KU̧U̧NAŊMƆ 33
33
Jakob kpaa ŋmaa in Esau
1Jakob baa yí nɛ̀ ŋgɔn, a̧ zɔka Esau nɛ̀ o bíí ɗoŋ ŋmaa gɔmŋmaa-naar gbar tɛnɛ in a̧, ɓɛɛ a̧ kɛ̧ o bem ha̧ Lea in Rachɛl, in ha̧ o kó-de-tom yiitoo. 2A̧ kaia o kó-de-tom in o bem a ti; nɛ̀ ɗoŋ, Lea in o bem kɔ‘i, sɛka Rachɛl in Jozɛf. 3A̧ yaka ti ha̧ wa, ɓɛɛ a̧ gu nù war mɔɔrɔ-ɗoŋ-yiitoo nɛti kaɗi sɛka a̧ hɔ katɛ nya-a̧. 4Ɓɛɛ Esau ma yì we nɛ ti a̧ tɛnɛ, hɛr ŋmaa in a̧, dui nú-a, ɓɛɛ wa a nú-wa tɛ kɔ̧a̧. 5Ŋgimbi nɛ Esau baa yí nɛ̀ ŋgɔn, n'aa zɔka o kóò in o bem, a̧ aka mɔ: «Nɛ́ o'o ya mɛ‘i o?» Jakob kifa nú: «Nɛ́ o bem nɛ Sɔ̧ ha̧a̧ ha̧ wi-de-tom k’ɛ́nɛ́.» 6O kó-de-tom ɗɔŋa pii ti, wa in o bem kɔ-wa, ɓɛɛ wa gu nù. 7Lea ɗɔŋa pii ti in o bem kɔ‘i mbɛt, ɓɛɛ wa gu nù. Mɛ ɗoŋ Jozɛf ɗɔŋa pii ti in Rachɛl, ɓɛɛ wa gu nù mbɛt.
8Esau aka mɔ: «O gba mɔ-dai n'am kpaa nɛ yuwar tɛnɛ‘i, tɔ̧ nɛ ge?» Ɓɛɛ Jakob tɔ̧: «Nɛ́ wen ha̧ nyaa mɛ kpa desee zu'm.»
9Ɓɛɛ Esau tɔ̧ woyo: «Mi a̧a̧ nɛ mɔ nyɛm am, nya'm! Mɔ nɛ̀ dúk nɛ́ kɔ-mɛ a̧ ɓɔn nɛ́ kɔ-mɛ.»
10Ɓɛɛ Jakob tɔ̧: «K’ɛ́nɛ́ bɛ̧ mɔ n'am ha̧‘nɛ́ na, mi aia nú h’ɛ́nɛ́. K’ɛ̀nɛ̀ nɛ́ zɔka'm nɛ̀ de yí, ɛ̀nɛ̀ kpɛ́k o mɔ n'am ha̧‘nɛ́'ɛ, hee mɔ'ɔ n'am zɔka nɛ̀ sɔnti'nɛ́ hee mɔ'ɔ nɛ‘i zɔk nɛ̀ sɔnti Sɔ̧'ɛ ga, ɓɛɛ k’ɛ́nɛ́ kpɛk am nɛ̀ de-a, 11ɛ̀nɛ̀ kpɛ́k mɔ n'am baa tɛnɛ h’ɛ́nɛ́, wen Sɔ̧ ha̧a̧ mɔ ha̧‘m, mi a̧a̧ nɛ mɔ lɛŋ nɛ‘i nyɛma so mɛ kpa.» Jakob ira Esau ɓɛɛ a̧ kpɛk.
12Esau tɔ̧a̧: «Ɛ̀ɛ̀ kúr ɛ̀ɛ̀ yak, mi tɛ nɛ kpɔk in mɛɛ.» 13Jakob kifa nú ha̧ a̧: «Nyaa, ɛ́nɛ́ iŋa o bem bo nɛ̀ ŋgai na. Mi a̧a̧ nɛ o sami in o nana ndai, nɛ̀ ha̧ nɛ́ bere ha̧ bem; kà‘i nɛ́ nɔ̀ gan ŋgai kɔ-wa, nɛ́ kpɔk kale wese a̧ o geɗek mɔ-dai tɛ kum nɛnɛ. 14Nyaa, ɛ̀nɛ̀ yák ti ha̧ wi-de-tom k’ɛ́nɛ́, mi tɛ nɛ kɔ‘m mɔktɛ nyɛm nɛ ɗoŋ naŋanɔ ko o mɔ-dai nɛ a̧a̧ ti'm in nyɛm nɛ ɗoŋ naŋanɔ ko o bem mbɛt, hegɔ hɔ nɛnɛ ŋgimbi n'am tɛ hɔ tɛ ko nyaa sɛn nú Sɛir.»
15Esau tɔ̧a̧: «Mi kɔ̧ɔ̧ mɛ e o ŋma wi nɔ'ɔ nɛ tɛɛ in am’ɛ in mɛɛ.» Ɓɛɛ Jakob kifi nú: «Wen ge? Gana so à̧‘m dé tɛ nyaa, ɓɛɛ kaɗa.» 16Nɛ́ kpɔk kale wese'i, a̧ Esau baa nɛ̀ yuwar kɔ‘i si ɗoŋ sɛn Sɛir, 17ɓɛɛ war ko Jakob nɛ̀ɛ́ kɔ‘i si sɛn Sukot. Nɛ́ sɛn hi̧i̧ á̧ a̧ dee tua kɔ̧-a̧ in o gbaksak wen o mɔ-dai kɔ̧-a̧; nɛ́ hegɔ sa a̧ a nin fara'i Sukot, mɛ nɛ wen nɛ tɔ̧ «gbaksak».
18Jakob nɛ pii nɛ bɔkɔ-nú Aram hɔɔ nɛ de-a sɛn saaye Sikɛm sɛn nú Kanaŋ, ɓɛɛ a̧ ba gbagari nú ye. 19A̧ hi̧fa fara n'aa ee tua-laa kɔ̧-a̧ sɛnɛ tɛ kɔya-sede gɔmŋmaa sɛn er o bem ko Hamɔr dáà ko Sikɛm.#Jos 24.32; Jn 4.5 20A̧ mboo fara-ɗafi-sɔ̧ hi̧i̧, ɓɛɛ a̧ sa nin-a'e: Sɔ̧ ko Israɛl.
Currently Selected:
KU̧U̧NAŊMƆ 33: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
