MATEUS 6

Ɓǝ cuu tǝ ɓǝ nyi fan nyi za syakke

1We joŋ yella, ka we joŋ yeɓ ɓǝ iŋ ɓii ne nahnǝn dǝfuu mor ka mo ẽera we to ka. We tǝ joŋ nai ɓe, we ka ga lwaa reba jol Pa ɓii mai mo no sǝŋ ya. 2Ne cok mo tǝ nyi fan nyi za syak ɓe, mo ul lagaita tǝ suu ɓo cok ah tǝgbana za matǝ vǝrvǝr moo joŋra yaŋ kee ɓǝ Masǝŋ tǝkine tǝ fahlii mor ka za mo yii ra ka. Me faa nyi we goŋga, rera reba ɓǝǝ vǝr ɓe. 3Amma mo tǝ nyi fan nyi za syak ɓe, mo joŋ ne fahlii mai ka dǝɓ ma kah ɓo laŋ mo tǝ ka, 4mor ka fan nyi ah mo yea pǝ muŋni. Pa ɓo mai moo kwan fan mai mo tǝ joŋ pǝ muŋni, a ga soo mo.

Ɓǝ cuu tǝ ɓǝ juupelle

(Lu 11:2-4)

5Ne cok we tǝ juupel ɓe, we joŋ na za matǝ vǝrvǝr ka. A 'yahra ur uu juupel yaŋ kee ɓǝ Masǝŋ tǝkine kah fahlii mor ka za mo ẽe ra. Me faa nyi we goŋga, rera reba ɓǝǝ ɓe. 6Amma ne cok mo tǝ 'yah ka juupel ɓe, mo dan ge ɓǝr yaŋ ɓo mo coo zahfahe, ka mo juupel wo Pa ɓo mai mo gŋ pǝ cok muŋni. Pa ɓo mai moo kwan fan mai moo joŋ pǝ cok ma muŋni, a ga soo mo.

7Ne cok we tǝ juupel ɓe, we jin kee ɓǝ tǝ vaŋno pǝpãa tǝgbana za bai iŋ moo joŋra ka. Mor a lǝŋra Masǝŋ ga laa juupel ɓǝǝ mor kee ɓǝ pãa ɓǝǝra. 8We joŋ na ra ka, mor Pa ɓii tǝ fan mai we ne 'yah ah ɓo, kǝpel ka we ɓah fii ko laŋ ya ba. 9We tǝ juupel ɓe, we faa naiko:

Pa ɓuu mai mo no sǝŋ,

Tǝɗii ɓo mo yea pǝyǝkki,

10Goŋ ɓo mo ge,

Mo joŋ 'yah ɓo wo sǝr tǝgbana mai moo joŋ sǝŋ ta.

11Mo nyi farel ru kǝ̃ǝ tǝ'nahko.

12Mo rõm faɓe' ɓuuru,

Tǝgbana ruu rõm za mai moo joŋra ɓǝɓe' wo ɓuuru.

13Mo soɓ ru ge pǝ cok mai faɓe' moo kǝǝ ru gŋ ka,

Amma mo ǝ̃ǝ ru gin jol Satan.

[Mor goŋe, ne swahe, ne yǝk daŋ ma ɓo yo ŋhaa ga lii. Amen.]

14We tǝ rõm za mai moo joŋra ɓǝɓe' wo ɓii ɓe, Pa ɓii mai mo no sǝŋ ga rõm faɓe' ɓii ta. 15Amma we ka tǝ rõm za ma joŋra ɓǝɓe' wo ɓii ya ɓe, Pa ɓii ma sǝŋ ka ga rõm faɓe' ɓii ya ta.

Ɓǝ cuu tǝ ɓǝ syẽe fanne

16Ne cok we tǝ syẽe fan ɓe, we joŋ suu tǝgbana za matǝ vǝrvǝr moo joŋra ka, a ferra cok nahnǝn cam mor ka za mo kwora rǝ tǝ syẽe fanne. Me faa nyi we goŋga, rera reba ɓǝǝ ɓe. 17Amma amo, mo tǝ syẽe fan ɓe, mo 'wǝ̃ǝ nahnǝnni, mo sõm tǝtǝl ɓo ne nǝmmi, 18mor ka za mo tǝra mo tǝ syẽe fan ka, sai Pa ɓo mai mo pǝ cok muŋni a ga tǝ, Pa ɓo mai moo kwan fan mai mo tǝ joŋ pǝ muŋni a ga soo mo.

Kan fan coksǝŋ

(Lu 12:33-34)

19We tai fan ɓii kan wo sǝr nyee pǝ cok mai tǝsyin moo ceere, cok wok mo guɓ tǝkine nyin moo dan ga kiŋ ka. 20Amma we kan fan ɓii coksǝŋ pǝ cok mai tǝsyin ne cok wok mo ka ɓeɓ ya, nyin mo ka gak dan ga kiŋ ya ta. 21Mor pǝ cok mai fan ɓo mo gŋ ɓe, zahzyil ɓo yea gŋ ta.

Cokfãi suu

(Lu 11:34-36)

22Nahnǝn a tǝgbana pitǝrla suu, nahnǝn ɓo mo jam ɓe, suu ɓo daŋ a yea pǝ cokfãi. 23Amma nahnǝn mo tǝ syen mo ɓe, suu ɓo daŋ a yea pǝ cokfuu. So cokfãi mai mo pǝzyil ɓo mo ciŋ cokfuu ɓe, fuu ah ga yea na fẽene?

Masǝŋ tǝkine lakre

(Lu 16:13)

24Dǝɓ vaŋno ka gak syee mor goŋ gwa ya, a syiŋ maki ah vaŋno, a ga 'yah maki ahe, a ga mgbãa dǝɓ maki ah vaŋno, a ga syẽa maki ahe. We ka gak syee mor Masǝŋ tǝkine lak gwa daŋ ya.

Soɓ ɓǝ suu gai Masǝŋ jolle

(Lu 12:22-31)

25Mor maiko me tǝ faa nyi we, we gaɓ suu ɓii ne swaa ɓǝ farelle, ne ɓǝ fazwanne, tǝkine ɓǝ fan wo suu ɓii ka. Cee ka pǝyǝk kal farel ya ne? Suu ka pǝyǝk kal fan wo suu ya ne? 26We ẽe juu mai moo zwǝǝra sǝŋ ɗǝ, ka ruura fan a, ka taira fagwahl a, ka taira fan ga kahcel laŋ ya. Amma Pa ɓii mai mo no sǝŋ yee wol ra. We ka pǝyǝk kal juu ɓoroo ya ne? 27Azu ye kǝsyil ɓii gak ɓoo giŋ suu ah ga gŋ biŋ ne ɓǝ mai mo tǝ swaako ne?

28We gaɓ ne swaa ɓǝ fan wo suu mor fẽene? We ẽe kul cok moo giŋra ɗǝ, ka joŋra yeɓ ya, ka curra fan wo suu ya ta. 29Amma me faa nyi we, koo Salomo ne kǝ̃ǝ ah daŋ laŋ ka ɓoo mbǝro dai kul maki ah vaŋno laŋ ya. 30Fãa mai mo no cok tǝ'nah laŋ Masǝŋ ɓoo mbǝro nyi ra, so comki a ɓoo wii nyi. Awe za iŋ tǝ biŋ, ka ɓoo mbǝro nyi we kal ra ya ne? 31We gaɓ ne swaa ɓǝ ru ga re fẽene, ru ga zwǝ fẽene, wala ru ga ɓoo fẽene ka. 32Mor fan marai daŋ za bai iŋ yee kyeɓra. Pa ɓii mai mo no sǝŋ tǝ ɓe, we ne 'yah fan ah ra daŋ. 33Amma we kyeɓ Goŋ Masǝŋ tǝkine joŋ fan matǝ njaŋ ah mai Masǝŋ mo 'yah ɓo kǝpelle. Fahfal ah a ga nyi tǝcoŋ fan daŋ nyi we ta. 34We gaɓ suu ɓii ne swaa ɓǝ tǝ'nan ka, mor tǝ'nan ga swaa ɓǝ tǝ suu ah ba. Bone mai moo gin zah'nan daŋ, kii mor zah'nan ah moo ɓe.

Currently Selected:

MATEUS 6: MUAR

Highlight

Copy