2 ZA GOŊE 6

Kǝlaɓ gbel cwaa ge bii

1Profetoen faara nyi Elisa: Mo ẽe cok kal mai ru kaa ɓo kah ɓo ru baa ɓo. 2Mo nyi fahlii nyi ru ka ru ge Yordan, ru 'yah ka zune daŋ kǝsyil ɓuu mo ceko kpuu ge ne ko, mor ka ru ge zyeɓ cok kal gŋ ne ko. Zyii zah ɓǝǝ faa: We gyo. 3Dǝɓ ki kǝsyil ɓǝǝ vaŋno faa: A pǝsãh ka mo ge ne ru. Elisa zyii faa: Me ga ne we. 4So zol kal ne ra. Ge daira Yordan, ceera kpuu. 5Amma ne cok dǝɓ ki mo tǝ cen kpuu, kǝlaɓ ah gbel cwaa ge bii. Dǝɓ ah ɓyaŋ ɓǝ faa: Kaiya dǝɓlii ɓe, me syea kǝlaɓ ah ɓo syeare! 6Dǝɓ Masǝŋ fii ko faa: Cwaa ge ɓo kẽne? So cuu cok ah mo gbel cwaa ge ɓo gŋ nyi ko. So Elisa ce we kpuu pǝlaŋ ɓoo ge pǝ cok ahe, so kǝlaɓ zoo ge tǝ bii sǝŋ. 7Elisa faa nyi ko: Mo ɓaŋ o. Dǝɓ ah nyen jol ɓaŋ.

Elisa ne Sirien

8Ne cok maki ah ka goŋ sǝr Siria tǝ ruu sal ne za Israel, zyeɓ ɓǝ ne zan ah faa: We ge gbah jul sal pǝ cok mai nai sye. 9Amma dǝɓ Masǝŋ pepee ge nyi goŋ Israel faa: Mo joŋ yella ka mo syee ge pǝ cok mai nai ka. Mor Sirien tǝ ga ɗǝrra gŋ. 10Goŋ Israel pee za kal ge pǝ cok mai dǝɓ Masǝŋ mo cuu nyi ko.

Elisa a cuu cok mai Sirien moo ga ɗǝrra gŋ nyi goŋ Israel daŋ, so a joŋ yella ne cok ah daŋ ta. 11Zahzyil sye goŋ Siria tǝ ɓǝ ah pǝlli. So ɗii zan ah faa nyi ra: We lii laa cuu dǝɓ mai mo kǝsyil man nyee mo so zah ah mo tǝki vaŋno ne goŋ Israel nyi me ɗǝ. 12Dǝɓ ki kǝsyil zan ah zyii zah ah faa: Dǝɓlii ɓe goŋe, dǝɓ ah kǝka. Amma profeto Elisa mai mo no sǝr Israel, ako yee cuu ɓǝ mai moo faa pǝ cok swul ɓo ne suŋ nyi goŋ Israel. 13Goŋ faa: We ge, ka we ẽe cok mai ako mo gŋ, ka me pee za ge gbǝ ko ge ne ko. Faara nyi ko: A no yaŋ Dotan. 14Pee pǝr ne muŋta sal tǝkine za sal pǝpãa kal ge gŋ, gera ne suŋni, ryaŋra yaŋ Dotan.

15Ne cok dǝɓ yeɓ Elisa mo pǝ̃ǝ ne zah'nan pim, kwo za sal ryaŋ cok ɓo ne pǝr ne muŋta salle. So faa nyi Elisa: Kai, dǝɓlii ɓe, na ga joŋ ɗǝne? 16Amma Elisa zyii faa: Mo ɗuu gal ka, mor za mai mo no ne na kal za mai mo ne ra ne pãa ɓe. 17Elisa juupel faa: Dǝɓlii, mo gbǝr nahnǝn ah ka mo kwoko cokki. So Dǝɓlii gbǝr nahnǝn nyi dǝɓ yeɓ Elisa, kwo pǝr ne muŋta wii baa ɓo tǝwaa kǝrkǝr, ryaŋ yaŋ Elisa ɓoo ɓo kǝsyilli.

18Ne cok Sirien mo ɗǝrra ge wo Elisa, Elisa juupel wo Dǝɓlii faa: Oseni mo rǝ̃ǝ nahnǝn zai sa. Dǝɓlii rǝ̃ǝ nahnǝn nyi ra tǝgbana mai Elisa mo faa. 19So Elisa faa nyi ra: Fahlii ka nyee ya, yaŋ laŋ ka nyee ya ta. We syee ge mor ɓe, me swǝ fahlii ɓii ga wo dǝɓ mai we tǝ kyeɓ ko. Kal pel ɓǝǝ kal ge yaŋ Samaria ne ra. 20Ne cok mo danra ge tǝgǝǝ yaŋ Samaria, Elisa so juupel faa: Dǝɓlii, mo gbǝr nahnǝn ɓǝǝ ka mo kwora cokki. So Dǝɓlii mo gbǝr nahnǝn ɓǝǝ mo kwora cok o, ara tǝgǝǝ yaŋ Samaria.

21Ne cok goŋ Israel mo kwo ra, faa nyi Elisa: Daddǝ, me ik ra ge lal o ne? 22Amma zyii zah ah faa: Mo ik ra ka. Amo ik za mai mo gbah ra ɓo zah sal ga lal no ne? Mo nyi bii tǝkine farel nyi ra, fahfal ah ka mo piira soo ge wo dǝɓlii ɓǝǝra. 23So goŋ nyi farel nyi ra pǝlli, rera, zwahra, fahfal ah nyi fahlii nyi ra, piira soo kal ge wo dǝɓlii ɓǝǝra. Amma za sal Sirien so fǝ̃ǝ maa ɓal gin tǝ sǝr za Israel yao.

Elisa tǝkine ɓǝ ryaŋ yaŋ Samaria

24Fahfal ah Benhadat goŋ sǝr Siria tai za sal ah daŋ ge ryaŋ yaŋ Samaria ne ko. 25Koŋ malii ah so wǝ yaŋ Samaria, ryaŋra yaŋ Samaria nǝnra gŋ liilii ŋhaa ɓǝ ah joŋ lee tǝtǝl korro vaŋno a lee dah jemma tǝ gwa, raita tahsah makul a lee gŋ solai 700.

26Comki ne cok goŋ Israel mo tǝ kyãh ẽe ɓaale, mawin ki ɓyaŋ ɓǝ ge wol ah faa: Dǝɓlii ɓe goŋe, mo gbah jol ɓe sa. 27Goŋ zyii zah ah faa: Dǝɓlii Masǝŋ mo gbah jol ɓo ya ɓe, me gak gbah jol ɓo ɗǝne? Me ka ne sor ka nyi mo ya, me ka ne bii lee kpuu vin ka nyi mo laŋ ya ta. 28Goŋ so faa nyi ko: A fẽe ye joŋ mo ɓo ne? Mawin zyii zah ah faa: Comki mawin ma nyẽe faa nyi me: Mo soɓ we ɓo ka na kǝǝ re tǝ'nahko, tǝ'nan ah ɓe, ka na re we ma 'min ba ta. 29Ru ɓaŋ we ma ɓe ru kǝǝ re. Tǝ'nan ah me faa nyi ko: Mo soɓ we ma ɓo ka na kǝǝ re o ta. Amma so ɓaŋ we mǝ ah muŋ.#CuuƁ 28:57; Yee 4:10 30Ne cok goŋ mo tǝ syee ka ẽe ɓaale, mo so laa ɓǝ faa mawin nyẽe naiko, so ŋgǝ̃ǝ mbǝro wo suu ahe. Za daŋ kwora ge, mo ẽera cok ge wol ah o, kwora ɓoo mbǝro dahsuu#6:30 Ne cok ɓǝ magaɓ ah mo joŋ wo za Israel ɓe, a ɓoora mbǝro dahsuu ka cuu rǝ tǝ swaa ɓǝ. ɓo wo suu. 31Goŋ faa: Tǝ'nah mai tǝtǝl Elisa we Safat mo no sǝŋ kpǝ ɓe, Masǝŋ mo joŋ me nai sye nai sye, ŋhaa mo so kal tǝl ah laŋ ta.

32Amma ka Elisa kaa ɓo ɓǝr yaŋ ahe, zaluu haira ɓo ne ki gŋ. Goŋ pee dǝɓ ki kal ge wol ahe. So ka papee ah ɓah dai ya ba, Elisa faa nyi zaluu mai mo no wol ahe: We kwo ɓe ne? We pa in wul kŋ pee dǝɓ no gin ka ŋgoŋ tǝtǝl ɓe. We kaa ne yella, ka papee ah mo ge gwari ɓe, ka we coo zahfahe, ka we gbǝ uu ne pǝswahe. Ɓal dǝɓlii ah laŋ no cii gin mor ahe. 33Ne cok mo tǝ faa ɓǝ ne ra faa ba, goŋ ge dai wol ahe, faa: Bone mai gee wo Dǝɓlii ye ge ɓo, me so byak ɓǝ fẽe ga wo Dǝɓlii faɗa ne?

Currently Selected:

2 ZA GOŊE 6: MUAR

Highlight

Copy