2 ZA GOŊE 8

Mawin Sunemiyo lwaa 'wah ahe

1Comki Elisa faa nyi mawin mai mo syemko wel ah kŋ: Mo ur ne za yaŋ ɓo daŋ, mo ge pǝ cok mai moo gak ga kaa gŋ, mor Dǝɓlii pee koŋ ɓo ka mo ge wǝ wo sǝr syii rǝŋ.#2 ZaG 4:8-37

2Mawin urri, joŋ tǝgbana mai dǝɓ Masǝŋ mo faa nyi ko, zol kal ne zan ah daŋ, ge kaa sǝr Filistien syii rǝŋ. 3Ne cok syii rǝŋ ah mo vǝrri, mawin pii soo gin sǝr Filistien ge. So kal ge wo goŋ Israel ka fii ɓǝ yaŋ ah ne 'wah ah zah ahe. 4Amma ne cok ah ka goŋ tǝ faa ɓǝ ne Gehazi dǝɓ yeɓ Elisa. Fii ko faa: Mo kee ɓǝ yeɓ maluu ah mai Elisa mo joŋ daŋ nyi me ɗǝ. 5Ne cok Gehazi mo tǝ kee ɓǝ Elisa mo syem wul nyi goŋe, mawin mai Elisa mo syem nan ah pǝ wul kŋ ge dai wo goŋe ka fii ɓǝ 'wah ah zah ahe. Gehazi faa: Dǝɓlii ɓe goŋe, mawin nyẽe ako ye mawin mai Elisa mo syem wel ah gin pǝ wul kŋ. 6Goŋ so fii ɓǝ ah zah mawinni, so mawin kee ɓǝ ah nyi ko. Goŋ so pee ko kal ne dǝɓ faadal ah faa ka mo jinra fan ah daŋ nyi ko ne fakpãhpǝǝ 'wah ah mai mo soɓko daga ne cok mai mo yea kal ɓo daŋ.

Hazayel kaa goŋ sǝr Siria

7Ne cok maki ah Elisa ge yaŋ Damaskus, Benhadat goŋ sǝr Siria joŋ syemme. Faara nyi ko: Dǝɓ Masǝŋ ge ɓo no nyeeko. 8Goŋ faa nyi dǝɓ ma ɗii ne Hazayel: Mo ɓaŋ fan mor jolle, mo ge zyaŋ ne ki, ka mo fiiko Dǝɓlii Masǝŋ ne zah ah mo faa: Syem ɓe nyẽe laɓ no ne? 9Hazayel kal ge zyaŋ ne ki, ɓaŋ fan mor jolle, sǝǝ zah fan masãh ah Damaskus camcam nǝn cel njoŋnjoŋ jemma nai. Ge wol ah faa nyi ko: We ɓo Benhadat goŋ Siria pee me ge wo ɓo faa: Syem 'min nyẽe laɓ no ne? 10Elisa zyii zah ah faa: Mo gyo, mo faa nyi ko a ga laɓɓe, amma ne daŋ laŋ, Dǝɓlii cuu nyi me a ga wuu. 11Elisa pee nahnǝn wo Hazayel ẽe ko, ŋhaa swãa re Hazayel, so dǝɓ Masǝŋ kal tǝ yeyee. 12Hazayel fii ko faa: Dǝɓlii ɓe so yeyee mor fẽene? Elisa zyii zah ah faa: Mor me tǝ ɓǝɓe' mai mo tǝ ga joŋ wo za Israel pel ɓe. Mo ga ɓaa wii nyi yaŋ ɓǝǝ maswah ah ra daŋ, mo ga ik wee tǝbanna ɓǝǝ ne kafahe, mo ga ɗuu wee ɓǝǝ pǝ saŋne, mo ga ŋgǝ̃ǝ ɓǝr nyi ŋwǝǝ ɓǝǝ ma ne ɓilli. 13Hazayel faa: Ame ko ye zune? Goo makol mai gak joŋ ɓǝ malii mai ne? Elisa faa: Dǝɓlii cuu nyi me mo ga kaa goŋ sǝr Siria.#1 ZaG 19:15

14So zol gin wo Elisa kal ge wo dǝɓlii ahe, dǝɓlii ah fii ko: Elisa faa nyi mo ɗǝne? Zyii zah ah faa: Faa nyi me mo ga laɓɓe. 15Tǝ'nan ah Hazayel ɓaŋ gwado maa ge pǝ bii, koo zah ne fahvõo nyi goŋ ne ko, so goŋ lee wul sǝ. Hazayel kaa goŋ pǝ cok ahe.

Yuram kaa goŋ Yuda

(2 KeeƁ 21:1-20)

16Ne cok Jehoram we Akaɓ mo kaa goŋ Israel syii dappe, Yuram we Yusafat kaa goŋ Yuda ne ko. 17Ne cok mo kaa goŋ, ka joŋ syii ɓo jemma sai tǝtǝl gwa. Kaa goŋ yaŋ Jerusalem syii nama. 18Ɓaŋ tǝɓal za goŋ Israel tǝgbana za yaŋ Akaɓ mo joŋra, mor ɓaŋ mǝlaŋ Akaɓ kan ɓo. Joŋ fan maɓe' ah pel Dǝɓlii. 19Amma Dǝɓlii 'yah ka muŋ Yuda ya, mor ɓǝ dǝɓ yeɓ ah David, tǝgbana mai mo faa nyi ko, a ga soɓ wee ɓǝr ah nǝn wo sǝrri.#1 ZaG 11:36

20Pǝ zah'nan goŋ Yuram, Edomien ŋwoora kyaŋ ne goŋ Yuda. Ɓaŋra goŋ ma ɓǝǝ kanne.#Tǝŋ 27:40 21Yuram ur ne muŋta sal ne pǝr ah ne suŋni ge pǝ̃ǝ Zair, ge ik Edomien mai mo ryaŋra ko ɓo ne zaluu ma lwaa muŋta sal ahe. Amma za ɗuura gin pǝ tal mbǝro ɓǝǝ kalle. 22Edomien ŋwoora kyaŋ ne goŋ Yuda daga cok ah ŋhaa tǝ'nahko. Ne cok ah laŋ, za yaŋ Libna ŋwoora kyaŋ ta.

23Tǝcoŋ ɓǝ Yuram ne yeɓ ah daŋ ŋwǝǝ ɓo no pǝ ɗerewol Ɓǝ Za Goŋ Yuda. 24Yuram wuu, ciira ko kah zan ah ra pǝ yaŋ David. Wel ah Akazia kaa goŋ pǝ cok ahe.

Akazia kaa goŋ Yuda

(2 KeeƁ 22:1-6)

25Ne cok Jehoram we Akaɓ mo kaa goŋ Israel syii jemma tǝtǝl gwa, Akazia kaa goŋ ne ko. Ako ye we Yuram goŋ sǝr Yuda. 26Ne cok Akazia mo kaa goŋ, ka joŋ syii ɓo jemma gwa tǝtǝl gwa. Kaa goŋ yaŋ Jerusalem syii vaŋno. A ɗii mah ah ne Atalia mǝlaŋ Omri goŋ Israel. 27Ɓaŋ tǝɓal fan joŋ za yaŋ Akaɓ, joŋ fan maɓe' ah pel Dǝɓlii tǝgbana za yaŋ Akaɓ mo joŋra, mor ɓaŋ mǝlaŋ ah kan ɓo.

28Ur kal ge Ramot ma Giliat ne Jehoram we Akaɓ mor ka ruura sal ne Hazayel goŋ sǝr Siria. Sirien kanra syim wo Jehoram. 29Goŋ Jehoram pii soo ge Jezereel mor kiŋ nwãh ah mai Sirien mo ira ko Ramot ma Giliat ne cok mo tǝ ruu sal ne Hazayel goŋ sǝr Siria. Akazia we Yuram goŋ Yuda kal ge ka ẽe Jehoram we Akaɓ yaŋ Jezereel ne syem ah mo ne gŋ.

Currently Selected:

2 ZA GOŊE 8: MUAR

Highlight

Copy