MATEUS 8

Yesu laɓ tǝkpiŋ vaŋno

(Mk 1:40-45; Lu 5:12-16)

1Yesu ɗǝr gin tǝ waare, za pǝlli syeera mor ahe. 2So tǝkpiŋ ge wol ah kea sǝŋ pel ah faa: Dǝɓlii, mo 'yah no ɓe, mo gak laɓ me. 3Yesu nyen jol juu ko faa: Me 'yahe, mo laɓ o. Ne cok ah sǝ tǝkpiŋ ah vǝr wol ahe. 4So Yesu faa nyi ko: Mo faa ɓǝ ah nyi za ki ka, mo laa ɓe ne? Amma mo ge cuu suu ɓo nyi pa joŋzahsyiŋrĩ, ka mo ẽeko mo ka mo so joŋ syiŋ na mai Mosus mo cuu ɓo, mor ka cuu nyi za daŋ mo laɓ ɓe.

Yesu laɓ dǝɓ yeɓ swah sooje Romanen

(Lu 7:1-10)

5Ne cok Yesu mo ge yaŋ Kapernaum, swah sooje Romanen ge wol ah pǝǝ ko, 6faa: Dǝɓlii, dǝɓ yeɓ ɓe swǝ ɓo sǝŋ yaŋ ne syemme, zyak hah ko ɓo a swǝ̃ǝ ko pǝlli. 7Yesu faa nyi ko: Me ga, ka me ge laɓ ko. 8Amma swah sooje zyii faa nyi ko: Dǝɓlii, me kii nǝn pǝ koŋ mai ka mo ge yaŋ ɓe ya. Amma mo faa ɓǝ vaŋno to laŋ, dǝɓ yeɓ ɓe ga laɓɓe. 9Ame laŋ me no mor jol swah za ki, so me no ne sooje ra mor jol ɓe ta, me faa nyi dǝɓ vaŋno mo gyo, a ganne, me faa nyi dǝɓ maki ah mo ge, a ginni, me faa nyi dǝɓ yeɓ ɓe mo joŋ fan maino, a joŋni. 10Ne cok Yesu mo laa ɓǝ faa ah naiko, kaa tǝl ah gǝriŋ, so faa nyi za mai mo tǝ syeera mor ahe: Me faa nyi we goŋga, koo kǝsyil za Israel laŋ, me lwaa iŋ ma morãi gŋ taa ya syaŋsyaŋ. 11Me tǝ faa nyi we, za pǝlli ga gera gin fah morcomzah'nan ne fah morcomlil a ga kaara zah taabǝl ne Abraham, Isak ne Yakuɓ pǝ Goŋ Masǝŋ. 12Amma za mai kǝnah Goŋ ah mo ma ɓǝǝr o, a ga rǝkra ra pǝ cokfuu lalle, a ga yera yee gŋ tǝkine soŋ syelle. 13So Yesu faa nyi swah sooje: Mo ge yaŋ ɓo, fan ah ga joŋ nyi mo tǝgbana iŋ ɓo. So dǝɓ yeɓ swah sooje laɓ ne cok ah sǝ ta.

Yesu laɓ za ma ne syem pǝlli

(Mk 1:29-34; Lu 4:38-41)

14So Yesu ge yaŋ Petar, ge lwaa magor ah swǝ ɓo sǝŋ tǝ faswul ne syem tǝtǝl 'wahe. 15Yesu juu jol ahe, syem tǝtǝl 'wah ceere, so ur sǝŋ kal ne joŋ fan nyi ra.

16Ne cok lil mo joŋ, gera wo Yesu ne za ma ne syem coksyiŋ pǝlli, Yesu nĩi coksyiŋ tǝ ɓǝǝ ge lal ne ɓǝ faa zah ahe. So laɓ za ma ne syem daŋ. 17Joŋ nai mor ka ɓǝ mai profeto Esaia mo faa ɓo mo joŋ ge cok ahe, faa: Ɓaŋ ɓeɓ man ɓo, nyiŋ syem man daŋ ge tǝ suu ahe.

Za mai mo tǝ 'yahra ka syee ne Yesu

(Lu 9:57-62)

18Yesu kwo za wol ah pǝlli, so faa ɓǝ ka yee mabii ga nǝzakǝŋhaa. 19Pa cuu ɓǝ lai no ge wol ah faa nyi ko: Pa cuu fanne, me ga syee mor ɓo pǝ cok mai mo tǝ ga gŋ daŋ. 20Yesu zyii faa nyi ko: Gyaori no ne lak ɓǝǝra, juu ma zwǝǝ sǝŋ laŋ no ne kol ɓǝǝra, amma We Dǝfuu ka ne cok mai ka mo swǝko gŋ 'yak ya. 21Dǝɓ vaŋno kǝsyil za syee mor ah faa nyi ko: Dǝɓlii, mo nyi fahlii nyi me ka me ge cii pa ɓe ɗao. 22Yesu zyii faa nyi ko: Mo syee mor ɓe, mo soɓ za wul ciira wul ɓǝǝra.

Yesu lai zyak yea zahe

(Mk 4:35-41; Lu 8:22-25)

23Yesu yee dahe, za syee mor ah yeera ne ki ta. 24Ne pel gwari sǝ, zyak malii ah nǝǝ tǝ mabii, wea bii ah kyeɓ ka muŋ dahe, amma ka Yesu nǝnǝm ɓo. 25Za syee mor ah ge wol ah kpiŋra ko, faara nyi ko: Dǝɓlii, mo ǝ̃ǝ ru, ru tǝ yah ka wukki. 26Yesu zyii faa nyi ra: We ɗuu gal nai mor fẽene? Iŋ ɓii ɗii biŋ nai ne? So urri, lai zyak tǝkine bii daŋ, so cok cõo nyanya. 27Za daŋ kaara tǝ ɓǝ ah gǝriŋ faara: Dǝɓ fẽe ye dǝɓ mai ne? Ŋhaa zyak tǝkine bii daŋ laara zah ahe.

Yesu laɓ za ma ne tǝcem gwa

(Mk 5:1-20; Lu 8:26-39)

28Ne cok Yesu mo ge dai zahgee nǝzakǝŋhaa pǝ sǝr Gadarenien, za ma ne tǝcem gwa pǝ̃ǝra gin pǝ yii mai moo ciira wul gŋ ge zyaŋra ne ki. Tǝcem ah ra pǝgaɓ no cam, za ka gak pǝ̃ǝ tǝ fahlii cok ah laŋ ya. 29Kalra ne ɓyaŋ ɓǝ faara: We Masǝŋ, ɓǝ ɓuu saaŋ mo gin kẽne? Mo ge ɓo nyee ka cuu syak nyi ru bai cok ah mo ge dai ne? 30Pǝ cok ah ŋgaɓ bil no tǝ pii kah ɓǝǝ lal pǝɗǝk nje. 31Tǝcem pǝǝra Yesu faara: Mo tǝ 'yah ka nĩi ru ga lal ɓe, mo nyi fahlii nyi ru ge tǝ ŋgaɓ billi. 32Yesu faa nyi ra: We gyo. So pǝ̃ǝra gin tǝ zan ahe, kalra ge tǝ billi, ŋgaɓ bil ah rǝkra ɗul zahkee bii leara ge pǝ mabii, wukra gŋ daŋ.

33Za kǝpii bil ɗuura kal ge tǝgǝǝ yaŋ, ge keera ɓǝ fan mai mo joŋ ɓo daŋ, tǝkine mai mo joŋ wo za ma ne tǝcem gwa ta. 34So za yaŋ ah daŋ pǝ̃ǝra ka ga zyaŋ ne Yesu. Ne cok mo kwora ko, so pǝǝra ko ka mo zolko gin sǝr ɓǝǝra.

Currently Selected:

MATEUS 8: MUAR

Highlight

Copy