MATEUS 7

We ŋgoŋ kiita tǝ za ki ka

(Lu 6:37-38,41-42)

1We ŋgoŋ kiita tǝ za ki ka, mor ka Masǝŋ mo ŋgoŋ kiita tǝ ɓii ka ta. 2Mor Masǝŋ ga ŋgoŋ kiita tǝ ɓii tǝgbana mai we ŋgoŋ tǝ za ki ta, a ga lii nyi we ne muŋjwǝǝ mai we lii nyi za ki ne ta. 3Mor fẽe mo ẽe fãa ma nahnǝn naa pa ɓo mo ka kwan tǝzyee kpuu ma nahnǝn ɓo ya ne? 4Mo gak faa nyi naa pa ɓo ɗii, mo soɓ me ɓaŋ fãa nahnǝn ɓo ge lalle, so ka mo laŋ mo no ne tǝzyee kpuu gŋ ma ɓo taa ne? 5Dǝɓ tǝ vǝrvǝrri, mo ɓaŋ tǝzyee kpuu ma nahnǝn ɓo ge lal kǝpelle, so mo ga kwo cok pǝsãh ka mo ɓaŋ fãa ma nahnǝn naa pa ɓo ge lal ba.

6We nyi fan masãh nyi goo ka, a so pii soo lwǝǝra we ne ko. We rǝk fãi ɓii pel bil ka mo dah ra ne ɓal ka.

We fii, we kyeɓɓe, we kǝ̃ǝ zahfahe

(Lu 11:9-13)

7We fii, we ga ɗǝǝ, we kyeɓɓe, we ga lwaa, we kǝ̃ǝ zahfahe, a ga gbǝrra nyi we. 8Mor koo zune mo tǝ fii fanne, a ɗǝǝni, dǝɓ mo tǝ kyeɓɓe, a lwaani, dǝɓ mo tǝ kǝ̃ǝ zahfahe, a gbǝrra nyi ko. 9Azu ye kǝsyil ɓii wel ah mo fii farel ɓe, a ɓaŋ tǝsal nyi ko ne? 10Wala mo fii syiŋ jol ah ɓe, a ɓaŋ soo nyi ko ne? 11Awe nanaa we ye za ɓeare, we tǝ fahlii nyi fan sãh nyi wee ɓii ɗao, a joŋ ɗii Pa ɓii mai mo no sǝŋ ka nyi fan masãh ah nyi za mai moo fiira ko ya ne?

12Fan mai we tǝ 'yah ka za ki mo joŋra wo ɓii ɓe, awe laŋ we joŋ wo ɓǝǝ nai ta. Mor ɓǝ lai Mosus tǝkine ɗerewol profetoen daŋ faa naiko.

Zahfah manyiŋ

(Lu 13:24)

13We dan zahfah manyiŋ ahe. Mor zahfah ma'ah fahlii ah ka pǝgaɓ ya, a ga pǝ cok muŋni, za pǝlli tǝ syeera gŋ. 14Amma zahfah manyiŋ ah a pǝgaɓɓe, so fahlii ah a ga pǝ cok lwaa cee, za ma ɓaŋra fahlii ah ka pǝlli ya.

Kpuu ne lee syẽm ahe

(Lu 6:43-44)

15We byak suu ɓii wo profetoen maber ahe, a ɓaara mbǝro pǝsǝ̃ǝ gin wo ɓii ne ko, amma kǝɓǝr ɓǝǝ ara ye goobam ma gbah fanne. 16We ga tǝ ra ne lee syẽm ɓǝǝra. Dǝɓ ka ŋhǝǝ lee kpuu vin tǝ kpuu waa ya, dǝɓ ka ŋhǝǝ wuu tǝ waafãi ya ta. 17Kpuu masãh ah a lee syẽm masãhe, so kpuu maɓe' ah a lee syẽm maɓe' ta. 18Kpuu masãh ka gak lee syẽm maɓe' ya, kpuu maɓe' laŋ ka gak lee syẽm masãh ya ta. 19Kpuu makẽne mo ka lee syẽm masãh ya daŋ a ŋgoŋra ɓoo ga tǝ wii. 20We ga tǝ profetoen maber ne lee syẽm ɓǝǝ nai ta.

Me tǝ we ya syaŋsyaŋ

(Lu 13:25-27)

21Za mai moo ɗiira me ne Dǝɓlii, Dǝɓlii, ka ga danra Goŋ Masǝŋ mor ah daŋ ya, amma sai za mai mo tǝ joŋra fan mai Pa ɓe mo no sǝŋ mo tǝ 'yahe. 22Zah'nan ah no ginni, za pǝlli ga faara nyi me: Dǝɓlii, Dǝɓlii, aru cuu ɓǝ Masǝŋ pǝ tǝɗii ɓo ya ne? Ru nĩi coksyiŋ pǝ tǝɗii ɓo, ru joŋ yeɓ matǝ gǝriŋ laŋ pǝ tǝɗii ɓo pǝlli ta. 23Me so ga faa nyi ra wat: Me tǝ we ya syaŋsyaŋ, we zol gin wo ɓe, awe ye za ma joŋ faɓe'.

Yaŋ gwa

(Lu 6:47-49)

24Koo zune mo tǝ laa ɓǝ mai me tǝ faani mo so syee mor ɓǝ ah ra ta ɓe, a ga yea tǝgbana dǝɓ ma ne tǝtǝl mai mo vuu yaŋ ah ɓo tǝ pǝɗakka. 25Bam ge tǝ, bii zoo ryaŋ, zyak kuu fok yaŋ ah pǝlli, amma ne daŋ gak lee ge sǝŋ ya, mor yaŋ ah vuu ɓo tǝ pǝɗakka. 26Amma koo zune mo laa ɓǝ mai me tǝ faani, mo syee mor ɓǝ ah ra ya ɓe, a ga yea tǝgbana dǝɓ ma tǝgwĩi mai mo vuu yaŋ ah tǝ tǝkuuri. 27Bam ge tǝ, bii zoo ryaŋ, zyak kuu fok pǝlli, so yaŋ ah lee ge sǝŋ ɓeɓ tǝɗe'.

Swah Yesu

28Ne cok Yesu mo vǝr ɓǝ faa ah ra, za kaara tǝ ɓǝ cuu ah gǝriŋ, 29mor cuu ɓo ka nyi ra tǝgbana za ma cuu ɓǝ lai ɓǝǝr a, amma cuu nyi ra na dǝɓ mai mo ne swah jol ahe.

Currently Selected:

MATEUS 7: MUAR

Highlight

Copy