1 WANNU 16

1Wen nɛ̀ GASA WAN tɔ̧ɔ̧ ha̧ Jɛhu bem ko Hanani, zu Baesa nɛ́ mɔ'ɔ: 2«Hee mɔ'ɔ n'am baa mɛ e ŋgɔn nɛ̀ ɗɔɔ fuunu, e nɛ̀ mɛ nɛ̀ wan zu dukbíí kɔ‘m Israɛl, ɓɛɛ ka mɛ ba nɛ́ yuwar ko Jeroboam, de nɛnɛ ha̧ dukbíí kɔ‘m Israɛl mɛ de ɗaŋmɔ, tu̧ nɛ̀ see-am nɛ̀ o ɗaŋmɔ kɔ-wa ga, 3mi tɛ kum mɛ in o bíí nutua kɔ-mɛ, ɓɛɛ mi tɛ de mɔ nɛ̀ tua kɔ-mɛ hee mɔ'ɔ n'am dee nɛnɛ in o bíí nutua ko Jeroboam bem ko Nɛbat ga. 4O toyo tɛ nyɔŋ bíí nutua kɔ-mɛ lɛŋ nɛ̀ tɛ fe sɛn saaye, ɓɛɛ o nɔ̧́í̧ tɛ nyɔŋ o wan nɛ̀ tɛ fe sɛn zaŋbɛɛ lɛŋ.»

5O oi tom ko Baesa, mɔ n'aa dea, o ŋgaŋamɔ kɔ̧-a̧, yɔra zaŋ Kalata Nyɛrɛ ko o wannu Israɛl. 6Baesa sii ɗoŋ tɛ o dáà kɔ‘i, ɓɛɛ wa gun a̧ sɛn Tirsa. Bem kɔ̧-a̧ Ela ɔɔ wan oi-aa. 7Wen ko GASA WAN nɛ̀ wi-tɔ̧-wen oi nú Sɔ̧ Jɛhu, bem ko Hanani tɔ̧ɔ̧ so zu Baesa in o bíí nutua kɔ̧-a̧‘i, bo nɛ wen ɗaŋmɔ n'aa dea yí GASA WAN tu̧ nɛ̀ see-aa nɛ̀ naŋanɔ kɔ̧-a̧ in zɔka ɗoŋ deemɔ ko o bíí nutua ko Jeroboam ɓɛɛ na, ɓɛɛ mɛ̀ nɛ́ wen nɛ̀ Baesa kuma so o bíí nutua'i mbɛt.

Ela wannu Israɛl

8Tɛ ɓu-yiitoo-zua-mɔɔrɔ-ɗoŋ-kpɔk pɛ ɔɔ-wan ko Asa wannu Juda, Ela bem ko Baesa ɔɔ wan zu Israɛl sɛn Tirsa, tɛ pɛ yiitoo. 9Wi-de-tom kɔ̧-a̧ Zimri, gasawi zu o reeta keekee-nyaŋa baa ɗaŋ keta zu a̧. Wannu duk so kɔ‘i sɛn Tirsa, gbɛ nɛ̀ dɔ̧ɔ̧ kɔ̧ tua ko Arsa, gasa wi-pɛm-tua-wan. 10Zimri yee tua, gɔm Ela gbɛ tɛ ɓu-yiitoo-zua-mɔɔrɔ-ɗoŋ-yiitoo pɛ-wan ko Asa, wannu Juda; ɓɛɛ a̧ ɔ wan oi-aa.

11Ŋgimbi n'aa ɔɔ wan, n'aa duka nù zu damti kaɗi, a̧ kuma bíí nutua ko Baesa lɛŋ; a̧ e ŋma be-wiwii, ŋma pɛ́r-nam kɔ̧-a̧, kóó ŋma bíí kɔ̧-a̧ na. 12Zimri kuma bíí nutua ko Baesa lɛŋ nyɛm nɛ̀ ɗoŋ wen nɛ̀ GASA WAN tɔ̧ɔ̧ so nɛ̀ nú wi-tɔ̧-wen oi nú Sɔ̧ Jɛhu zu a̧, 13zu o ɗaŋmɔ kɔ̧-a̧ lɛŋ in zu o ɗaŋmɔ ko Ela bem kɔ̧-a̧ mbɛt; mɛ̀ nɛ́ o ɗaŋmɔ kɔ-wa mɛ tɛ-wa in o wan nɛ̀ wa dee so ha̧ Israɛl mɛ de, tu̧ nɛ̀ see GASA WAN Sɔ̧ ko Israɛl nɛ̀ o géé-sɔ̧ kɔ-wa. 14Oi o tom ko Ela, mɔ lɛŋ n'aa dea yɔra zaŋ Kalata Nyɛrɛ ko o wannu Israɛl.

Zimri wannu Israɛl

15Tɛ ɓu-yiitoo-zua-mɔɔrɔ-ɗoŋ-yiitoo pɛ-wan ko Asa wannu Juda, Zimri ɔɔ wan tɛ zɛ mɔɔrɔ-ɗoŋ-yiitoo sɛn Tirsa; ŋgimbi'i ká dukbíí bi so nɛ ye Gibetɔŋ nɛ̀ duka so nɛ́ ko o be Filistii. 16Dukbíí nɛ̀ bi so nɛ biro zia nyɛrɛ'ɛ: «Zimri baa ɗaŋ keta, ɓɛɛ gbɛ wannu yinɛ.» Hegɔ, kpɔk kale wese'i sɛn kɔ̧ gbagari-biro, o be Israɛl ee Ɔmri, gasawi ko o gíí wi-biro nɛ̀ wannu Israɛl. 17Ɔmri in o be Israɛl lɛŋ daŋa nɛ̀ Gibetɔŋ, ɓɛɛ tɛ́ɛ̀ kɛr Tirsa nɛ̀ biro. 18Ŋgimbi nɛ Zimri zɔka wa baa ye kaɗi, a̧ yee kɔ̧ tua-hu̧si-biro ko wannu, dɔ tua ko wannu a zu, ɓɛɛ fe. 19Mɛ̀ nɛ́ wen o ɗaŋmɔ n'aa dee so de nɛ̀ mɔ ɗaŋ yí GASA WAN, ba nɛ̀ yuwar ko Jeroboam, zɔk nɛ̀ ɗoŋ ɗaŋmɔ n'aa dee so, kai nɛ̀ o be Israɛl a sɛnɛ. 20Oi o tom ko Zimri, o ɗaŋ keta n'aa ba so yɔra zaŋ Kalata Nyɛrɛ ko o wannu Israɛl.

Ɔmri wannu Israɛl

21Nɛ́ mɔ'ɔ nɛ̀ dukbíí Israɛl kɛ̧ɛ̧ yiitoo: reeta-a nɛɛ ɗoŋ Tibni bem ko Ginat, mɛ de wan ha̧ a̧; ɓɛɛ ɓii reeta nɛ́ kɔ‘i nɛ́ ɗoŋ Ɔmri. 22O bíí nɛ̀ ndaka pata Ɔmri gana zu o wan nɛ̀ ndaka pata Tibni bem ko Ginat. Tibni fea, ɓɛɛ Ɔmri ɔ wan. 23Tɛ ɓu-taar-zua-kpɔk pɛ-wan ko Asa wannu Juda, Ɔmri ɔɔ wan zu o be Israɛl pɛ ɓu-zua-yiitoo. A̧ ɔɔ wan pɛ mɔɔrɔ-ɗoŋ-kpɔk sɛn Tirsa, 24ɓɛɛ a̧ hi̧fi kaya Samarii sɛn Sɛmɛr tɛ kɔya bu-mbɔi booro-mɔɔrɔ-ɗoŋ-kpɔk. A̧ mboo mɔ zik nɛ̀ kaya, ɓɛɛ a̧ a nin ye n'aa mboa'i nɛ́ Samarii, nyɛm nɛ̀ ɗoŋ nin Sɛmɛr wan kaya'i.

25Ɔmri dee mɔ ɗaŋ yí GASA WAN gan ko o wi nɛ̀ yaa nɛti ha̧ a̧ lɛŋ. 26A̧ nɛɛ kànà ɗoŋ yuwar ko Jeroboam bem ko Nɛbat lɛŋ, ɓɛɛ a̧ nɛ́ ɗoŋ o ɗaŋmɔ nɛ̀ Jeroboam dee so ha̧ o be Israɛl mɛ de, tu̧ nɛ̀ see GASA WAN Sɔ̧ ko Israɛl nɛ̀ o géé-sɔ̧ kɔ-wa. 27Oi o tom ko Ɔmri, mɔ n'aa dea, o ŋgaŋamɔ n'aa dea, yɔra zaŋ Kalata Nyɛrɛ ko o wannu Israɛl. 28Ɔmri sii ɗoŋ tɛ o dáà kɔ‘i, ɓɛɛ wa gun a̧ sɛn Samarii. Bem kɔ̧-a̧ Akab ɔɔ wan oi-aa.

Akab wannu Israɛl

29Akab bem ko Ɔmri ɔɔ wan zu Israɛl tɛ pɛ ɓu-taar-zua-mɔɔrɔ-ɗoŋ-taar pɛ-wan ko Asa wannu Juda. Akab bem ko Ɔmri ɔɔ wan pɛ ɓu-yiitoo-zua-yiitoo zu Israɛl sɛn Samarii. 30Akab bem ko Ɔmri dee mɔ ɗaŋ yí GASA WAN gan o wi nɛ̀ yaa nɛti ha̧ a̧ lɛŋ. 31Hee mɔ'ɔ nɛ̀ ndaka ɗoŋ o ɗaŋmɔ ko Jeroboam bem ko Nɛbat nyɛm a̧ na ga, a̧ baa Jezabɛl boko-bem ko Ɛtbal wannu ko o be Sidɔŋ nɛ̀ kóò. A̧ nɛɛ de tom ha̧ sɔ̧ Bal, ɓɛɛ a̧ gu nù ti a̧. 32A̧ mboo fara-ɗafi-sɔ̧ ha̧ sɔ̧ Bal sɛn kɔ̧ tua n'aa mboo so ha̧ sɔ̧‘i sɛn Samarii. 33Akab sɛka te nɛ‘i gasi gasi, ɓɛɛ a̧ ndak kànà nɛ́ ɗoŋ deemɔ mɛ tu̧ nɛ́ see GASA WAN Sɔ̧ ko Israɛl, gan o wannu Israɛl lɛŋ nɛ̀ ɔɔ so wan nɛti ha̧ a̧. 34Tɛ ŋgimbi kɔ̧-a̧, Hiɛl be Bɛtɛl mboo mɔ zik nɛ̀ Jeriko. Ŋgimbi baa naŋ garo, kaya-bem kɔ̧-a̧ Abiram fea, ɓɛɛ ŋgimbi aa o kpar-nú-a, hɔ-ɗoŋ-kaya-bem Sɛgub mbɛt fea, nyɛm nɛ̀ ɗoŋ wen nɛ̀ GASA WAN tɔ̧ɔ̧ so nɛ̀ nú Josue bem ko Nun.#Jos 6.26

Currently Selected:

1 WANNU 16: GB11DC

Highlight

Copy