TOM 7
7
Tɔ̧ɔ̧-wen ko Etienne
1Gasa wan-ɗafi-sɔ̧ aka a̧: «Nɛ́ kpasawen nɛ̀ mbetɛ?» 2Ɓɛɛ Etienne kifi nú ha̧ wa: «O nya'm in o dáà kɔ‘m, ɛ̀nɛ̀ zìì: Sɔ̧ ko gasamɔ usa tɛ-wi ha̧ zɔmdáa k’ɛ́ɛ́ Abraham nɛti sɛn nú Mesopotamii mɛ sɛka a̧ bé tɛ̀ɛ́ gbin si Haraŋ.#Ku̧u̧ 12.1 3Nɛ́ mɔ'ɔ nɛ̀ Sɔ̧ tɔ̧ɔ̧ ha̧ a̧: ‹Mɛ̀ é nù kɔ-mɛ in nàm kɔ-mɛ duk, á̧ mɛ̀ yák sitɛ nù n'am tɛ usi ha̧ mɛ‘i.› 4Abraham kura e nù ko o be Kaldee duk, ɓɛɛ gbin si Haraŋ mɛ. Nɛ́ ɗoŋ fio ko dáà kɔ̧-a̧ á̧ Sɔ̧ tɔ̧ɔ̧ ha̧ a̧‘e a̧ a̧ tɛ́ píí fara n’ɛnɛ ya sɛnɛ kinii’ɛ.#Ku̧u̧ 11.31; 12.4 5Sɔ̧ ha̧ ŋma fara ha̧ a̧ tɛ nù'ɛ na, kóó be fara-yor-sɛnɛ mbɛt bo na. Ɓɛɛ Sɔ̧ ha̧a̧ nú ha̧ a̧‘e wi tɛ ha̧ nù'ɛ lɛŋ ha̧ a̧ in o bezaŋ-aa mbɛt. Ŋgimbi'i, ɓɛɛ ká Abraham tɛ ko bem na.#Ku̧u̧ 12.7; 13.15; 15.18; 17.8 6Wen nɛ̀ Sɔ̧ tɔ̧ɔ̧ so ha̧ Abraham nɛ́ mɔ'ɔ: ‹O bezaŋ mɛ tɛ ya ŋma gɔni-nù, ɓɛɛ o be-nù‘i tɛ de wa nɛ̀ bara usi nɛ̀ bɔnɛ ha̧ wa tɛ pɛ gɔmŋmaa naar.›#Ku̧u̧ 15.13-14 7Sɔ̧ tɔ̧a̧: ‹Nɛ́ mi nɛ̀ tɛ‘m a̧ tɛ gɔn kita zu tugun bíí nɛ̀ tɛ de wa nɛ̀ bara'i, ɓɛɛ mɛ ɗoŋ o bezaŋ-mɛ tɛ pii ɗoŋ mɛ ɗaf'am sɛn fara’ɛ.›#Gboa-a 3.12 8Nɛ́ mɔ'ɔ nɛ̀ Sɔ̧ ha̧a̧ heembea gɔna-bɔr ha̧ Abraham mɛ usi nɔɔ-tɔk kɔ-wa in ŋmaa. Mɛ̀ nɛ́ hegɔ, Abraham koo Izak, ɓɛɛ gɔn bɔr-aa ɗoŋ zɛ mɔɔrɔ-ɗoŋ-taar, Izak dee hegɔ in Jakob, ɓɛɛ Jakob de kale mɔ‘i in o zɔmdáa ɓu-zua-yiitoo mbɛt.#Ku̧u̧ 17.10-14; 21.2-4; 25.26; 29.31—35.18
9«O zɔmdáa ee see tɛ Jozɛf, ɓɛɛ wa ɗɔr a̧ si Egiptɛ mɛ. Nɛ́ mɔ'ɔ nɛ̀ Sɔ̧ duka in a̧.#Ku̧u̧ 37.11,28; 39.2,21 10Sɔ̧ gboo Jozɛf tɛ bɔnɛ‘i yinɛ, ɓɛɛ ha̧ de sɔnti in iŋa-mgbara-mɔ ha̧ a̧ ti Faraɔŋ wannu Egiptɛ, ɓɛɛ wannu e a̧ nɛ̀ gasawi zu nú Egiptɛ lɛŋ gú nɛ̀ o mɔɔ kɔ̧̀ kira kɔ̧-a̧ mbɛt.#Ku̧u̧ 41.39-41 11Gasa kaɓa tika nú Egiptɛ lɛŋ in nú Kanaŋ mbɛt; bɔnɛ a̧a̧ so sɛnɛ nyɛmna, ɓɛɛ o zɔmdáa k’ɛɛ kpa mɔɔ-nyɔŋ na.#Ku̧u̧ 42.1-2 12Ŋgimbi nɛ̀ Jakob zia'e nyɔŋmɔ a̧a̧ sɛn nú Egiptɛ wó, a̧ toma o zɔmdáa k’ɛɛ nɛnɛ war kpɔk. 13Ɓɛɛ mɛ̀ nɛ́ tɛ yiitoo nɔ̀ a̧ Jozɛf usa nɛ̀ tɛ-wi ha̧ o nya-wi; nɛ́ kale ŋgimbi'i a̧ Faraɔŋ iŋa nɛ̀ tugun-aa mbɛt.#Ku̧u̧ 45.1,16 14Nɛ́ mɔ'ɔ nɛ̀ Jozɛf pi̧i̧ tom, nɛ́ɛ̀ sa dáà kɔ‘i Jakob in o bíí kɔ‘i; wa lɛŋ duka so nɛ́ o bíí ɓu-mɔɔrɔ-ɗoŋ-yiitoo-zua-mɔɔrɔ.#Ku̧u̧ 45.9-10; 17.18; Ku̧u̧ 46.27 15Jakob gbina ye si Egiptɛ, ɓɛɛ nɛ́ sɛn hi̧i̧ a̧ a̧ fea in o zɔmdáa k’ɛɛ mbɛt.#Ku̧u̧ 46.1-7; 49.33 16Wa kaia wa si Sikɛm nɛ́ɛ̀ gun sɛn kɔ̧́ pɛsi-fio nɛ̀ Abraham hi̧fa so nɛ̀ sede er o bem ko Emɔr dáà ko Sikɛm.#Ku̧u̧ 23.3-16; 33.19; 50.7-13; Jos 24.32
17«Ŋgimbi nɛ̀ ha̧a̧nú ko Sɔ̧ ha̧ Abraham hɛɗa mɛ hɔ gba̧a̧ kaɗi, dukbíí Israɛl dɔka gan kuti-a sɛn nú Egiptɛ.#Gboa-a 1.7-8 18Ɓɛɛ tɛ ŋgimbi'i, mbe wannu Egiptɛ iŋ so kɔ‘i Jozɛf na. 19Mbe wannu'i yɔkɔi dukbíí k’ɛɛ, usi nɛ̀ bɔnɛ ha̧ o zɔmdáa k’ɛɛ, ɓɛɛ a̧ de o bíí k’ɛɛ nɛ̀ doole mɛ kai o bem kɔ-wa a zan ha̧ wa mɛ fe.#Gboa-a 1.10-11,22 20Nɛ́ tɛ ŋgimbi'i a̧ wa kòó nɛ̀ Moisɛ; a̧ duka nɛ́ gba de bem nyɛmna yí Sɔ̧, ɓɛɛ o dáà kɔ̧-a̧ kas'a kɔ̧́ tua kɔ-wa tɛ fio-zɛ taar.#Gboa-a 2.2 21Nɛ́ mɔ'ɔ nɛ̀ wa baa a̧ e zan, ɓɛɛ boko-bem ko Faraɔŋ ba a̧ mɛ́ dai hee mgbák bem kɔ‘i ga.#Gboa-a 2.3-10 22Moisɛ kpaa iŋa-mgbara-mɔ ko o bíí Egiptɛ lɛŋ, a̧ duka nɛ́ ŋga-wi tɛ tɔ̧ɔ̧-wen in tɛ deemɔ mbɛt.
23«Nɛ̀ pɛ-a dee ɓu-naar kaɗi, a̧ taa mɔ mɛ si ɗoŋ mgbara o nya-a̧ o be Israɛl.#Gboa-a 2.11-15 24Moisɛ zɔka ŋma be Egiptɛ nɛ̀ usi bɔnɛ ha̧ ŋma be Israɛl, a̧ yee biro zu nya-a̧, ɓɛɛ mbɛr be Egiptɛ‘i gbɛ. 25A̧ ta kɔ̧-a̧‘e o nya-a̧ tɛ iŋ‘e nɛ́ Sɔ̧'ɔ̧ toma a̧ tɛnɛ mɛ kpasi wa wó, ɓɛɛ o nya-a̧ iŋ kɔ‘i hegɔ na. 26Mɛ́ sa̧a̧mɔ Moisɛ nɛ̀ɛ̀ kpa o ŋma nya-wi fara dee biro in ŋmaa; a̧ ama wa, ɓɛɛ tɔ̧: ‹O sɛm kɔ‘m, ɛ́nɛ́ nɛ́ o nya-wi, ɛ́nɛ́ usi bɔnɛ ha̧ ŋmaa wen ge?› 27Nɛ́ mɔ'ɔ nɛ̀ wi-usi-bɔnɛ ha̧ ɓii wi ira Moisɛ si ɗoŋ, ɓɛɛ tɔ̧: ‹Wi nɛ̀ ee mɛ nɛ̀ wan in wi-gɔn-kita zu yɛ nɛ́ o? 28Mɛ kɔ̧ɔ̧ mɛ gbɛ‘m hee mɔ'ɔ nɛ̀ mɛ gbɛɛ nɛ̀ be Egiptɛ mɛ mboyɛɛ'ɛ ga?› 29Nɛ̀ Moisɛ zia wen'i, a̧ yuu mɔ yak si gɔni-nù, nɛ́ɛ̀ duk nú Madiaŋ mɛ, ɓɛɛ a̧ ko bem yiitoo hi̧i̧.#Gboa-a 18.3-4
30-31«Moisɛ dee pɛ ɓu-naar hi̧i̧, ɓɛɛ betom mɛ yiwese tɛ tɛ-a zaŋ leɓe-wee tɛ be te. Ɗɛɗɛ Moisɛ gɔna tɛ mɔ n'aa zɔka ŋga-gbárà ká̧ naŋ kaya Sinai mɛ. Nɛ́ mɔ'ɔ n'aa ɗɔŋa siti mɛ zɔk mɔ‘i nɛ̀ sa̧a̧-a̧, ɓɛɛ a̧ zii nɛ́ tiger Gasa Wan nɛ̀ tɔ̧ ha̧ a̧‘e:#Gboa-a 3.1-10 32‹Mi nɛ́ Sɔ̧ ko o zɔmdáa kɔ-mɛ, Sɔ̧ ko Abraham, Izak, in Jakob.› Zia wen'i nɛ̀ Moisɛ zia hegɔ, kíì dee a̧, tɛ-a nak nɛnɛ tututu, ɓɛɛ a̧ pi̧ nú tɛ zɔka mɔ‘i siti ɓɔna. 33Ɓɛɛ Gasa Wan tɔ̧ ha̧ a̧ woyo: ‹Mɛ̀ kpɔ̧́í̧ ndárà naŋ-mɛ yinɛ, wen fara nɛ̀ mɛ yor sɛnɛ'ɛ nɛ́ sa̧a̧ fara. 34Mi zɔka bɔnɛ nɛ̀ dukbíí kɔ‘m ya sɛnɛ nú Egiptɛ‘i, mi zia gɔfamɔ kɔ-wa mbɛt, ɓɛɛ s'am tɛ mɛ gbo wa. Mɛ̀ tɛ́ ha̧‘m tom mɛ nɛnɛ si Egiptɛ mɛ.›
35«Moisɛ nɛ̀ o be Israɛl tɔ̧ɔ̧ so'e: ‹Wi nɛ̀ ee mɛ nɛ̀ wan in wi-gɔn-kita zu yɛ nɛ́ o› ndé'ɛ, nɛ́ kale Moisɛ‘i a̧ Sɔ̧ toma mɛ́ ɔ wan zu wa, kpasi nɛ̀ wa mbɛt. Nɛ́ betom mɛ yiwese nɛ̀ tɛ̀ɛ̀ tɛ Moisɛ zaŋ leɓe-wee tɛ be te a̧ tɔ̧ɔ̧ so tom'i ha̧ a̧.#Gboa-a 2.14 36Nɛ́ Moisɛ‘i a̧ mgbɔɔ so wa gbonɛ nɛ̀ nú Egiptɛ, de nɛ̀ o mɔɔ-gɔn-ɗɛɗɛ in o mɔɔ-usi-mɔ tɛ nú Egiptɛ‘i, in sɛn ká̧ Gbɛ̧ gba-tɔp ká bá nɛ̀ ŋga-gbárà sɛn tɛ pɛ ɓu-naar.#Gboa-a 7.5; 14.21; Tɔra-bíí 14.33 37Nɛ́ Moisɛ a̧ tɔ̧ɔ̧ ha̧ o be Israɛl‘e: ‹Sɔ̧ tɛ hok ŋma wi-tɔ̧-wen oi nú Sɔ̧ hee mi ga sɛn mgbara o nya'nɛ́ h’ɛ́nɛ́.›#Wee-ɗoŋ-he 8.15,18 38Gasa mɔi̧a-a dee so ŋga-gbárà mɛ, ɓɛɛ nɛ́ Moisɛ a̧ duka so mgbara betom mɛ yiwese in o zɔmdáa k’ɛɛ; betom mɛ yiwese duk kɔ‘i zu kaya Sinai mɛ tɔ̧ nɛ̀ wen ha̧ a̧; ɓɛɛ a̧ tɛ̀ɛ̀ we ɗoŋ-aa h’ɛ́ɛ́. Wen'i nɛ́ wen-duka-kpasa.#Gboa-a 19.1—20.17; Wee-ɗoŋ-he 5.1-33
39«Ɓɛɛ o zɔmdáa k’ɛ́ɛ́ kɔ̧ mɛ́ mbo zu ha̧ Moisɛ na, wa bɛ̧ɛ̧ a̧, ɓɛɛ see-wa ɓɔn si Egiptɛ mɛ. 40Nɛ́ mɔ'ɔ nɛ̀ wa tɔ̧ɔ̧ ha̧ Arɔŋ: ‹Ɛ̀nɛ̀ dúí o sɔ̧ nɛ̀ tɛ duk ti h’ɛ́ɛ́, wen wi nɛ̀ mgbɔɔ yɛ gbonɛ nú Egiptɛ nɛ́ Moisɛ, ɓɛɛ ɛ́ɛ́ iŋ mɔ nɛ̀ kpaa a̧ kinii na.›#Gboa-a 32.1 41Nɛ́ mɔ'ɔ nɛ̀ wa duia be-ndai, ɓɛɛ wa ɗaf'a, de nɛ̀ gbaŋa nɛ̀ tortɛ zu mɔ nɛ̀ wa dee nɛ er.#Gboa-a 32.2-6 42Ɓɛɛ Sɔ̧ e wa duk, ha̧ wa mɛ gasi o sɔra mɛ yiwese, hee mɔ'ɔ nɛ̀ yɔra so zaŋ kalata ko o wi-tɔ̧-wen oi nú Sɔ̧‘e:
‹O be Israɛl, tɛ pɛ ɓu-naar
n’ɛnɛ dee ŋga-gbárà'ɛ,
ɛ́nɛ́ gbɛɛ so ŋma saɗi ɗafi nɛ‘m?#Amɔs 5.25-27
43Ɛ́nɛ́ tuia nɛ́ tua-laa ko Mɔlɔk
in sɔra ko Refan sɔ̧ k’ɛ́nɛ́;
nɛ́ ɛ́nɛ́'ɛ dee o mɔɔ nɔ‘i mɛ gasi.
Wen zu mɔ‘i n’ɛnɛ dea'i,
mi tɛ kai'nɛ́ yaknɛ si ɗoŋ Babilɔŋ mɛ.›
44«O zɔmdáa k’ɛ́ɛ́ a̧a̧ so nɛ̀ tua-laa sɛn ŋga-gbárà mɛ, mɛ usi'e Sɔ̧ a̧a̧ mgbara wa; nɛ́ Sɔ̧ a̧ tɔ̧ɔ̧ so ha̧ Moisɛ, ɓɛɛ usi ha̧ a̧ mɛ de tua hee wan nɛ̀ Sɔ̧ usa so ha̧ a̧‘i ga.#Gboa-a 25.9,40 45O zɔmdáa k’ɛɛ kpaa tua-laa'i ɓɛɛ ba ye nɛ̀ nù ko o tugun bíí nɛ̀ Sɔ̧ ndaka yinɛ ti wa; wi nɛ duka zu wa nɛ́ Josue, ɓɛɛ tua-laa'i duk hɔ ŋgimbi ko David mbɛt.#Jos 3.14-17 46Sɔ̧ ha̧a̧ de sɔnti ha̧ David, ɓɛɛ David ak mɛ de fara-duk ha̧ Sɔ̧ ko Jakob.#2 Sam 7.1-16; 1 Kal Ny 17.1-14 47Ɓɛɛ mɛ̀ nɛ́ Salomɔŋ a̧ dee dee tua'i ha̧ a̧.#1 Wan 6.1-38; 2 Kal Ny 3.1-17
48«Ɓɛɛ Sɔ̧ nɛ̀ duk ŋgɔn mɛ‘i ɔ kɔ‘i kɔ̧ tua nɛ bíí dee nɛ er na. Wen wi-tɔ̧-wen oi nú Sɔ̧ tɔ̧ɔ̧ so'e:
49‹Yiwese nɛ́ damti kɔ‘m,
ɓɛɛ mbɔɗɔnu nɛ́ gboŋgoe-e-ɗɔɔ naŋ-am.
Gasa Wan tɔ̧a̧:
Nɛ́ ge tua ge ɛ̀nɛ̀ tɛ de so ha̧‘m ge?
Nɛ́ ge fara ge a̧‘m tɛ ɔm tɛ‘m sɛnɛ ge?#Es 66.1-2
50O mɔɔ nɔ'ɔ lɛŋ'ɛ,
bó nɛ́ mi'i dee nɛ̀ er-am na?›
51«Ɛ́nɛ́ nɛ́ o wi-ŋgazu, ɛ́nɛ́ zii wen nú Sɔ̧ na, ɛ́nɛ́ mbo zu ha̧ a̧ na mbɛt. Ta-oi-mɔ k’ɛ́nɛ́ nɛ́ bɛ̧ɛ̧ wen nú Sa̧a̧ Ɔmi. Ɛ́nɛ́ baa nɛ́ tom ko o zɔmdáa k’ɛ́nɛ́.#Es 63.10 52Ŋma wi-tɔ̧-wen oi nú Sɔ̧ nɛ̀ o zɔmdáa k’ɛ́nɛ́ usi bɔnɛ ha̧ wa na nɛ́ o? Wa gbɛɛ o wi nɛ̀ tɔ̧ɔ̧ wen tɛa-a ko wi-de-mɔ nɛ̀ yuwar-a; wi’ɛi nɛ́ mɔ'ɔ n’ɛnɛ ee so ɗɔra tɛ-a, ɓɛɛ k’ɛ́nɛ́ gbɛ a̧ yinɛ'ɛ. 53Nɛ́ o betom mɛ yiwese a̧ baa heembea ko Sɔ̧ tɛnɛ, ɓɛɛ ɛ́nɛ́ kasi na.»
Fio ko Etienne
54Wen'i yee tɛ-wa nyɛmna, ɓɛɛ wa nyɔŋ ndàrà-nú-wa sitɛ Etienne. 55Etienne duna nɛ̀ Sa̧a̧ Ɔmi, ɓɛɛ a̧ mbaɗi yiwese fééé; nɛ́ mɔ'ɔ n'aa zɔka gasamɔ ko Sɔ̧ in Jesu nɛ̀ yor nɛ̀ war wii-er Sɔ̧. 56Ɓɛɛ a̧ tɔ̧: «Mi zɔka yiwese hu̧i̧a̧ bóóŋ, in Bem ko bíí nɛ̀ yor nɛ̀ war wii-er Sɔ̧.» 57Wa kpee zer-wa tɛ wen'i, ɓɛɛ wa a nú tɛ hiɗimɔ, ma nɛ̀ yì lɛŋ nɛ́ɛ̀ tik tɛ Etienne. 58Wa gbura a̧ si ɗoŋ ye, ɓɛɛ wa ku̧ naŋ yoo a̧ nɛ̀ ta. Nɛ́ mɔ'ɔ nɛ̀ o wi-sedaako kpɔ̧i̧a̧ o laa kɔ‘i a er ŋma be ŋgaiwi, nin-a'e Saul. 59Ŋgimbi nɛ̀ wa yo nɛ̀ Etienne, Etienne kɔfa Sɔ̧, tɔ̧ nɛnɛ‘e: «Gasa Wan Jesu, ɛ̀nɛ̀ kpɛ́k sɔ̧-tɛ‘m.» 60Nɛ́ mɔ'ɔ n'aa gbɛɛ zugur-aa nù, hiɗi mɔ nɛ̀ ŋgaya-a, ɓɛɛ tɔ̧: «Gasa Wan, k’ɛ́nɛ́ e ɗaŋmɔ'ɛ zu o wi nɔ'ɔ na.» Ɗoŋ tɔ̧ɔ̧ wen'i, ɓɛɛ a̧ fe.
Currently Selected:
TOM 7: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
