1 WANNU 17
17
Elii in ŋga bɛɛ
1Elii, be Tisbe, bíí Galad tɔ̧ɔ̧ ha̧ Akab: «Hee mɔ'ɔ nɛ̀ GASA WAN Sɔ̧ ko Israɛl n'am de tom ha̧ a̧ duk kpasa ga, tɛ pɛ nɔ'ɔ, kóó mbɛŋ, kóó kórò beka bo na, hɔ ŋgimbi nɛ‘m tɛ ha̧ nú sɛ.»#Jk 5.17
2GASA WAN tɔ̧ɔ̧ ha̧ Elii hee mɔ'ɔ ga: 3«Mɛ̀ kúr fara’ɛ, mɛ̀ nɛ́ si war daŋa-wese, mɛ̀ nɛ́ɛ̀ hu̧si kɔ̧ gboŋgo Kɛrit nɛ̀ duk nɛ̀ war daŋa-wese ha̧ Jurdɛn. 4Hegɔ, mɛ tɛ nɔ foka-yì, ɓɛɛ mi tɔ̧ɔ̧ wen ha̧ o gba-kɔra mɛ ha̧ nyɔŋmɔ ha̧ mɛ hi̧i̧.»
5A̧ nɛɛ ɓɛɛ a̧ de mɔ nyɛm nɛ̀ ɗoŋ wen ko GASA WAN. A̧ nɛɛ ɔ sɛn kɔ gboŋgo Kɛrit nɛ̀ duk nɛ̀ war daŋa-wese ha̧ Jurdɛn. 6O gba-kɔra kai so nɛ brɛt in kpoo tɛnɛ ha̧ a̧ mɛ tutuyɛ in mɛ ga̧a̧mɔ, ɓɛɛ a̧ nɔ so nɛ foka-yì. 7Tɛ ŋma ŋgimbi, yì gɔna mgbót-mgbót.
Elii in ŋma ko-gera sɛn Sarɛpta
8GASA WAN tɔ̧ɔ̧ ha̧ Elii: 9«Mɛ̀ kúr, mɛ̀ nɛ́ si Sarɛpta, ye nɛ zii nɛ̀ Sidɔŋ, mɛ̀ ɔ́ hi̧i̧. Mi tɔ̧ɔ̧ wen ha̧ ŋma ko-gera mɛ ha̧ nyɔŋmɔ ha̧ mɛ hi̧i̧.»#Lk 4.25-26 10A̧ kura yak si Sarɛpta, ɓɛɛ a̧ hɔ nú ye. Ŋma ko-gera a̧a̧ hi̧i̧ nɛ̀ kii so nɛ gua. Elii saa a̧, ɓɛɛ tɔ̧: «Mi kɔfi mɛ, mɛ̀ nɛ́ɛ̀ ɗu ŋma be yì kɔ̧ kpáná-yì kɔ-mɛ tɛnɛ ha̧‘m nɔ!» 11A̧ nɛɛ ɗu tɛnɛ. Elii saa a̧ woyo ɓɛɛ tɔ̧ ha̧ a̧: «Mi kɔfi mɛ, mɛ̀ nɛ́ɛ̀ kii be brɛt tɛ kɔ-mɛ tɛnɛ ha̧‘m!»
12A̧ kifa nú: «Hee mɔ'ɔ nɛ̀ GASA WAN Sɔ̧ kɔ-mɛ duk kpasa ga, mi bó nɛ̀ ŋma nyɔŋmɔ hɛ̧ɛ̧ na, kànà nɛ́ be fuu tikiɗi a̧ ɓɔna ha̧‘m sɛn kɔ̧ kpánà, in be nɔ̧́ tikiɗi kɔ̧ yèè ɓɛɛ. Ŋgimbi n'am tɛ dɔr be gua kaɗi, mi tɛ si ɗoŋ, ɓɛɛ mi tɛ gi o nyɔŋmɔ nɔ‘i wen am in bem kɔ‘m; ɛɛ tɛ nyɔŋ wa kaɗi, ɓɛɛ ɛɛ yaa zɛm nɛ̀ fio ɓɛɛ.»
13Elii tɔ̧ɔ̧ ha̧ a̧ woyo: «Ká mɛ́ de kíì na! Mɛ̀ sí ɗoŋ a̧ mɛ̀ dé mɔ nɛ mɛ tɔ̧ nɛnɛ‘i tɛnɛ ha̧‘m sɛka mɛ gii k’ɛ́nɛ́ in bem. 14Wen mɔ nɛ̀ GASA WAN Sɔ̧ ko Israɛl tɔ̧ nɛ mɔ'ɔ: ‹Fuu beka kaɗi kɔ̧ kpánà na, nɔ̧́ beka ɔ̧si kɔ̧ yèè na hɔ wese nɛ̀ GASA WAN tɛ de nɛnɛ ha̧ kórò mɛ hɔ zu nù.› »
15A̧ yaka nɛ́ɛ̀ de hee Elii tɔ̧ɔ̧ ga. A̧ nyɔŋa mɔ in bem kɔ̧-a̧ ká bá nɛ̀ wi-tɔ̧-wen oi nú Sɔ̧ mbɛt tɛ zɛ nɛ̀ dɔka-a, 16fuu kaɗi kɔ̧ kpánà na, nɔ̧́ ɔ̧si kɔ̧ yèè na mbɛt nyɛm nɛ̀ ɗoŋ wen nɛ̀ GASA WAN tɔ̧ɔ̧ nɛ̀ nú Elii.
Elii kpasa bem ko ko-gera
17Mɔ nɛ hɔɔ oi o mɔɔ nɔ‘i nɛ́ mɔ'ɔ. Bem ko nàá-wan-tua'i ɔɔ zɛɛ. Zɛɛ kɔ̧-a̧ ŋgaia nyɛmna ɓɛɛ a̧ fe. 18Ɓɛɛ kóò‘i ak Elii: «Bíí ko Sɔ̧, nɛ́ ge a̧ a̧a̧ mgbara'm in mɛɛ ge! Mɛ tɛɛ tɛ kɔ‘m mɛ we ɗoŋ ɗaŋmɔ kɔ‘m in ha̧ mɛ mɛ gbɛ bem kɔ‘m nde?»
19Elii kifa nú ha̧ a̧: «Mɛ̀ há̧ bem kɔ-mɛ ha̧‘m.» A̧ baa a̧ er kóò‘i daŋnɛ si kɔ̧ gɔna-bɛr-tua mɛ ŋgɔn, fara n'aa ɔ sɛnɛ, ɓɛɛ a̧ pi̧ a̧ nù gɔn gado kɔ̧-a̧. 20A̧ kɔfa sɔ̧ tɔ̧ nɛnɛ: «GASA WAN Sɔ̧ kɔ‘m, ɛnɛ kɔ̧ɔ̧ kànà mɛ de ɗaŋmɔ in ko-gera’ɛ n'am yuu mɔ tɛnɛ pii tɛ kɔ̧-a̧, h’ɛ́nɛ́ mɛ gbɛ bem kɔ̧-a̧ nde?» 21Elii guu zu bem’ɛi war taar, kɔfi nɛ̀ GASA WAN, tɔ̧ nɛnɛ: «GASA WAN Sɔ̧ kɔ‘m! Ɔmi ko bem’ɛ a̧ píí ɗoŋ tɛ-a.»#2 Wan 4.34-35 22GASA WAN zia kɔfa-sɔ̧ ko Elii, ɓɛɛ ɔmi ko bem’ɛi pii ɗoŋ tɛ-a, ɓɛɛ a̧ kpasi.
23Elii baa bem’ɛi zir nɛnɛ nɛ̀ kɔ̧ gɔna-bɛr-tua mɛ ŋgɔn pii ɗɔɔ, ɓɛɛ a̧ ha̧ a̧ ha̧ nàà kɔ̧-a̧. Elii tɔ̧a̧: «Mɛ̀ zɔ́k, bem kɔ-mɛ duk kpasa.»
24Koo'i tɔ̧ɔ̧ ha̧ Elii: «Nɛ̀ mbetɛ, kinii, mi iŋa'e mɛ nɛ́ bíí ko Sɔ̧, ɓɛɛ wen ko GASA WAN a̧a̧ kɔ̧ nú mɛ nɛ̀ mbetɛ.»
Currently Selected:
1 WANNU 17: GB11DC
Highlight
Share
Copy
Want to have your highlights saved across all your devices? Sign up or sign in
KALATA KO SƆ̧ La Sainte Bible en Langue Gbaya © L’Alliance Biblique du Cameroun, 2011.
