, com ki Abiraham à kìghà ɓi. 41Ɓi kìki ɓiɓan ɓi seŋi wìn a kìlàg? Nni ɓɛ ɓakà nyi lɛ: Tì yin ɓɔn ɓɛ tìsɔ̀mɔ̀g, tì rì lɔŋ Seŋi bog lɛ Bɛ̀ll. 42Yeesus à kpaa lɛ: I kaa rì saaɗ lɛ Bɛ̀ll yɛɛ ri Seŋi wìn, di ɓì keesii mɛ̀; lɛ ɓi Bɛ̀ll nnɛ ǹfuu yì, wɔɔ nnɛ ǹki ɓaghày; ǹ-yùghày ɓi ri nto wɛ̀m, lɔŋ nyi yɛɛ romgày mɛ̀. 43Ɓisuucɛ nnɛ ɓì woogh ɓi kitòkì kɛm̀? Lɛ ɓì yin lɛ ɓì wog jɛ̀ɛ̀ yɛ̀m. 44Satàn yɛɛ ri seŋi wìn fɔɔnnɛ ɓi kɔ̀nkɔn lɛ di ɓyàa kìi rìkɔ̀n ɗi seŋi wìn. A ɓalag ǹwolì-ɓum à tumɛ̀n a rìtumɛ̀n, à ki ka rɛlìghà ɓi ɓi saaɗ nsoò ŋwos bog, ɓisuulɛ, saaɗ a maà ɓa ɓi a lɔ̀ŋkii; cààmɛ̀n ki a pwààpwaa ɓum, lɔŋ com ki ki riì nyi ɓi nɗem kɛɛ̀ki a kpaakpaa ɓɔ, lɛ à rì pwààpwaà, à ki ɓa ti seŋi ɓɛ̀pwàà. 45Ɓì gherɛɛ ɓi mɛ lɛ yɛ̀ɛ mɛ̀ nkpaakpaa saaɗ. 46Ghɛn anɛ ɓi mìni yɛɛ ri lɛ à rèsì nsoò maa rìnàn ɓi cɛɓ kɛ̀m lɛ tɛntɛ̀ɛ̀n? I mɛ̀ ǹki kpaa saaɗ, ɓi cɛ nnɛ ɓì gherɛɛ ɓi mɛ? 47Ŋwaànɛ àrì mum à Bɛ̀ll, a woki jɛ̀ɛ̀ ì Bɛ̀ll; nni yɛ̀ɛ ɓì yin ɓum ɓɛ Bɛ̀ll, nnɛ ɓì woogh ɓi jɛ̀ɛ̀ yìì.

48Nni Ɓɛ̀yudɛ̀n ɓɛ ɓakà nyi lɛ: Ki ri lɔŋ saaɗ yɛ̀ɛ tìi nkpaa lɛ, ù rì ŋwaànɛ a Samari, ù ki ɓa ti ri kìɓeɓtàg ki nghay. 49Yeesus à pɛ̀ɛ̀zì lɛ: Ǹ-yin ɗi kìɓeɓtàg ki nghay, kìɓan kifog nkeekem̀zì Seŋi wɛ̀m, mìnii ki sòosoòtì mɛ̀. 50Mɛ̀ n-yin ɓiì kaakaa rikem ɗyɛ̀m, ŋwaàdɛŋ yɛɛ̀ kaakaa ɗyɔ, nnyɛɛ̀ ki yɔ̀myɔm ɓum. 51Ǹkalii mìni kɔɔ̀kɔɔ̀ à rìkalì lɛ: I ŋwaà ɓèŋi ɓìɓan ɓyɛm̀, ŋwaànɛ̀n à wii gɛ ɓi. 52Nni Ɓɛ̀yudɛ̀n ɓɛ kpaaghà nyi lɛ: Ɓigomìnɛ tì yii lɛ ù rì rì kìɓeɓtàg ki nghay. Abiraham à wughà, ɓɛ̀kpaŋzì-ɓìɓan ɓɛ cuu girig, wɔ̀ɔ̀ ki kpaa lɛ: Ŋwaànɛ à ɓèŋi ɓìɓan ɓyɛm̀ à wii gɛ ɓi. 53Wɔ̀ yɛɛ cee Abiraham à seŋi wìs anɛ à wughà? Rì ɓɛ̀kpaŋzì-ɓìɓan ɓɛ ɓɛ cuughà girig? Wɔ̀ɔ fèfeg lɛ ù rì cɛ? 54Nni Yeesus à ɓàkà lɛ: I màa ɓɔɔ̀ɓɔ̀gsɛ̀n di rìkem ɗyɛ̀m ɗi ri ɗi zɛy rì zɛy. Nni Seŋi wɛ̀m ànɛ ɓi kalag lɛ à rì Bɛ̀ll wìn yɛɛ̀ ɓɔɔɓɔgsì mɛ̀. 55Ɓì ki yii ɓi nyi; mɛ̀ ǹ-yii nyi. I ǹkpaa lɛ ǹ-yii ɓi nyi, di ǹɗì pwààpwaà yɛ̀ɛ mìni. Kiɓan kifog mɛ̀ ǹ-yii nyi, mɛ̀ɛ ǹki ɓèŋɓeŋ jɛ̀ɛ̀ yìì. 56Abiraham à seŋi wìn a nyààrɛ̀ngà rì fèg ànɛ lɛ, à ɓiì ghɛɛ ŋwos wɛm̀, à ki ghɛngà nyi à wog kìrɔɔ lɛɛ̀gwey. 57Nni Ɓɛ̀yudɛ̀n ɓɛ kpaaghà nyi lɛ: Wɔ̀ kɛ̀ɛ̀ kìkpaŋì bèg mɛ̀tin mɛɓɛɛ̀ rì ǹtɛ̀ɗ, ù ki kpaa lɛ ù ghɛngà Abiraham? 58Yeesus à kpaa ɓɔ lɛ: Mɛ̀ ǹkpaa mìni ɓi saaɗ lɛ, di Abiraham à ka yin, mɛ̀ m̀ɓaghà. 59Fɔɔnnɛ ɓɛ pɛsàkà gɔ̀g lɛ ɓɛɛ rogi nyi, wɔ̀lɛ Yeesus à nyamzɛ̀ngà à kpaŋ ɓi naà-Bɛ̀ll.

Currently Selected:

ZYAŊ 8: BAFNT

Highlight

Copy