KU̧U̧NAŊMƆ 34
34
Dina in o be Sikɛm
1Dina bem nɛ Lea koo ha̧ Jakob, gboo mɛ nɛ̀ɛ́ zɔk o be-zɔŋa nù‘i. 2Sikɛm bem ko Hamɔr, be Hiv, be-wan nù‘i zɔka Dina, ɓɛɛ ba a̧ nɛ ŋgai ɔ in a̧, ɓɛɛ ɗaŋ a̧. 3Kɔ̧ɔ̧mɔ ko Sikɛm lɛŋ duka tɛ Dina, boko-bem ko Jakob; Sikɛm kɔ̧ɔ̧ so Dina nyɛmna, ɓɛɛ a̧ kii mɛ ba see-aa. 4Sikɛm tɔ̧ɔ̧ ha̧ dáà kɔ‘i Hamɔr: «Ɛ̀nɛ̀ hár boko-bem’ɛi ha̧‘m nɛ kóò.»
5Jakob zia so'e Sikɛm pi̧i̧ búù zu boko-bem kɔ̧-a̧ Dina; ɓɛɛ hee mɔ'ɔ nɛ o bem kɔ̧-a̧ ɓɔna so zaŋbɛɛ ɗoŋ o mɔ-dai ga, a̧ duka nɛ oi nú-a pɛm nɛ ŋgimbi pia-a kɔ-wa. 6Hamɔr, dáà ko Sikɛm kura nɛ zu nɛ́ɛ̀ kpa Jakob mɛ tɔ̧ wen in a̧. 7O bem ko Jakob pia nɛ zaŋbɛɛ; ŋgimbi nɛ wa zia nyɛrɛ mɔ‘i, ɔ hee dara da̧a̧ wa ga, ɓɛɛ see-wa tu̧ wen Sikɛm dee búù pi̧ Israɛl, tɛ ɔa-a n'aa ɔɔ in bem ko Jakob; wi beka de so mɔ hegɔ na. 8Hamɔr tɔ̧ɔ̧ ha̧ wa: «See bem kɔ‘m Sikɛm baa boko-bem k’ɛ́nɛ́ nyɛmna; ɛ̀nɛ̀ há̧ boko-bem k’ɛ́nɛ́ nɛ̀ kóò ha̧ a̧. 9Ɛ̀ɛ̀ nɔ́ tɔk in'nɛ̀ɛ́ nɛ̀ báá ŋmaa. Ɛ́nɛ́ tɛ ha̧ boko-bem k’ɛ́nɛ́ nɛ̀ kóò h’ɛ́ɛ́, ɓɛɛ ɛ́ɛ́ ha̧a̧ boko-bem k’ɛɛ nɛ̀ kóò h’ɛ́nɛ́ mbɛt. 10Ɛ́nɛ́ tɛ ya in yɛɛ, nù tɛ duk wen ɛ́nɛ́; ɛ̀nɛ̀ dé ye sɛnɛ, ɛ̀nɛ̀ dé gɛnɛ k’ɛ́nɛ́ sɛnɛ gee, ɓɛɛ ɛ̀nɛ̀ baa nù gee mbɛt.»
11Sikɛm tɔ̧ɔ̧ ha̧ dáà ko boko-bem’ɛi in o bu̧i̧-nya-a̧: «Ɛ̀nɛ̀ dé ko ha̧‘m, ɓɛɛ mi tɛ ha̧ mɔ lɛŋ n’ɛnɛ tɛ ak er-am h’ɛ́nɛ́. 12Ɛ̀nɛ̀ gɔ́n mbɔi kóò ha̧‘m nɛ dɔka-a in duknu, ɓɛɛ mi tɛ ha̧ mɔɔ nɔ‘i lɛŋ n’ɛnɛ tɛ ak'i h’ɛ́nɛ́. Mɔ kpɔk n'am kɔ̧a̧, nɛ́ boko-bem k’ɛ́nɛ́ ha̧‘m mɛ ba nɛ kóò ɓɛɛ!»
13O bem ko Jakob kifa nú ha̧ Sikɛm in ha̧ dáà kɔ̧-a̧ Hamɔr nɛ gɔna-kɔ̧-zaŋ, wen wa iŋa so Sikɛm ɗaŋa boko-nya-wa Dina kaɗi. 14Wa tɔ̧a̧: «H’ɛ́ɛ́ mɛ́ ha̧ boko-nya yɛ ha̧ wi nɛ gɔn bɔr na, ɛ́ɛ́ nyɛm mɛ de pɛrti mɔ hegɔ na, wen duk nɛ mɔɔ-búù nyɛmna sɛn mgbara yɛ. 15Ɛɛ tɛ de mɔ n’ɛnɛ kɔ̧a̧ tɛ ŋgimbi n’ɛnɛ tɛ gɔn bɔr o bíí k’ɛ́nɛ́ lɛŋ hee k’ɛɛ ga, 16sɛk’ɛɛ ha̧a̧ o boko-bem k’ɛɛ h’ɛ́nɛ́ nɛ kóò, ɓɛɛ ɛɛ baa o boko-bem k’ɛ́nɛ́ nɛ kóò h’ɛ́ɛ́ mɛ ya in'nɛ̀ɛ́, ɓɛɛ ɛɛ dee nam kpɔk. 17K’ɛ̀nɛ̀ nɛ́ zia wen n’ɛɛ tɔ̧ɔ̧ h’ɛ́nɛ́ wen gɔna bɔr'nɛ́ na, ɛ́ɛ́ tɛ ba boko-nya-ɛɛ pii nɛ ɗoŋ, ɓɛɛ ɛɛ yaka.»
18Wen kɔ-wa dee tɛ Hamɔr in Sikɛm bem kɔ̧-a̧. 19Be-ŋgaiwi'i nik naŋ tɛ dee mɔ nɛ wa aka ha̧ a̧ mɛ de'i na, wen a̧ kɔ̧ɔ̧ so boko-bem ko Jakob nyɛmna. Wa tu̧ so tɛ Sikɛm nutua ko dáà kɔ̧-a̧ nyɛmna.
20Hamɔr in bem kɔ̧-a̧ Sikɛm kaia ŋmaa yak si nú garo ye kɔ-wa, ɓɛɛ tɔ̧ wen ha̧ o bíí saaye kɔ-wa: 21«O wi nɔ'ɔ bo nɛ wi-kii-wen in yɛɛ na! Wa a̧ ya tɛ nù k’ɛɛ, wa a̧ de o gɛnɛ kɔ-wa, ɓɛɛ nù a̧ duk wen wa. Ɛ̀ɛ̀ bá o boko-bem kɔ-wa nɛ kóò, ɓɛɛ ɛ̀ɛ̀ há̧ o boko-bem k’ɛɛ nɛ kóò ha̧ wa. 22Mɔ kpɔk, h’ɛ́ɛ́ lɛŋ mɛ ya in wa nɛ de-a, mɔ nɛ wa kɔ̧ɔ̧ nɛ mɔ'ɔ: o bíí lɛŋ tɛ gɔn bɔr-wa hee mɔ'ɔ nɛ wa de ga mbɛt. 23O mɔ-dai kɔ-wa, o mbɔi kɔ-wa, mɔ nɛ tɔ̧ɔ̧‘e mɔ-dai kɔ-wa lɛŋ, bo nɛ tɛ duk nɛ k’ɛɛ na nde? Mɔ k’ɛɛ nɛ kpɛka wen kɔ-wa ha̧ wa mɛ ya in yɛɛ ɓɛɛ.» 24O bíí lɛŋ nɛ tɛɛ pii nú garo zia wen nɛ Hamɔr in bem kɔ̧-a̧ Sikɛm tɔ̧a̧, ɓɛɛ o wiwii lɛŋ gɔn bɔr.
25Ɗoŋ zɛ taar nɛ wa gɔna nɛ bɔr-wa, nɛ̀ ɓɔna fara nyima wa, o bem ko Jakob yiitoo, Simɛɔŋ in Levii, o bu̧i-nya Dina, tika zu o bíí nɛ zii so kɔ‘i'e, wi a̧a̧ tɛ ga̧a̧mɔ wó, ɓɛɛ gbɛ wiwii saaye lɛŋ nɛ gba-paa. 26Wa gbɛɛ Hamɔr in bem kɔ̧-a̧ Sikɛm nɛ gba-paa a nù, ɓɛɛ wa mgbɔ Dina gbonɛ kɔ̧ tua ko Sikɛm yak. 27O bem ko Jakob tika zu o wɔr kai nɛ mɔɔ-tɛ-wa; wa kaia o mɔ saaye lɛŋ, wen nɛ wa ɗaŋa so boko-nya-wa. 28Wa kaia o geɗek mɔ-dai, o gasa-a, o tuifuu kɔ-wa, in o mɔ kɔ-wa lɛŋ nɛ a̧a̧ nɛ̀ saaye in nɛ̀ zaŋbɛɛ. 29Wa kaia o mbɔi kɔ-wa, o bem kɔ-wa, o kóò kɔ-wa gu nɛ o mɔ kɔ̧ tua kɔ-wa lɛŋ.
30Jakob tɔ̧ɔ̧ ha̧ Simɛɔŋ in Levii: «Ɛ́nɛ́ sɔka'm e ti sak ha̧ o be Kanaŋ in o be Periz; mí bó nɛ̀ o dɔka bíí na, wa tɛ mɔi̧ ŋmaa tik zu'm, wa tɛ gan am, ɓɛɛ mi dee geemɔ in o bíí kɔ‘m.» 31Wa kifa nú: «Hee ge wa tɛ de mɔ in boko-nya-ɛɛ hee kó-de-mɔ nɛ mbɔɗɔnu ga ge?»
Currently Selected:
KU̧U̧NAŊMƆ 34: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
