GIMA 10
10
Kɔfa-sɔ̧ mɛ gbak wi
1GASA WAN, wen ge s’ɛnɛ yor nɛ̀ nyɛi̧a-a nɛ‘m ge?
Wen ge s’ɛnɛ hu̧si tɛ‘nɛ́ wese ŋga bɔnɛ kɔ‘m ge?
2Wisan zɔk nɛ bɔnɛ tɛ ŋmaŋa-tɛ ko wi-ɗaŋ;
a̧ tika yí pɛ́r gɔna-kɔ̧-zaŋ nɛ̀ wi-ɗaŋ tuia ha̧ a̧.
3Wi-ɗaŋ ŋmaŋ nɛ tɛ tɛ o mɔ nɛ̀ see-aa kɔ̧a̧;
wi-de-wɔ-mɔ ɗaŋ kɔ‘i nɛ́ nin Sɔ̧;
wi-ɗaŋ zɔk kɔ‘i Sɔ̧ hee geemɔ ga.
4Taamɔ kɔ̧-a̧ hee ndé:
«Nyimsea ko Sɔ̧ a̧a̧ kɔ‘i ŋgɔn mɛ,
a̧ nyɛm mɛ de ŋma mɔ in am na.»
A̧‘e nde: «Sɔ̧ bo kɔ‘i na.»
5Ko wi’ɛi kànà nɛ́ dee mɔ kɔ‘i yaknɛ;
ŋma mɔɔ-dor-a bo na.
Taamɔ kɔ̧-a̧ ndé, gɔna-kita k’ɛ́nɛ́ a̧a̧ ŋgɔn mɛ,
ɓɛɛ kita'i beka de ŋma mɔ in wii na.
Ko wi’ɛi kànà nɛ́ zɛkɛɗa o wi-kur-zu-a nɛnɛ.
6Ɓɛɛ a̧ duk nɛ̀ tɛ-a tɔ̧ nɛnɛ‘e:
«Ŋma mɔɔ-de'm bo na,
ŋma ŋgamɔ nɛ̀ tɛ kpa'm bo na.»
7Kɔ̧-a̧ kànà nɛ́ foma o ŋma-a nɛnɛ.
Kɔ̧ nú-a duna nɛ́ ɔramɔ in ŋgamɔ;
mɔɔ ɗɔɔ leɓe-a nɛ́ saka-yí in ɗaŋ wen.
8A̧ hu̧si ká̧ o be ye tik nɛnɛ zu wi nɛ duk zóóŋ géè
mɛ gbɛ wa yinɛ;
a̧ duk kɔ̧-a̧ hi̧i̧ mbaɗi nɛ̀ o wi nɛ̀ bó nɛ̀ ŋgai na.
9A̧ hu̧sa̧ tɛ-a hee mɔ'ɔ nɛ dila mgbuti nɛnɛ ti da̧a̧ zɔ̧'ɛ ga;
a̧ hu̧sa̧ mbɛɛr nɛ̀ de-a ha̧ a̧ mɛ ba wi nɛ̀ bó nɛ̀ ŋgai na.
Kà a̧ nɛ́ yuɓura wa nɛ̀ yɔk kaɗi, ɓɛɛ a̧ gbura wa yaknɛ.
10A̧ hira gu nù ndaɗi mbɛɛr hai nɛnɛ,
ɓɛɛ o wi nɛ̀ bó nɛ̀ ŋgai na tika kɔ̧ er-a.
11A̧ tɔ̧ɔ̧ nɛ̀ kɔ̧ see-aa ndé:
«Sɔ̧ nɛ̀ duk nɛ kɔ‘i’ɛ,
tɛ-a ɓan nɛ̀ bìí ɗoŋ mɔ na.»
Ko Sɔ̧ kànà nɛ́ kpee yí kà a̧ tɛ́ɛ̀ zɔk mɔɔ nɔ‘i.
12GASA WAN Sɔ̧, ɛ̀nɛ̀ hú̧í̧ er'nɛ́ nɛ ŋgɔn,
tɛ‘nɛ́'ɛ mbaŋ ɗoŋ o wi-kɔsa.
13Wen ge sa wi-ɗaŋ e Sɔ̧ hee geemɔ ga ge?
Wen ge sa a̧ tɔ̧ kɔ̧-a̧ ndé,
Sɔ̧ beka kii mɛ de ŋma mɔ in wi na ge?
14GASA WAN, ɛ́nɛ́ zɔka wan ɗaŋsee
in hiɗimɔ ko o wi-kɔsa na nde?
Ɛ̀nɛ̀ zɔ́k wa ɓɛɛ ɛ̀nɛ̀ kásí wa kɔ̧ er'nɛ́.
O wi nɛ̀ bó nɛ̀ ŋgai na e kɔ‘i ta nɛ̀ ɛ́nɛ́
wen ɛ́nɛ́ nɛ́ wi-gbak o be-oi.
15Ɛ̀nɛ̀ gbín ɓaa o wi-ɗaŋ in o ɗaŋwi;
ɛ̀nɛ̀ násí wa hɔ ŋgimbi nɛ̀ ɗaŋmɔ kɔ-wa'i kaɗa lɛŋ.
16GASA WAN tɛ ɔ wan kpoo nɛ kpoo.
O wi nɛ̀ iŋ a̧ na lɛŋ tɛ yambali zu nù kɔ̧-a̧'ɛ.
17GASA WAN, mi iŋa ɛnɛ zii kɔfamɔ ko o wi-mɔka-see zii;
ɛnɛ ha̧ ŋgai ha̧a̧ ha̧ wa mbɛt.
18GASA WAN, ɛ̀nɛ̀ yéŋ zer'nɛ́
h’ɛ́nɛ́ mɛ gɔn kita zu o be-oi in o wi-bɔnɛ nɛ yuwar-a
wen ká o bíí zaŋnu tɛ́ɛ̀ pi̧ bele tɛ wa siti.
Currently Selected:
GIMA 10: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
