ZYAŊ 9

Yeesus à wɔ̀ɔ̀zii ŋwaànɛ à yalɛ̀ngà rì tìɗyaŋ

1Yɛ̀ɛ Yeesus à ghaghàghìyà, nni à ghɛngà ŋwaàdɛŋ ànɛ à yalɛ̀ngà rì tìɗyaŋ. 2Ɓɛ̀yilàg ɓii ɓɛ tɔg nyi lɛ: Raɓì, ŋwaànɛ à yalɛ̀ngà fɛlɛ rì tìɗyaŋ lɛ nyimiɗ yɛɛ kighà kìɓe gìn ɓɛ̀yalì ɓii? 3Yeesus à ɓàg lɛ: Ki yin lɛ nyimiɗ, nsoò lɛ ɓɛ̀yalì ɓii ɓɛɛ kighà kìɓe, wɔ̀lɛ ki ri lɔŋ fɔlɔɔ lɛ, di mɛ̀kìkìì mɛ Bɛ̀ll mɛɛ ghɛnɛn a lɔ̀ŋkii. 4Ki ghɛɛ̀sɛɛ lɛ ti ki ɓìsay ɓi roànɛ à romgày mɛ̀, di ŋwos a kaka, lɛ ìru wɛɛ̀ yùyuiy, wɛɛ̀wu mum àa ɓa ti ɓi ri bee inɛ à kì kìsay miì. 5Cààmɛ̀n ki ǹkaka ɓi ziinɛ, ǹɗì kìtɛɛtɛn ki ɓi ziinɛ.

6Yɛ̀ɛ à kpaaghà fɔlɔɔ, nni à tuughà tìtyɛɛ̀ ɓi zi, à kì kìtɔ̀tɔ̀ɓ rì tìtyɛɛ̀ tii, à siŋì ŋwaànɛ̀n ɓi mis, 7à kpaa nyi lɛ: Kɛ̀na kìsòo ìsu ɓi kìɗig ki a Silowe; ɗii ɗìn ɗi ri azi lɛ: Ǹɗomɛn. Nni ɗyaŋɗyàŋ à kɛ̀ngà, à sòò ìsu, à sugtìì di à mɛ ghɛnɛ̀n. 8Ɓumɓɛ ɓɛ woŋzɛ̀ngà mɛɛ ri ɓɔ, rì ɓɛ̀roɓɛ ɓɛ nghɛngì nyi abɛ̀y di a lɔnlɔn ɓyom ɓi bee, ɓɛ kpaakpàà lɛ: Àa ŋwaànɛ yɛɛ nti à kɔ̀ràg fɛ à lɔnlɔ̀n ɓum ɓyom? 9Ɓɛ̀ro ɓɛdɛŋ ɓɛ kpaaghà lɛ nnyɛɛ ri, ɓɛ̀ro ɓɛmbog lɛ àg! Àa nyi yɛɛ ri, lɔŋ kìpisɛn kii kɛɛ ri. Wɔ̀lɛ nyimiɗ a ki kpaakpaa lɛ: Lɔŋ mɛ̀ yɛɛ ri. 10Nni ɓɛ tɔkà min nyi lɛ: Mis mɔɔ maa ghɛnɛɛ di ki ɓaa là? 11Nni à ɓakà ɓɔ lɛ: Ŋwaànɛ ɓɛɛ̀ regi lɛ Yeesus yaa tɔɓi zi, à siŋì mɛ̀ ɓi mis, à kpaa mɛ̀ lɛ: Kɛ̀na kì sòo ìsu ɓi Silowe. Fɔɔnnɛ màa kɛ̀ɛ, ǹsòò ìsu, ǹghɛnɛ̀n. 12Nni ɓɛ tɔkà nyi lɛ: Ŋwaà ǹcèm à rì fe? Nyii pɛɛ̀zì lɛ: Mɛ̀ ǹ-yii ɓi.

13Fɔɔnnɛ ɓɛ kɛǹgà rì ŋwaànɛ à ka ɓaghà rì tìɗyaŋ ànɛ̀n a Ɓɛ̀fàrìzyɛŋ. 14Kɔɔ ki ɓaghà foo lɛ, ŋwosi Saɓàt nnɛ Yeesus à tɔɓkà zi, à kì lɛ, mis mɛ ŋwaànɛ̀n mɛɛ ghɛnɛn. 15Fɔlɔɔ nnɛ Ɓɛ̀fàrìzyɛŋ ɓɛ tɔkà girig ŋwaànɛ̀n lɛ, a kali ɓɔ lannɛ kaa kìlɛɛ lɛ a ghɛnɛn. Nni à kpaaghà ɓɔ lɛ: Àa siŋii mɛ̀ kìtɔ̀tɔ̀ɓ ɓi mis, ǹsòò ìsu, nnɛ nghɛɛghɛnɛ̀n lɛ. 16Fɔɔnnɛ Ɓɛ̀fàrìzyɛŋ ɓɛdɛŋ ɓɛ kpaaghà lɛ: Ŋwaànɛ à pɛ̀sɛɛ yì ɓi yɛ̀ɛ Bɛ̀ll ɓisuulɛ à cèlii ɓi Saɓàt. Ɓɛ̀ro ɓɛmbog ɓɛ tɔg lɛ: Lannɛ ǹkìì-kìɓe a rì lɛ à kì mɛ̀kuu mɛ dàm yɛ̀ɛ mɛ? 17Fɔɔnnɛ ɓɛ ghasɛ̀ngà gàɓ yiɓɛɛ̀; ɓɛ tɔgtì ɗyaŋɗyàŋ ànɛ̀n lɛ: Ɓi ɓɛg wɔ̀ɔ̀, wɔ̀ɔ̀ kpaa la ɓi kìɓan ki ŋwaànɛ àa kìi lɛ mis mɔɔ mɛɛ ghɛnɛn? Nni ŋwaànɛ̀n à pɛ̀ɛ̀zìghà ɓɔ lɛ: Mɛ̀ ǹghɛɛ lɛ à rì ǹkpaŋzì-ɓìɓan.

18Ɓɛ̀yudɛ̀n ɓɛ gherɛ̀ngà ɓi lɛ ŋwaànɛ̀n à ka ɓaghà rì tìɗyaŋ nni à mɛ ghɛnɛ̀n, cààmɛ̀n ki ɓɛ ɓaghà di ɓɛ ka reŋii ɓi ɓɛyalì ɓii. 19Fɔɔnnɛ ɓɛ tɔkà ɓɛ̀yalì ɓii lɛ: Man wiǹ ànɛ ɓi kpaaghi lɛ à yalɛ̀ngà rì tìɗyaŋ yɛɛ ri lɛ? Nni lannɛ à ti ɓiì ghɛnɛɛghɛnɛ̀n ɓigomìnɛ? 20Ɓɛ̀yalì ɓii ɓɛ ɓaàg lɛ: Ɓìsii yii lɛ man wìs yɛɛ ri lɛ, à ki yalɛ̀ngà rì tìɗyaŋ. 21Kìɓan kifog, tì yii ɓi com ki ki kiì lɛ a ghɛnɛn, tyɛ̀ ki ki yi nsoò ŋwaànɛ àa ŋwàri nyi mis. Tɔɔghna nyi, à ti ǹsɛ̀ɛ̀mɛn ɓi lèg ànɛ lɛ à ɓàg kìɓan ki ki seesee nyi. 22Ɓɛ̀yalì ɓii ɓɛ kpaaghà fɔlɔɔ ɓisuulɛ, ɓɛ rirìsìghà Ɓɛ̀yudɛ̀n; rì tì lɛ Ɓɛ̀yudɛ̀n ɓɛ ɓaghà di ɓɛ mɛ wooghrɛn jɛ̀ɛ̀ lɛ, ŋwaànɛ à gherɛɛ lɛ Yeesus à rì Kiris, ɓɛ ren nyi ɗii ɓi naà-bɔ̀ŋzɛ̀n. 23Kìɓan kiǹ kɛɛ kighà lɛ ɓɛ̀yalì ɓii ɓɛɛ kpaa lɛ: À ti ǹsɛ̀ɛ̀mɛn, tɔɔghna nyi.

24Fɔɔnnɛ Ɓɛ̀fàrìzyɛŋ ɓɛ reŋìghày tì ŋwaànɛ à ka ɓaghà ànɛ̀n rì tìɗyaŋ, ɓɛ kpaa nyi lɛ: Kali saaɗ ɓi mis mɛ Bɛ̀ll ɓìsii yii lɛ ŋwaànɛ̀n à rì ǹkìì-kìɓe. 25Nni ŋwaànɛ̀n à ɓàkà lɛ: Mɛ̀ ǹ-yii ɓi nkòo à rì ǹkìì-kìɓe; com ki mɛ̀ ǹ-yii ki ri lɛ, m̀ɓalag ri tìɗyaŋ, nni m̀mɛ ghɛnɛn ɓigomìnɛ. 26Ɓɛ tɔkà nyi lɛ: Cɛ kɛɛ̀ ki àa kìi wɔ̀? Lannɛ àa kìi lɛ mis mɔɔ mɛɛ ghɛnɛ̀n? 27À ɓàg ɓɔ lɛ: Màa kpaa mìni kìɓan ki, kɛ̀ ɓi kɔ̀n lɛ ɓi wog. Ɓisuucɛ nnɛ ɓi kɔ̀nkɔn lɛ ɓi wogti kɔ? Ɓi kɔ̀nkɔn girig lɛ ɓi ɓa ɓɛ̀yilàg ɓii? 28Fɔɔnnɛ ɓɛ sɛmgàkà ŋwaànɛ̀n, ɓɛ kpaa nyi lɛ: Wɔ̀ yɛɛ ri ǹ-yilàg wìì, ɓìsii ri ɓɛ̀yilàg ɓɛ Moyis. 29Tì yii lɛ, Bɛ̀ll à tòòghrɛ̀ngà rì Moyis; wɔ̀lɛ roànɛ, tì yii ɓi fennɛ à pɛ̀sɛɛ yì. 30Ŋwaànɛ̀n à ɓàg ɓɔ lɛ: Kìɓan ki ki yeesɛɛ rìwog ki ri lɛ, mìnii yii ɓi fennɛ à pɛ̀sɛɛ yì, wɔ̀lɛ nyaa ki ŋwàri mɛ̀ mis! 31Tì yii lɛ Bɛ̀ll à ti kɛ̀ɛ wog bɔ̀ŋzɛ̀n yi ɓɛ̀kìì-kìɓe, kìɓan kifog, à ti à wokì bɔ̀ŋzɛ̀n yi ŋwaànɛ à kuuraagh nyi, à ki kìlag rikɔ̀n ɗii. 32Tì ka wokà ɓi di ɓɛɛ̀ kpaakpaa lɛ, ŋwaàdɛŋ à mɛ kìghà lɛ mis mɛ ŋwaànɛ à yalɛɛ rì tìɗyaŋ mɛɛ ghɛnɛ̀n. 33I ŋwaànɛ kɛ̀ɛ ɓay yɛ̀ɛ Bɛ̀ll, di à yin lɛ à kì com. 34Nni ɓɛ ɓakà nyi lɛ: Wàànɛ ù yalɛ̀ngà ɓi kìɓe wɛ̀ɛmiɗ bimiɗ, wɔ̀ yɛɛ̀ kɔ̀nkɔn lɛ u resag ɓìsi? Fɔɔnnɛ ɓɛ naɓkà nyi. 35Yɛ̀ɛ Yeesus à wokà lɛ, ɓɛ nnàɓi ŋwaànɛ̀n, nni à tuusɛ̀ngà rì nyi, à kpaa nyi lɛ: Ù gherɛɛ nya Man à mum? 36Ŋwaànɛ̀n à pɛ̀ɛ̀zì nyi lɛ: Nnyɛɛ ri ghɛn Kan, yɛ̀ɛ ǹɗì lɛ ǹgherɛ̀n nyi? 37Yeesus à kpaa nyi lɛ: Ù mɛ ghɛn ancèm, nyimiɗ yɛɛ̀ ki tòtog lɛ rì wɔ̀. 38Fɔɔnnɛ ŋwaànɛ̀n à kpaaghà lɛ: Kan ǹgherɛɛ; à ɓag mɛ̀ɗu ɓi zi, à ɓɔgsì nyi.

39Yeesus à kalì min nyi lɛ: Ǹ-yùghà ɓi ziinɛ lɛ rìren ɗi ɓìɓan ɗyɛɛ ghɛnɛn lèg ànɛ lɛ, ɓumɓɛ ɓɛ ri rì tìɗyaŋ ɓɛɛ ghɛnɛn, ɓɛ̀roɓɛ ɓɛɛ̀ ghɛɛghɛnɛ̀n ɓɛ ɗiŋì tìɗyaŋ. 40Yɛ̀ɛ Ɓɛ̀fàrìzyɛŋ ɓɛdɛŋ ɓɛ Yeesus à ɓaghà rì ɓɔ ɓɛ wokà ɓìtòkì ɓiǹ, ɓɛ tɔg nyi lɛ: Ɓìsii ri nya girig rì tìɗyaŋ? 41Yeesus à ɓàg ɓɔ lɛ: I ɓyàa rì rì tìɗyaŋ, di ɓì yiǹ lɛ ɓì ɓa rì kìɓe; nni yɛ̀ɛ ɓi kpaakpaa lɛ ɓi ghɛɛghɛnɛ̀n, fɔlɔɔ nnɛ kìɓe kin ki kaka.

Currently Selected:

ZYAŊ 9: BAFNT

Highlight

Copy