TOM 5
5
Ndela ko Ananias in Safira
1Ŋma bíí nin-a'e Ananias ee so nú in kóò kɔ‘i Safira, ɓɛɛ ɗɔr fɔ kɔ-wa mbɛt. 2Wa ee nú in kóò, ɓɛɛ Ananias ba ŋma sede fɔ‘i hu̧si, ɓɛɛ a̧ ba oi-aa nɛnɛ e ti o betom. 3Ɓɛɛ Pierre tɔ̧: «Ananias, wen ge Satan yee kɔ̧́ see-mɛ, ɓɛɛ mɛ́ kai ŋma sede fɔ de nɛ̀ ndela ha̧ Sa̧a̧ Ɔmi ge? 4Bíí tɛ̀ɛ́ de so mɛ́ nɛ̀ ŋgai mɛ́ ɗɔr mɔ kɔ-mɛ nde? Ɓɛɛ kà mɛ́ nɛ́ ɗɔra fɔ‘i, bó nɛ́ mɛ́ tɛ ɗaŋ sede-a hee mɛ kɔ̧a̧ ga na? Dee héé ge sa pɛrti taamɔ hegɔ hɔɔ nɛnɛ zu mɛ ge? Mɛ̀ íŋ‘e ndela nɛ̀ mɛ́ dea'i bó nɛ́ ha̧ bíí na, ɓɛɛ mɛ̀ nɛ́ ha̧ Sɔ̧.» 5Ananias zia wen'i hegɔ, ɓɛɛ tik nù nɛ̀ fio. Ɓɛɛ zɔm kíì ba o bíí lɛŋ nɛ̀ zia nyɛrɛ mɔ‘i. 6O be ŋgaiwi tɛ̀ɛ̀ ye a̧ nɛ̀ ndɔmbɔ, ɓɛɛ wa ba a̧ nɛ́ɛ̀ gun.
7Karkór yaka hee ŋgimbi taar ga, ɓɛɛ kóò ko Ananias tɛ́ɛ̀ ye tua, a̧ iŋ kɔ̧-a̧ mɔ nɛ yaka nɛti na. 8Ɓɛɛ Pierre ak a̧: «Mɛ̀ tɔ̧́ ha̧‘m, fɔ n’ɛnɛ ɗɔra’ɛ, ɓàá sede-a nɛ́ mɔ'ɔ?» Kóò ko Ananias kifa nú ha̧ a̧: «Íì, ɓàá sede-a nɛ́ mɔ‘i.» 9Ɓɛɛ Pierre tɔ̧ ha̧ a̧ woyo: «Héé ge ɛ́nɛ́ ee nú in wíì kɔ-mɛ mɛ́ we Ɔmi ko Gasa Wan ge? Mɛ̀ zíí giti naŋ o wi nɛ̀ nɛ̀ɛ̀ gun wíì kɔ-mɛ nɛ̀ de mɔ nú tua'i; mɛ mbɛt, wa tɛ gɔ mɛ yaknɛ.» 10Tɛ́ wen'i, kóò‘i tika nù ká̧ naŋ Pierre, ɓɛɛ fe. Nɛ̀ o ŋgaiwi yee tua, wa zɔka a̧ fee kaɗi, ɓɛɛ wa ba a̧ nɛ́ɛ̀ gun ká̧ pɛsi ko wíì kɔ̧-a̧. 11Ɓɛɛ zɔm kíì ba o zuduk bíí ko Krist lɛŋ, gú nɛ̀ o bíí lɛŋ nɛ̀ zia nyɛrɛ mɔ nɛ̀ yaka'i.
O mɔɔ-kifi ko o betom
12Sɔ̧ dee o mɔɔ-usi-mɔ in o mɔɔ-gɔn-ɗɛɗɛ nɛ̀ dɔka-a mgbara dukbíí nɛ̀ er o betom ko Jesu. Wa lɛŋ mɔi̧a ya in o ŋmaa sɛn ɗɔɔ Zala ko Salomɔŋ. 13Ŋma bíí mɛ ye mgbara wa bo na, ɓɛɛ dukbíí lɛŋ zɔn nɛ́ wa. 14O gba gíí wiwii in okoo nɛ̀ dɔka-a nɛ̀ kɔ̧ɔ̧ ɗɔaa ha̧ Gasa Wan yee mgbara wa woyo. 15Nɛ́ mɔ'ɔ nɛ̀ o bíí gɔɔ o wi-zɛɛ nɛnɛ e ká̧ war nɛ̀ oi gado in mɔɔ-gɔ-wa, gbakna, gi̧ɔ̧-tɛ Pierre nɛ̀ tɛ ɓir yak'i hɔɔ tɛ-wa. 16O bíí kaia o wi-zɛɛ in o wi nɛ̀ ɗaŋ-sɔ̧ a̧a̧ tɛ-wa tɛnɛ nɛ̀ tɛ o ye nɛ̀ ya zik Jerusalɛm, ɓɛɛ wa kpasi lɛŋ.
Bɔnɛ ko o betom
17See gasa wan-ɗafi-sɔ̧ in o bíí kɔ‘i nɛ̀ ya nɛ́ pɛ́r-bíí nɛ̀‘i sa'e Saduseɛn kura zu o betom ko Jesu. 18Wa toma nɛ́ɛ̀ kai wa a zɔɓɔ sɛn fara ko o ɗaŋ bíí. 19Nɛ́ mɔ'ɔ nɛ̀ ŋma betom ko Gasa Wan tɛ̀ɛ̀ hu̧i̧ nú tua zɔɓɔ mɛ́ zɛ, fo wa gbonɛ, ɓɛɛ tɔ̧ ha̧ wa: 20«Ɛ̀nɛ̀ yák mɔ k’ɛ́nɛ́, ɛ̀nɛ̀ nɛ́ɛ̀ yor kɔ̧́ Tua ko Sɔ̧ tɔ̧ nɛ̀ wen-duka-kpasa ha̧ o bíí lɛŋ.» 21Wa mboo zu tɛ wen'i, ɓɛɛ wa yak si kɔ̧́ Tua ko Sɔ̧ tɛ gɔna-ndaa-zan mɛ́ usi mɔ.
Nɛ́ mɔ'ɔ nɛ̀ gasa wan-ɗafi-sɔ̧ in o bíí kɔ‘i saa gasa gɔna-kita nɛ̀ duk nɛ́ gasa mɔi̧a-a ko o Juif, ɓɛɛ wa tom mɔ mɛ́ nɛ̀ɛ́ kai o betom kɔ̧́ zɔɓɔ mɛ tɛnɛ. 22O wi-biro nɛ̀ɛ̀ hɔ kɔ̧́ tua zɔɓɔ, ɓɛɛ wa kpa o betom ko Jesu na. Wa sii ɗoŋ, ɓɛɛ wa tɔ̧: 23«Ɛ́ɛ́ nɛ̀ɛ̀ kpa nú tua zɔɓɔ nɛ̀ kpea-a nɛ̀ de-a, in o wi-pɛm-nú tua tɛ yora-a mbɛt; k’ɛ̀ɛ̀ tɛ́ hu̧i̧ nú tua, ɓɛɛ ɛ́ɛ́ kpa bíí kóó kpɔk na.» 24Gasawi ko o wi-zɔk-tua ko Sɔ̧ in o gasa wan-ɗafi-sɔ̧ zia wen'i hegɔ, ɗɛɗɛ-wa gɔna, ɓɛɛ wa ak o ŋmaa: «Nɛ́ ge a̧ yaka ge?» 25Dekpaa, ɓɛɛ ŋma bíí hɔ, ɓɛɛ tɔ̧ ha̧ wa: «Zɔ́k, o wi nɔ'ɔ n’ɛnɛ kaia so a zɔɓɔ'ɛ nɛ́ mɔ'ɔ nɛ̀ yor kɔ̧́ Tua ko Sɔ̧ usi nɛ̀ mɔ ha̧ o bíí mɛ‘i.» 26Nɛ́ mɔ'ɔ nɛ̀ gasawi ko wi-biro nɛ̀ɛ̀ in o ŋgaiwi kɔ‘i, kai o betom ko Jesu mɔktɛ nɛ̀ de-a pii ɗoŋ. Kíì dee o wi-biro wen ká o bíí tɛɛ yo wi nɛ̀ ta.
27Wa kaia o betom ko Jesu nɛnɛ a ti gasa gɔna-kita. Ɓɛɛ gasa wan-ɗafi-sɔ̧ ak wa: 28«Ɛ́ɛ́ bàá gɔn geŋa'e k’ɛ́nɛ́ usi mɔ nɛ̀ nin dáa-wan’ɛ ɓɔna. Nɛ́ mɔ'ɔ nɛ̀ kinii usamɔ k’ɛ́nɛ́ dama Jerusalɛm lɛŋ; ɛ́nɛ́ kɔ̧ɔ̧ ha̧ simbo ko wi’ɛi mɛ ba yɛ gɔ?»#Mt 27.25 29Ɓɛɛ Pierre in o betom ko Jesu kifi nú ha̧ wa'e: «Ɛ́ɛ́ tɛ́ mbo zu ha̧ Sɔ̧ gan mbóó zu ha̧ o bíí. 30Mɛ̀ nɛ́ Sɔ̧ ko o zɔmdáa k’ɛ́ɛ́ a̧ kpasa Jesu, wi n’ɛnɛ mgboia so zu te-diŋa gbɛ nɛ̀ a̧. 31Sɔ̧ baa a̧ e nɛ̀ war wii-er; ɓɛɛ e a̧ nɛ Be-wan in Wan-kpasi-wi, wen ha̧ o be Israɛl mɛ kpai duka-a kɔ-wa sɛka wa kpaa ea-ɗaŋmɔ. 32Ɛ́ɛ́ in Sa̧a̧ Ɔmi nɛ̀ Sɔ̧ ha̧ ha̧ o bíí nɛ̀ mbo zu ha̧ a̧ nɛ́ o wi-sedaako o mɔ nɛ̀ dea'i.»
33Wen'i baa tɛ o wi-ba-keta nyɛmna, ɓɛɛ mɔ nɛ̀ wa taa mɛ de in o betom ko Jesu nɛ́ gbɛ́ɛ́ wa yinɛ ɓɛɛ. 34Nɛ́ mɔ'ɔ nɛ̀ ŋma bíí kura yor ti gasa gɔna-kita, wi’ɛi só nɛ́ ŋma Fariziɛn nɛ̀ nin-a'e Gamaliɛl; a̧ nɛ́ wan-usi-heembea nɛ̀ o bíí zɔn nyɛmna; a̧ tɔ̧ɔ̧ ha̧ wa mɛ mgbɔ o betom ko Jesu gbonɛ tikiɗi sɛ́. 35Ɓɛɛ a̧ tɔ̧: «Ɛ́nɛ́ o be Israɛl, ɛ̀nɛ̀ tá mɔ nɛ̀ de-a zu mɔ n’ɛnɛ kɔ̧a̧ mɛ de in o wi nɔ'ɔ. 36Ŋma bíí duka so nɛti, nin-a'e Teudas, a̧ tɔ̧ so kɔ̧-a̧‘e wi nɛ́ kpasa bíí, ɓɛɛ o bíí gɔmŋmaa-naar nɛ́ ɗoŋ-aa; nɛ́ mɔ'ɔ nɛ̀ o bíí gbɛɛ a̧, ɓɛɛ o wi nɛ̀ nɛ̀ɛ̀ so ɗoŋ-aa pɛsi lɛŋ, ɓɛɛ mɔ kɔ̧-a̧ yambali. 37Ɗoŋ mɔ ko Teudas, Judas be Galilee hɔɔ kɔ‘i tɛ ŋgimbi tɔra-bíí; nɛ́ mɔ'ɔ n'aa ɔra gba giiwi sitɛ a̧; o bíí gbɛɛ a̧ mbɛt, ɓɛɛ o wi nɛ̀ ndaka so pata a̧ pɛsi yambali. 38Kà bó nɛ́ kɔ‘m, ɓɛɛ k’ɛ́nɛ́ ndak pata o wi nɔ'ɔ ɓɔna. Ɛ̀nɛ̀ é ha̧ wa yak mɔ kɔ-wa. Wen kà mɔ nɛ̀ wa ta mɛ de in mɔ nɛ̀ wa de'i a̧ tɛ̀ɛ́ nɛ̀ tɛ̀ bíí, ɓɛɛ tɛ yambali sɔɔ géè. 39Ɓɛɛ kà mɔ‘i nɛ̀ wa de'i a̧ tɛ̀ɛ́ nɛ̀ tɛ́ Sɔ̧ nɛ̀ mbetɛ, ɛ́nɛ́ nyɛm mɛ ɗaŋ yinɛ kóó tikiɗi na. K’ɛ́nɛ́ kii biro in Sɔ̧ na.» Ɓɛɛ o wi-ba-keta kpɛk wen kɔ̧-a̧. 40Nɛ́ mɔ'ɔ nɛ̀ o wi-ba-keta saa o betom ko Jesu pii ɗoŋ, gusi wa, ɓɛɛ gɔn geŋa ha̧ wa'e ká wa sa nin Jesu ɓɔna, ɓɛɛ wa a wa nù. 41O betom ko Jesu kura gbo ti gasa gɔna-kita si ɗoŋ nɛ̀ desee, wen nɛ̀ wa nyɛma mɛ zɔk bɔnɛ wen zu nin Jesu. 42Ɓɛɛ dam ɗoŋ wese kpɔk kpɔk wa usa nɛ́ mɔ tɔ̧ nɛ̀ De Mbe Wen kɔ̧́ Tua ko Sɔ̧, in sɛn tɛ ko o bíí mbɛt'e, Jesu nɛ́ Mɛsii.#5.42 Jesu nɛ́ Mɛsii: ó ŋma wí-kpai-kalata tɔ̧a: Dé Mbé Wen kó Jesu Mɛsii.
Currently Selected:
TOM 5: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
