TOM 6
6
Hoka o bíí mɔɔrɔ-ɗoŋ-yiitoo
1Ŋgimbi'i, o ŋgaiwi ko Jesu ku̧u̧ naŋ dɔka-a nyɛmna, ɓɛɛ o Juif-tɔ̧-nú grɛk ku̧i̧ mɔ zu o Juif mɛ Jerusalɛm; wen tɛ̀ kɛ̧ɛ̧ nyɔŋmɔ ha̧ o ko-gera dam ɗoŋ wese lɛŋ, wa ha̧ kpasamɔ ha̧ o ko-gera Juif nɛ̀ tɔ̧ nú grɛk na, na. 2Nɛ́ mɔ'ɔ nɛ̀ o betom ɓu-zua-yiitoo mɔi̧a o ŋgaiwi ko Jesu lɛŋ tɛ kpɔk fara, ɓɛɛ tɔ̧ ha̧ wa: «Bó nɛ́ ɔ dee h’ɛ́ɛ́ mɛ e tom-tɔ̧ɔ̧-wen ko Sɔ̧ duk wen kɛ̧ɛ̧ nyɔŋmɔ na. 3O nya-ɛɛ, ɛ̀nɛ̀ hók o bíí mɔɔrɔ-ɗoŋ-yiitoo mgbara'nɛ́, o bíí nɛ̀ wen-tɛ-wa ɔ dee, ɛ̀ɛ̀ é tom'i er-wa. O wi nɔ‘i tɛ́ duk nɛ́ o bíí nɛ̀ duna nɛ̀ Sa̧a̧ Ɔmi in iŋa-mgbara-mɔ. 4Ɓɛɛ nɛ̀ war k’ɛɛ, ɛ́ɛ́ tɛ e see-ɛɛ tɛ kɔfa-sɔ̧, tɔ̧ nɛ̀ Wen ko Sɔ̧ nɛnɛ ɓɔnsɛnɛ.» 5Wen'i dee tɛ o wi nɛ̀ mɔi̧a'i lɛŋ, ɓɛɛ wa hok Etienne, nɛ̀ duna nɛ̀ kɔ̧ɔ̧ɗɔɔwen, in nɛ̀ Sa̧a̧ Ɔmi mbɛt; ká bá nɛ̀ Filip, Prɔkɔr, Nikanɔr, Timɔŋ, Parmenas in Nikola be Antiok nɛ̀ ndak pata yuwar-kia-sɔ̧ ko o Juif. 6Wa ee wa ti o betom ko Jesu, nɛ́ mɔ'ɔ nɛ̀ o betom kɔfa Sɔ̧ kaɗi, ɓɛɛ e er zu wa.
7Wen ko Sɔ̧ pɛsa siti, ɓɛɛ o ŋgaiwi ko Jesu dɔk sɛn Jerusalɛm gan kuti-a; gba gíí o wi-ɗafi-sɔ̧ kpɛka kɔ̧ɔ̧ɗɔɔwen mbɛt.
Wa baa Etienne
8Sɔ̧ dee mɔ nɛ̀ ta-tɛ nyɛmna ha̧ Etienne, ha̧ nɛ̀ ŋgai ha̧ a̧ mbɛt, ɓɛɛ Etienne de o kpasa mɔɔ-gɔn-ɗɛɗɛ in o mɔɔ-usi-mɔ mgbara o bíí. 9Nɛ́ mɔ'ɔ nɛ̀ o ŋma Juif mɛ́ Sirɛn in Alɛkzandrii nɛ̀ duka so mɔi̧ kɔ̧́ tua-mɔi̧a-a ko o bara nɛ̀ kpaa zu in o ŋma Juif mɛ́ Silisii ká bá nɛ̀ Azii mbɛt nɛ̀ɛ̀ si kafɛ in Etienne. 10Ɓɛɛ wen kɔ-wa nyɛm mɛ gan wen ko Etienne nɛ̀ tɔ̧ nɛ̀ iŋa-mgbara-mɔ, in nɛ̀ ŋgai ko Sa̧a̧ Ɔmi ma. 11Nɛ́ mɔ'ɔ nɛ̀ wa yee o ŋma bíí nɛ̀ mbɔi mɛ tɔ̧‘e: «Ɛ́ɛ́ nɛ̀ tɛ-ɛɛ, ɛ́ɛ́ zia ɗaŋa nin Moisɛ in nin Sɔ̧ n'aa ɗaŋ‘i.» 12Wa aa wen ha̧ o bíí in o kuti-wi ká bá nɛ̀ o wi-usi-heembea, ɓɛɛ wa nɛ́ɛ̀ tik tɛ Etienne, ba a̧ yaknɛ ti gasa gɔna-kita mɛ. 13Nɛ́ mɔ'ɔ nɛ̀ wa foo o bíí tɛnɛ mɛ tɛ̀ɛ́ ɓir wen-ndela e nú-a'e: «Wi’ɛ n’ɛnɛ zɔk’ɛ kaɗi tɔ̧ɔ̧ ɗaŋ wen zu sa̧a̧-fara in zu heembea na. 14Ɛ́ɛ́ zia wen n'aa tɔ̧a̧‘e, Jesu be Nazarɛt tɛ ɗaŋ fara’ɛ yinɛ, ɓɛɛ a̧ kpaia yuwar-duka-a nɛ̀ Moisɛ usa so h’ɛ́ɛ́ lɛŋ.» 15O wi-ba-keta lɛŋ mbaɗa Etienne, ɓɛɛ wa zɔk sɔnti-a nɛ̀ tok hee sɔnti betom mɛ yiwese ga.
Currently Selected:
TOM 6: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
