TOM 4
4
Pierre in Jean ti o wi-ba-keta
1O wi-ɗafi-sɔ̧, gasawi ko o wi-pɛm-tua ko Sɔ̧ in o Saduseɛn hɔɔ kpa o Pierre in Jean fara tɔ̧ɔ̧ wen ha̧ o bíí. 2Ɓɛɛ wa kpa ɗaŋsee zu o betom wen wa usi nɛ́ mɔ ha̧ o bíí tɔ̧ nɛnɛ‘e, Jesu kura ŋgɔn tɛ fio, ɓɛɛ hegɔ o bíí tɛ kur ŋgɔn tɛ fio mbɛt. 3Wa tika zu o betom, kai wa a kɔ̧́ zɔɓɔ ha̧ wa mɛ ya hi̧i̧ hɔ mɔɔsa̧, wen ŋgimbi'i mɔ ga̧a̧ so kaɗi. 4Mgbara o wi nɛ̀ zia wen'i, o bíí nɛ̀ dɔka-a kɔ̧ɔ̧ ɗɔaa, ɓɛɛ dɔka wa lɛŋ dee hee booro-mɔɔrɔ ga.
5Mɔ sa̧a̧ kaɗi, ɓɛɛ o kuti-wi ko o Juif, o kuti-wi in o wi-usi-heembea nɛ̀ ya Jerusalɛm mɔi̧ ŋmaa. 6Wese'i gasa wan-ɗafi-sɔ̧ Ha̧n duka so hi̧i̧, in Kaif, Jean, ká bá nɛ̀ Alɛkzandrɛ, in o pɛ́r-nàm ko o wan-ɗafi-sɔ̧ lɛŋ. 7Nɛ́ mɔ'ɔ nɛ̀ wa tɔ̧ɔ̧ ha̧ wa mɛ mgbɔ Pierre in Jean tɛnɛ e ti wa, ɓɛɛ wa ku̧ naŋ aka wa: «Ɛ́nɛ́ dee bɔɔ mɔ'ɔ nɛ̀ ŋgai ko o in nɛ̀ nin o?» 8Sa̧a̧ Ɔmi ha̧a̧ ŋgai ha̧ Pierre, ɓɛɛ a̧ tɔ̧ ha̧ wa: 9«Ɛ́nɛ́ o wan ko o dukbíí in o gasawi, ɛ́nɛ́ de ŋmaa in yɛɛ sɔsɔɔ wen n’ɛɛ dee demɔ in ŋma kara-wi; ɛ́nɛ́ ak yɛ h’ɛ́ɛ́ mɛ tɔ̧ ndaa mɔ nɛ̀ kpasa wi’ɛ h’ɛ́nɛ́. 10Ɛ́nɛ́ in o be Israɛl lɛŋ a̧ íŋ‘e, mɛ̀ nɛ́ nin Jesu Krist be Nazarɛt, wi n’ɛnɛ mgboia so zu te-diŋa, ɓɛɛ ká Sɔ̧ kpas'a tɛ fio, mɛ̀ nɛ́ nin-a á̧ kpasa wi’ɛ nɛ̀ yor yi'nɛ́ n’ɛnɛ zɔk’ɛ. 11Jesu nɛ́ ta nɛ̀ ɛ́nɛ́ o wi-mbo-tua pi̧i̧ so taŋ, ɓɛɛ nɛ́ a̧‘i á̧ kifa duk nɛ́ de kina-ta-e mgbii-tua.#Gima 118.22 12Ŋma yuwar-kpasa-a nɛtɛ yak zu a̧ bo na, wen ŋma nin bíí nɛ̀ Sɔ̧ ha̧a̧ zaŋnu’ɛ nɛ̀ nyɛma mɛ́ kpasi yɛ bo na.»
13Ɗɛɗɛ o wi-ba-keta gɔna tɛ́ tɔ̧ɔ̧-wen ko Pierre in Jean nɛ nɔɔ-ŋgiɗi, wen wa iŋa wa nɛ̀ o géé bíí nɛ̀ bó nɛ̀ kpasa iŋamɔ na, ɓɛɛ wa iŋ‘e wa duka so nɛ́ o gbama-yari ko Jesu. 14Ŋgimbi'i, ká kara-wi nɛ̀ kpasa so'i a̧ yor katɛ wa mbɛt'i, ɓɛɛ o wi-ba-keta kpa ŋma wen mɛ tɔ̧ siti ɓɔna. 15Wa tɔ̧ɔ̧ ha̧ wa mɛ fo Pierre in Jean gbonɛ ti gasa gɔna-kita, ɓɛɛ wa ku̧ naŋ aka o ŋmaa: 16«Ge mɔ ge ɛ̀ɛ̀ tɛ́ de nɛ̀ o wi nɔ'ɔ ge? Wen ɛ́ɛ́ nyɛm mɛ si kafɛ mɔɔ-kifi nɛ̀ wa dea ɓɔn gbaayí o bíí Jerusalɛm’ɛ pi̧ nù na. 17Ɓɛɛ wen ká wa tɛ́ɛ̀ usi mɔ nɛ̀ nin Jesu'i sɛn mgbara o bíí siti, ɛ̀ɛ̀ dé ŋmaa in wa wen ká wa tɛ́ɛ̀ sa nin'i ti ŋma bíí kóó kpɔk ɓɔna.» 18Nɛ́ mɔ'ɔ nɛ̀ wa tɔ̧ɔ̧ ha̧ wa mɛ sa o betom pii ɗoŋ, ɓɛɛ tɔ̧ ha̧ wa'e, ká wa sa nin Jesu, usi nɛ́ mɔ nɛ̀ nin-a ɓɔna.
19Ɓɛɛ Pierre in Jean kifi nú ha̧ wa: «Mɔ nɛ̀ duk nɛ̀ yuwar-a ti Sɔ̧ nɛ́ mboo-zu h’ɛ́nɛ́ náà, kóó nɛ́ mboo-zu ha̧ Sɔ̧? Ɛ̀nɛ̀ kɛ̧́ mgbara-a h’ɛ́ɛ́ zii. 20War k’ɛ́ɛ́, ɛ́ɛ́ beka e dee sedaako zu mɔ n’ɛ́ɛ́ zɔka, in mɔ n’ɛ́ɛ́ zia duk na.» 21O wi-ba-keta dee ŋmaa in wa woyo, mbo nú-wa, ɓɛɛ gbo wa a nù. Wa kpa so yuwar mɛ de ha̧ kita mɛ tik wa na, wen dukbíí nɛ̀ oi-aa lɛŋ nɛ̀ mɔi̧a gasa Sɔ̧ wen mɔɔ-kifi nɛ̀ dea'i. 22Pɛ wi nɛ̀ kpasa tɛ mɔɔ-kifi'i gana pɛ ɓu-naar.
Kɔfa-sɔ̧ ko o bíí ko Sɔ̧
23Ɓɛɛ nɛ̀ wa gboo o Pierre in Jean a nù kaɗi, Pierre in Jean sii ɗoŋ sitɛ o gbama-yari kɔ‘i, ɓɛɛ we ɗoŋ mɔ nɛ̀ o gasa wan-ɗafi-sɔ̧ in o kuti-wi tɔ̧ɔ̧ lɛŋ ha̧ wa. 24Ɗoŋ wee ɗoŋ wen'i, wa lɛŋ kɔfa Sɔ̧ in o ŋmaa hee mɔ'ɔ ga: «Gasa Wan, nɛ́ ɛ́nɛ́'ɛ dee yiwese, nù in yì, ká bá nɛ̀ o mɔ lɛŋ nɛ ya sɛnɛ.#Gboa-a 20.11; Neh 9.6; Gima 146.6 25Nɛ́ ɛ́nɛ́ a̧ ee wen nɛ̀ ŋgai ko Sa̧a̧ Ɔmi nú wi-de-tom k’ɛ́nɛ́, dáà k’ɛɛ David mɛ tɔ̧‘e:
‹O dukbíí dik gɛrɛm wen ge?
O bíí e see tɛ géé tum-mɔ wen ge?#Gima 2.1-2
26O wannu nɛka yor naŋ biro,
ɓɛɛ o be-wan mɔi̧ ŋmaa duk kpɔk
mɛ bi Gasa Wan in wi n'aa tɛna nɔ̧́ a zu-a.›
27«O wannu Herod in Pɔns Pilat, ká bá nɛ̀ o be Juif in o gɔni-dùk mɔi̧a ŋmaa tɛ ye’ɛ mɛ bi sa̧a̧ wi-de-tom k’ɛ́nɛ́ Jesu, wi n’ɛnɛ tɛna so nɔ̧́ a zu-a.#Mt 27.1-2; Mk 15.1; Lk 23.1,7-11; Jn 18.28-29 28Wa dee mɔ‘i wen ha̧ mɔ n’ɛnɛ ɗafa so tɛ ŋgai k’ɛ́nɛ́, nyɛm nɛ̀ ɗoŋ mɔ n’ɛnɛ kɔ̧a̧, mɛ hɔ gba̧a̧. 29Kinii, Gasa Wan, ɛ̀nɛ̀ zɔ́k dee ŋmaa nɛ̀ wa de in yɛɛ‘i, ɓɛɛ ɛ̀nɛ̀ há̧ ŋgai ha̧ o wi-de-tom k’ɛ́nɛ́ mɛ́ tɔ̧ wen k’ɛ́nɛ́ nɛnɛ nɛ̀ nɔɔ-ŋgiɗi. 30Ɛ̀nɛ̀ nyɛ́í̧ er'nɛ́, ɛ̀nɛ̀ kpásí o wi-zɛɛ, ɓɛɛ ɛ̀nɛ̀ dé o mɔɔ-usi-mɔ in o mɔɔ-gɔn-ɗɛɗɛ nɛ̀ nin Jesu, sa̧a̧ wi-de-tom k’ɛ́nɛ́.» 31Wa kɔfa Sɔ̧ kaɗi, ɓɛɛ fara nɛ̀ wa mɔi̧a sɛnɛ nak ɗirr; wa lɛŋ duna nɛ̀ Sa̧a̧ Ɔmi, ɓɛɛ wa tɔ̧ wen ko Sɔ̧ yaknɛ nɛ̀ nɔɔ-ŋgiɗi.
O bíí ko Sɔ̧ kɛ̧ɛ̧ mɔ kɔ‘i nɛ̀ er ŋmaa
32Gba giiwi nɛ̀ kɔ̧ɔ̧ ɗɔaa ha̧ Sɔ̧ duka nɛ̀ see kpɔk in taamɔ kpɔk mbɛt; ŋma bíí mɛ tɔ̧‘e mɔ nɛ‘i a̧a̧ nɛnɛ nɛ́ kɔ‘i ɛ̀nɛ̀-wi wó, bo na; wa lɛŋ aa mɔ kɔ-wa zu ŋmaa.#Tom 2.44-45 33O betom ko Jesu dee sedaako kura-ŋgɔn ko Gasa Wan Jesu tɛ fio nɛnɛ nɛ̀ ŋgai ko Sɔ̧, ɓɛɛ a̧ de gasa demɔ nɛ̀ ta-tɛ ha̧ wa lɛŋ. 34Mgbara o wi nɛ̀ kɔ̧ɔ̧ ɗɔaa ha̧ Jesu lɛŋ, wi nɛ̀ mɔ ɓan a̧ bo na; wen wi nɛ̀ a̧a̧ so nɛ̀ fɔ, kóó tua, nɛ̀ɛ̀ ɗɔr, ɓɛɛ baa mbɔi-a 35nɛnɛ e ti o betom, ɓɛɛ wa kɛ̧ɛ̧ mbɔi-a nɛ̀ ŋmaa, wen ha̧ kóó o ndé mɛ kpa mɔɔ-de-san kɔ‘i.
36Jozɛf ŋma be Siprɛ, bezaŋ o wi-ɗafi-sɔ̧, ŋma nin nɛ̀ o betom aa ha̧ a̧ nɛ́ Barnabas, mɛ̀ nɛ́ wen nɛ̀ tɔ̧‘e: «wi-ha̧-nɔɔ-ŋgiɗi»; a̧ duka so nɛ̀ ŋma fɔ; 37nɛ́ mɔ'ɔ n'aa ɗɔra ɓɛɛ a̧ ba mbɔi-a nɛnɛ e ti o betom.
Currently Selected:
TOM 4: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
