ZYAŊ 7

Ɓɛ̀geni ɓɛ Yeesus ɓɛ gherɛɛ ɓi nyi

1Ajɛ̀m ìnɛn, Yeesus à rerènìghà ziì Galile lɛ à kɔ̀ngà ɓi lɛ a kɛǹ kì kɛ̀ɛ̀kɛɛ a Zyude, lɛ Ɓɛ̀yudɛ̀n ɓɛ kaakààghà lɛ ɓɛɛ wey nyi. 2Tìcàɓ ti Ɓɛ̀yudɛ̀n ti lɛ tìcàɓ ti ɓilaa#7:2 tìcàɓ ti ɓilaa Tìcàɓ ti ɓilaa ti ɓaghà tìcàɓ ti Ɓɛ̀yudɛ̀n ɓɛ n-yitàg cɛɓ ki ɓɛ̀seŋi ɓaa ɓɛ ghɛɓ kà ɓi-reɓ bèg mɛ̀tin mɛɓɛɛ̀. Ɓɛ nkìlàg tyɔ bimiɗ à sɔnɗì, ɓum ɓɛ lalày ɓi ɓɔɔ ɓilaa di ɓɛ pɛsaaghiì ɓi ɓɛ̀tum ɓɛ kilɔ̀ŋ ɓɛ̀cèm ɓɛ taŋzɛ̀n a Yorisalɛm. ti ɓaghà di ti ti jàŋbog. 3Nni ɓɛ̀geni ɓɛ Yeesus ɓɛ kpaaghà nyi lɛ: Pɛ̀sɛn fɛ, u kɛǹ a Zyude, di Ɓɛ̀yilàg ɓɔɔ ɓɛɛ ghɛǹ girig ɓìɓan ɓi u kìki fɛ. 4Mum à yin lɛ à kìkì ɓìɓan a rìnyam di a kɔ̀nkɔn lɛ ɓɛɛ yi nyi. Nni yɛ̀ɛ u kìki ɓiɓan yɛ̀ɛ ɓi, kpaŋzi ɓyɔ mum bimiɗ a yi wɔ̀. 5Lɛ nsoò ɓɛ̀geni ɓii ɓɛ gherɛ̀ngà ɓi nyi. 6Yeesus à kalì ɓɔ lɛ: Cààmɛ̀n kɛm̀ ki ka kpaŋ ɓi, mìni yɛɛ ri rì syeesyee à cààmɛ̀n ɓyààmɛ̀n ɓìcèm. 7Ziinɛ ì yin lɛ ì ɓèèzɛ̀n mìni wɔ̀lɛ mɛ̀ɛnɛ yɛɛ̀ ɓèeɓeèzɛ̀n, lɛ ǹti ǹkalàg lɛ, mɛ̀kìkii mɛ yɔ̀ mɛ rɔɔtɛɛ ɓì. 8Mìnii ɓɔɔghna ɓi kɛǹ tìcàɓ, ɓi san wɛ̀m, mɛ̀ ǹka yin ɓiì ɓɔɓɔɔgh wɔɔ lɛ, cààmɛ̀n kɛm̀ ki ka ghɛɛ̀sɛn ɓi. 9Yɛ̀ɛ à kpaaghà ɓɔ fɔlɔɔ, nni à rɔ̀ɓkà a Galile.

Yeesus a Tìcàɓ ti ɓilaa ti a Yorisalɛm

10Yɛ̀ɛ ɓɛ̀geni ɓɛ ɓaghà di ɓɛ mɛ ɓɔg a tìcàɓ, nni nyimiɗ a ɓɔkà girig wɔɔ, wɔ̀lɛ à ɓɔkà ɓi ɓi mɛ̀tàna, lɔŋ a rìnyam nnɛ à ɓɔkà.

11Nni Ɓɛ̀yudɛ̀n ɓɛ kaakààghà nyi ɓi cààmɛ̀n à tìcàɓ di ɓɛɛ̀ kpaakpaa lɛ: À rì fe? 12Fɔɔnnɛ ɓumɓɛ ɓi gwìy ìnɛn ɓɛ rurùmìghà lɛɛ̀gwey ɓi kìɓan kii. Ɓɛ̀ro ɓɛdɛŋ lɛ: À rì syeesyee à mum; ɓɛ̀ro ɓɛmbog lɛ: Àg! A nàanaàzì gì kɔm̀ ɓum bee. 13Nsoò fɔlɔɔ, mum à ghɛɛsìghà ɓi lɛ a ɓuŋ nyi fɛlɛ lɛ tɛntɛ̀ɛ̀n ɓi mɛ̀reè mɛ ɓum lɛ ɓɛ rirìsìghà Ɓɛ̀yudɛ̀n.

14Yɛ̀ɛ tìcàɓ ti ɓaghà di ti ti ɓi nyìinyìm, Yeesus à ɗiŋìghà ɓi naà-Bɛ̀ll, à tum rìrèsàg ɗi ɓum. 15Nni Ɓɛ̀yudɛ̀n ɓɛ kuùkùùghràkà ɓɛ kpaakpàà lɛ: Ki ɓaa la lɛ, a yi ɓìɓan ɓi ɓi ri ɓìkànɛ̀n, kɛ̀ɛ̀fɛ à yilaagh ɓyɔ? 16Fɔɔnnɛ Yeesus à ɓàkà ɓɔ lɛ: Ɓìɓan ɓi nɗèeresàg ɓi, ɓi yin ɓiɓan ɓyɛm̀ ɓi mɛ̀ɛmiɗ, ɓi ri lɔŋ ɓiɓan ɓi roànɛ à romgày mɛ̀. 17Ŋwaànɛ à kɔ̀ni lɛ a ki rìkɔ̀n ɗi Bɛ̀ll yɛɛ ri ɓiì yiì ǹkòo ɓìɓan ɓi Bɛ̀ll ɓyɛɛ̀ɓi nɗèrèsì, nkòo ɓiŋkɛ̀m ɓi mɛ̀ɛmiɗ. 18Ŋwaànɛ a kpaakpaa ɓiɓan ɓii ɓi nyimiɗ yɛɛ̀ kaakaa rikem ɗii, wɔ̀lɛ roànɛ a kaakaa rikem ɗi roànɛ à romgày nyi, nnyɛɛ̀ kpaakpaa saaɗ, kɛ̀ɛ ki ɓa ri kìɓan kidɛŋ ki ki ri kìtɛ̀ŋtɛ̀ŋ. 19Mɛ̀ɛ nti Moyis à faghà mìni ɓìdɔ̀gsɛna kìɓan kifog, nsoò wààdɛŋ ù ɓèŋi ɓi ɓidɔ̀gsɛna ɓiǹ; nni ɓi kaakaa lɛ ɓi wey mɛ̀ lɛ cɛ? 20Nni gwìy ì ɓum ì ɓàkà nyi lɛ: Ù rì rì kìɓeɓtàg ki nghay; ghɛn yɛɛ̀ kɔ̀nkɔn lɛ a wey wɔ̀? 21Yeesus à pɛ̀ɛ̀zì ɓɔ lɛ: Mɛ̀ɛ ǹkìi lɔŋ kiɓan kifog, kɛɛ ǹkegsii mìni lɛ ɓɛ̀sɛ̀ɛ̀ ɓɛ̀cèm. 22Ɓì ti ɓì kɛ̀ɗkì mum ŋwosi Saɓàt lɛ yɛ̀ɛ Moyis yɛɛ faghà mìni ìtèɗ ɓisuu kɛ̀rɛ̀n; nsoò yɛ̀ɛ ki yin lɛ Moyis yɛɛ kpagày rì nyi, lɔŋ ɓɛ̀seŋi ɓin ɓɛ ɓɛsɛ̀ɛ̀mɛn ɓɛɛ lokà kì kpaŋìì rì nyi. 23I ɓì rì lɛ ɓì kɛ̀ɗ ŋwɔɓti ŋwosi Saɓàt, fɔlɔɔ kɛ̀ɛ ki yogsi ɓidɔ̀gsɛna ɓi Moyis, nni lannɛ ɓi woki bim ri mɛ̀ lɛ mɛ̀ɛ ǹwɔ̀ɔ̀zii mum lɛ kɔɔ̀kɔɔ̀ ŋwosi Saɓàt? 24Kɛ̀ ɓi teki ɓiɓan ɗyoo rì ɗyoo, ɓàkiina kìɓan yɛ̀ɛ saaɗ a kɔ̀nkɔ̀n.

25Ɓum ɓɛdɛŋ ɓɛ a Yorisalɛm ɓɛ kpaakpààghà lɛ àa ŋwaànɛ ɓɛɛ̀ kaakaa lɛ ɓɛɛ wey yɛɛ ri lɛ? 26Nni ghɛɛna min yɛ̀ɛ a tòtog lɛ fwàafwàày ɓi nyìinyìm à ɓum, ɓɛ̀ kɛɛ̀ ki kpaa nyi com. Ɓɛ̀làmì ɓis ɓɛ mɛ konag nya kì yiì lɛ nnyɛɛ ri Kiris gìn? 27Ɓìsii yii jàŋ inɛ ŋwaànɛ à pɛ̀sɛɛ yì, wɔ̀lɛ yɛ̀ɛ Kiris à ri yù mum àa yi ɓi fennɛ à pɛ̀sɛɛ yì. 28Yɛ̀ɛ Yeesus à rèrèsàkà ɓum fɔlɔɔ ɓi naà-Bɛ̀ll, nni à kpaaghà jɛ̀ɛ̀ aɗyoo lɛ: Ɓì yii mɛ̀, ɓì ki yi fennɛ m̀pɛ̀sɛɛ yì; kɔm̀ lɛ m̀pɛ̀sɛ̀ngày ɓi ri nto wɛ̀m, kìɓan kifog roànɛ à romgày mɛ̀ yɛɛ̀ kpaakpaa saaɗ, nyi nnɛ ɓì yii ɓi. 29Mɛ̀ ǹ-yii nyi lɛ ǹɗì fɛ ɓisu wii, rì tì lɛ, nnyɛɛ romgày mɛ̀. 30Fɔɔnnɛ ɓɛ kaakààghà bee inɛ ɓɛɛ ɓaǹ nyi, kìɓan kifog mum à ki saghìghà ɓi nyi càg ɓi nyoo, ɓisuulɛ, cààmɛ̀n kii ki ɓaghà di ki ka kpaŋ ɓi.

31Ɓi gwìy ìnɛn, ɓum lɛɛ̀gwey ɓɛ gherɛ̀ngà nyi, ɓɛ kpaakpàà lɛ: Yɛ̀ɛ Kiris à ri yù, à ri kì nya dàm yi yi cee yi ŋwaànɛ a kìkì? 32Ɓɛ̀fàrìzyɛŋ ɓɛ wokà yɛ̀ɛ ɓum ɓɛ ŋwɔŋwɔ̀ŋìghà fɔlɔɔ ɓi kìɓan kii; nni ɓɛ̀pìrɛɛtìrɛ̀ ɓɛgwey rì Ɓɛ̀fàrìzyɛŋ ɓɛ romgà ɓɛ̀sujàà lɛ ɓɛɛ ɓaǹ nyi.

33Yeesus à kpaa lɛ: Mɛ̀ ǹkaka tì rì mìni ɓi maa cààmɛ̀n, fɔɔnnɛ ǹɗì ɓiì kɛ̀ɛ min yɛ̀ɛ roànɛ à romgày mɛ̀. 34Ɓì rì mɛ̀ ɓiì kaà, kɛ̀ ɓi ghɛn mɛ, lɛ ɓì yin lɛ ɓì kpaŋ jàŋ inɛ m̀ɓiì ɓaà. 35Nni Ɓɛ̀yudɛ̀n ɓɛ tɔɔghrɛ̀ngà ɓɔmiɗ lɛ: Fennɛ àrì ɓiì kɛ̀ɛ ɓi ɗi lɛ tyɛ̀ ki ghɛn nyi? A kɛ̀n nya a Ɓɛ̀yudɛ̀n ɓɛ ɓɛ ri ɓɛ̀sààtɛn ɓi bàn yi Gìrɛg, à rèèrèsàg ɓumɓɛ ɓɛ ri Gìrɛg wɔɔ giǹ? 36Jɛ̀ɛ̀ ìnɛ à kpaa lɛ: Ɓì rì mɛ̀ ɓiì kaà, ɓyɛ̀ ki ghɛn mɛ; rì ìnɛ lɛ: Jàŋ inɛ ǹɗì ɓiì ɓaà, ɓì yin lɛ ɓì kpaŋ wɔɔ, yi ri azi lɛ cɛ?

37Ɓi ŋwos a siitòn, ànɛ à ɓaghà gɛn à ŋwos a tìcàɓ tiǹ, Yeesus à pɛ̀sɛ̀ngà aɗyoo, à làmɓɛ̀n lɛ: I mum a wowog kinɔli, a yu a lɔ̀ŋkɛm̀, a nɔ. 38Ŋwaànɛ à gherɛɛ mɛ̀, mɛ̀syòm mɛ mɛnig mɛ cɛɓ mɛ ri nyi ɓiì ɓɛ̀nɓɛniì ɓi nɗem fɛlɛ yɛ̀ɛ ki ri kìkànɛn. 39Kìɓan ki Nghay ànɛ ɓumɓɛ ɓɛ gherɛɛ nyi ɓɛ ghɛɛ̀sɛ̀ngà kìterì kɛɛ̀ki à kpaakpààghà lɔɔ. Ɓisuulɛ cààmɛ̀n kiǹ ki ɓaghà di ɓɛ ka rom yi ɓi Nghay, rì tì lɛ Yeesus à ɓaghà di à ka teɗ ɓi rìkem ɗìì.

40Ɓum lɛɛ̀gwey ɓɛ ɓaghà lɛ, ɓɛ mɛ wog ɓitòkì ɓiǹ, nni ɓɛ kpaaghà lɛ: Ki ri lɔŋ kɔɔ̀kɔɔ̀ lɛ ŋwaànɛ yɛɛ ri ǹkpaŋzì-ɓìɓan. 41Ɓɛ̀ro ɓɛdɛŋ ɓɛ kpaa lɛ: À rì Kiris, ɓɛ̀ro ɓɛmbog ɓɛ kpaa lɛ: Kiris à rì lɛ à ɓay a Galile? 42Mɛ̀kànì mɛɛ̀ kpaaghi lɛ Kiris à rì ɓiì ɓaà yì ɓi boo ì mum ì Davit, ɓi bàn ì Bɛtilɛhɛm, jàŋ inɛ Davit à yalɛ̀ngà. 43Nni ɓum ɓɛ rɔɓkà fɔlɔɔ, mɛ̀rɛli dɛŋ dɛ̀ŋ dɛŋ ɓi kìɓan kii. 44Fɔɔnnɛ ɓum ɓɛdɛŋ ɓɛ ɓi nɗaŋ wu ɓumɓɛ̀n, ɓɛ mɛɛ̀ fèkà lɛ ɓɛɛ ɓaǹ nyi, kìɓan kifog mum à saghìghà ɓi nyi càg ɓi nyòò.

45Ɓɛ̀sujàà ɓɛ sugtìghà a Ɓɛ̀pìrɛɛtìrɛ̀ ɓɛgwey rì a Ɓɛ̀fàrìzyɛŋ, ɓɛ̀roɓɛ̀n ɓɛ tɔg ɓɔ lɛ: Ɓì yùu yì ɓi ri nyi lɛ cɛ? 46Ɓɛ̀sujàà ɓɛ ɓaàg lɛ: Mum à ka tokàkà ɓi yɛ̀ɛ ŋwaànɛ̀n. 47Nni Ɓɛ̀fàrìzyɛŋ ɓɛ pɛɛ̀zìghà ɓɛ̀sujàà ɓɛǹ lɛ: Mìni girig ɓyàa càrɛɛ lɛ a yegsi mìni wa? 48Mìnii mɛ ghɛn nya di ǹlàmì àdɛŋ, nsoò lɛ Fàrìzyɛŋ àdɛŋ à gherɛɛ nyi? 49Mìni ɓumɓɛ ɓi gwìy ìnɛ ì yii ɓi ɓidɔ̀gsɛna ɓi Moyis, ɓì rì ɓumɓɛ ɓɛ ri ɓɛ̀cɛ̀mɛn. 50Nikodɛm ànɛ à kɛ̀ngà kì ghɛɛ̀ Yeesus à ɓaghà kìbog ki ɓi ɓumɓɛ̀n, nni à kpaaghà ɓɔ lɛ: 51Ɓi ɓìdɔ̀gsɛna ɓis, ɓɛ ri nya lɛ ɓɛ ren kìɓan ki mum di ɓɛ ka wog ɓi nkpaà wii, ɓɛ ki yi kiɓan ki à kìi? 52Nni ɓɛ ɓakà nyi lɛ: Wɔ̀ɔ̀ rì nya girig ŋwaànɛ a Galile? I ù konaagh kì kaà, ù ɓiì ghɛɛ̀ lɛ, Ǹkpaŋzì-ɓìɓan a ka ɓaghày ɓi a Galile. [53Nni ɓɛ sukàkà a ɓɛ̀mɛɛ ɓaa.

Currently Selected:

ZYAŊ 7: BAFNT

Highlight

Copy