KU̧U̧NAŊMƆ 35
35
Sɔ̧ toka de yoŋgo zu Jakob sɛn Bɛtɛl
1Sɔ̧ tɔ̧ɔ̧ ha̧ Jakob: «Mɛ̀ kúr, mɛ̀ dáŋ si Bɛtɛl a̧ mɛ̀ dúk sɛn hi̧i̧. Mɛ̀ mbó fara-ɗafi-sɔ̧ ha̧ Sɔ̧ nɛ usa so tɛ ha̧ mɛ ŋgimbi nɛ mɛ yuu nɛ mɔ ti nya-mɛ Esau.»#Ku̧u̧ 28.11-17
2Jakob tɔ̧ɔ̧ ha̧ o bíí kɔ̧-a̧, gu nɛ o bíí lɛŋ nɛ yaa so in a̧: «Ɛ̀nɛ̀ káí o sɔ̧ ko o gɛnɛ nɛ̀ ya mgbara'nɛ́ yinɛ, ɛ̀nɛ̀ ɗáfí war-tɛ‘nɛ́, ɛ̀nɛ̀ kpáí laa, 3ɛ̀nɛ̀ kúr ɛ̀ɛ̀ yák si Bɛtɛl. Nɛ́ sɛn hi̧i̧ a̧‘m tɛ de gasa tua-wor-sɔ̧ kɔ‘m, nɛ zia so aia-nú kɔ‘m ŋgimbi n'am duka so zaŋ bɔnɛ; a̧ duka in am tɛ yuwar n'am baa tɛnɛ.» 4Wa mɔi̧a o sɔ̧ ko o gɛnɛ nɛ yaa so er-wa in o wele nɛ wa aa so zer-wa, ɓɛɛ Jakob kai mɔɔ nɔ‘i lɛŋ nɛ́ɛ̀ yur ɗɔɔ kunin gasa te nɛ a̧a̧ sɛn Sikɛm.
5Ŋgimbi nɛ wa kura gbagari, Sɔ̧ pi̧i̧ gasa kíì tɛ o ye nɛ yaa so zik fara'i. Ŋma bíí kpɔk nɛ ndaka ɗoŋ o bem ko Jakob bo na. 6Jakob in o bíí lɛŋ nɛ yaa so in a̧ hɔɔ sɛn Luz nɛ‘i sa'e Bɛtɛl sɛn nú Kanaŋ. 7A̧ mboo fara-ɗafi-sɔ̧ hi̧i̧, ɓɛɛ a̧ a nin fara'i Bɛtɛl, wen Sɔ̧ usa so tɛ ha̧ a̧ sɛn hi̧i̧, ŋgimbi n'aa yuu so nɛ nya-a̧ Esau. 8Nɛ́ hi̧i̧ a̧ geɗek nàà ko Rebeka, Debɔra fea, ɓɛɛ wa gun a̧ sɛn Bɛtɛl, ɗɔɔ gasa te,#35.8 gasa te: te’ɛ nɛ́ chêne, nɛ̀ hɔɔ ŋmaa in sumbu. ɓɛɛ wa a nin fara'i Te-kɔ̧a.
9Sɔ̧ usa tɛ ha̧ Jakob woyo ŋgimbi n'aa pia nɛ ɗoŋ nɛ bɔkɔ-nú Aram; Sɔ̧ toka de yoŋgo zu a̧, 10tɔ̧ nɛnɛ:
«Nin-mɛ nɛ́ Jakob,
ɓɛɛ wa beka sa mɛ‘e Jakob ɓɔna;
kinii wa tɛ sa mɛ‘e Israɛl.»
Ɓɛɛ Sɔ̧ sa nin-a'e Israɛl.#Ku̧u̧ 32.28
11Sɔ̧ tɔ̧ɔ̧ ha̧ a̧ woyo:
«Mi nɛ Sɔ̧ nɛ a̧a̧ nɛ ŋgayamɔ lɛŋ.
Mɛ̀ kó bem, ɛ̀nɛ̀ dɔ́k siti;
o dukbíí in o dɔka gíí dukbíí tɛ gbo nɛ tɛ-mɛ,
o gasa wannu tɛ gbo nɛ tɛ-mɛ.#Ku̧u̧ 17.4-8
12«Nù n'am ha̧a̧ ha̧ Abraham in ha̧ Izak, mi ha̧a̧ ha̧ mɛ; ɓɛɛ mi tɛ ha̧ nù'ɛ ha̧ o bezaŋ-mɛ mɛ ɗoŋ.» 13Sɔ̧ kura yak nyɛi̧ nɛ Jakob tɛ fara n'aa duka sɛnɛ tɔ̧ nɛ wen ha̧ a̧. 14Jakob baa ta e ŋgɔn sɛn fara nɛ Sɔ̧ duka tɔ̧ nɛ wen in a̧‘i, ɓɛɛ a̧ tɛn zu-dɔ̧ɔ̧ in nɔ̧́ a zu-a.#Ku̧u̧ 28.18-19 15Jakob aa nin fara'i Bɛtɛl, wen Sɔ̧ tɔ̧ɔ̧ wen in a̧ sɛn hi̧i̧.
Fio ko Rachɛl
16Wa kura Bɛtɛl; oi yuwar ɓɔna tikiɗi ha̧ wa mɛ hɔ sɛn Efrat, ɓɛɛ Rachɛl ko. Koa-a'i duka nɛ ŋgayamɔ nyɛmna. 17Hee mɔ'ɔ nɛ koa-a'i duka nɛ ŋgayamɔ ga, kó-bà-kɔra tɔ̧ɔ̧ ha̧ a̧: «Ká mɛ́ de kíì na, wen mɛ kpaa be-wiwii woyo.» 18Ŋgimbi n'aa hɛɗa fio kaɗi, ɓɛɛ a̧ a nin bem’ɛi nɛ́ Bɛn-Ɔni, wen nɛ tɔ̧ «Be-Bɔnɛ»; ɓɛɛ dáà kɔ̧-a̧ saa kɔ‘i nɛ́ Bɛnjamin, wen nɛ tɔ̧, «Be-wii-er».
19Rachɛl fea, ɓɛɛ wa gun a̧ sɛn ká̧ yuwar nɛ̀ nɛ́ si Efrat nɛ‘i sa'e Bɛtlɛhɛm. 20Jakob baa ta e ŋgɔn zu pɛsi-fio ko Rachɛl, nɛ duk kana hɔ sɔsɔɔ‘i.
21 Israɛl kura gbagari, ɓɛɛ a̧ nɛ́ɛ̀ de tua-laa kɔ̧-a̧ si sɛn ká̧ Migdal-Edɛr mɛ.
O bezaŋ Jakob
22Ŋgimbi nɛ Israɛl ɓɔna so fara'i, ɓɛɛ Rubɛn nɛɛ ɔ in Bilha nɛ̀ duka nɛ́ ŋma kóò ko dáà kɔ̧-a̧, ɓɛɛ wen mɔ‘i a zer Israɛl.#Ku̧u̧ 49.4
Jakob duka nɛ̀ o bem ɓu-zua-yiitoo. 23O bem ko Lea nɛ́ mɔ'ɔ: kaya-bem ko Jakob nɛ́ Rubɛn, hɔ-ɗoŋ-aa nɛ́ Simɛɔŋ, Levii, Juda, Isakar in Zabulɔŋ. 24O bem ko Rachɛl nɛ́ Jozɛf in Bɛnjamin. 25O bem ko Bilha kó-de-tom ko Rachɛl nɛ́ Dan in Nɛftalii. 26O bem ko Zilpa, kó-de-tom ko Lea nɛ́ Gad in Asɛr. Ɛ̧ɛ̧ nɔ'ɔ nɛ́ o bem nɛ̀ Jakob koo sɛn bɔkɔ-nú Aram.
Fio ko Izak
27Jakob hɔɔ sɛn fara-duk ko dáà kɔ̧-a̧ Izak, sɛn Mambre, nin fara'i nɛ́ Kiriat-Arba nú Hebrɔŋ; nɛ́ fara'i a̧ Abraham in Izak yaa so sɛnɛ.#Ku̧u̧ 13.18 28-29Izak dee nɛ́ pɛ gɔmŋmaa-nɛ-ɓu-mɔɔrɔ-ɗoŋ-taar; a̧ kpaa pɛ nɛ̀ dɔka-a in a̧ zɔka wese ɗoŋ-aa nyɛi̧ mbɛt, ɓɛɛ a̧ fe. Wa guna a̧ mgbara o bíí kɔ̧-a̧, ɓɛɛ nɛ́ o bem kɔ̧-a̧ Esau in Jakob a̧ guna guna a̧.
Currently Selected:
KU̧U̧NAŊMƆ 35: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
