2 ZA GOŊE 7

1Elisa faa: We laa ɓǝ faa Dǝɓlii ɗao, Dǝɓlii faa sye: Tǝ'nan ne cok naiko, sum manik ah tahsah vaŋno a ga lee suŋgu jemma, sum zyemĩi tahsah vaŋno laŋ a ga lee suŋgu dappe zahfah yaŋ Samaria. 2Amma dǝɓlii mai moo gbah jol goŋ ne ɓǝ zyii zah dǝɓ Masǝŋ faa: Koo Dǝɓlii mo gbǝr zahtǝwoo coksǝŋ ɓo ka fan mo pǝ̃ǝ gin gŋ ge sǝŋ laŋ, fan mai mo tǝ faa ɓǝ ah a joŋ ne? Elisa faa: Mo ga kwo fan ah ne nahnǝn ɓo, amma mo ka ga re ya.

Sirien ɗuura kalle

3So tǝkpiŋ nai no kaara ɓo zahfah yaŋ ah lalle, faara tǝgǝǝ ki: Na kaa ɓo nyee ka na wuk tǝkol mor fẽene? 4Na faa na ge tǝgǝǝ yaŋ o, koŋ wǝ ɓo gŋ, na ga wukki. So na kaa ɓo nyeeko, na ga wuk laŋ ta. Pǝram na ur na ge zahjul sal Sirien. Mo soɓra na ko ɓe, ka na yea ne cee o, mo ikra na pǝ wul ɓe laŋ, ka na wuk o.

5Ne cok com mo tǝ dan ganne, urra ka ga zahjul sal Sirien. Ne cok mo ge daira kah zahjul sal Sirien, ge lwaara za gŋ ya. 6Mor Dǝɓlii joŋ za sal Sirien laara cii ɓal muŋta sal ne cii ɓal pǝr ne cii ɓal za sal pǝpãare. Faara tǝgǝǝ ki: Goŋ Israel soo goŋ Hetien ne goŋ sǝr Egiɓ ɓo ne lak ka mo ge ryaŋra zah mana. 7Urra myah ɗulli, ne cok ah ka com tǝ dan ganne. Soɓra tal mbǝro ɓǝǝ ne pǝr ɓǝǝ tǝkine korro ɓǝǝra. Jul ɓǝǝ 'wa 'wa tǝgbana mai mo gbahra ɓo. Ɗuura ka ǝ̃ǝ suu ɓǝǝra.

8Ne cok tǝkpiŋ rai mo ge daira kah jul salle, danra ge pǝ tal mbǝro vaŋno, rera farel gŋ, so zwahra fanne, woora vãm solai ne vãm kaŋnyeeri tǝkine mbǝro, kalra ne ge mokra. So pii soora ge danra pǝ tal mbǝro maki ahe, woora fan gŋ, so kalra ne ge mokra faɗa.

9So tǝkpiŋ faara tǝgǝǝ ki: Na ka tǝ joŋ pǝsãh ya. Tǝ'nah mai zah'nan ɓǝ 'nyah ye cee ɓo. Amma na kaa ŋhaa ka na byak zah'nan mo cee ɗao ɓe, ɓǝ ah a ga yea tǝ man pǝɓe' no cam. Na ur na ge tǝgǝǝ yaŋ, na ge faa ɓǝ ah nyi za yaŋ goŋe. 10Kalra ge, ge daira pa byak zahfahe, faara nyi ko: Aru ge dan pǝ jul sal Sirien, so ru lwaa za gŋ ya, ru laa kyaŋ dǝfuu gŋ laŋ ya ta. Sai ru lwaa pǝr ɓǝǝ mo gaara dalla ɓo nyi ne korro tǝkine tal mbǝro uu ɓo na mai mo peara. 11So za byak zahfah ge faara ɓǝ ah nyi za yaŋ goŋe.

12Goŋ ur ne suŋni, faa nyi za yeɓ ahe: Me ga kee ɓǝ mai Sirien mo joŋra ɓo ka man nyi we. Tǝra ɓe, ana ne koŋne, mor ah pǝ̃ǝra gin pǝ jul sal ɓǝǝ ge mokra ɓo lalle. Ɓǝ foo ɓǝǝ sye: ka na kal pǝ̃ǝ gin tǝgǝǝ yaŋ ge lal ɓe, rǝ ga gbah na ne nahnǝnni, rǝ dan yaŋ mana. 13Dǝɓ yeɓ ah maki ah zyii zah ah faa: Na soɓ za ki ka mo woora pǝr dappe gin pǝzyil mai mo coŋ ɓo jol mana. Na pee ge ka na ẽe ɗao, mo ge wukra ɓe, ka ɓǝ ah a tǝki vaŋno ne za mai mo wukra ɓe ta.

14So woora muŋta pǝr gwa. Goŋ so pee kal ka foo mor za sal Sirien, faa nyi ra: We ge ka we ẽe ɓǝ ɓǝǝ ɗao. 15Foora mor ɓǝǝ ŋhaa ge dai kah el Yordan. Ge lwaara mbǝro Sirien tǝkine fan manyeeki ah soɓra myah ɓo ne ɗul tǝ fahlii haihai. Zapee piira soo ge faara ɓǝ ah nyi goŋe.

16So za pǝ̃ǝra, ge woo fan pǝ jul sal Sirien. Sum manik ah tahsah vaŋno a lee suŋgu jemma, sum zyemĩi laŋ tahsah vaŋno a lee suŋgu dappe ta, ɓǝ ah joŋ tǝgbana mai Dǝɓlii mo faa. 17Amma goŋ ɓaŋ dǝɓ ma gbah jol ah ne ɓǝ kŋ kan zahfahe. Za dahra ko ne ɓal gŋ ŋhaa wuu. Fan ah joŋ tǝgbana mai dǝɓ Masǝŋ mo faa ne cok goŋ mo ge wol ah kŋ. 18Mor faa nyi goŋe: Tǝ'nan ne cok naiko, sum zyemĩi tahsah vaŋno a ga lee suŋgu dappe zah yaŋ Samaria. 19Ne cok ah dǝɓlii ma gbah jol goŋ ne ɓǝ zyii zah ah faa: Koo Dǝɓlii mo gbǝr zahtǝwoo coksǝŋ laŋ, fan mai mo tǝ faa ɓǝ ah a joŋ ne? So ne cok moo laŋ, dǝɓ Masǝŋ faa nyi ko: Mo ga kwo fan ah ne nahnǝn ɓo, amma mo ka ga re ya. 20Fan ah joŋ wol ah na mooko. Za dahra ko zahfah ne ɓal ŋhaa wuu.

Currently Selected:

2 ZA GOŊE 7: MUAR

Highlight

Copy