ZYAŊ 6

Yeesus à faa ɓum ɓɛ̀tɔɔsìm ɓɛtaǹ ɓìɗilàg

(Mt. 14:13-21; Mk. 6:30-44; Lk. 9:10-17)

1Ajɛ̀m ìnɛn, Yeesus à syààghà cɛcɛɗ ki riɓày ànɛ a Galile, ànɛ ɓɛ nɗegì tì lɛ rìɓày ànɛ a Tiɓeriyaadɛ. 2Fɔɔnnɛ coo kituu ki ɓum ki nɔɔ̀tìghà nyi, lɛ ɓɛ ghɛngà dàm yi à kìkìghà ɓi ɓɛ̀roroɓ ɓɛ à wɔ̀ɔ̀wɔ̀ɔ̀zìghà. 3Nni Yeesus à ɓɔkà ɓi dòn aɗyòò, à kɔ̀rì wɔɔ ɓi zi, ri ɓɛ̀yilàg ɓii.

4Fɔlɔɔ a ɓaghà di tìcàɓ ti Ɓɛ̀yudɛ̀n ti lɛ Paskà ti ti jàŋbog.

5Yeesus à pìkà mis, à ghɛn coo kituu ki ɓum, di kɛɛ̀ yùyuiy nyi a nyoo, fɔɔnnɛ à tɔkà Filiɓ lɛ: Fennɛ tì rì lɛ tì làg bìrɛs ìnɛ lɛ ɓumɓɛ ɓɛ̀cèm ɓɛɛ ɗi? 6Yeesus à kpaaghà fɔlɔɔ lɛ, a feèghrɛn Filiɓ lɛ, nyimiɗ a yighà com ki à rì ɓiì kìi. 7Nni Filiɓ à ɓàkà nyi lɛ: Nsoò bìrɛs ì ɓɛ̀hɔnɗɛ̀ɗ ɓɛ ɓɛtɔɔsìm ɓɛɓɛɛ̀, ì yin lɛ ì ghɛ̀ɛ̀sɛ̀n lɛ mum ǹcèm à ɗi maa kìɓɛghà.#6:7 Bàlì ì mɔ̀ɔ̀ni ìnɛ ɓɛ faa ìnɛ ì rì lɛ ɓɛ feègh yɛɛ ri; ɓi kìsyɔ̀ɔ̀ ki lɛ fìraŋ̀ fìfog fi ɓaghà mɛ̀lèɓ mɛ kisay mɛ bimiɗ à ŋwos ɓi ŋwaànɛ a sasay ri ɓyàg ɓi dɛm. Fɔɔnɛ ɓɛ feègh lɛ fìraŋ̀ fìfog fiɓaghà nunug tɔɔsìm. 8Fɔɔnnɛ ǹ-yilàg wìì adɛŋ ànɛ lɛ Andire, geni Simɔn Pyɛɛri à kpaaghà nyi lɛ: 9Maa ŋwɔɓti à baŋì àdɛŋ à rì fɛ lɛ, rì bìrɛs yitaǹ yi ɓɛ kii rì rìkuu ɗi gèŋ ɗilɛ ɔrìzɛ̀, rì ɓìzɛn ɓiɓɛɛ̀, nni ɓi ri lɛ ɓi ki cɛ ri gɛ mum ànɛ? 10Fɔɔnnɛ Yeesus à kpaaghà ɓɔ lɛ: Kɔ̀ɔ̀siina ɓumɓɛ̀n ɓi zi. Ɓyaaɓi ɓi ɓaghà ɓi jàŋ inɛ̀n lɛɛ̀gwey, nni ɓumɓɛ̀n ɓɛ kɔrìghà min ɓi zi, ɓɛ ɓaghà nunùg ɓum ɓɛ̀tɔɔsìm ɓɛtaǹ. 11Fɔɔnnɛ Yeesus à tekà bìrɛs, à fa Bɛ̀ll ɓìtògsɛ̀n, à kàɓsì yɔ̀ ri ɓumɓɛ ɓɛ ɓaghà wɔɔ ɓɛǹ; fɔɔnnɛ à fatìghà girig ɓɔ ɓìzɛn gàɓ ìnɛ ɓɛ kɔnkɔ̀ngà lɛ ɓɛɛ ɗi. 12Yɛ̀ɛ ɓumɓɛ̀n ɓɛ wuràkà, nni Yeesus à kpaaghà ɓɛ̀yilàg ɓii lɛ: Taŋ̀zɛɛna ɓìɓɛghà ɓi bìrɛs ɓi ɓi rɔɓtaagh lɛ com kɛ̀ kɛɛ̀ ɗyoŋ. 13Nni ɓɛ ɓadɛ̀ngà ɓìɓɛghà ɓi bìrɛs ɓi ɓumɓɛ ɓɛ ɗìghà ɓɛ caɗkà, ɓɛ roòzì ɓìkàɗ ntɛ̀ɗ rì ɓiɓɛɛ̀; ɓi bìrɛs yi kitaǹ yi yi ɓaghà yiǹ yi kìyɛn ɗi ɔrìzɛ̀.

14Yɛ̀ɛ ɓumɓɛ̀n ɓɛ ghɛngà dàm ì kìɓan inɛ̀n, nni ɓɛ kpaaghà lɛ: Roànɛ à rì lɔŋ ǹkpaŋzì-ɓìɓan anɛ ɓɛ kpaaghà lɛ, à ɓiì yùu ɓi ziinɛ. 15Yɛ̀ɛ Yeesus à yighà lɛ ɓɛ ti ɓiì kìi lɛ, ɓɛɛ ɓan nyi, ɓɛɛ ɓɔgsi nyi rìfòm ɓi-tèɗ, nni à ghàghìghà à ɓɔgtì ɓi dòn cɛ̀ncii.

Yeesus a kɛ̀ɛ̀kɛɛ ɓi mɛ̀nig aɗyòò

(Mt. 14:22-34; Mk. 6:45-53)

16Yɛ̀ɛ cɛŋkò ki kpagà, nni ɓɛ̀yilàg ɓii ɓɛ sɛngà ɓi rìɓày. 17Ɓɛ ɓɔg ɓi kìkɔm lɛ ɓɛɛ syaà cɛcɛɗ ki riɓày a Kapɛrinawum; birìm ì kpìghà di Yeesus à ka tanɛn ɓi lɔŋ ɓɔ. 18Fɔɔnnɛ bɛ̀ɓ ì fɛɛ̀fɛ̀ɓsìghà rì ìtèɗ, rìɓày à pìpìg ɓìkus. 19Yɛ̀ɛ ɓɛ ɓaghà di ɓɛ mɛ fyèè riɓày fɛlɛ yɛ̀ɛ ɓɛ̀kilòmɛɛ̀tɛ̀rɛ̀ ɓɛtaǹ nsoò lɛ taàfog, nni ɓɛ ghɛngày Yeesus di a kɛ̀ɛ̀kɛɛ yi ɓi rìɓày aɗyòò, à yùyùy jàŋbog rì kìkɔm, ìris wu ɓan ɓɔ. 20Nni Yeesus à kpaaghà ɓɔ lɛ: Mɛ̀ yɛɛ ri, kɛ̀ ɓi risi. 21Ɓɛ mɛɛ̀ kìghà lɛ, ɓɛɛ teɗ nyi ɓi kìkɔm, nni ki ghaskà kì lomì ɓi bèn ì rìɓày jàŋ inɛ ɓɛ kɛnkɛ̀ngà.

Yeesus à rì bìrɛs ì cɛɓ

22Ɓi duri tana, kìtuu ki ɓum ki ki rɔɓkày cɛcɛɗ ki riɓày, ki ghɛngà lɛ, kìkɔm kìfog kɛɛ nɗì wɔɔ. Nni Yeesus àa nki ɓɔɔgh ɓi ɓi kìkɔm kiŋcèm ǹɗaŋ ri ɓɛ̀yilàg ɓii, lɔŋ ɓɔ yɛɛ nkɛ̀ɛ ɓi kìkɔm kìn cɛ̀ncaa. 23Wɔ̀lɛ ɓìkɔm ɓidɛŋ ɓi ɓaghày a Tiɓeriyaadɛ, jàŋbog rì jàŋ inɛ ɓɛ ɗighà bìrɛs, di Kan à mɛ fa Bɛ̀ll ɓìtògsɛ̀n. 24Yɛ̀ɛ ɓumɓɛ̀n ɓɛ ghɛngà lɛ nsoò Yeesus nsoò ɓɛ̀yilàg ɓii, àdɛŋ à ɓaghà ɓi wɔɔ, fɔɔnnɛ ɓɔmiɗ ɓɛ ɓɔkà ɓi ɓìkɔm ɓìn, ɓɛ kɛǹ kì kaà Yeesus a Kapɛrinawum. 25Ɓɛ kɛǹgà nyi kìtanɛɛ cɛcɛɗ ki riɓày, ɓɛ tɔg nyi lɛ: Raɓì, wɔ̀ɔ n-yùu fɛ̀ fin? 26Yeesus à ɓàg ɓɔ lɛ: Ǹkpaa mìni kɔɔ̀kɔɔ̀ à rìkpaa lɛ, àa ɓisuulɛ ɓìi nghɛɛ dàm nnɛ ɓi kaakaa mɛ; ɓi kaakaa mɛ lɛ, yɛ̀ɛ ɓìi nɗii bìrɛs ɓì wuràg. 27Kɛ̀ ɓi say ɓisuu ɓiɗilàg ɓi ɓi ri lɛ ɓi ɗyoŋ, salina ɓisuu ɓiɗilàg ɓi ɓi ri lɛ ɓi kɔrì à kpaŋ ɓi cɛɓ ki fiɗyàɓ fikɔ̀ɔ̀, ɓyɛɛ̀ ɓi Man à mum à rì mìni ɓiì faà, lɛ nyi nnɛ Bɛ̀ll Seŋi à fogà kìrèmzɛnà ki rilàmì ɗii ɓi nyi. 28Nni ɓɛ tɔkà Yeesus lɛ: Tì ghɛ̀ɛ̀sɛɛ kì kìi cɛ ɓi ɗi lɛ ti say ɓisuu ɓiɓan ɓi Bɛ̀ll a kɔ̀nkɔ̀n? 29Yeesus à ɓàg ɓɔ lɛ: Kìsay ki Bɛ̀ll ki ri lɛ, ɓi gherɛn roànɛ Bɛ̀ll à romgày. 30Nni ɓɛ tɔkà nyi lɛ: Dàm ì kìɓan aɗi yɛɛ̀ nnɛ ù kìi, ìnɛ ìrì lɛ, i tì ghɛɛ, tì gherɛ̀n wɔ̀? Kìsay aɗi kɛɛ̀ki wɔ̀ɔ kìkì? 31Ɓɛ̀seŋi ɓis ɓɛ ɗighà manà ɓi-reɓ yɛ̀ɛ ki ri kìkànɛn lɛ: À faghà ɓɔ bìrɛs ìnɛ ì rìì aɗyoo lɛ ɓɛɛ ɗi.

32Yeesus à kpaa ɓɔ lɛ: Ǹkalii mìni ɓi saaɗ lɛ, àa Moyis yɛɛ faghà mìni bìrɛs ìnɛ ì sɛngày aɗyòò, kìɓan kifog Seŋi wɛ̀m yɛɛ faa mìni kɔɔ̀kɔɔ̀ à bìrɛs ànɛ à rìì aɗyòò. 33Lɛ bìrɛs ì Bɛ̀ll ì rì bìrɛs ìnɛ ì sɛniì aɗyòò, ì ki fa ziinɛ cɛɓ.

34Nni ɓɛ kpaaghà min nyi lɛ Kan, falag ɓìsi bìrɛs ìnɛ̀n ɓyààmɛ̀n ɓìcèm.

35Yeesus à kalìghà ɓɔ lɛ: Mɛ̀ ǹɗì bìrɛs ì cɛɓ, ŋwaànɛ à yùu a lɔ̀ŋkɛm̀ zày, yàa kɔɔdii gɛ ɓi nyi. Ŋwaànɛ à ki gherɛɛ mɛ̀, kìnɔli kaa kitii gɛ ɓi nyi. 36Ǹki kpaaghà mìni fɔlɔɔ, ɓì ghɛn mɛ̀, kɛ̀ ɓi ki gherɛn. 37Ɓum ɓɛ̀cèm ɓɛ Tààta à faa mɛ̀, ɓɛ ri ɓiì yùu a lɔ̀ŋkɛm̀, nni màa ki kpaŋzi ɓi ŋwaànɛ à yùu yì a lɔ̀ŋkɛm̀ ɓi ɗyɔ̀m. 38Ɓisuulɛ, ǹsɛngày ɓi aɗyoo lɛ nki rìkɔ̀n ɗyɛm̀, ǹsɛngày lɔŋ lɛ nki rìkɔ̀n ɗi roànɛ à romgày mɛ̀. 39Nni rìkɔ̀n ɗi roànɛ à romgày mɛ̀ ɗyɛɛ̀ɗi: Lɛ kɛ̀ɛ nɗimzi nsoò mum bog, ɓi ɓum ɓɛ̀cèm ɓɛ à faghà mɛ̀. Ǹghɛ̀ɛ̀sɛɛ lɔŋ ɓɔ kì ghèmzii, ɓi siitòn a ŋwos. 40Lɛ rìkɔ̀n ɗi Seŋi wɛ̀m ɗyɛɛ̀ɗi: Lɛ mum ǹcèm ànɛ à ghɛɛ Man, à ki gherɛn nyi, a ɓa rì cɛɓ ki fiɗyàɓ fikɔ̀ɔ̀, mɛ̀ ǹki ghèmzii gɛ nyi ɓi siitòn a ŋwos.

41Fɔɔnnɛ Ɓɛ̀yudɛ̀n ɓɛ ŋwɔŋwɔ̀ŋìghà nyi lɛ, à kpaaghà lɛ: Mɛ̀ ǹɗì bìrɛs ìnɛ ì sɛngày aɗyòò. 42Ɓɛ kpaakpààghà lɛ: Àa Yeesus à man à Yoosɛɓ yɛɛ ri lɛ? Tì yii lɛ rì seŋi rì jɛɛ, nni lannɛ a kpaaghi ɓigomìnɛ lɛ, nyii ri bìrɛs ìnɛ ì sɛngày aɗyòò? 43Yeesus à pɛ̀ɛ̀zìghà ɓɔ lɛ: Kɛ̀ ɓi ŋwɔ̀ŋwɔŋi, mìni rì mìni. 44Mum à yin lɛ à yù a lɔ̀ŋkɛm̀ di Tààta ànɛ à romgày mɛ̀ à syòŋiì ɓi nyi, mɛ̀ ǹki ghèmzii gɛ ŋwaànɛ̀n miì ɓi siitòn a ŋwos. 45Ki ri kìkànɛn ɓi kaàtà à ɓɛ̀kpaŋzì-ɓìɓan lɛ: Bɛ̀ll à rì ɓiì rèsaagh ɓɔ ɓɛ̀sɛ̀ɛ̀ ɓɛ̀cèm, fɔɔnnɛ mum ǹcèm ànɛ à wokà jɛ̀ɛ̀ ì Tààta, à ki teɗ rirèsàg ɗii, nnyɛɛ ri lɛ à yù a lɔ̀ŋkɛm̀. 46Fɔlɔɔ a rèsii ɓi lɛ ŋwaàdɛŋ à ka ghɛngà Tààta, lɔŋ roànɛ à ɓaghày yɛ̀ɛ Bɛ̀ll yɛɛ ghɛngà Tààta cɛ̀ncii. 47Ǹkpaa mìni kɔɔ̀kɔɔ̀ à rìkpaa lɛ ŋwaànɛ à gherɛɛ mɛ̀, à rì rì cɛɓ ki fiɗyàɓ fikɔ̀ɔ̀. 48Mɛ̀ yɛɛ ri bìrɛs ì cɛɓ. 49Ɓɛ̀seŋi ɓin ɓɛ ɗighà manà ɓi-reɓ, ɓɛ ki cuu. 50Lɔŋ bìrɛs ìnɛ ì sɛngày aɗyoo, yɛɛ̀nɛ, lɛ ŋwaànɛ à ɗii yɔ̀, kɛ̀ɛ wù. 51Ǹɗì bìrɛs ì cencem ìnɛ ì sɛngày aɗyòò, ŋwaànɛ à ɗii bìrɛs ìnɛ̀n, à rì ɓiì ghɛɓì fìɗyàɓ fikɔ̀ɔ̀. Bìrɛs ìnɛ m̀ɓiì faà ìnɛ̀n, yɛ̀ɛ ri nyoo yɛ̀m ìnɛ ǹɗì ɓiì faà, lɛ ziinɛ yɛ̀ɛ ɓa rì cɛɓ.

52Ɓi jɛ̀ɛ̀ ìnɛn, Ɓɛ̀yudɛ̀n ɓɛ tumɛ̀ngà rìnyoònyòlɛ̀n ɓɔ rì ɓɔ, ɓɛ kpaakpàà lɛ: Lannɛ ŋwaànɛ à rì lɛ à fa ɓìsi nyoo yìì lɛ ti ɗi yɔ̀?

53Nni Yeesus à kpaaghà ɓɔ lɛ: Ǹkpaa mìni ɓi saaɗ lɛ, i ɓì ɗii ɓi nyoo ì Man à mum, kɛ̀ ɓi ki nɔ bwaɓ yii, ɓì yin lɛ ɓì ɓa rì cɛɓ ki kɔɔ̀kɔɔ̀. 54Ŋwaànɛ à ɗii nyoo yɛ̀m, à ki nɔ bwaɓ yɛm̀, à rì rì cɛɓ ki fiɗyàɓ fikɔ̀ɔ̀, ǹɗì ɓiì ki ghèmzii nyi ɓi siitòn a ŋwos. 55Lɛ nyoo yɛ̀m ì rì ɓìɗilàg ɓi kɔɔ̀kɔɔ̀, bwaɓ yɛm̀, kɔɔ̀kɔɔ̀ à com ki nɔyɛ̀n. 56Ŋwaànɛ à ɗii nyoo yɛ̀m, à nɔ bwaɓ yɛm̀, à rì ǹɗàrɛn ɗi mɛ̀, mɛ̀ girig ǹɗàrɛn ɗi nyi. 57Fɛlɛ yɛ̀ɛ Tààta ànɛ à rì cem a romgày mɛ̀, mɛ̀ ǹki ɓa ri cɛɓ lɛ nyi, fɔlɔɔ nnɛ ŋwaànɛ à ɗii mɛ̀, à ɓiì ghɛɓì lɛ mɛ̀. 58Bìrɛs ìnɛ ì sɛngày aɗyoo yɛ̀ɛ ri lɛ; ì yin yɛ̀ɛ ìnɛ ɓɛ̀seŋi ɓin ɓɛ ɗighà ɓɛ cuu; nni ŋwaànɛ à ɗii bìrɛs ìnɛ, à rì ɓiì ghɛɓì fìɗyàɓ fikɔ̀ɔ̀.

59Yeesus à kpaaghà ɓìɓan ɓi, yɛ̀ɛ à rèèrèsàkà ɓum ɓi naà-bɔ̀ŋzɛ̀n ìnɛ a Kapɛrinawum.

60Yɛ̀ɛ ɓɛ̀yilàg ɓɛ wokà ɓìɓan ɓi Yeesus à kpaaghà ɓiǹ, nni kìgwey ki kalìghà lɛ: Ɓìtòkì ɓi ɓi teèsɛɛ, ghɛn yɛɛ ri lɛ à cenɛ̀n ɓyɔ rìwowòg? 61Yɛ̀ɛ Yeesus à yighà ɓi nɗem wii lɛ ɓɛ̀yilàg ɓii ɓɛɛ̀ ŋwɔ̀ŋwɔŋi nyi ɓi kìɓan kiǹ, nni à kpaaghà ɓɔ lɛ: Kìɓan kiǹ ki kɛɓtii mìni fìɓàg? 62I ɓì ki ghɛɛ Man à mum di a ɓɔɓɔg aɗyoo jàŋ inɛ à ka ɓaghà, ki ɓa min la? 63Ǹghay wɛɛ̀ fafa cɛɓ, mɛ̀mùù mɛ yin ɗi gɛɓsɛ̀n. Fɔɔnnɛ ɓìɓan ɓi màa kpaa mìni ɓi ri ɓìɓan ɓi Nghay, rì ɓi cɛɓ. 64Kìɓan kifog, ɓum ɓɛdɛŋ ɓɛ ɓi nyìinyìm wìn ɓɛ gherɛɛ ɓi. Lɛ a rìtumɛ̀n Yeesus à yighà ɓumɓɛ ɓɛ gherɛ̀ngà ɓi, rì roànɛ à ghɛ̀ɛ̀sɛ̀ngà nyi kìkàɓi. 65Fɔɔnnɛ à kpaaghà lɛ: Kìɓan ki kɛɛ̀ki ǹkpaaghà mìni miì lɛ mum à yin lɛ à yù a lɔ̀ŋkɛm̀ di Tààta à faa ɓi nyi fèg ànɛ̀n. 66À tumɛ̀n ɓi cààmɛ̀n kiǹ, ɓɛ̀yilàg ɓii lɛɛ̀gwey ɓɛ ghaaghràkà, ɓɛ̀ kɛɛ̀ nɔ̀ɔ̀ti ti nyi.

67Nni Yeesus à kpaaghà min ɓɛyilàg ɓɛ kiǹtɛ̀ɗ rì ɓɛɓɛɛ̀rɛn lɛ: Mìnii kɔni ɓi lɛ ɓi ghaàrag girig? 68Simɔn Pyɛɛri à pɛ̀ɛ̀zìghà nyi lɛ: Kan, tì ɓiì kɛ̀ɛ yɛ̀ɛ ghɛn? Ù rì rì ɓìɓan ɓi cɛɓ ki fiɗyàɓ fikɔ̀ɔ̀. 69Fɔɔnnɛ tì mɛ gherɛ̀n, tì ki yi lɛ wɔ̀ yɛɛ ri roànɛ à rì ǹtenɛn ànɛ à ɓaghày yɛ̀ɛ Bɛ̀ll. 70Yeesus à pɛ̀ɛ̀zì ɓɔ lɛ: Mɛ̀ɛ nti mɛ̀ yɛɛ ɓɔngà mìni ɓɛ̀sɛ̀ɛ̀ ntɛ̀ɗ rì ɓɛɓɛɛ̀? Ǹsoò fɔlɔɔ, kìbog ki ɓi mìni ki ri Satàn. 71Zyudas à man à Simɔn Iskariyot innɛ à kpaakpààghà lɔɔ lɛ nnyɛɛ ɓaghà kìbog ki ɓi ɓɛ̀yilàg ǹtɛ̀ɗ rì ɓɛɓɛɛ̀ , ki ki ghɛɛ̀sɛ̀ngà nyi kì kàɓi.

Currently Selected:

ZYAŊ 6: BAFNT

Highlight

Copy